ຂ່າວຫຼ້າສຸດ

ການຄັດເລືອກຜະລິດຕະພັນສື່ ໃນຫົວຂໍ້ປີທ່ອງທ່ຽວລາວ

190 23 ກ.ກ. 2018 ຂ່າວໜ້າ​ໜຶ່ງ
ການຄັດເລືອກຜະລິດຕະພັນສື່ ໃນຫົວຂໍ້ປີທ່ອງທ່ຽວລາວ

    ເນື່ອງ​ໃນ​ໂອ­ກາດ​ວັນ​ສື່​ມວນ​ຊົນ ຄົບ­ຮອບ 68 ປີ ແລະ ປີ​ທ່ອງ​ທ່ຽວ​ລາວ 2018 ສະ­ມາ­ຄົມ​ນັກ​ຂ່າວ​ແຫ່ງ ສປປ ລາວ ຈະ​ໄດ້​ຄັດ​ເລືອກ​ຜະ­ລິດ​ຕະ​ພັນ​ສື່ ແລະ ພິມ​ຈຳ­ໜ່າຍ​ດີ­ເດັ່ນ​ໃນ​ຫົວ­ຂໍ້ ປີ​ທ່ອງ​ທ່ຽວ​ລາວ.

    ວັນ​ທີ 19 ກໍ­ລະ­ກົດ 2018 ທີ່​ກະ­ຊວງ ຖວ​ທ ທ່ານ ສະ­ຫວັນ​ຄອນ ຣາ​ຊ​ມຸນ​ຕຣີ ຮອງ​ລັດ­ຖະ­ມົນ­ຕີ ກະ ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ທັງ​ເປັນ​ປະ­ທານ​ສະ­ມາ­ຄົມ​ນັກ​ຂ່າວ ແຫ່ງ ສປປ ລາວ ໄດ້​ຖະ­ແຫຼງ​ຂ່າວ​ກ່ຽວ​ກັບ​ມາດ­ຕະ­ຖານ ຂັ້ນ​ຕອນ​ການ​ຄັດ​ເລືອກ ການ​ສົ່ງ ແລະ ລາ­ງວັນ​ຜະ­ລິດ​ຕະ​ພັນ​ສື່ ແລະ ພິມ​ຈຳ­ໜ່າຍ​ດີ­ເດັ່ນ ຄື: ຜະ­ລິດ​ຕະ​ພັນ​ທີ່​ຈະ​ສົ່ງ​ປະ­ກອບ​ມີ 5 ປະ­ເພດ ເຊັ່ນ: ຂ່າວ ບົດ​ສາ­ລະ​ຄະ­ດີ ພາບ​ນິ້ງ ພາບ​ວີ​ດີ​ໂອ ແລະ ປຶ້ມ​ຂໍ້​ມູນ​ຂ່າວ­ສານ​ດ້ານ​ການ­ທ່ອງ­ທ່ຽວ​ປີ​ທ່ອງ​ທ່ຽວ​ລາວ 2018 ເຊິ່ງ​ຜະ­ລິດ​ຕະ​ພັນ​ເຫຼົ່າ­ນັ້ນ​ໄດ້​ພິມ​ຈຳ­ໜ່າຍ ແລະ ອອກ​ອາ­ກາດ ໃນ​ວັນ​ທີ 13 ສິງ­ຫາ 2017 ຫາ ວັນ​ທີ 5 ສິງ­ຫາ 2018 ຢູ່​ໜັງ­ສື­ພິມ ວາ­ລະ­ສານ ວິ­ທະ­ຍຸ ໂທລະ­ພາບ ເວັບ​ໄຊ ແລະ ສຳ­ນັກ​ພິມ​ຈຳ­ໜ່າຍ​ຕ່າງໆ​ໃນ​ຂອບ​ເຂດ​ທົ່ວ​ປະ­ເທດ  ໃນ​ນີ້​ຜະ­ລິດ​ຕະ​ພັນ​ແຕ່​ລະ​ປະ­ເພດ​ຈະ​ໄດ້​ຮັບ​ລາ­ງວັນ​ປະ­ເພດ​ລະ  5 ລ້ານ​ກີບ ພ້ອມ​ດ້ວຍ​ໃບ​ກຽດ​ຕິ​ຄຸນ.

