ຂ່າວຫຼ້າສຸດ

ບໍ່ມີມິດແທ້ທາງການຄ້າ...

536 23 ກ.ກ. 2018 ນານາສາລະ

   ນັບ​ແຕ່​ມື້​ຂຶ້ນ​ເປັນ​ຜູ້­ນຳ​ສະ­ຫະ­ລັດ​ອາ​ເມ​ຣິ​ກາ ທ່ານ Donald Trump ໄດ້​ດຳ­ເນີນ​ນະ­ໂຍ­ບາຍ​ຢ່າງ​ຈິງ​ຈັງ ຄື: America First (ອາ​ເມ​ຣິ​ກາ​ຕ້ອງ​ມາ​ກ່ອນ) ຕາມ​ທີ່​ເພິ່ນ​ຫາ​ສຽງ​ໄວ້ ເຊິ່ງ​ສະ­ແດງ​ອອກ​ເດັ່ນ​ຊັດ ແມ່ນ​ການ​ຖອນ​ອອກ​ຈາກ​ຂໍ້​ຕົກ­ລົງ ປາ​ຣີ ກ່ຽວ​ກັບ​ດິນ​ຟ້າ​ອາ­ກາດ​ທີ່​ອາ​ເມ​ຣິ​ກາ​ຮ່ວມ​ລົງ​ນາມ ໃນ​ປີ 2015 ຖອນ​ຕົວ​ອອກ​ຈາກ​ຂໍ້​ຕົກ­ລົງ​ນິວ​ເຄຼຍ ອີ​ຣານ ທີ່​ອາ​ເມ​ຣິ​ກາ ຮ່ວມ​ລົງ​ນາມ​ໃນ​ປີ 2015 ແລະ ຫຼ້າ​ສຸດແມ່ນ​ການ​ປະ­ກາດ​ຂຶ້ນ​ພາ­ສີ​ສຳ­ລັບ​ເຫຼັກ​ກ້າ ອາ​ລູ​ມີ​ນຽມ ຈາກ ສປ ຈີນ ແລະ ກຸ່ມ​ປະ­ເທດ ເອີ​ຣົບ (EU).

   ແຕ່​ໃດ​ມາ ອາ​ເມ​ຣິ​ກາ ແລະ EU ຖື​ວ່າ​ເປັນ​ພັນ­ທະ​ມິດ​ທີ່​ແໜ້ນ​ແກ່ນ​ໃນ​ການ​ຊຸກ­ຍູ້​ການ​ຄ້າ​ເສລີ​ທົ່ວ​ໂລກ ສະ­ນັ້ນ ເມື່ອ​ທ່ານ ທຣຳ ມີ​ນະ­ໂຍ­ບາຍ​ເລື່ອງ​ການ​ຄ້າ​ຕ່າງ​ຜູ້­ນຳ​ຄົນ​ກ່ອນ ຈຶ່ງ​ເຮັດ​ໃຫ້ EU ເກີດ​ການ​ປັ່ນ​ປ່ວນ​ທັນ­ທີ ຈົນ​ເຖິງ​ຂັ້ນ​ວ່າ EU ກ່າວ​ຟ້ອງ​ຕໍ່​ອົງ­ການ WTO ໃນ​ເລື່ອງ​ອາ​ເມ​ຣິ​ກາ ຂຶ້ນ​ພາ­ສີ​ເຫຼັກ​ກ້າ ແລະ ອາ​ລູ​ມິ​ນຽມ ທີ່​ນຳ​ເຂົ້າ​ຈາກ EU ຝ່າຍ​ດຽວ ໂດຍ​ຂໍ້​ມູນ​ການ​ປຶກ­ສາ​ກັບ​ຄູ່​ຄ້າ​ແຕ່​ຢ່າງ­ໃດ ?.

