ເສດຖະກິດ​ພາກ​ພື້ນ​ອາຊີ - ປາ​ຊີ​ຟິກ ຍັງ​ມີ​ຄວາມ​ເຕີບ​ໂຕ​ໝັ້ນ​ທ່ຽງ

110 23 ກ.ກ. 2018 ຂ່າວຕ່າງປະເທດ
ເສດຖະກິດ​ພາກ​ພື້ນ​ອາຊີ - ປາ​ຊີ​ຟິກ ຍັງ​ມີ​ຄວາມ​ເຕີບ​ໂຕ​ໝັ້ນ​ທ່ຽງ

    ໃນ​ເອກະສານ​ເພີ່ມ​ເຕີມ ໃຫ້​ແກ່​ບົດ​ລາຍ​ງານ​ກ່ຽວ​ກັບ ຄວາມ​ຫວັງ​ການ​ພັດທະນາ​ອາຊີ (ADO) ປີ 2018 ທີ່​ໄດ້​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 19 ກໍລະກົດ​ທີ່​ຜ່ານ​ມາ​ນັ້ນ  ທະນາຄານ​ພັດທະນາ ອາຊີ (ADB) ໃຫ້​ຮູ້​ວ່າ ຄວາມ​ເຕີບ​ໂຕ​ຂອງ​ບັນດາ​ພື້ນຖານ​ເສດຖະກິດ​ພວມ​​ພັດທະນາ ຢູ່​ໃນ​ພາກ​ພື້ນ ອາຊີ - ປາ​ຊີ​ຟິກ ໃນ​ປີ 2018 ແລະ 2019 ຍັງ​ຄົງ​ມີ​ຄວາມ​ໝັ້ນ​ທ່ຽງ ໂດຍ​ບໍ່​ເອົາ​ຫົວຊາ​ຕໍ່​ຄວາມ ເຄັ່ງ​ຕຶງ​ທາງ​ດ້ານ​ການ​ຄ້າ ທີ່​ນັບ​ມື້ ນັບ​ເພີ່ມ​ຂຶ້ນ ລະຫວ່າງ ສ ອາ​ເມ​ຣິ​ກາ ກັບ​ບັນດາ​ຄູ່​ຮ່ວມ ທາງ​ດ້ານ​ເສດຖະກິດ.

    ໃນ​ເອກະສານ​ເພີ່ມ​ເຕີມ​ດັ່ງກ່າວ ADB ໃຫ້ການ​ຄາດ​ຄະເນ​ວ່າ ພາກ​ພື້ນ​ອາຊີ - ປາ​ຊີ​ຟິກ ທີ່​ປະກອບ​ມີ 45 ພື້ນຖານ​ເສດຖະກິດ​ພວມ​ພັດທະນາ​ນັ້ນ ຈະ​ບັນລຸ​ລະດັບ​ເຕີບ​ໂຕ​ທີ່ 6% ໃນ​ປີ 2018 ແລະ 5,9% ໃນ​ປີ 2019 ທີ່​ນັບ​ວ່າ​ຄ້າຍຄື​ກັນ​ກັບ​ການ​ຄາດ​ເນ​ອອກ​ມາ​ກ່ອນ​ໜ້າ​ນີ້.

    ເມື່ອ​ເວົ້າ​ເຖິງ​ແຕ່​ລະ​ເຂດ ADB ຢັ້ງຢືນ​ວ່າ ຄວາມ​ເຕີບ​ໂຕ​ເສດຖະກິດ​ຂອງ​ເຂດ​ອາຊີ​ຕາເວັນ ອອກ ຈະ​ຍັງ​ຄົງ​ຢູ່​ທີ່ 6% ໃນ​ປີ 2018 ແລະ  5,8% ໃນ​ປີ 2019 ດັ່ງ​ທີ່​ໄດ້​ຄາດ​ຄະເນ​ໄວ້​ກ່ອນ​ໜ້າ ນີ້. ພິເສດ​ກໍ​ແມ່ນ​ພື້ນຖານ​ເສດຖະກິດ​ຈີນ ທີ່​ມີ​ຂະໜາດ​ໃຫຍ່​ອັນ​ດັບ​ສອງ​ຂອງ​ໂລກ ຈະ​ຍັງ​ບັນລຸ​ລະດັບ ເຕີບ​ໂຕ​ທີ່ 6,6% ໃນ​ປີ 2018 ແລະ 6,4% ໃນ​ປີ 2019 ດັ່ງ​ທີ່​ໄດ້​ໃຫ້ການ​ຄາດ​ຄະເນ​ໄວ້​ກ່ອນ​ໜ້າ​ນີ້.

