ຂ່າວຫຼ້າສຸດ

ເມືອງປາກງື່ມ ປ່ອຍປາລົງສູ່ໜອງຫານ 200.000 ກວ່າໂຕ

257 23 ກ.ກ. 2018 ຂ່າວໜ້າ​ໜຶ່ງ
ເມືອງປາກງື່ມ ປ່ອຍປາລົງສູ່ໜອງຫານ 200.000 ກວ່າໂຕ

    ເມືອງ​ປາກ​ງື່ມ ນະ­ຄອນ­ຫຼວງ​ວຽງ​ຈັນ (ນວ) ຈັດ​ພິ­ທີ​ປ່ອຍ​ປາ ເນື່ອງ​ໃນ​ໂອ­ກາດ​ວັນ​ອະ­ນຸ​ຮັກ​ສັດ​ນ້ຳ-ສັດ­ປ່າ ແຫ່ງ​ຊາດ (13 ກໍ­ລະ­ກົດ) ປະ­ຈຳ​ປີ 2018 ຂຶ້ນ​ວັນ​ທີ 21 ກໍ­ລະ­ກົດ 2018 ຢູ່​ໜອງ​ຫານ ເຂດ​ບ້ານ​ນາ­ທາມ ແລະ ບ້ານ​ນາ​ຊອນ ໂດຍ​ມີ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ທ່ານ ວົງ​ເດືອນ ບຸນ​ຍະ​ແສງ ເຈົ້າ­ເມືອງ​ປາກ​ງື່ມ ທ່ານ ຫຼ້າ​ສາຍ ນວນ​ທາ​ສິງ ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ວົງ​ເດືອນ ບຸນ​ຍະ​ແສງ ກ່າວ​ວ່າ: ການ​ປ່ອຍ​ປາ​ຄັ້ງ​ນີ້ ເປັນ​ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ​ວ່າ​ດ້ວຍ​ສັດ​ນ້ຳ-ສັດ­ປ່າ ເຊິ່ງລັດ­ຖະ­ບານ​ລາວ ໄດ້​ກຳ­ນົດ​ເອົາ​ວັນ​ທີ 13 ກໍ­ລະ­ກົດ ຂອງ​ທຸກໆ​ປີ ເປັນ​ວັນ​ປ່ອຍ​ປາ ແລະ ອະ­ນຸ​ຮັກ​ສັດ​ນ້ຳ-ສັດ­ປ່າ ແຫ່ງ​ຊາດ ເພື່ອ​ຊຸກ­ຍູ້-ສົ່ງ­ເສີມ ອະ­ນຸ​ຮັກ​ປົກ​ປັກ​ຮັກ­ສາ​ສິ່ງ­ແວ­ດລ້ອມ ໃຫ້​ຄວາມ​ສົມ​ດຸນ​ທາງ​ທຳ​ມະ​ຊາດ ທັງ​ເປັນ​ການ​ພັດ­ທະ­ນາ ແລະ ຂະ­ຫຍາຍ​ສັດ​ນ້ຳ-ສັດ­ປ່າ​ໃຫ້​ມີ​ຄວາມ​ສົມ­ບູນ ຍືນ​ຍົງ ຄຽງ​ຄູ່​ກັບ​ຊີ­ວິດ-ສັງ­ຄົມ.

    ການ​ສ້າງ​ຂະ​ບວນ​ການ​ປ່ອຍ​ສັດ​ນ້ຳ-ສັດ­ປ່າ​ໄລ­ຍະ​ເດືອນ​ກໍ­ລະ­ກົດ​ຂອງ​ທຸກໆ​ປີ ໄດ້​ຈັດ​ຂຶ້ນ​ຢ່າງ​ເປັນ​ຂະ​ບວນ​ຟົດ­ຟື້ນ​ໃນ​ທົ່ວ​ປະ­ເທດ ເວົ້າ​ລວມ ເວົ້າ​ສະ­ເພາະ​ຢູ່​ເມືອງ​ກໍ່​ໄດ້​ຈັດ​ຕັ້ງ​ປະ­ຕິ­ບັດ​ຢ່າງ​ຕໍ່​ເນື່ອງ ເຊັ່ນ​ປີ 2015 ໄດ້​ປ່ອຍ​ຢູ່ 2 ຈຸດ ປ່ອຍ​ປາ 30.000 ໂຕ ປີ 2016 ປ່ອຍ​ຢູ່ 2 ຈຸດ ປ່ອຍ​ປາ 200.000 ໂຕ ປີ 2017 ປ່ອຍ​ຢູ່ 5 ຈຸດ ປ່ອຍ​ປາ 310.000 ໂຕ ໃນ​ນີ້ ບໍ່​ນັບ​ບຸກ­ຄົນ ນິ­ຕິ­ບຸກ­ຄົນ​ທີ່​ປ່ອຍ​ໃນ​ໜອງ​ຂອງ​ຕົນ​ເອງ ສຳ­ລັບ​ປີ 2018 ໄດ້​ຈັດ​ພິ­ທີ​ປ່ອຍ​ໄປ​ແລ້ວ​ຄັ້ງ​ທີ 1 ຢູ່​ໜອງ​ໝີ ເຂດ​ບ້ານ​ເວີນ​ແຄນ ປ່ອຍ​ປາ 61.000 ໂຕ ສຳ­ລັບ​ຄັ້ງ​ນີ້​ເປັນ​ຄັ້ງ​ທີ 2 ໂດຍ​ໄດ້​ຮັບ​ການ​ອຸ­ປະ­ຖຳ​ລູກ​ປາ​ຈາກ​ບໍ­ລິ­ສັດ​ສົມ​ສະ­ໜຸກ​ຟາມ 50.000 ໂຕ ບໍ­ລິ­ສັດ XP 5.000 ໂຕ ບ້ານ​ນາ­ທາມ 3.000 ໂຕ ບ້າ​ນາ​ຊອນ 3.000 ໂຕ ບໍ­ລິ­ສັດ​ລາວ​ອິນ​ໂດ-ໄຊ​ນາກ​ຣຸບ ມະ­ຫາ­ຊົນ 5.000 ໂຕ ທ່ານ​ເຈົ້າ​ຄອງ ນວ 11.000 ໂຕ ແລະ ພາກ­ສ່ວນ​ອື່ນໆ​ອີກ​ລວມ​ລູກ​ປາ 200.000 ກວ່າ​ໂຕ ໃນ​ນີ້​ມີ​ປາ​ນິນ ປາ­ໄນ ປາ­ປາກ ປາ­ເຂັງ ແລະ ປາ­ດຸກ ນອກ​ນີ້ ຍັງ​ຈະ​ລະ­ດົມ​ໃຫ້​ບ້ານ​ທີ່​ມີ​ເງື່ອນ­ໄຂ​ປ່ອຍ​ຕື່ມ​ຈຳ­ນວນ​ໜຶ່ງ.

ຂ່າວທີ່ກ່ຽວຂ້ອງ