ບັນດາ​ປະເທດ​ສະມາຊິກ CPTPP ເລີ່ມ​ການ​ເຈລະຈາ​ກ່ຽວ​ກັບ​ການ​ເຂົ້າ​ຮ່ວມ​ຂອງ​ສະມາຊິກ​ໃໝ່

150 23 ກ.ກ. 2018 ຂ່າວຕ່າງປະເທດ
ບັນດາ​ປະເທດ​ສະມາຊິກ CPTPP ເລີ່ມ​ການ​ເຈລະຈາ​ກ່ຽວ​ກັບ​ການ​ເຂົ້າ​ຮ່ວມ​ຂອງ​ສະມາຊິກ​ໃໝ່

     ຂ່າວສານ​ກຽວ​ໂດ ລາຍ​ງານ​ວ່າ ວັນ​ທີ 19 ກໍລະກົດ​ທີ່​ຜ່ານ​ມາ ບັນດາ​ຫົວໜ້າ​ຄະນະ​ເຈລະຈາ ຈາກ 11 ປະເທດ ທີ່​ເປັນ​​​ສະມາຊິກ​ຂອງ​ສັນຍາ​ຂ້າມ​ປາ​ຊີ​ຟິກ (TPP) ຊຶ່ງ​ປັດຈຸບັນ​ເອີ້ນ​ວ່າ ສັນຍາ​ຄູ່​ຮ່ວມ​ຮອບດ້ານ ແລະ​ກ້າວໜ້າ​ຂ້າມ​ປາ​ຊີ​ຟິກ (CPTPP) ໄດ້​ເຫັນ​ດີ​ເປັນ​ເອກະສັນ​ກັນ ໃນ​ການ​ເລີ່ມ​ເຄື່ອນ​ໄຫວ​ຂະ​ບວນ​ການ​ເຈລະຈາ ກ່ຽວ​ກັບ​ການ​ເຂົ້າ​ຮ່ວມ​ຂອງ​ບັນດາ​ສະມາຊິກ​ໃໝ່ ພາຍ​ໃນ​ປີ 2019 ຫຼັງ​ຈາກ​ທີ່​ສັນຍາ​ດັ່ງກ່າວ ມີ​ຜົນ​ບັງຄັບ​ໃຊ້.

    ການເຄື່ອນໄຫວ​ດັ່ງກ່າວ​ມີ​ຂຶ້ນ ຢູ່​ໃນ​ການ​ປະຊຸມ​ເປັນ​ເວລາ​ສອງ​ວັນ ຂອງ​ຫົວໜ້າ​ຄະນະ ຜູ້​ແທນ​ຈາກ 11 ປະເທດ​ດັ່ງກ່າວ ຊຶ່ງ​ເລີ່ມ​ຂຶ້ນ​ເມື່ອ​ວັນ​ທີ 18 ກໍລະກົດ​ທີ່​ຜ່ານ​ມາ ຢູ່​ທີ່​ເຂດ​ພັກຜ່ອນ ເພື່ອ​ສຸຂະພາບ ຮາ​ໂກ​ເນ (ຍີ່ປຸ່ນ) ໂດຍ​ໄດ້​ມີ​ການ​ກວດກາ​ເບິ່ງ​ຄວາມ​ຄືບ​ໜ້າ ໃນ​ການ​ປະຕິບັດ ເອກະສານ​ຕ່າງໆ​ຢູ່​ພາຍ​ໃນ​ປະເທດ ເພື່ອ​ຮັບຮອງ​ສັນຍາ ແລະ​ ປຶກສາ​ຫາລື​ກ່ຽວ​ກັບ​ການ​ເປີດ​ກວ້າງ ຂອບ​ຂະໜາດ​ຂອງ​ສັນຍາ ໃນ​ອະນາຄົດ.

    CPTPP ຈະ​ມີ​ຜົນ​ບັງຄັບ​ໃຊ້ 60 ວັນ​ຫຼັງ​ຈາກ​ທີ່​ມີ​ຢ່າງ​ໜ້ອຍ 6 ປະເທດ ທີ່​ເປັນ​ສະມາຊິກ ເຮັດ​ສຳເລັດ​ເອກະສານ​ຕ່າງໆ​ຢູ່​ພາຍ​ໃນ​ປະເທດ. ເມັກ​ຊິກ ແລະ ​ຍີ່ປຸ່ນ ໄດ້​ສິ້ນ​ສຸດ​ຂະ​ບວນ​ການ ໃຫ້​ສັດຕະຍາບັນ​ສັນຍາ​ນັ້ນ​ໄປ​ແລ້ວ ແລະ ​ຫຼ້າ​ສຸດ  ຂ່າວສານ​ກຽວ​ໂດ ລາຍ​ງານ​ວ່າ ກະຊວງ​ການ​ຄ້າ ແລະ​ອຸດສາຫະກຳ​ຂອງ​ສິງກະໂປ ແຈ້ງ​ໃ​​ຫ້​ຮູ້ເມື່ອ​ວັນ​ທີ 19 ກໍລະກົດ​ນີ້​ວ່າ ສິງກະໂປ​ໄດ້​ໃຫ້​ສັດຕະຍາບັນ CPTPP ແລ້ວ ໂດຍ​ໄດ້​ກາຍເປັນ​ປະເທດ​ທີ​ສາມ ຈາກ​ຈຳນວນ 11 ປະເທດ ເຮັດ​ສຳເລັດ​ເອກະສານ​ຕ່າງໆ​ຢູ່​ພາຍ​ໃນ​ປະເທດ./.

 

ຂ່າວທີ່ກ່ຽວຂ້ອງ