   ວິ­ທະ­ຍຸ​ກະ­ຈາຍ­ສຽງ​ຫວຽດ­ນາມ: (VOVOWORLD) ສະ­ບັບ​ອອນ​ລາຍ ວັນ​ທີ 1 ມິ­ຖຸ­ນາ 2018 ໄດ້​ພິມ​ບົດ​ໃນ​ຫົວ­ຂໍ້: “ຮົ້ວ​ກີດ­ຂວາງ​ໃໝ່​ໃນ​ການ​ພົວ­ພັນ ລະ­ຫວ່າງ ອາ​ເມ​ຣິ​ກາ ແລະ ອີ​ຢູ” ມີ​ບາງ​ຈຸດ​ໄດ້​ກ່າວ​ວ່າ: “ຂໍ້​ຕົກ­ລົງ​ຈັດ​ວາງ 25% ອັດ­ຕາ​ພາ­ສີ​ສຳ­ລັບ​ເຫຼັກ​ກ້າ ແລະ 10% ສຳ­ລັບ​ອາ​ລູ​ມິ​ນຽມ ນຳ​ເຂົ້າ​ຈາກ EU ທີ່​ມີ​ຜົນ​ສັກ­ສິດ​ແຕ່​ວັນ​ທີ 1 ມິ­ຖຸ­ນາ​ເປັນ­ຕົ້ນ​ໄປ ໄດ້​ສົ່ງ​ຜົນ​ກະ­ທົບ​ຢ່າງ​ແຮງ​ຕໍ່​ການ​ພົວ­ພັນ​ສຳ­ພັນ​ທະ​ມິດ ເຊິ່ງ​ໄດ້​ຮັບ​ການ​ສ້າງ​ມາ​ແຕ່​ດົນ​ແລ້ວ ຊ້ຳ​ບໍ່​ພໍ ຂໍ້​ຕົກ­ລົງ​ນີ້​ອາດ​ຈະ​ເປັນ​ການ​ເປີດ​ສາກ​ໃຫ້​ແກ່​ສົງ­ຄາມ​ການ​ຄ້າ​ລະ­ຫວ່າງ​ສອງ​ຝ່າຍ ເຮັດ​ໃຫ້​ຊ່ອງ​ຫວ່າງ​ລະ­ຫວ່າງ​ອາ​ເມ​ຣິ​ກາ ແລະ ອີ​ຢູ ນັບ​ມື້​ນັບ​ເພີ່ມ​ຂຶ້ນ”.

   ອີງ​ຕາມ​ແຫຼ່ງ​ຂ່າວ​ຈາກ​ຕ່າງ­ປະ­ເທດ​ໃຫ້​ຮູ້​ວ່າ: ກອງ​ປະ­ຊຸມ​ຜູ້­ນຳ G7 ທີ່​ຈັດ​ຂຶ້ນ​ໃນ​ວັນ​ທີ 8-9 ມິ­ຖຸ­ນາ 2018 ທີ່​ເມືອງ​ຊານ​ເລີ​ວົວ ລັດ​ຄິວ​ເບກ ປະ­ເທດ​ກາ​ນາ​ດາ ຂັ້ນ​ຜູ້­ນຳ​ສະ­ຫະ­ລັດ ໂດຍ​ທ່ານ ທຣຳ ມາ​ຮ່ວມ​ກອງ​ປະ­ຊຸມ​ຊ້າ ແລະ ອອກ​ຈາກ​ກອງ​ປະ­ຊຸມ​ກ່ອນ​ໝົດ​ວາ­ລະ ທັງ​ປະ­ຕິ­ເສດ​ຂໍ້​ລົງ​ນາມ​ໃນ​ຖະ­ແຫຼງ­ການ​ຮ່ວມ ບໍ່​ທໍ່​ນັ້ນ ຍັງ​ສັ່ງ​ໃຫ້​ເຈົ້າ​ໜ້າ­ທີ່​ອາ​ເມ​ຣິ​ກາ ປະ­ຕິ­ເສດ​ຖະ­ແຫຼງ­ການ​ຮ່ວມ​ຫຼັງ​ກອງ​ປະ­ຊຸມ.

   ຄວາມ​ຈິງ​ແລ້ວ ຂໍ້​ຂັດ​ແຍ່ງ​ທາງ​ການ​ຄ້າ​ນີ້ ຕ້ອງ​ຍອມ­ຮັບ​ວ່າ ໃນ​ໂລກ​ນີ້​ບໍ່​ມີ​ມິດ​ແທ້ທາງ​ການ​ຄ້າ ເພາະ​ການ​ຄ້າ​ໝາຍ​ເຖິງ​ການ​ຊອກ​ຫາ​ກຳ­ໄລ ສະ­ນັ້ນ ບ່ອນ​ໃດ​ທີ່​ຈະ​ມີ​ກຳ­ໄລ ສິນ­ຄ້າ​ຍ່ອມ​ເຄື່ອນ​ຍ້າຍ​ໄປ​ບ່ອນນັ້ນ ? ບໍ່​ທໍ່​ນັ້ນ ຢາກ​ມີ​ກຳ­ໄລ ມັນ​ກໍ່​ຕ້ອງ​ເວົ້າ​ເຖິງ​ການ​ປົກ​ປ້ອງ​ສິນ­ຄ້າ.

