ເສດຖະກິດ​ຂອງ ​ສປປ ເກົາຫຼີ ຫຼຸດ​ລົງ 3,5% ຍ້ອນ​ຜົນ​ກະທົບ​ຂອງ​ການ​ປິດ​ລ້ອມ

147 24 ກ.ກ. 2018 ຂ່າວຕ່າງປະເທດ
ເສດຖະກິດ​ຂອງ ​ສປປ ເກົາຫຼີ ຫຼຸດ​ລົງ 3,5% ຍ້ອນ​ຜົນ​ກະທົບ​ຂອງ​ການ​ປິດ​ລ້ອມ

     ວິທະຍຸ​ສຽງ​ອາ​ເມ​ຣິ​ກາ ອ້າງ​ຕາມ​ການ​ຄາດ​ຄະເນ​ຂອງ​ທະນາຄານ​ກາງ ສ ເກົາຫຼີ (BOK) ໃຫ້​ຮູ້ເມື່ອ​ວັນ​ທີ 20 ກໍລະກົດ​ທີ່​ຜ່ານ​ມາ​ວ່າ ເສດຖະກິດ​ຂອງ ​ສປປ ເກົາຫຼີ ໄດ້​ຫຼຸດ​ລົງ 3,5% ໃນ​ປີ​ກາຍ ຍ້ອນ​ໄດ້​ຮັບ​ຜົນ​ກະທົບ​ຈາກ​ມາດ​ຕະການ​ປິດ​ລ້ອມ​ຂອງ​ສາກົນ ທີ່​ປະຕິບັດ​ຕໍ່​ປະເທດ​ນີ້.

    BOK ໃຫ້​ຮູ້​ວ່າ ຫຼັງ​ຈາກ​ທີ່​ໄດ້​ເພີ່ມ​ຂຶ້ນ 3,9% ໃນ​ປີ 2016 ແລ້ວ ການ​ຫຼຸດ​ລົງ 3,5% ນັບ​ວ່າ​ເປັນ​ລະດັບ​ໃຫຍ່​ສຸດ​ຂອງ​ພື້ນຖານ​ເສດຖະກິດ ​ສປປ ເກົາຫຼີ ພາຍ​ໃນ​ຮອບ 20 ກວ່າ​ປີ ນັບ​ແຕ່​ເວລາ​ທີ່​ໄດ້​ຫຼຸດ​ລົງ 6,5% ໃນ​ປີ 1997 ເປັນຕົ້ນ​ມາ.

    ຍ້ອນ​ມາດ​ຕະການ​ປິດ​ລ້ອມ ໄດ້​ເຮັດ​ໃຫ້​ຂະແໜງ​ອຸດສາຫະກຳ​ຂຸດ​ຄົ້ນ​ແຮ່​ທາດ​ຂອງ ​ສປປ ເກົາຫຼີ ໃນ​ປີ 2017 ຫຼຸດ​ລົງ​ຢ່າງ​ແຮງ​ທີ່ 11% ທຽບໃສ່​ລະດັບ​ເພີ່ມ​ຂຶ້ນ 8,4% ໃນ​ປີ 2016. ການ​ສົ່ງ​ອອກ​ສິນຄ້າ​ຂອງ ​ສປປ ເກົາຫຼີ ໃນ​ປີ 2017 ຫຼຸດ​ລົງ​ກວ່າ 37% ລົງ​ໄປ​ສູ່​ລະດັບ​ເກືອບ  2 ຕື້​ໂດ​ລາ​ສະຫະລັດ ໃນ​ຂະນະ​ທີ່​ການ​ນຳ​ເຂົ້າ​ສິນຄ້າ​ເພີ່ມ​ຂຶ້ນ 1,8% ຂຶ້ນ​ສູ່​ລະດັບ​ເກືອບ  4 ຕື້​ໂດ​ລາ​ສະຫະລັດ.

    ໃນ​ຂະນະ​ດຽວ​ກັນ ການ​ຄ້າ​ລະຫວ່າງ ​ສປປ ເກົາຫຼີ ກັບ ສ ເກົາຫຼີ ໄດ້​ພັງ​ທະ​ລາຍ​ເກືອບ​ວ່າ​ທັງ​ໝົດ ໂດຍ​ຫຼຸດ​ລົງ 99,7% ໄປ​ຍັງ​ເຫຼືອ​ພຽງ 900.000 ໂດ​ລາ​ສະຫະລັດ ຫຼັງ​ຈາກ​ທີ່ ສ ເກົາຫຼີ ປິດ​ເຂດ​ອຸດສາຫະກຳ​ຮ່ວມ​ເກ​ເຊິງ ຢູ່​ໃນ ​ສປປ ເກົາຫຼີ.

    ຕາມ​ການ​ຄາດ​ຄະເນ​ຂອງ BOK ແລ້ວ ​ສປປ ເກົາຫຼີ ມີ​ລາຍ​ຮັບ​ສະເລ່ຍ​ໄລ່​ໃສ່​ຫົວ​ຄົນ​ທີ່​ກວ່າ 1.000 ໂດ​ລາ​ສະຫະລັດ ໃນ​ຂະນະ​ທີ່​ຕົວ​ເລກ​ດັ່ງກ່າວ​ຂອງ ສ ເກົາຫຼີ ສູງ​ທົບ 23 ເທົ່າ​ຕົວ.

 

ຂ່າວທີ່ກ່ຽວຂ້ອງ