ສະພາ​ແຫ່ງ​ຊາດ​ກູ​ບາ ໃຫ້​ສັດຕະຍາບັນ​ລັດ​ຖະ​ທຳ​ມະນູນ​ໃໝ່

97 24 ກ.ກ. 2018 ຂ່າວຕ່າງປະເທດ
ສະພາ​ແຫ່ງ​ຊາດ​ກູ​ບາ ໃຫ້​ສັດຕະຍາບັນ​ລັດ​ຖະ​ທຳ​ມະນູນ​ໃໝ່

    ຫຼັງ​ຈາກ​ທີ່​ໄດ້​ດຳເນີນ​ການ​ຄົ້ນຄວ້າ​ຫາລື ມາ​ເປັນ​ເລ​​າ 2 ວັນ ໂດຍ​ມີ​ຜູ້​ແທນ​ສະພາ​ແຫ່ງ​ຊາດ 100 ກວ່າ​ຄົນ ປະກອບ​ຄວາມ​ຄິດ​ຄວາມ​ເຫັນ ຢູ່​ໃນ​ສະໄໝ​ປະຊຸມ​ສາມັນ​ເທື່ອ​ທຳ​ອິດ ຂອງ​ສະພາ ແຫ່ງ​ຊາດ ກູ​ບາ​ຊຸດ​ທີ IX ນັ້ນ ໃນ​ວັນ​ທີ 22 ກໍລະກົດ​ນີ້ ສະພາ​ແຫ່ງ​ຊາດ​ກູ​ບາ ກໍ​ໄດ້​ໃຫ້​ສັດຕະຍາບັນ ຕໍ່​ລັດ​ຖະ​ທຳ​ມະນູນ​ໃໝ່ ດ້ວຍ​ສຽງ​ເຫັນ​ດີ​ຢ່າງ​ຂາດ​ຂັ້ນ.

    ທ່ານ ເອ​​ສ​ເຕ​ບານ ລາ​ໂຊ ປະທານ​ສະພາ​ແຫ່ງ​ຊາດ​ກູ​ບາ ກ່າວ​ຕໍ່​ສະໄໝ​ປະຊຸມ​ດັ່ງກ່າວ ໂດຍ​ໄດ້​ຕີ​ລາຄາ​ສູງ​ໃນ​ດ້ານ​ລວງ​ເລິກ​ຂອງ​ການ​ຄົ້ນຄວ້າ​ຫາລື; ຍົກ​ໃຫ້​ເຫັນ​ເຖິງ​ຄວາມ​ສຳເລັດ​ຜົນ ຂອງ​ກຳມາ​ທິ​ການ​ຮັບຜິດຊອບ​ການ​ຮ່າງ​ລັດ​ຖະ​ທຳ​ມະນູນ ທີ່​ນຳ​ໂດຍ​ທ່ານ ຣາ​ອູນ ​ກັສ​ໂຕຣ ເລຂາ​ທີ​ໜຶ່ງ​ຂອງ​ພັກ​ກອມ​ມູ​ນິດ​ກູ​ບາ.

    ຮ່າງ​ລັດ​ຖະ​ທຳ​ມະນູນ​ໃໝ່ ເປັນ​ການ​ຮັກສາ​ໄວ້​ຊຶ່ງ​ຈຸດ​ພິເສດ​ສັງຄົມ​ນິຍົມ ແລະ​ນຳ​ເອົາ​ການ ປ່ຽນແປງ​ອອກ​ມາ​ຢູ່​ໃນ​ໂຄງ​ສ້າງ​ຂອງ​ລັດ​ກູ​ບາ ໃນ​ນັ້ນ​ປະກອບ​ການ​ສ້າງຕັ້ງ​ທີ່​ຕັ້ງ​ຂອງ​ປະທານ​ປະເທດ ຮອງ​ປະທານ​ປະເທດ ແລະ​ນາຍົກລັດຖະມົນຕີ ແທນ​ໃຫ້​ແກ່​ປະທານ​ຂອງ​ສະພາ​ແຫ່ງ​ລັດ ແລະ​ ສະພາ​ລັດຖະມົນຕີ ທີ່​ໃຊ້​ຢູ່​ໃນ​ປັດຈຸບັນ.

    ຮ່າງ​ລັດ​ຖະ​ທຳ​ມະນູນ​ໃໝ່​ຂອງ​ກູ​ບາ ກໍ​ເປີດ​ກວ້າງ​ສິດທິ​ມະນຸດ ດ້ວຍ​ບັນຫາ​ຕ່າງໆ ເຊັ່ນ​ການ​ຮັບປະກັນ​ສຳນວນ​ເອກະສານ​ການ​ຮ້ອງ​ຟ້ອງ “ຄຳ​ສັ່ງ​ງົດ​ສິດ​ກັກ​ຂັງ” (Habeas Corpus) ສົມ​ໝຸດ​ຖານ​ປາສະຈາກ​ໂທດ ແລະ​ການ​ກັບເຂົ້າ​ສູ້​ສັງຄົມ​ຂອງ​ບັນດາ​ນັກໂທດ ດັ່ງນີ້​ເປັນຕົ້ນ.

