ຂ່າວຫຼ້າສຸດ

ໄພ​ທຳ​ມະ​ຊາດ​ສ້າງ​ຄວາມ​ເສຍ​ຫາຍ​ຢູ່​ໃນ​ຫຼາຍ​ປະເທດ

225 24 ກ.ກ. 2018 ຂ່າວຕ່າງປະເທດ
ໄພ​ທຳ​ມະ​ຊາດ​ສ້າງ​ຄວາມ​ເສຍ​ຫາຍ​ຢູ່​ໃນ​ຫຼາຍ​ປະເທດ

    ຂ່າວສານ​ຫວຽດນາມ ລາຍ​ງານ​ອ້າງ​ຕາມ​ສະຖິຕິ​ເບື້ອງ​ຕົ້ນ ໃຫ້​ຮູ້​ວ່າ ໄລ່​ມາ​ຮອດ​ຕອນ​ແລງ ຂອງ​ວັນ​ທີ 21 ກໍລະກົດ ພາຍຸ ເຊີນ​ຕິງ ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ ແລະ ຫາຍ​ສາບ​ສູນ 31 ຄົນ. ແຂວງ​ຕ່າງໆ​ທີ່​ໄດ້​ຮັບ​ຄວາມ​ເສຍ​ຫາຍ​ຫຼາຍ​ກໍ​ແມ່ນ ລ່າວ​ກາຍ ເຊີນ​ລາ ອຽນ​ບ້າຍ ຟູ້​ເຖາະ ຫ່ວ​​າ​ບິ່ງ ແລະ​ແທັງ​ຮ້ວ​​າ (ພາກ​ເໜືອ​ຫວຽດນາມ). ໃນ​ນັ້ນ ແຂວງ​ອຽນ​ບ້າຍ ມີ​ຜູ້​ເສຍ​ຊີວິດ ແລະ​ຫາຍ​ສາບ​ສູນ 19 ຄົນ.

    ລັດຖະບານ​ຍີ່ປຸ່ນ ແຈ້ງ​ໃຫ້​ຮູ້ເມື່ອ​ວັນ​ທີ 22 ກໍລະກົດ​ນີ້​ວ່າ ຝົນຕົກ​ໜັກ ແລະ​ນ້ຳ​ຖ້ວມ ຢູ່​ທາງ​ພາກ​ຕາເວັນຕົກ​ຍີ່ປຸ່ນ ໃນ​ຕົ້ນ​ເດືອນ​ກໍລະກົດ​ນີ້ ບວກ​ກັບ​ຝົນຕົກ​ໜັກ​ທີ່​ເກີດ​ຈາກ​ອິດ​ທິ​ພົນ​ຂອງ​ພາຍຸ ປຣາ​ປີ​ຣູນ (Prapiroon) ທີ່​ເກີດ​ຂຶ້ນ​ກ່ອນ​ໜ້າ​ນັ້ນ ໄດ້​ເຮັດ​ໃຫ້​ເກີດ​ຄວາມ​ເສຍ​ຫາຍ​ເປັນ​ມູນ​ຄ່າ 119,8 ຕື້​ເຢນ (ເທົ່າ​ກັບ​ປະມານ 1,1 ຕື້​ໂດ​ລາ​ສະຫະລັດ) ໃຫ້​ແກ່​ຂະແໜງ​ກະສິກຳ ແລະ​ຂະແໜງການ​ປະມົງ ຊຶ່ງ​ນັບ​ວ່າ​ສູງ​ກວ່າ​ຫຼາຍ ເມື່ອ​ທຽບໃສ່​ລະດັບ​ການ​ຄາດ​ຄະເນ​ຄວາມ​ເສຍ​ຫາຍ 76,8 ຕື້​ເຢນ ທີ່​ມີ​ອອກ​ມາ​ກ່ອນ​ໜ້າ​ນີ້.

ໃນ​ຂະນະ​ດຽວ​ກັນ ອົງການ​ຕຳຫຼວດ​ແຫ່ງ​ຊາດ​ຍີ່ປຸ່ນ ແຈ້ງ​ໃຫ້​ຮູ້​ວ່າ ຈຳນວນ​ຜູ້​ເສຍ​ຊີວິດ ຍ້ອນ​ຝົນຕົກ​ໜັກ ແລະ​ນ້ຳ​ຖ້ວມ​ຢູ່​ໃນ​ເຂດ​ທິດຕາເວັນຕົກ​ຍີ່ປຸ່ນ​ນັ້ນ ຢູ່​ທີ່ 224 ຄົນ ເປັນ​ການ​ຫຼຸດ​ລົງ 1 ຄົນ ຫຼັງ​ຈາກ​ທີ່​ກໍລະນີ​ການ​ເສຍ​ຊີວິດ 1 ລາຍ ຢູ່​ໃນ​ແຂວງ​ຮີ​ໂຣ​ຊີ​ມາ ບໍ່​ມີ​ສ່ວນ​ກ່ຽວຂ້ອງ​ກັບ​ຝົນຕົກ​ໜັກ ແລະ​ນ້ຳ​ຖ້ວມ.

