ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 24/07/2018

160 24 ກ.ກ. 2018 ຫົວຂໍ້ຂ່າວອື່ນໆ

ມື້­ນີ້​ຜູ້​ຂຽນ​ໄດ້​ສັງ​ລວມ​ຂ່າວ​ກ່ຽວ​ກັບ​ມາດ​ຕະ­ການ​ຫ້າມ​ໃຊ້​ມື​ຖື​ຢູ່​ຕາມ​ໂຮງ­ຮຽນ​ໃນ​ຝຣັ່ງ ການ​ປະ​ທ້ວງ​ກ່ຽວ​ກັບ​ສິດ­ທິ​ຂອງ​ແມ່­ຍິງ​ໃນ​ຕັງ​ຊາ​ນີ ແລະ ເລື່ອງ​ການ​ຮ່ວມ​ມື​ລະ­ຫວ່າງ​ທະ­ນາ­ຄານ​ໄທ ອິນ​ໂດ​ເນ​ເຊຍ ແລະ ມາ​ເລ​ເຊຍ.

ທີ່ ປະ­ເທດ​ຝຣັ່ງ: ຫວ່າງ​ບໍ່​ດົນ​ມາ​ນີ້​ມີ​ຂ່າວ​ວ່າ: ປະ­ເທດ​ຝຣັ່ງ​ໄດ້​ສຳ­ເລັດ​ການ​ຮ່າງ​ກົດ­ໝາຍ​ ຄວບ​ຄຸມ​ການ​ນຳ​ໃຊ້​ໂທລະ­ສັບ​ມື​ຖື​ຢູ່​ໂຮງ­ຮຽນ​ປະ­ຖົມ ມັດ­ທະ­ຍົມ​ຕົ້ນ ແລະ ມັດ­ທະ­ຍົມ​ປາຍ ໂດຍ​ໄດ້​ກຳ­ນົດ “ຫ້າມ​ໃຊ້” ນັບ​ແຕ່​ເດືອນ​ກັນ­ຍາ​ປີ​ນີ້​ເປັນ­ຕົ້ນ​ໄປ.

ສາ­ເຫດ​ທີ່​ຕ້ອງ​ມີ​ມາດ​ຕະ­ການ​ຫ້າມ​ໃຊ້​ໂທລະ​ສັບ​ມື​ຖື ​ໃນ​ໂຮງ­ຮຽນ​ສາມ​ລະ­ດັບ​ດັ່ງ­ກ່າວ​ມານັ້ນ​ແມ່ນ​ເພື່ອ ໜຶ່ງ: ຮັບ­ປະ­ກັນ​ໃຫ້​ນັກ­ຮຽນ​ຕັ້ງ­ໃຈ​ໃສ່​ການ​ຮຽນ-ການ​ສອນ ໃນ​ໄລ­ຍະ​ຜ່ານ​ມາ ເດັກ​ນັກ­ຮຽນ​ໃນ​ເກນ​ອາ­ຍຸ 12-17 ປີ​ນັ້ນ​ຂາດ​ສະ­ມາ­ທິ​ຍ້ອນ​ມົວ​ແຕ່​ໃຊ້​ໂທລະ­ສັບ​ມື​ຖື ບໍ່​ຕັ້ງ­ໃຈ​ຮ່ຳ­ຮຽນ ແລະ ຟັງ​ຄູ-ອາ­ຈານ​ສິດ­ສອນ ແລະ ອັນ​ທີ​ສອງແມ່ນ​ເພື່ອ​ຊ່ວຍ​ປົກ​ປ້ອງ​ເດັກ​ຈາກ​ເນື້ອ​ໃນ​ທີ່​ເປັນ​ອັນ­ຕະ­ລາຍ ແລະ ບໍ່​ເໝະ​ສົມ​ຕ່າງໆ ໂດຍ​ສະ­ເພາະແມ່ນ​ບັນ­ຫາ​ການ​ໃຊ້​ຄວາມ​ຮຸນ​ແຮງ.