    ໃນ​ຂະນະ​ດຽວ​ກັນ ເຊດ​ອາຊີ​ໃຕ້ ສືບຕໍ່​ເປັນ​ອະນຸ​ພາກ​ພື້ນ​ທີ່​ມີ​ຄວາມ​ເຕີບ​ໂຕ​ໄວ​ທີ່​ສຸດ ໂດຍ​ມີ​ອິນ​ເດຍ​ເປັນ​ປະເທດ​ນຳ​ໜ້າ ເມື່ອ​ຄາດ​ວ່າ​ພື້ນຖານ​ເສດຖະກິດ​ນີ້ ຈະ​ບັນລຸ​ຄວາມ​ເຕີບ​ໂຕ 7,3% ໃນ​ປີ 2018 ແລະ ​ເພີ່ມ​ຂຶ້ນ​ເປັນ 7,6% ໃນ​ປີ 2019 ຍ້ອນ​ໄດ້​ຈາກ​ມາດ​ຕະການ​ປັບປຸງ ລະບົບ​ທະນາຄານ ແລະ​ການ​ປະຕິ​ຮູບ​ພາສີ ຊ່ວຍ​ໃຫ້​ເພີ່ມ​ທະວີ​ການ​ລົງທຶນ.

    ເສດຖະກິດ​ຂອງ​ເຂດ​ອາຊີ​ກາງ ພວມ​ເຕີບ​ໂຕ​ໄວ​ກວ່າ​ທີ່​ຄາດ​ໄວ້ ເຮັດ​ໃຫ້ ADB ຕ້ອງ​ໄດ້​ປັບ ການ​ຄາດ​ຄະເນ​ຄວາມ​ເຕີບ​ໂຕ​ຈາກ 4% ຂຶ້ນ​ເປັນ 4,2% ໃນ​ປີ 2018 ແລະ​ ຈາກ 4,2% ຂຶ້ນ​ເປັນ 4,3% ໃນ​ປີ 2019. ໃນ​ນັ້ນ ກາ​ຊັກ​ສະຖານ ທີ່​ເປັນ​ພື້ນຖານ​ເສດຖະກິດ​ໃຫຍ່​ສຸດ ຂອງ​ເຂດ​ອາຊີ​ກາງ ບັນລຸ​ລະດັບ​ເຕີບ​ໂຕ 4,1% ໃນ​ໄຕ​ມາດ​ທຳ​ອິດ​ຂອງ​ປີ 2018 ນັບ​ວ່າ​ສູງ​ກວ່າ  0,5% ທຽບໃສ່​ໄຕ​ມາດ​ດຽວ​ກັນ​ຂອງ​ປີ 2017 ຊຶ່ງ​ໄດ້​ຈາກ​ການ​ຟື້ນ​ຟູ​ດ້ານ​ອຸດສາຫະກຳ ແຮງ​ກວ່າ​ທີ່​ຄາດ ເອົາ​ໄວ້.

    ADB ຄາດ​ຄະເນ​ຄວາມ​ເຕີບ​ໂຕ​ເສດຖະກິດ​ຂອງ​ເຂດ​ອາຊີ​ຕາເວັນ​ອອກ​ສ່ຽງ​ໃຕ້ ໃນ​ປີ  2018 ແລະ 2019 ວ່າ​ມີ​ຄວາມ​ໝັ້ນຄົງ​ຢູ່​ທີ່​ລະດັບ 5,2% ຍ້ອນ​ຄວາມ​ຕ້ອງການ ຢູ່​ພາຍ​ໃນ ມີ​ຄວາມ​ແຂງແຮງ. ADB ກໍ​ຍັງ​ຮັກສາ​ການ​ຄາດ​ຄະເນ ຄວາມ​ເຕີບ​ໂຕ​ເສດຖະກິດ ຂອງ​ເຂດ​ປາ​ຊີ​ຟິກ ຕາມ​ລຳດັບ​ທີ່ 2,2% ແລະ 3,0% ພາຍ​ໃນ​ປີ 2018 ແລະ 2019.

    ບົດ​ລາຍ​ງານ​ເພີ່ມ​ເຕີມ​ດັ່ງກ່າວ​ຂອງ ADB ໄດ້​ປັບ​ຫຼຸດ​ການ​ຄາດ​ຄະເນ ກ່ຽວ​ກັບ​ອັດຕາ​ສ່ວນ ເງິນ​ເຟີ້ ຢູ່​ໃນ​ບັນດາ​ພື້ນຖານ​ເສດຖະກິດ​ພວມ​ພັດທະນາ​ໃນ​ອາຊີ ລົງ​ສູ່​ລະດັບ 2,8% ໃນ​ປີ 2018 ແລະ 2,7% ໃນ​ປີ 2019.

   ADB ໄດ້​ຮັບ​ການ​ສ້າງຕັ້ງ​ເມື່ອ​ປີ 1966 ໂດຍ​ມີ​ສຳນັກງານ​ໃຫຍ່​ຕັ້ງ​ຢູ່​ນະຄອນຫຼວງ ມາ​ນີ​ລາ ຂອງ​ຟີ​ລິບ​ປິນ ແລະ​ມີ 67 ພື້ນຖານ​ເສດຖະກິດ​ເປັນ​ສະມາຊິກ ໃນ​ນັ້ນ​ມີ 48 ພື້ນຖານ​ເສດຖະກິດ ຢູ່​ໃນ​ພາກ​ພື້ນ​ອາຊີ - ປາ​ຊີ​ຟິກ.

 

ຂ່າວທີ່ກ່ຽວຂ້ອງ