ໄລ່​ມາ​ຮອດ​ເວລາ 6 ໂມງ ຂອງ​ວັນ​ທີ 22 ກໍລະກົດ ສະພາບ​ຂາດແຄນ​ນ້ຳ​ໃຊ້ ສືບຕໍ່​ເປັນ​ຜົນ​ກະທົບ​ຕໍ່ 127.000 ຄອບຄົວ ຢູ່​ໃນ 3 ແຂວງ ທີ່​ປະສົບ​ໄພ​ທຳ​ມະ​ຊາດ​ດັ່ງກ່າວ ຄື​ແຂວງ ໂອ​ກາ​ຢາ​ມາ ຮີ​ໂຣ​ຊີ​ມາ ແລະ ເອ​ຮີ​ເມ.

   ໃນ​ຂະນະ​ດຽວ​ກັນ ໂທລະພາບ​ແຫ່ງ​ລັດ​ຈີນ (CCTV) ລາຍ​ງານ​ເມື່ອ​ວັນ​ທີ 22 ກໍລະກົດ​ວ່າ ພາຍຸ​ອາມ​ປີ​​ລ (Ampil) ທີ່​ພັດ​ຂຶ້ນ​ຝັ່ງ​ນະຄອນ​ຊຽງ​ໄຮ ໃນ​ວັນ​ດຽວ​ກັນ ໄດ້​ເຮັດ​ໃຫ້​ເກີດ​ຝົນຕົກ​ໜັກ ເປັນ​ຜົນ​ກະທົບ​ຕໍ່​ການເຄື່ອນໄຫວ​ຂົນສົ່ງ​ທາງ​ອາກາດ ທາງບົກ ແລະ​ທາງ​ທະເລ. ຂ່າວ​ແຈ້ງວ່າ ກວ່າ 600 ຖ້ຽວ​ບິນ ທີ່​ບິນ​ຂຶ້ນ​ຈາກ​ສະໜາມ​ບິນ​ໃນ​ນະຄອນ​ດັ່ງກ່າວ ຕ້ອງ​ໄດ້​ຍົກເລີກ ແລະ​ການ​ບໍລິການ ທາງ​ລົດໄຟ​ຄວາມ​ໄວ​ສູງ ກໍ​ໄດ້​ຮັບ​ຜົນ​ກະທົບ​ເຊັ່ນ​ກັນ.

    ​ກ່ອ​ນໜ້າ​ນັ້ນ ອຳນາດ​ການ​ປົກຄອງ​ນະຄອນ​ຊຽງ​ໄຮ ໄດ້​ສຳເລັດ​ການ​ອົບ​ພະ​ຍົບ ແລະ​ຈັດ​ສັນ​ທີ່ ພັກຊົ່ວຄາວ​ໃຫ້​ແກ່​ປະຊາຊົນ 190.000 ກວ່າ​ຄົນ ຢູ່​ໃນ​ເຂດ​ທິດຕາເວັນອອກ​ຂອງ​ນະຄອນ​ຊຽງ​ໄຮ ເພື່ອ​ລີ້​ໄພ​ຈາກ​ພາຍຸ Ampil. ໃນ​ຂະນະ​ດຽວ​ກັນ ຢູ່​ໃນ​ແຂວງ​ເຈີ​ຈຽງ ແລະ​ຈຽງ​ຊູ ກໍ​ມີ​ປະຊາຊົນ ອົບ​ພະ​ຍົບ​ແລ້ວ 42.500 ກວ່າ​ຄົນ; ກຳປັ່ນ ແລະ ​ເຮືອ​ແພ 28.000 ກວ່າ​ລຳ ໄດ້​ກັບ​ສູ່​ທ່າເຮືອ ເພື່ອ​ລີ້​ໄພ​ຈາກ​ພາຍຸ​ດັ່ງກ່າວ.

    ສ່ວນ​ທີ່​ປະເທດ​ອີ​ຣານ ຂ່າວສານ AFP ລາຍ​ງານ​ອ້າງ​ຕາມ​ໂທລະພາບ​ແຫ່ງ​ຊາດ​ອີ​ຣານ ໃຫ້​ຮູ້ເມື່ອ​ວັນ​ທີ 22 ກໍລະກົດ​ນີ້​ວ່າ ກົມ​ສຳ​ຫຼວດ​ທໍລະນີ​ສາດ​ຂອງ ສ ອາ​ເມ​ຣິ​ກາ (USGS) ລາຍ​ງານ​ວ່າ ໄດ້​ເກີດ​ເຫດການ​ແຜ່ນດິນ​ໄຫວ​ຂະໜາດ​ປານ​ກາງ​ຫຼາຍ​ເທື່ອ ຢູ່​ໃນ​ເຂດ​ພາກ​ໃຕ້ ແລະ ພາກ​ຕາເວັນຕົກ​ຂອງ​ປະເທດ​ອີ​ຣານ ເປັນ​ເຫດ​ໃຫ້​ມີ​ຜູ້​ໄດ້​ຮັບ​ບາດເຈັບ​ຢ່າງ​ໜ້ອຍ 25 ຄົນ.

 

ຂ່າວທີ່ກ່ຽວຂ້ອງ