ກ່ອນ​ໜ້າ​ນີ້​ຢູ່​ປະ­ເທດ​ອີ​ຣານ​ກໍ່​ມີ​ການ​ສັ່ງ​ຫ້າມ​ໂຮງ­ຮຽນ ກໍ່​ຄື ສະ​ຖາ​ບັນ​ສຶກ​ສາ​ໃນ​ທົ່ວ​ປະ­ເທດ​ນຳ​ໃຊ້​ເຄືອ​ຄ່າຍ​ຂ່າວ­ສານ​ ສັງ­ຄົມ​ອອນ​ລາຍ​ຂອງ​ຕ່າງ­ປະ­ເທດ ເພາະ​ເຫັນ​ວ່າເປັນ​ບ່ອນ​ທຳ­ລາຍ​ຄວາມ​ສະ­ຫງົບ ຄວາມ​ເປັນ​ລະ­ບຽບ​ຮຽບ​ຮ້ອຍ​ຂອງ​ສັງ­ຄົມ ທາງ​ການ​ອີ​ຣານ​ໄດ້​ພັດ­ທະ­ນາ​ສື່​ສັງ­ຄົມ​ອອນ​ລາຍ​ພາຍ​ໃນ ເພື່ອ​ໃຫ້​ໂຮງ­ຮຽນ​ຕ່າງໆ​ນຳ​ໃຊ້ສຳ­ລັບ​ກົດ­ໝາຍ​ຂອງ​ຝຣັ່ງ ​ທີ່​ກຳ­ນົດ​ຫ້າມ​ນຳ​ໃຊ້​ໂທລະ­ສັບ​ມື​ຖື​ໃນ​ໂຮງ­ຮຽນ​ປະ­ຖົມ ມັດ­ທະ­ຍົມ​ຕົ້ນ ແລະ ປາຍ​ນີ້ ໄດ້​ມີ​ຂໍ້​ຍົກ­ເວັ້ນ ຄື: ສາ­ມາດ​ນຳ​ໃຊ້​ໄດ້​ສະ­ເພາະ​ເພື່ອ​ຈຸດ­ປະ­ສົງ​ດ້ານ​ການ​ສຶກ​ສາ​ເທົ່າ​ນັ້ນ ກົດ­ໝາຍ​ນີ້​ໄດ້​ຮັບ​ການ​ສ້າງ​ຂຶ້ນ​ດ້ວຍ​ແຮງ​ຊຸກ­ຍູ້​ສະ­ໜັບ­ສະ­ໜູນ​ຈາກ​ຄູ-ອາ­ຈານ ເປັນ­ຕົ້ນ​ຕໍ.

ທີ່ ຕັງ​ຊາ​ນີ (ຕັນ​ຊາ​ເນຍ): ມີ​ຂ່າວ​ຈາກ​ປະ­ເທດ​ແດນ​ໄກ ຕັງ​ຊາ​ນີ ທີ່​ອາ​ຟຣິ​ກາ ວ່າ: ກຸ່ມ​ປົກ​ປ້ອງ​ສິດ­ທິ​ມະ­ນຸດ​ສຳ­ລັບ​ແມ່­ຍິງ​ໄດ້​ສະ­ແດງ​ຄວາມ​ແຄ້ນ​ເຄືອງ ແລະ ຕໍ່​ວ່າ​ຕໍ່​ຂານ​ເຈົ້າ​ໜ້າ­ທີ່​ຕຳ­ຫຼວດ​ເມືອງກິ​ລົມ​ເບ​ໂຣ (Kilombero) ປະເທດ​ຕັງ​ຊາ​ນີ ທີ່​ໄດ້​ຈັບ​ກຸມ ແລະ ກັກ​ຂັງ​ຍິງ​ແມ່​ມານ​ທ້ອງ​ແກ່​ຄົນ​ໜຶ່ງ ຈົນ​ນາງ​ຕ້ອງ​ໄດ້​ເກີດ​ລູກ​ຢູ່​ເດີ່ນ​ສວນ​ຫຍ້າ​ດ້ານ​ໜ້າ​ຫ້ອງ​ຄຸມ​ຂັງ.

ເລື່ອງ​ມີ​ຢູ່​ວ່າ: ໃນ​ຕອນ​ຄ່ຳ​ຂອງ​ວັນ​ທີ 02 ມິ­ຖຸ­ນາ​ປີ​ນີ້ ເຈົ້າ​ໜ້າ­ທີ່​ຕຳ­ຫຼວດ​ໄດ້​ບຸກ​ເຂົ້າ​ຈັບ​ຕົວ​ຊາຍ​ທີ່​ເປັນ​ຜົວ​ຂອງ​ຍິງ​ຖື­ພາ​ທ້ອງ​ແກ່​ ໃນ​ຂໍ້​ກ່າວ​ຫາ​ວ່າ​ໄດ້​ຊື້​ຕຽງ​ນອນ​ທີ່​ໂຈນ​ລັກ​ມາ ແຕ່​ບັງ­ເອີນ​ຜູ້​ເປັນ​ຜົວ​ບໍ່​ຢູ່​ເຮືອນ ເຈົ້າ​ໜ້າ­ທີ່​ຈຶ່ງ​ໄດ້​ຈັບ​ຜູ້​ເປັນ​ເມຍ ເຊິ່ງ​ຖື­ພາ​ໃນ​ໄລ­ຍະ​ຄອງຍິງ​ຖື­ພາ​ຄົນ​ນີ້​ໄດ້​ອ້ອນ­ວອນ​ໃຫ້​ເຈົ້າ​ໜ້າ­ທີ່​ສົ່ງ​ນາງ​ໄປ​ໂຮງ­ໝໍ ແຕ່​ຖືກ​ປະ­ຕິ­ເສດ​ແບບ​ໜ້າ­ດ້ານໆ ໃນ​ທີ່​ສຸດ​ນາງ​ຈຶ່ງ​ໄດ້​ເກີດ​ລູກ​ຢູ່​ເດີ່ນ​ຫຍ້າ​ກາງ­ແຈ້ງ.

