ຂ່າວຫຼ້າສຸດ

ຕົວແທນຈາກລາວ ໄປແຂ່ງຂັນແຕ້ມຮູບລະດັບໂລກຢູ່ຍີ່ປຸ່ນ

230 24 ກ.ກ. 2018 ຂ່າວໜ້າ​ໜຶ່ງ
ຕົວແທນຈາກລາວ ໄປແຂ່ງຂັນແຕ້ມຮູບລະດັບໂລກຢູ່ຍີ່ປຸ່ນ

    ນາງ ສຸກ​ສະ­ຫວັນ ມະ­ນີ​ວົງ​ໄຊ ອາ­ຍຸ 14 ປີ ຈາກ​ໂຮງ­ຮຽນ​ມັດ­ທະ­ຍົມ​ຕອນ​ຕົ້ນ​ເພຍ​ວັດ ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ ຜູ້​ຊະ­ນະ​ເລີດ​ອັນ​ດັບ 2 “ໂຄງ­ການ​ແຂ່ງ­ຂັນ​ແຕ້ມ​ຮູບ​ລົດ​ໂຕ​ໂຢ​ຕ້າ​ໃນ​ຝັນ​ຂອງ​ຂ້ອຍ” ລະ­ດັບ​ປະ­ເທດ ໄດ້​ຮັບ​ຄັດ​ເລືອກ​ເປັນ​ຕົວ​ແທນ​ຂອງ ສປປ ລາວ ໄປ​ແຂ່ງ­ຂັນ​ແຕ້ມ​ຮູບ​ລະ­ດັບ​ໂລກ ຢູ່​ປະ­ເທດຍີ່­ປຸ່ນ ລະ­ຫວ່າງ​ວັນ​ທີ 27-31 ສິງ­ຫາ 2018 ໂດຍ​ໄດ້​ຮັບ​ເງິນ​ສະ­ໜັບ­ສະ­ໜູນ​ເງິນ​ຄ່າ​ໃຊ້​ຈ່າຍ​ໃນ​ການ​ເດີນ­ທາງ ຈາກ​ບໍ­ລິ­ສັດ​ໂຕ​ໂຢ​ຕ້າ​ມໍ​ເຕີ້​ປະ­ເທດ​ໄທ​ຈຳ­ກັດ 100 ລ້ານ​ກີບ.

    ພິ­ທີ​ປະ­ກາດ​ລາຍ​ຊື່​ຜູ້​ໄດ້​ຮັບ​ຄັດ​ເລືອກ ຈັດ​ຂຶ້ນ​ວັນ​ທີ 19 ກໍ­ລະ­ກົດ 2018 ທີ່​ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ທິບ​ພະ​ມົນ ຈັນ­ທະ​ລັງ­ສີ ຮອງ​ຫົວ­ໜ້າ​ຫ້ອງ­ການ​ກະ­ຊວງ​ສຶກ​ສາ​ທິ​ການ ແລະ ກີ­ລາ ທ່ານ ນິ­ກອນ ປະ­ເສີດ​ສົມ ທີ່​ປຶກ­ສາ​ບໍ­ລິ­ຫານ​ສຳ­ນັກ­ງານ​ໂຄງ­ການ​ເຂດ​ພາກ​ພື້ນ​ແມ່­ນ້ຳ​ຂອງ ບໍ­ລິ­ສັດ​ໂຕ​ໂຢ​ຕ້າ​ມໍ​ເຕີ້​ປະ­ເທດ​ໄທ​ຈຳ­ກັດ ພ້ອມ​ດ້ວຍ​ຕົວ​ແທນ​ຈຳ­ໜ່າຍ​ໂຕ​ໂຢ​ຕ້າ ໃນ ສປປ ລາວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ໂຄງ­ການ​ແຂ່ງ­ຂັນ​ແຕ້ມ​ຮູບ​ລົດ​ໂຕ​ໂຢ​ຕ້າ​ໃນ​ຝັນ​ຂອງ​ຂ້ອຍ ສ້າງ­ຕັ້ງ​ຂຶ້ນ​ເພື່ອ​ສົ່ງ­ເສີມ​ໃຫ້​ເຍົາ­ວະ​ຊົນ​ລາວ​ກ້າ​ສະ­ແດງ​ອອກ ຜ່ານ​ຄວາມ​ຄິດ​ສ້າງ­ສັນ ແລະ ຈິນ­ຕະ­ນາ­ການ ໂດຍ​ມີ​ສິ­ລະ​ປະ​ເປັນ​ສື່​ກາງ​ຜ່ານ​ການ​ແຕ້ມ​ຮູບ ເຊິ່ງ​ປີ 2018 ມີ​ຜົນ­ງານ​ເຂົ້າ​ແຂ່ງ­ຂັນ 650.000 ຜົນ­ງານ ຈາກ 76 ປະ­ເທດ​ທົ່ວ​ໂລກ ໃນ​ນີ້ ຄະ­ນະ​ກຳ­ມະ­ການ​ໄດ້​ຄັດ​ເລືອກ​ເອົາ 30 ຄົນ​ທີ່​ມີ​ຜົນ­ງານ​ດີ­ເດັ່ນ​ເຂົ້າ​ຮ່ວມ​ແຂ່ງ­ຂັນ​ລະ­ດັບ​ໂລກ.

