ຂ່າວຫຼ້າສຸດ

ລາວສະເໜີບົດລາຍງານແຫ່ງຊາດແບບສະໝັກໃຈ

269 23 ກ.ກ. 2018 ຂ່າວໜ້າ​ໜຶ່ງ

    ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ຮອງ​ປະ­ທານ​ຜູ້​ປະ­ຈຳ­ການ​ຄະ­ນະ​ຊີ້​ນຳ​ລະ­ດັບ​ຊາດ ເພື່ອ​ຈັດ​ຕັ້ງ​ປະ­ຕິ­ບັດ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ (ປພຍ) ໄດ້​ນຳ­ພາ​ຄະ­ນະ​ຜູ້​ແທນ​ລາວ​ຈາກ​ກະ­ຊວງ​ການ​ຕ່າງ­ປະ­ເທດ ກະ­ຊວງ​ແຜນ­ການ ແລະ ການ​ລົງ­ທຶນ ແລະ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ເຂົ້າ​ຮ່ວມ​ກອງ​ປະ­ຊຸມ​ເວ­ທີ​ການ­ເມືອງ​ລະ­ດັບ​ສູງ​ວ່າ​ດ້ວຍ​ການ​ພັດ­ທະ­ນາ​ແບບ​ຍືນ​ຍົງ ຈັດ​ຂຶ້ນ​ທີ່​ສຳ­ນັກ­ງານ​ໃຫຍ່​ອົງ­ການ​ສະ­ຫະ​ປະ­ຊາ​ຊາດ ທີ່​ນິວ​ຢອກ ວັນ​ທີ 9-18 ກໍ­ລະ­ກົດ 2018. 

    ໃນ​ໄລ­ຍະ​ກອງ​ປະ­ຊຸມ​ລະ­ດັບ​ລັດ­ຖະ­ມົນ­ຕີ ແຕ່​ວັນ​ທີ 16-18 ກໍ­ລະ­ກົດ​ນີ້ ທ່ານ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ໄດ້​ຂຶ້ນ​ນຳ​ສະ­ເໜີ​ບົດ​ລາຍ​ງານ​ແຫ່ງ​ຊາດ​ແບບ​ສະ­ໝັກ​ໃຈ​ສະ­ບັບ​ທຳ​ອິດ​ຂອງ​ລາວ ກ່ຽວ​ກັບ​ຄວາມ​ຄືບ​ໜ້າ​ການ­ຈັດ­ຕັ້ງ​ປະ­ຕິ­ບັດ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ ເຊິ່ງ​ເປັນ​ໜຶ່ງ​ໃນ 47 ປະ­ເທດ​ສະ­ມາ­ຊິກ​ທີ່​ນຳ​ສະ­ເໜີ​ບົດ​ລາຍ​ງານ​ແຫ່ງ​ຊາດ​ປີ 2018 ໂດຍ​ຊີ້​ໃຫ້​ເຫັນ​ວ່າ​ລາວ​ເຮົາ​ໄດ້​ເອົາ­ໃຈ­ໃສ່​ຈັດ​ຕັ້ງ​ປະ­ຕິ­ບັດ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ ນັບ​ແຕ່​ມື້​ຖືກ​ຮັບ​ເອົາ​ເປັນ­ຕົ້ນ​ມາ ໂດຍ​ສະ­ເພາະ ແມ່ນ​ໄດ້​ຜັນ​ຂະ­ຫຍາຍ​ເປົ້າ​ໝາຍ​ການ​ພັດ­ທະ­ນາ​ຂອງ​ສາ­ກົນ​ເຂົ້າ​ໃນ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ 5 ປີ ຄັ້ງ​ທີ VIII (2016-2020) ທີ່​ສອດ­ຄ່ອງ​ກັບ 3 ເສົາ­ຄ້ຳ​ຂອງ​ວາ­ລະ​ການ​ພັດ­ທະ­ນາ 2030 ຄື: ດ້ານ​ເສດ­ຖະ­ກິດ ສັງ­ຄົມ ແລະ ສິ່ງ­ແວ­ດລ້ອມ ໃນ​ນັ້ນ ປະ­ມານ 60% ຂອງ​ຕົວ​ຊີ້​ວັດ​ຂອງ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ 5 ປີ ຄັ້ງ​ທີ VIII ແມ່ນ​ເຊື່ອມ​ໂຍງ​ກັບ​ຕົວ​ຊີ້​ວັດ ປພຍ ເຊິ່ງ​ຕົວ​ຊີ້​ວັດ ປພຍ ທີ່​ຍັງ​ເຫຼືອ​ຈະ​ສືບ­ຕໍ່​ຜັນ​ຂະ­ຫຍາຍ​ເຂົ້າ​ໃນ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ​ໃນ​ໄລ­ຍະ​ຕໍ່​ໄປ ພິ­ເສດ​ລາວ​ຍັງ​ໄດ້​ສະ­ເໜີ​ຄວາມ​ຄືບ​ໜ້າ​ກ່ຽວ​ກັບ ປພຍ ທີ 18 ວ່າ​ດ້ວຍ “ຊີ­ວິດ​ທີ່​ປອດ​ໄພ​ຈາກ​ລະ­ເບີດ​ບໍ່​ທັນ​ແຕກ” ເຊິ່ງ​ເປັນ​ເປົ້າ​ໝາຍ​ແຫ່ງ​ຊາດ​ຂອງ​ຕົນ ແນ­ໃສ່​ເພື່ອ​ຫຼຸດ­ຜ່ອນ​ຜົນ​ກະ­ທົບ​ທີ່​ເກີດ​ຈາກ​ລະ­ເບີດ​ບໍ່​ທັນ​ແຕກ (UXO) ຕໍ່​ການ​ພັດ­ທະ­ນາ​ປະ­ເທດ.

