ຂ່າວຫຼ້າສຸດ

ໂຈະກໍ່ສ້າງຕຶກ ບີເອັມ ພລາຊາ ຢູ່ດ່ານສາກົນຂົວມິດຕະພາບລາວ-ໄທ 1

285 23 ກ.ກ. 2018 ຂ່າວໜ້າ​ໜຶ່ງ

   ທ່ານ ແກ້ວ​ພິ­ລາ​ວັນ ອາ​ໄພ​ລາດ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ໄດ້​ຊີ້​ແຈງ​ກ່ຽວ​ກັບ​ໂຄງ­ການ​ກໍ່­ສ້າງ​ຕຶກ​ບີ​ເອັມ ພລາ​ຊາ ຕໍ່​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 5 ຂອງ​ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ​ຊຸດ​ທີ 1 ວ່າ: ຕຶກ​ບີ​ເອັມ​ພລາ​ຊາ​ຕັ້ງ​ຢູ່​ດິນ​ລັດ​ຄຸ້ມ​ຄອງ​ເບື້ອງ​ຂວາ​ມື​ປະ­ຕູ­ໂຂງ​ເຂົ້າ​ດ່ານ​ພາ­ສີ​ຂົວ​ມິດ­ຕະ­ພາບ​ລາວ-ໄທ 1 ໂດຍ​ແມ່ນ​ບໍ­ລິ­ສັດ ບີ​ເອັມ ກຣຸບ ຈຳ­ກັດ​ເປັນ​ເຈົ້າ​ຂອງ​ໂຄງ­ການ ໃນ​ເນື້ອ­ທີ່​ສຳ​ປະ­ທານ 37.150 ຕາ​ແມັດ ເຊິ່ງ​ການ​ກໍ່­ສ້າງ​ຕຶກ​ດັ່ງ­ກ່າວ​ແມ່ນ​ໄດ້​ຮັບ​ການ​ອະ­ນຸ­ມັດ​ການ​ປຸກ​ສ້າງ​ຈາກ​ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ ນະ­ຄອນ­ຫຼວງ​ວຽງ​ຈັນ ປັດ­ຈຸ­ບັນ​ກໍ່­ສ້າງ​ສຳ­ເລັດ 60% ແລະ ໄດ້​ໂຈະ​ການ​ກໍ່­ສ້າງ​ແຕ່​ທ້າຍ​ປີ 2015 ເປັນ­ຕົ້ນ​ມາ ດ້ວຍ​ເຫດ­ຜົນ​ທີ່​ວ່າ ບໍ­ລິ­ສັດ ບີ​ເອັມ ກຣຸບ ຈຳ­ກັດ ໄດ້​ສະ­ເໜີ​ຍົກ​ລະ­ດັບ​ການ​ພັດ­ທະ­ນາ​ສູນ​ການ​ຄ້າ ບີ​ເອັມ ພລາ​ຊາ ຕໍ່​ທ່ານ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ກ່ຽວ​ການ​ຍົກ​ລະ­ດັບ​ການ​ພັດ­ທະ­ນາ​ສູນ​ການ​ຄ້າ​ບີ​ເອັມ ພລາ​ຊາ ຢູ່​ດ່ານ​ສາ­ກົນ​ຂົວ​ມິດ­ຕະ­ພາບ​ລາວ-ໄທ 1 ແລະ ກອງ​ປະ­ຊຸມ​ເຈົ້າ​ຄອງ ຮອງ​ເຈົ້າ​ຄອງ ໃນ​ເດືອນ​ມິ­ຖຸ­ນາ 2015 ບໍ່​ເຫັນ​ດີ​ໃຫ້​ມີ​ການ​ຍົກ​ລະ­ດັບ​ຕຶກ​ດັ່ງ­ກ່າວ​ເປັນ​ເຂດ​ເສດ­ຖະ­ກິດ​ພິ­ເສດ ເນື່ອງ​ຈາ​ກວ່າ​ມີ​ຄວາມ​ແອ​ອັດ​ຫຼາຍ​ແລ້ວ​ຈະ​ເຮັດ​ໃຫ້​ເຂດ​ພື້ນ​ທີ່​ຂອງ​ດ່ານ​ຂົວ​ມິດ­ຕະ­ພາບ​ລາວ-ໄທ 1 ແຄບ​ລົງ ພ້ອມ​ນັ້ນ ຕາມ​ການ​ຊີ້​ນຳ​ຂອງ​ທ່ານ ສົມ​ສະ­ຫວາດ ເລັ່ງ​ສະ​ຫວັດ ຮອງ​ນາ­ຍົກ­ລັດ­ຖະ­ມົນ­ຕີ ໃນ​ກອງ​ປະ­ຊຸມ​ເດືອນ ກຸມ­ພາ 2015 