ທັງຢືມ ທັງລັກ ຖືກເຈົ້າໜ້າທີ່ຕຳຫຼວດກັກຕົວດຳເນີນຄະດີ

255 24 ກ.ກ. 2018 ຂ່າວໜ້າ​ໜຶ່ງ

    ທ້າວ ໄຊ​ສົມ­ບັດ ອາ­ຍຸ 26 ປີ ພັກ​ເຊົາ​ຢູ່​ບ້ານ​ເກົ້າ​ຍອດ ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ ໄດ້​ເຂົ້າ​ແຈ້ງ​ຄວາມ​ກັບ​ເຈົ້າ​ໜ້າ­ທີ່ ປກສ ເມືອງ​ສີ​ສັດ­ຕະ​ນາກ ວ່າ: ໃນ​ວັນ​ທີ 1 ກໍ­ລະ­ກົດ 2018 ທ້າວ ບຸດ​ເລີດ ອາ­ຍຸ 23 ປີ ຢູ່​ບ້ານ​ສະ­ພານ​ທອງ​ໃຕ້ ເມືອງ​ສີ​ສັດ­ຕະ​ນາກ ໄດ້​ຢືມ​ລົດ­ຈັກ​ເວບ 100 ສີ­ຟ້າ​ດຳ ໝາຍ​ເລກ​ທະ­ບຽນ ດບ 5547 ກຳ­ແພງ​ນະ­ຄອນ ແຕ່​ບໍ່​ເອົາ​ມາ​ສົ່ງ ເຊິ່ງ​ຕິດ­ຕໍ່​ຫາ​ບໍ່​ໄດ້.

    ຈາກ​ນັ້ນ ທາງ​ເຈົ້າ​ໜ້າ­ທີ່​ໄດ້​ແຕ່ງ­ຕັ້ງ​ກຳ­ລັງ​ວິ­ຊາ​ສະ­ເພາະ​ປະ­ສານ​ກັບ​ອຳ­ນາດ​ການ​ປົກ­ຄອງ​ບ້ານ​ເກົ້າ​ຍອດ ເພື່ອ​ຕິດ­ຕາມ​ຫາ​ທ້າວ ບຸດ​ເລີດ ຜ່ານ​ການ​ຕິດ­ຕາມ​ຮອດ​ວັນ​ທີ 5 ກໍ­ລະ­ກົດ 2018 ຈຶ່ງ​ສາ­ມາດ​ຈັບ​ຕົວ​ຜູ້­ກ່ຽວ​ໄດ້ ແລະ ດຳ­ເນີນ​ການ​ສອບ​ສວນ.

    ຜ່ານ​ການ​ສອບ​ສວນ ຜູ້­ກ່ຽວ​ສາ­ລະ­ພາບ​ວ່າ: ໃນ​ວັນ​ທີ 1 ກໍ­ລະ­ກົດ 2018 ໄດ້​ໄປ​ຫຼິ້ນ​ນຳ​ທ້າວ ໄຊ​ສົມ­ບັດ ຢູ່​ບ້ານ​ເກົ້າ​ຍອດ ກ່ອນ​ກັບ​ບ້ານ​ໄດ້​ໃຊ້​ເລ່​ລ່ຽມ​ຕົວະ​ຢືມ​ລົດ­ຈັກ​ເວບ 100 ໂດຍ​ອ້າງ​ວ່າ​ຈະ​ໄປ​ຊື້​ແນວ​ກິນ ພາຍ­ຫຼັງ​ຢືມ​ລົດ­ຈັກ​ໄດ້ ກໍ່​ຂີ່​ກັບ​ໄປ​ເຮືອນ ແລ້ວ​ເອົາ​ໄປ​ຂາຍ​ໃຫ້​ກັບ​ທ້າວ ຕ້ອມ ໄດ້​ເງິນ 2,8 ລ້ານ​ກີບ.