    ບົດ​ລາຍ​ງານ​ແຫ່ງ​ຊາດ​ສະ­ບັບ​ນີ້​ຊີ້​ໃຫ້​ເຫັນ​ເຖິງ​ຂໍ້​ສະ­ດວກ ຂໍ້​ຫຍຸ້ງ­ຍາກ ສິ່ງ​ທ້າ​ທາຍ ແລະ ທິດ​ທາງ​ໃນ­ຕໍ່­ໜ້າ​ໃນ​ການ­ຈັດ­ຕັ້ງ​ປະ­ຕິ­ບັດ ປພຍ ຢູ່​ລາວ ພ້ອມ​ທັງ​ຢ້ຳ​ຄືນ​ຄວາມ​ຕັດ­ສິນ​ໃຈ​ສູງ ແລະ ຄວາມ​ໝັ້ນ​ໝາຍ​ອັນ​ແຮງ​ກ້າ​ຂອງ​ລັດ­ຖະ­ບານ​ລາວ ໃນ​ການ​ສືບ­ຕໍ່​ຮ່ວມ​ມື​ກັບ​ວົງ​ຄະ­ນະ​ຍາດ​ສາ­ກົນ ເພື່ອ​ຮັບ­ປະ­ກັນ​ໃຫ້​ແກ່​ການ​ປະ­ຕິ­ບັດ ປພຍ ໃຫ້​ບັນ­ລຸ​ຜົນ​ຕາມ​ຄາດ­ໝາຍ ເຊິ່ງ​ຈະ​ເປັນ​ການ​ສ້າງ​ເງື່ອນ­ໄຂ ແລະ ເປັນ​ພື້ນ­ຖານ​ສຳ­ຄັນ​ເພື່ອ​ໃຫ້​ສາ­ມາດ​ບັນ­ລຸ​ເງື່ອນ­ໄຂ​ຂອງ​ການ​ຫຼຸດ​ພົ້ນ​ອອກ​ຈາກ​ສະ­ຖາ­ນະ​ພາບ​ດ້ອຍ​ພັດ­ທະ­ນາ ແລະ ປັບ­ປຸງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ໃຫ້​ດີ​ຂຶ້ນ​ເທື່ອ​ລະ​ກ້າວ.