    ທ່ານ ນິ­ກອນ ປະ­ເສີດ​ສົມ ກ່າວ​ວ່າ: ໂຄງ­ການ​ແຂ່ງ­ຂັນ​ແຕ້ມ​ຮູບ​ລົດ​ໂຕ​ໂຢ​ຕ້າ​ໃນ​ຝັນ​ຂອງ​ຂ້ອຍ ໄດ້​ເລີ່ມ​ໃນ ສປປ ລາວ ແຕ່​ປີ 2011 ເປັນ­ຕົ້ນ​ມາ ໂດຍ​ປີ 2014 ມີ​ຜົນ­ງານ​ຂອງ​ເຍົາ­ວະ​ຊົນ​ລາວ 1 ຄົນ ຍາດ​ໄດ້​ລາ­ງວັນ Silver Award ໃນ​ລະ­ດັບ​ໂລກ ປີ 2017 ກໍ່​ມີ​ຜົນ­ງານ​ຂອງ​ເຍົາ­ວະ​ຊົນ​ລາວ 2 ຄົນ ຍາດ​ໄດ້​ລາ­ງວັນ Bronze Award ແລະ ປີ​ນີ້​ກໍ່​ມີ​ເຍົາ­ວະ​ຊົນ​ລາວ 1 ຄົນ​ທີ່​ສາ­ມາດ​ເຂົ້າ​ຊີງ​ລາ­ງວັນ​ລະ­ດັບ​ໂລກ ເຊິ່ງ​ຕ້ອງ​ຂໍ​ຍົກ­ຍ້ອງ​ນ້ອງ​ເກ່ງ ມີ​ຄວາມ​ຄິດ​ສ້າງ­ສັນ  ແລະ ແປກ​ໃໝ່ ເຊິ່ງ​ການ​ເດີນ­ທາງ​ໄປ​ປະ­ເທດ​ຍີ່­ປຸ່ນ​ຄັ້ງ​ນີ້ ນອກ­ຈາກ​ຈະ​ໄດ້​ເຂົ້າ​ຮ່ວມ​ການ​ແຂ່ງ­ຂັນ​ແລ້ວ ຍັງ​ຈະ​ໄດ້​ເຂົ້າ​ຢ້ຽມ​ຊົມ​ໂຮງ­ງານ​ຜະ­ລິດ​ລົດ​ໂຕ​ໂຢ​ຕ້າ ແລະ ເຂົ້າ​ຮ່ວມ​ກິດ­ຈະ­ກຳ​ຕ່າງໆ​ຂອງ​ໂຄງ­ການ​ອີກ​ຫຼາຍ​ຢ່າງ.

ຂ່າວທີ່ກ່ຽວຂ້ອງ