ຈີນ - UAE ລົງ​ນາມ​ຂໍ້​ຕົກລົງ​ດ້ານ​ການ​ຄ້າ ແລະ ນ້ຳມັນ​ຫຼາຍ​ສະບັບ

125 23 ກ.ກ. 2018 ຂ່າວຕ່າງປະເທດ
ຈີນ - UAE ລົງ​ນາມ​ຂໍ້​ຕົກລົງ​ດ້ານ​ການ​ຄ້າ ແລະ ນ້ຳມັນ​ຫຼາຍ​ສະບັບ

    ບໍລິສັດ​ນ້ຳມັນ​ແຫ່ງ​ຊາດ ອາ​ບູ ດາ​ບີ (ADNOC) ແຈ້ງ​ໃຫ້​ຮູ້ເມື່ອ​ບໍ່​ດົນ​ມາ​ນີ້​ວ່າ ໄດ້​ເຊັນ​ສັນຍາ 2 ສະບັບ ລວມ​ມູນ​ຄ່າ 1,6 ຕື້​ໂດ​ລາ​ສະຫະລັດ ກັບ BGP Inc. ຊຶ່ງ​ເປັນ​ສາຂາ​ຂອງ​ກຸ່ມ​ບໍລິສັດ ນ້ຳມັນ-ແກ​​ັສ​ແຫ່ງ​ຊາດ​ຈີນ (CNPC) ເພື່ອ​ດຳເນີນ​ການ​ສຳ​ຫຼວດ​ທໍ​ຊລະ​ນີ​ສາດ​ຢູ່​ໃນ​ສະຫະລັດ ອາ​ຣັບ ເອ​ມີ​ເຣດ (UAE) ໃນ​ການ​ຄົ້ນ​ຫາ​ນ້ຳມັນ ແລະ​ ແກ​​ັສ ຢູ່​ໃນ​ສະຖານທີ່​ບາງ​ແຫ່ງ​ໃນ​ເຂດ​ແຄມ​ຝັ່ງ​ທະເລ ແລະ​ນອກ​ຝັ່ງ​ທະເລ​ຂອງ UAE ຢູ່​ໃນ​ພື້ນ​ທີ່​ກວ້າງ 53.000​ ກມ2. ກ່ອນ​ໜ້າ​ນັ້ນ CNPC ໄດ້​ມີ​ສັນຍາ​ການ​ປະ​ນິ​ປະນອມ​ສິດ​ສອງ​ສະບັບ​ກັບ ADNOC ເປັນ​ມູນ​ຄ່າ​ປະມານ 3 ຕື້​ໂດ​ລາ ສະຫະລັດ.

    ໃນ​ຂະ​​ນຍ​ນະ​ດຽວ​ກັນ ບໍລິສັດ​ເຄື່ອນ​ໄຫວ​ທ່າ​ກຳປັ່ນ​ທົ່ວ​ໂລກ DP World ຂອງ​ລັດ UAE (ປັດຈຸບັນ​ນີ້ DP World ພວມ​ເຄື່ອນ​ໄຫວ​ຢູ່​ໃນ 40 ປະເທດ​ໃນ​ໂລກ) ກໍ​ໄດ້​ແຈ້ງ​ໃຫ້​ຮູ້​ເຖິງ ສັນຍາ​ສະບັບ​ໜຶ່ງ​ລະຫວ່າງ UAE ກັບ​ຈີນ ເພື່ອ​ກໍ່ສ້າງ​ເຂດ​ການ​ຄ້າ​ໃໝ່​ແຫ່ງ​ໜຶ່ງ ຢູ່​ໃນ​ດູ​ບາຍ. ສັນຍາ​ນີ້​ໄດ້​ຮັບ​ການ​ລົງ​ນາມ​ລະຫວ່າງ DP World ກັບ​ກຸ່ມ​ບໍລິສັດ​ແຫ່ງ​ໜຶ່ງ​ຂອງ​ຈີນ ຊຶ່ງ​ຕາມ​ນັ້ນແລ້ວ ກໍ​ແມ່ນ​ການ​ກໍ່ສ້າງ “ເຂດ​ຕະຫຼາດ​ຂອງ​ນັກ​ການ​ຄ້າ” ໃນ​ເນື້ອທີ່​ກວ້າງ 3 ​ກມ2 ນອນ​ຢູ່​ໃນ ເຂດ​ການ​ຄ້າ​ເສລີ Jebel Ali ທີ່​ມີ​ຂະໜາດ​ໃຫຍ່​ສຸດ​ໃນ​ເຂດ​ຕາເວັນ​ອອກ​ກາງ. ຍ່ານ​ຕະຫຼາດ​ດັ່ງກ່າວ ຈະ​ເປັນ​ບ່ອນ​ແລກປ່ຽນ​ສິນຄ້າ​ນາໆ​ຊະນິດ ນັບ​ຕັ້ງແຕ່​ສະບຽງ​ອາຫານ ເຄື່ອງ​ສຳອາງ ໄປ​ຈົນ​ຮອດ ວັດ​ສະ​ດຸ​ກໍ່ສ້າງ ແລະ​ສິນຄ້າ​ເຕັກ​ໂນ​ໂລ​ຊີ.