    ການ​ສ້າງ​ບົດ​ລາຍ​ງານ​ແຫ່ງ​ຊາດ​ດັ່ງ­ກ່າວ ຍັງ​ແມ່ນ​ການ​ປະ­ຕິ­ບັດ​ພັນ­ທະ​ສາ­ກົນ​ໃນ​ຖາ­ນະ​ເປັນ​ປະ­ເທດ​ສະ­ມາ­ຊິກ​ອົງ­ການ ສປຊ ເພື່ອ​ລາຍ​ງານ​ຄວາມ​ຄືບ​ໜ້າ​ຂອງ​ການ­ຈັດ­ຕັ້ງ​ປະ­ຕິ­ບັດ ປພຍ ໃນ​ລະ­ດັບ​ປະ­ເທດ​ໃຫ້​ສາ­ກົນ​ຮັບ​ຮູ້ ແລະ ເຂົ້າ­ໃຈ​ຕໍ່​ສະ­ພາບ​ຈຸດ​ພິ­ເສດ​ດ້ານ​ການ​ພັດ­ທະ­ນາ ກໍ່​ຄື ແນວ­ທາງ​ນະ­ໂຍ­ບາຍ​ຂອງ​ພັກ-ລັດ­ຖະ­ບານ ພາຍ​ໃຕ້​ຄຳ​ຂວັນ“ບໍ່​ປະ​ຖີ້ມ​ໃຜ​ໄວ້​ຢູ່​ທາງ​ຫຼັງ” ການ­ຈັດ­ຕັ້ງ​ປະ­ຕິ­ບັດ​ວາ­ລະ​ການ​ພັດ­ທະ­ນາ​ຂອງ​ສາ­ກົນ​ດັ່ງ­ກ່າວ​ຍັງ​ຮຽກ­ຮ້ອງ​ໃຫ້​ມີ​ສ່ວນ​ຮ່ວມ​ຂອງ​ທຸກ​ພາກ­ສ່ວນ​ໃນ​ສັງ­ຄົມ ດັ່ງ­ນັ້ນ​ໃນ​ຕະ­ຫຼອດ​ຂະ​ບວນ​ການ​ກະ­ກຽມ​ບົດ​ລາຍ​ງານ​ແຫ່ງ​ຊາດ​ດັ່ງ­ກ່າວ​ຈຶ່ງ​ໄດ້​ມີ​ການ­ຈັດ­ຕັ້ງ​ກອງ​ປະ­ຊຸມ​ປຶກ­ສາ​ຫາ­ລື​ແບບ​ມີ​ສ່ວນ​ຮ່ວມ​ຂຶ້ນ​ຫຼາຍ​ຄັ້ງ ໂດຍ​ການ​ເຂົ້າ​ຮ່ວມ​ປະ­ກອບ​ຄຳ​ຄິດ​ເຫັນ​ຂອງ​ພາກ​ລັດ­ຖະ­ບານ ສະ­ມາ­ຊິກ​ສະ­ພາ​ແຫ່ງ​ຊາດ ພາກ​ເອ­ກະ​ຊົນ ສະ​ຖາ​ບັນ​ການ​ສຶກ​ສາ ອົງ​ການ­ຈັດ­ຕັ້ງ​ທາງ​ສັງ­ຄົມ ອົງ​ການ­ຈັດ­ຕັ້ງ​ສາ­ກົນ​ທີ່​ບໍ່​ສັງ­ກັດ​ລັດ­ຖະ­ບານ ອົງ­ການ​ເຄືອ​ຄ່າຍ​ສະ­ຫະ​ປະ­ຊາ​ຊາດ ແລະ ຄູ່​ຮ່ວມ​ພັດ­ທະ­ນາ.

    ໃນ​ໂອ­ກາດ​ເຂົ້າ​ຮ່ວມ​ກອງ​ປະ­ຊຸມ​ຄັ້ງ​ນີ້ ທ່ານ ສະ­ເຫຼີມ​ໄຊ ກົມ​ມະ​ສິດ ຍັງ​ໄດ້​ພົບ​ປະ​ກັບ​ຫົວ­ໜ້າ​ຄະ­ນະ​ຜູ້​ແທນ​ແອ​ສ​ໂຕ​ເນຍ ອຽກ​ລັງ ກາ​ນາ​ດາ ຣູ​ມາ​ນີ ຜູ້­ອຳ­ນວຍ­ການ​ໃຫ່​ຍ​ອົງ­ການ ສປຊ ເພື່ອ​ການ​ພັດ­ທະ­ນາ (UNDP) ແລະ ຜູ້­ຕາງ­ໜ້າ​ຂັ້ນ​ສູງ​ສຳ­ລັບ​ປະ­ເທດ​ດ້ອຍ​ພັດ­ທະ­ນາ ປະ­ເທດ​ກຳ­ລັງ​ພັດ­ທະ­ນາ​ທີ່​ບໍ່​ມີ​ຊາຍ​ແດນ​ຕິດ​ກັບ​ທະ­ເລ ແລະ ປະ­ເທດ​ເກາະ­ດອນ​ນ້ອຍ ເພື່ອ​ປຶກ­ສາ​ຫາ­ລື​ກ່ຽວ​ກັບ​ການ​ຮ່ວມ​ມື​ສອງ​ຝ່າຍ ແລະ ຫຼາຍ​ຝ່າຍ ພ້ອມ​ກັນ​ນັ້ນ ຄະ­ນະ​ຜູ້​ແທນ​ລາວ​ຍັງ​ໄດ້​ເຂົ້າ​ຮ່ວມ ແລະ ປະ­ກອບ­ສ່ວນ​ຢ່າງ​ຫ້າວ­ຫັນ​ໃນ​ກອງ​ປະ­ຊຸມ​ປິ່ນ​ອ້ອມ​ທີ່​ສຳ­ຄັນ​ອີກ​ຈຳ­ນວນ​ໜຶ່ງ​ເພື່ອ​ແລກ­ປ່ຽນ​ບົດ­ຮຽນ​ດ້ານ​ການ​ພັດ­ທະ­ນາ ທັງ​ເປັນ​ການ​ຍົກ​ຖາ­ນະ​ບົດ­ບາດ​ຂອງ​ລາວ​ໃຫ້​ສູງ​ຂຶ້ນ​ໃນ​ເວ­ທີ​ສາ­ກົນ.

ຂ່າວທີ່ກ່ຽວຂ້ອງ