   ຕາມ​ແຫຼ່ງ​ຂ່າວ​ຈາກ​ຕ່າງ­ປະ­ເທດ​ແຈ້ງ­ວ່າ: ປີ 2017 EU ສົ່ງ​ອອກ​ຜະ­ລິດ​ຕະ​ພັນ​ເຫຼັກ​ກ້າ ແລະ ອາ​ລູ​ມິ​ນຽມ ໄປ​ຍັງ​ຕະ­ຫຼາດ​ອາ​ເມ​ຣິ​ກາ ມີ​ມູນ​ຄ່າ 6 ຕື້​ໂດ​ລາ​ທໍ່​ນັ້ນ ແຕ່​ລວມ​ຍອດ​ວົງ​ເງິນ​ສົ່ງ​ອອກ​ສິນ­ຄ້າ​ອື່ນໆ​ອີກ​ໄປ​ຍັງ​ຕະ­ຫຼາດ​ອາ​ເມ​ຣິ​ກາ ແມ່ນ​ຫຼາຍ​ກວ່າ 300 ຕື້​ໂດ​ລາ ໝາ­ຍວ່າ ການ​ຂາດ­ດູນ​ການ​ຄ້າ​ລະ­ຫວ່າງ ອາ​ເມ​ຣິ​ກາ ແລະ EU ນັ້ນ ບໍ່​ແມ່ນ​ມາ​ຈາກ​ເຫຼັກ​ກ້າ ແລະ ອາ​ລູ​ມິ​ນຽມ ຈາກ​ນັ້ນ ຈຶ່ງ​ເຫັນ​ໄດ້​ວ່າ​ມາດ​ຕະ­ການ​ຂອງ​ທ່ານ ທຣຳ ພຽງ​ແຕ່​ຢາກ​ສະ­ແດງ​ໃຫ້​ເຫັນ​ວ່າ ໄດ້​ມີ​ການ​ປະ­ຕິ­ບັດ​ຢ່າງ​ເຂັ້ມ​ງວດ ແລະ ຢຶດ​ໝັ້ນ​ແນວ­ໃດ​ສຳ­ລັບ​ການ​ປະ­ຕິ­ບັດ​ຄຳ​ຂວັນ America First.

   EU ຊອກ​ທຸກ​ວິ­ທີ​ທາງ ເພື່ອ​ກົດ​ດັນ​ອາ​ເມ​ຣິ​ກາ ລວມ​ໄປ​ເຖິງ​ການ​ຂຶ້ນ​ພາ­ສີ​ຕອບ​ໂຕ້​ສິນ­ຄ້າ​ອາ​ເມ​ຣິ​ກາ ທີ່​ນຳ​ເຂົ້າ​ສູ່​ຕະ­ຫຼາດ EU ການ​ກ່າວ​ຟ້ອງ​ອົງ­ການ WTO ແຕ່​ເບິ່ງ​ຄື​ວ່າ​ຈະ​ບໍ່​ມີ​ອຳ­ນາດ​ຕໍ່​ລອງ​ພໍ​ປານ­ໃດ? ເພາະ​ແຫຼ່ງ​ຂ່າວ​ບອກ​ວ່າ ອາ​ເມ​ຣິ​ກາ ໃນ​ທີ່​ສຸດ​ກໍ່​ຈະ​ປະ­ກາດ​ຖອນ​ຕົວ​ອອກ​ຈາກ​ອົງ­ການ ການ​ຄ້າ​ໂລກ WTO ນັ້ນ​ກໍ່​ໝາຍ​ຄວາມ​ວ່າ ຊາ­ຕາ­ກຳ​ຂອງ​ກຸ່ມ EU ກໍ່​ຕ້ອງ​ຂຶ້ນ​ຢູ່​ກັບ​ການ​ຕັດ­ສິນ​ໃຈ​ຂອງ​ຜູ້​ມີ​ສິດ​ເລືອກ​ຕັ້ງ​ຄົນ​ອາ​ເມ​ຣິ​ກາ ວ່າ​ໃນ​ການ​ເລືອກ​ຕັ້ງ​ປະ­ທາ­ນາ­ທິ­ບໍ­ດີ​ສະ­ຫະ­ລັດ​ອາ​ເມ​ຣິ​ກາ ໃນ​ປີ 2020 ນັ້ນ ເຂົາ​ຈະ​ເລືອກ​ທ່ານ ທຣຳ ອີກ ຫຼື ບໍ່? ສະ­ພາບ​ການ​ແບບ​ນີ້​ຖື​ວ່າ EU ຕົກ​ຢູ່​ໃນ​ຄວາມ​ສ່ຽງ​ຫຼາຍ​ທີ່​ສຸດ.

ຢາກ​ສະ­ຫຼຸບ​ວ່າ: ບໍ່​ມີ​ມິດ​ແທ້​ທາງ​ການ​ຄ້າ​ນັ້ນ ຄື​ຄວາມ​ເປັນ​ຈິງ.

+ ແນວ​ລາວ

ຂ່າວທີ່ກ່ຽວຂ້ອງ