   ນອກຈາກ​ນັ້ນແລ້ວ ຮ່າງ​ລັດ​ຖະ​ທຳ​ມະນູນ​ໃໝ່​ຂອງ​ກູ​ບາ ກໍ​ຍອມຮັບ​ບັນດາ​ຮູບ​ການ​ການ​ຄອບ​ຄອງ ທີ່​ປະກອບ​ດ້ວຍ​ການ​ຄອບ​ຄອງ​ສັງຄົມ​ນິຍົມ ການ​ຄອບ​ຄອງ​ທົ່ວ​ປວງ​ຊົນ ຄອບ​ຄອງ​ລວມ ແລະ​ຮູບ​ການ ຄອບ​ຄອງ​ພາກ​ເອກະ​ຊົນ; ແລະ​ບັນດາ​ການ​ປ່ຽນແປງ​ຢູ່​ໃນ​ການຈັດຕັ້ງ​ແຕ່ງດອງ ຊຶ່ງ​ຕາມ​ນັ້ນແລ້ວ ເອກະສານ​ດັ່ງກ່າວ​ຍອມຮັບ​ວ່າ ການ​ແຕ່ງດອງ ເປັນ​ການ​ສົມທົບ​ລະຫວ່າງ​ສອງ​ຄົນ (ບໍ່​ໄດ້​ຊີ້ ແຈງ​ເຖິງ​ເພດ) ແທນ​ໃຫ້​ແກ່​ລັດ​ຖະ​ທຳ​ມະນູນ​ຂອງ​ກູ​ບາ​ສະບັບ​ທີ່​ໃຊ້​ຢູ່​ໃນ​ປັດຈຸບັນ ທີ່​ເວົ້າ​ວ່າ ເປັນ​ການ​ສົມທົບ​ດ້ວຍ​ຄວາມ​ສະໝັກ​ໃຈ ລະຫວ່າງ​ເພດ​ຍິງ ກັບ​ເພດ​ຊາຍ.

    ຫຼັງ​ຈາກ​ທີ່​ຮ່າງ​ລັດ​ຖະ​ທຳ​ມະນູນ​ໃໝ່ ໄດ້​ຮັບ​ການ​ໃຫ້​ສັດຕະຍາບັນ​ແລ້ວ ສະພາ​ແຫ່ງ​ຊາດ​ກູ​ບາ ກໍ​ໄດ້​ປະກາດ​ຮັບຮອງ​ການ​ດຳເນີນ​ການ​ທາບ​ທາມ​ກັບ​ປວງ​ຊົນ ສຳລັບ​ເອກະສານ​ນີ້ ນັບ​ແຕ່​ວັນ​ທີ 13 ສິງຫາ ຮອດ​ວັນ​ທີ 15 ພະຈິກ ທີ່​ຈະ​ມາ​ເຖິງ. ຫຼັງ​ຈາກ​ນັ້ນ ອົງການ​ນິຕິບັນຍັດ​ຂອງ​ກູ​ບາ ຈະ​ໄດ້​ຈັດ​ຕັ້ງ ການ​ຢັ່ງ​ສຽງ​ປະຊາ​ມະຕິ ເພື່ອ​ສຳ​ຫຼວດ​ສຽງ​ສະໜັບສະໜູນ​ຂອງ​ປະຊາຊົນ ທີ່​ມີ​ຕໍ່​ການ​ປະຕິ​ຮູບ ລັດ​ຖະ​ທຳ​ມະນູນ​ດັ່ງກ່າວ.

    ໃນ​ສະໄໝ​ປະຊຸມ​ສາມັນ​ຂອງ​ສະພາ​ແຫ່ງ​ຊາດ​ກູ​ບາ​ເທື່ອ​ນີ້ ກຳມາ​ທິ​ການ​ກ່ຽວ​ກັບ​ບັນດາ​ບັນຫາ​ເສດຖະກິດ ການ​ເງິນ ແລະ ​ລາຄາ​ສິນຄ້າ ຂອງ​ກູ​ບາ ຍັງ​ຈະ​ໄດ້​ນຳ​ສະເໜີ​ລາຍ​ລະອຽດ​ຂອງ​ບົດ​ລາຍ​ງານ​ກ່ຽວ​ກັບ​ການ​ຕັດສິນ​ງົບປະມານ​ແຫ່ງ​ລັດ​ກູ​ບາ ປີ 2017 ອີກ​ດ້ວຍ.

ຂ່າວທີ່ກ່ຽວຂ້ອງ