ຂ່າວຫຼ້າສຸດ

ຍີ່ປຸ່ນ​ຫ້າມ​ຜູ້ໂດຍສານ​ນຳ​ເອົາ​ມີດ​ທີ່​ບໍ່​ຫຸ້ມ​ຫໍ່​ຂຶ້ນ​ລົດໄຟ

143 24 ກ.ກ. 2018 ຂ່າວຕ່າງປະເທດ
 ຍີ່ປຸ່ນ​ຫ້າມ​ຜູ້ໂດຍສານ​ນຳ​ເອົາ​ມີດ​ທີ່​ບໍ່​ຫຸ້ມ​ຫໍ່​ຂຶ້ນ​ລົດໄຟ

     ຂ່າວສານ​ກຽວ​ໂດ ລາຍ​ງານ​ວ່າ ກະຊວງ​ທີ່​ດິນ ພື້ນຖານ​ໂຄງ​ລ່າງ ຄົມມະນາຄົມ ແລະ​ທ່ອງ​ທ່ຽວ​ຍີ່ປຸ່ນ ມີ​ແຈ້ງ​ການ​ອອກ​ມາ​ເມື່ອ​ວັນ​ທີ 20 ກໍລະກົດ​ທີ່​ຜ່ານ​ມາ​ວ່າ ຜູ້ໂດຍສານ ຈະ​ຖືກ​ຫ້າມ​ນຳ​ເອ​​ົ​ມີດ​ທີ່​ບໍ່​ຫຸ້ມ​ຫໍ່​ຂຶ້ນ​ໄປ​ໃນ​ລົດໄຟ ຄື​ກັບ​ວ່າ​ເປັນ​ສ່ວນ​ໜຶ່ງ ໃນ​ມາດ​ຕະການ​ຮັກສາ ຄວາມ​ສະຫງົບ​ໃໝ່ ຫຼັງ​ຈາກ​ເກີດ​ເຫດການ​ໂຈມ​ຕີ​ດ້ວຍ​ອາວຸດ​ມີດ ເຮັດ​ໃຫ້​ເກີດ​ການ​ເສຍ​ຊີວິດ ຢູ່​ເທິງ​ລົດໄຟ​ຄວາມ​ໄວ​ສູງ ເມື່ອ​ເດືອນ​ມິຖຸນາ​ທີ່​ຜ່ານ​ມາ.

    ຢູ່​ໃນ​ຂອບ​ມາດ​ຕະການ​ໃໝ່​ນັ້ນ ບັນດາ​ເຈົ້າ​ໜ້າທີ່​ຢູ່​ໃນ​ສະຖານີ​ລົດໄຟ ໄດ້​ຮັບ​ອະນຸຍາດ ໃຫ້​ໃຊ້​ກຳລັງ​ແຮງ ໃນ​ການ​ຂັບ​ໄລ່​ຜູ້ໂດຍສານ​ທີ່​ຖື​ມີດ​ຂຶ້ນ​ໄປ​ໃນ​ລົດໄຟ​ທຸກໆ​ປະເພດ. ກະຊວງ​ດັ່ງກ່າວ ໃຫ້​ຮູ້​ວ່າ ມາດ​ຕະການ​ດັ່ງກ່າວ ບໍ່​ຮຽກຮ້ອງ​ກວດກາ​ກະເປົາ​ເດີນທາງ ເນື່ອງ​ຈາກ​ວ່າການ​ເຮັດ ຄື​ແນວ​ນັ້ນ ຕ້ອງ​ໄດ້​ມີ​ສະຖານທີ່​ເພີ່ມ ແລະ​ເປັນ​ການ​ກີດຂວາງ​ຕໍ່​ການ​ຂຶ້ນ​ລົດ.

    ກ່ອນ​ໜ້າ​ນັ້ນ ເມື່ອ​ວັນ​ທີ 9 ມິຖຸນາ​ທີ່​ຜ່ານ​ມາ ຊາວ​ໜຸ່ມ​ຜູ້​ໜຶ່ງ ອາຍຸ 20 ປີ ໄດ້​ໃຊ້​ມີດ​ໂຈມ​ຕີ ຜູ້ໂດຍສານ​ຢູ່​ເທິງ​ລົດໄຟ​ຄວາມ​ໄວ​ສູງ Nozomi ທີ່​ແລ່ນ​ຈາກ​ນະຄອນຫຼວງ​ໂຕ​ກຽວ ໄປ​ຍັງ​ສະຖານີ ລົດໄຟ Shin-Osaka ເປັນ​ເຫດ​ໃຫ້​ຜູ້​ຊາຍ​ຄົນ​ໜຶ່ງ ອາຍຸ 38 ປີ ເສຍ​ຊີວິດ ແລະ​ແມ່ຍິງ​ສອງ​ຄົນ ອາຍຸ​ປະມານ 20 ປີ ໄດ້​ຮັບ​ບາດເຈັບ.

ຂ່າວທີ່ກ່ຽວຂ້ອງ