    ເຈົ້າ​ໜ້າ­ທີ່​ໃຫ້​ຮູ້​ວ່າ: ຜ່ານ​ມາ ທ້າວ ບຸນ​ເລີດ ເຄີຍ​ເຄື່ອນ​ໄຫວ​ລັກ​ຊັບ ສໍ້​ໂກງ​ຊັບ​ຂອງ​ພົນ­ລະ­ເມືອງ ແລະ ຊື້​ຊັບ​ຜິດ​ກົດ­ໝາຍ​ຢູ່​ພາຍ​ໃນ​ນະ­ຄອນ­ຫຼວງ​ວຽງ​ຈັນ​ມາ​ແລ້ວ​ຫຼາຍ​ຄັ້ງ ເຊັ່ນ: ໃນ​ວັນ​ທີ 26 ມິ­ຖຸ­ນາ 2018 ເວ­ລາ​ປະ­ມານ 15 ໂມງ ໄດ້​ຍ່າງ​ໄປ​ຊອກ​ຫາ​ລັກ​ລົດ­ຈັກ​ຢູ່​ບ້ານ​ໂພນ​ປ່າ​ເປົ້າ ພໍ​ຍ່າງ​ໄປ​ຮອດ​ເຫັນ​ລົດ­ຈັກ​ຄິກ​ໄອ​ຈອດ​ໄວ້​ຢູ່​ກ້ອງ​ເຮືອນ​ຫຼັງ​ໜຶ່ງ ແລ້ວ​ຍ່າງ​ເຂົ້າ​ໄປ​ໃຊ້​ເຫຼັກ​ແຫຼມ​ງັດ​ກຸນ­ແຈ​ລົດ ແລ້ວ​ຈູງ​ອອກ​ໄປ​ນອກ​ທາງ ຈາກ​ນັ້ນ ກໍ່​ປົດ​ສາຍ​ສະ​ວິດ​ໄຟ​ເພື່ອ​ຕິດ​ຈັກ​ລົດ ເມື່ອ​ໄດ້​ແລ້ວ​ກໍ່​ຂີ່​ເອົາ​ໄປ​ຂາຍ​ໃຫ້​ຜູ້​ຮ່ວມ​ຂະ​ບວນ​ການ​ນຳ​ກັນ ວັນ​ທີ 4 ກໍ­ລະ­ກົດ 2018 ໄດ້​ໄປ​ລັກ​ລົດ­ຈັກ​ເວບ 100 ສີ­ແດງ​ດຳ ໝາຍ​ເລກ​ທະ­ບຽນ ດມ 1806 ກຳ­ແພງ​ນະ­ຄອນ ຈອດ​ໄວ້​ຂ້າງ​ຫ້ອງ​ແຖວ ບ້ານ​ໂພນ​ສະ­ຫວັນ​ໃຕ້ ແລ້ວ​ມາ​ຈອດ​ໄວ້​ຢູ່​ເຮືອນ ເພື່ອ​ເອົາ​ໄວ້​ຂາຍ ຮອດ​ວັນ​ທີ 5 ກໍ­ລະ­ກົດ 2018 ເຈົ້າ​ໜ້າ­ທີ່​ຕຳ­ຫຼວດ ຈຶ່ງ​ເຂົ້າ​ຈັບ​ຕົວ​ຢູ່​ເຮືອນ ພ້ອມ​ທັງ​ຕິດ­ຕາມ​ເກັບ​ກູ້​ບັນ­ດາ​ລົດ­ຈັກ​ທີ່​ທ້າວ ບຸດ​ເລີດ ລັກ​ໄປ​ຂາຍ​ໃນ​ໄລ­ຍະ​ຜ່ານ​ມາ ໄດ້​ທັງ​ໝົດ 9 ຄັນ ໃນ​ນີ້ ລົດ­ຈັກ​ເວບ 100 ມີ 5 ຄັນ ລົດ­ຈັກ​ຟີ​ໂນ ລົດ​ຄຼິກ​ໄອ ລົດ­ຈັກ​ເທ​ນ່າ ແລະ ລົດ­ຈັກ​ກີ​ໄວ ຢ່າງ​ລະ 1 ຄັນ.

   ມາ​ວັນ​ທີ 19 ກໍ­ລະ­ກົດ 2018 ເຈົ້າ​ໜ້າ­ທີ່ ປກສ ເມືອງ​ສີ​ສັດ­ຕະ​ນາກ ມອບ​ລົດ­ຈັກ​ຈຳ­ນວນ​ດັ່ງ­ກ່າວ ຄືນ​ໃຫ້​ເຈົ້າ​ຂອງ​ເດີມ ກ່າວ​ມອບ​ໂດຍ​ທ່ານ ພັທ ອິນ​ພອນ ບຸນ​ພະ­ຈັນ ຮອງ​ຫົວ­ໜ້າ​ກອງ​ບັນ­ຊາ​ການ ປກສ ເມືອງ​ສີ​ສັດ­ຕະ​ນາກ.

ຂ່າວທີ່ກ່ຽວຂ້ອງ