    ຂໍ້​ຕົກລົງ​ຕ່າງໆ​ດັ່ງກ່າວ ໄດ້​ຮັບ​ການ​ລົງ​ນາມ ກ່ອນ​ການ​ຢ້ຽມຢາມ UAE ຂອງ​ປະທານ ປະເທດ​ຈີນ ສີ​ຈິ້ນ​ຜິງ ໃນ​ວັນ​ທີ 19 ກໍລະກົດ​ນີ້ ຊຶ່ງ​ເປັນ​ບ່ອນ​ແວ່​ຢ້ຽມຢາມ​ແຫ່ງ​ທຳ​ອິດ ໃນ​ການ ຢ້ຽມຢາມ​ຫຼາຍ​ປະເທດ​ຂອງ​ທ່ານ ອັນ​ລວມ​ເຖິງ ເຊ​ເນ​ການ ຣູ​ອັນ​ດາ ແລະ ອາ​ຟະ​ຣິກ​ກາ​ໃຕ້.

    ຕາມ​ສະຖິຕິ​ແລ້ວ ຈີນ​ເປັນ​ຄູ່​ຮ່ວມ​ທາງ​ດ້ານ​ເສດຖະກິດ​ອັນ​ດັບ​ຕົ້ນ​ຂອງ UAE ໂດຍ​ມີ​ມູນ​ຄ່າ ການ​ຄ້າ​ທີ່​ປາສະຈາກ​ນ້ຳມັນ ໃນ​ປີ 2017 ເພີ່ມ​ຂຶ້ນ 15%/ປີ ເກີນ​ລະດັບ 53,3 ຕື້​ໂດ​ລາ​ສະຫະລັດ ເທົ່າ​ກັບ​ກວ່າ 90% ຂອງ​ສິນຄ້າ​ສົ່ງ​ອອກ​ຂອງ​ຈີນ ໄປ​ຍັງ UAE. ກົງກັນຂ້າມ  UAE ກໍ​ເປັນ​ໜຶ່ງ​ໃນ 15 ປະເທດ​ຜູ້​ສະໜອງ​ນ້ຳມັນ​ດິບ​ໃຫ້​ແກ່​ຈີນ ໂດຍ​ສົ່ງ​ອອກ​ນ້ຳມັນ​ໃນ​ມູນ​ຄ່າ​ປະມານ 4 ຕື້​ໂດ​ລາ ສະຫະລັດ ໃຫ້​ແກ່​ຈີນ ພາຍ​ໃນ​ປີ 2017. 86% ຂອງ​ປະລິມານ​ນ້ຳມັນ​ສະ​ສົມ​ຂອງ UAE ແມ່ນ​ຢູ່​ໃນ ອາ​ບູ ດາ​ບີ.

 

ຂ່າວທີ່ກ່ຽວຂ້ອງ