ເຫດ­ການ​ນີ້​ໄດ້​ຈູດ​ຊະ​ນວນ​ຄວາມ​ຄຽດ​ແຄ້ນ​ໄປ​ທົ່ວ​ປະ­ເທດ ທ່ານ​ນາງ ບີ​ຊິມ​ບາ (Bisimba) ຫົວ­ໜ້າ​ສູນ​ກົດໝາຍ ແລະ ສິດ­ທິ​ມະ­ນຸດ​ຂອງ​ຕັງ​ຊາ​ນີ ໄດ້​ລຸກ­ຂຶ້ນ​ມາ​ຕັ້ງ​ຄຳ​ຖາມ​ຕໍ່​ວ່າ​ຕໍ່​ຂານ​ກອງ​ກຳ­ລັງ​ຕຳ­ຫຼວດ​ວ່າ​ໜ້າ​ບໍ່​ອາຍ ເຫດ​ໃດ​ຈຶ່ງ​ຈັບ​ຄົນໜຶ່ງ​ເພື່ອ​ແລກ​ກັບ​ຄວາມ​ຜິດ​ຄົນ​ອື່ນຕາ­ບອດ​ບໍ​ຈຶ່ງ​ບໍ່​ຮູ້​ວ່າ​ນາງ​ເຈັບ­ທ້ອງ​ເກີດ​ລູກ ? ແລະ ຖ້າ​ນາງ​ເສຍ​ຊີ­ວິດ​ຢູ່​ບ່ອນ​ກັກ​ຂັງ​ເດ​ໃຜ​ຮັບ­ຜິດ­ຊອບ.

ສ່ວນ​ແນວ​ຮ່ວມ​ແຫ່ງ​ຊາດ​ຕັງ​ຊາ​ນີ ເພື່ອ​ຕ້ານ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່­ຍິງ ແລະ ເດັກນ້ອຍ ກໍ່​ໄດ້​ອອກ​ຖະ­ແຫຼງ­ການ​ກ່າວ​ປະ­ນາມ​ການກະ­ທຳ​ເກີນ​ເຫດ​ຂອງ​ເຈົ້າ​ໜ້າ­ທີ່​ຕຳ­ຫຼວດ​ຄັ້ງ​ນີ້​ວ່າ: “ເຫດ­ການ​ອັນ​ຊົ່ວ​ຮ້າຍ​ຄັ້ງ​ນີ້ ​ໄດ້​ຖືກ​ບັນ­ທຶກ​ເຂົ້າ​ບັນ­ຊີ​ຈຳ­ນວນ​ຜູ້​ເຄາະ​ຮ້າຍ ​ທີ່​ຕົກ​ເປັນ​ເຫຍື່ອ​ຄວາມ​ໂຫດ­ຮ້າຍ​ປ່າ​ເຖື່ອນ​ຈາກ​ເຈົ້າ​ໜ້າ­ທີ່​ຕຳຫຼວດ”.

ທີ່ ໄທ ອິນ​ໂດ ມາ​ເລ: ເພື່ອ​ເພີ່ມ​ຄວາມ​ສະ­ດວກ ແລະ ຊຸກ­ຍູ້​ການ​ຄ້າ-ການ​ລົງ­ທຶນ​ຢູ່​ສາມ​ປະ­ເທດ ເຊິ່ງ​ໄດ້­ແກ່ ໄທ ອິນ​ໂດ​ເນ​ເຊຍ ແລະ ມາ​ເລ​ເຊຍ ທະ­ນາ­ຄານ​ຂອງ 3 ປະ­ເທດ​ດັ່ງ­ກ່າວ ໄດ້​ຕົກ­ລົງ​ໃນ​ວັນ​ທີ 11 ເດືອນ​ທັນ­ວາ ປີ 2017 ກ່ຽວ​ກັບ​ການ​ສ້າງ​ກົນ​ໄກ​ການ​ຊຳ­ລະ​ດ້ວຍ​ສະ­ກຸນ​ເງິນ​ພາຍ​ໃນ ເຊິ່ງ​ໄດ້​ເລີ່ມ​ມີ​ຜົນ​ສັກ­ສິດ ນັບ​ແຕ່​ວັນ​ທີ 2 ເດືອນ​ມັງ­ກອນ ປີ 2018 ເປັນ­ຕົ້ນ​ມາ ນີ້​ຄື​ມາດ​ຕະ­ການ​ທີ່​ມີ​ປະ­ສິດ­ທິ­ພາບ​ເພື່ອ​ເພີ່ມ​ທະ­ວີ​ການ​ຮ່ວມ​ມື​ດ້ານ​ການ​ເງິນ ​ລະ­ຫວ່າງ​ທະ­ນາ­ຄານ​ຂອງ 3 ປະ­ເທດ​ດ້ວຍ​ກັນ.

ຂ່າວທີ່ກ່ຽວຂ້ອງ