ກ່ຽວ​ກັບ​ການ​ແກ້​ໄຂ​ບັນ­ຫາ​ເນື້ອ­ທີ່​ດ່ານ​ສາ­ກົນ​ຂົວ​ມິດ­ຕະ­ພາບ​ລາວ-ໄທ 1 ຂອງ​ເຂດ​ເສດ­ຖະ­ກິດ​ສະ­ເພາະ ໄດ້​ຊີ້​ນຳ​ວ່າ ພື້ນ​ທີ່​ບໍ­ລິ­ເວນ​ຂົວ​ມິດ­ຕະ­ພາບ​ລາວ-ໄທ 1 ຂ້ອນ​ຂ້າງ​ແອ​ອັດ ແລະ ຄັບ­ແຄບ ມອບ​ໃຫ້​ອົງ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ຊີ້​ນຳ​ຂະ­ແໜງ­ການ​ກ່ຽວ­ຂ້ອງ ປຶກ­ສາ​ຫາ­ລື​ກຳ­ນົດ​ຂອບ​ເຂດ​ພື້ນ​ທີ່​ຂອງ​ດ່ານ​ຄືນ­ໃໝ່ ລວມ​ທັງ​ເນື້ອ­ທີ່​ອ້ອມ​ຮອບ​ເຂດ​ດັ່ງ­ກ່າວ​ທີ່​ເຫັນ​ວ່າ​ມີ​ຄວາມ​ຈຳ­ເປັນ ເພື່ອ​ສະ­ຫງວນ​ໄວ້​ໃຫ້­ການ​ຂະ­ຫຍາຍ​ດ່ານ​ໃນ​ອະ­ນາ­ຄົດ ຫຼັງ​ຈາກ​ນັ້ນ ສະ­ເໜີ​ມາ​ຍັງ​ລັດ­ຖະ­ບານ​ພິ­ຈາ­ລະ­ນາ​ຮັບ­ຮອງ​ເອົາ ແລະ ການ​ຂະ­ຫຍາຍ​ເນື້ອ­ທີ່​ດິນ​ເຂດ​ເສດ­ຖະ­ກິດ​ສະ­ເພາະ​ດົງ​ໂພ​ສີ 2 ແລະ ເຂດ​ເສດ­ຖະ­ກິດ​ສະ­ເພາະ​ດົງ​ໂພ​ສີ 1 ທີ່​ມີ​ເນື້ອ­ທີ່​ປະ­ມານ 61 ເຮັກ­ຕາ ເຊິ່ງ​ເນື້ອ­ທີ່​ດັ່ງ­ກ່າວ​ເປັນ​ເນື້ອ­ທີ່​ດິນ​ເປົ່າ​ຫວ່າງ​ຂອງ​ປະ­ຊາ­ຊົນ ທີ່​ຍັງ​ບໍ່​ທັນ​ໄດ້​ຮັບ​ການ​ພັດ­ທະ­ນາ ສະ­ນັ້ນ ມອບ​ໃຫ້​ຄະ­ນະ​ຮັບ­ຜິດ­ຊອບ​ວຽກ​ງານ​ສຳ​ຫຼວດ ເກັບ​ກຳ​ຂໍ້​ມູນ​ສິດ​ນຳ​ໃຊ້​ສິ່ງ​ປຸກ​ສ້າງ ແລະ ຜົນ­ລະ­ປູກ​ຢູ່​ເຂດ​ເສດ­ຖະ­ກິດ​ສະ­ເພາະ​ດົງ​ໂພ​ສີ 2 ຕາມ​ຂໍ້​ຕົກ­ລົງ​ແຕ່ງ­ຕັ້ງ​ສະ­ບັບ​ເລກ​ທີ 1280/ຈ​ນວ ເລີ່ມ​ສຳ​ຫຼວດ ເກັບ​ກຳ​ຂໍ້​ມູນ​ລາຍ​ງານ​ແລ້ວ​ສະ­ເໜີ​ຜູ້​ພັດ­ທະ­ນາ​ຊົດ​ເຊີຍ​ຕາມ​ລະ­ບຽບ​ການ ເພື່ອ​ກ້າວ​ໄປ​ສູ່​ການ​ເຊັນ​ສັນ­ຍາ ແລະ ສ້າງ­ຕັ້ງ​ເຂດ​ຢ່າງ​ເປັນ​ທາງ​ການ ນອກ​ນີ້ ປະ­ທານ ບໍ­ລິ­ສັດ ບີ​ເອັມ​ກຣຸບ ຈຳ­ກັດ ເຫັນ​ດີ​ໃຫ້​ຄວາມ​ຮ່ວມ​ມື​ໃນ​ການ​ມອບ​ເນື້ອ­ທີ່​ດິນ ແລະ ສິ່ງ​ປຸກ​ສ້າງ​ສູນ​ການ​ຄ້າ​ບີ​ເອັມ ພລາ​ຊາ ທີ່​ບໍ­ລິ­ສັດ​ໄດ້​ມີ​ສັນ­ຍາ​ເຊົ່າ​ສຳ​ປະ­ທານ​ກັບ​ນະ­ຄອນ­ຫຼວງ​ວຽງ​ຈັນ​ຄືນ​ໃຫ້​ລັດ ເພື່ອ​ນຳ​ໃຊ້​ເຂົ້າ​ໃນ​ການ​ຂະ­ຫຍາຍ​ດ່ານ​ໃນ​ອະ­ນາ­ຄົດ ບົນ​ພື້ນ­ຖານ​ການ​ປຶກ­ສາ​ຫາ­ລື ແລະ ເປັນ​ເອ­ກະ​ພາບ​ທັງ​ສອງ​ຝ່າຍ.

ຂ່າວທີ່ກ່ຽວຂ້ອງ