    ເງື່ອນ­ໄຂ ແລະ ມາດ­ຕະ­ຖານ​ຜະ­ລິດ​ຕະ​ພັນ ອົງ­ການ​ສື່ ແລະ ສຳ­ນັກ​ພິມ​ຕ່າງໆ​ໃນ​ຂອບ​ເຂດ​ທົ່ວ​ປະ­ເທດ​ສາ­ມາດ​ຄັດ​ເລືອກ​ຜະ­ລິດ​ຕະ​ພັນ​ເດັ່ນ​ຂອງ​ຕົນ ແລະ ສົ່ງ​ໄປ​ແຂ່ງ­ຂັນ​ໂດຍ​ບໍ່​ເສຍ​ຄ່າ ແລະ ຜະ­ລິດ​ຕະ​ພັນ​ທີ່​ຈະ​ສົ່ງ​ໄປ​ນັ້ນ ຕ້ອງ​ຄົບ​ປັດ​ໄຈ​ອົງ​ປະ­ກອບ​ຂອງ​ມັນ ມີ​ເນື້ອ​ໃນ​ສ່ອງ​ແສງ​ເຖິງ​ປີ​ທ່ອງ​ທ່ຽວ​ລາວ 2018  ແລະ ອົງ­ການ​ສື່ ຫຼື ສຳ­ນັກ​ພິມ​ຕ້ອງ​ອັດ​ຜະ­ລິດ​ຕະ​ພັນ​ດີ­ເດັ່ນ ຊື່​ຫົວ­ຂໍ້ ຄວາມ​ຍາວ ວັນ​ອອກ​ອາ­ກາດ ຫຼື ພິມ​ຈຳ­ໜ່າຍ ຊື່​ຜູ້​ຜະ­ລິດ ທີ່­ຢູ່ ແລະ ເລກ​ໂທ​ຕິດ­ຕໍ່​ຂອງ​ຜູ້​ສົ່ງ​ລົງ​ໃສ່​ແຜ່ນ​ຊີ​ດີ ຫຼື ດີ​ວີ​ດີ ຢ່າງ​ລະ​ສອງ​ແຜ່ນ​ແລ້ວ​ຕິດ​ໜ້າ​ປົກ​ທີ່​ມີ​ຂໍ້​ມູນ​ພື້ນ­ຖານ​ໃສ່ ພ້ອມ​ທັງ​ມີ​ການ​ເຊັນ​ຢັ້ງ­ຢືນ-ຈ້ຳ​ກາ​ຈາກ​ອົງ­ການ​ທີ່​ສັງ­ກັດ​ຢູ່ ແລະ ບໍ່​ເຄີຍ​ສົ່ງ​ໄປ​ແຂ່ງ­ຂັນ​ຢູ່​ທີ່​ອື່ນ ນອກ​ນີ້ ອົງ­ການ​ສື່ ຫຼື ສຳ­ນັກ​ພິມ​ໜຶ່ງໆ​ສາ­ມາດ​ສົ່ງ​ຜະ­ລິດ​ຕະ​ພັນ​ດີ­ເດັ່ນ​ປະ­ເພດ​ລະ​ຢ່າງ ແລະ ສາ­ມາດ​ສົ່ງ​ໄດ້ 5 ປະ­ເພດ.

    ສຳ­ລັບ​ສະ­ຖານ­ທີ່​ສົ່ງ​ຜະ­ລິດ​ຕະ​ພັນ ສາ­ມາດ​ສົ່ງ​ໃຫ້​ຫົວ­ໜ້າ​ຫ້ອງ­ການ​ສະ­ມາ­ຄົມ​ນັກ​ຂ່າວ​ແຫ່ງ ສປປ ລາວ ທ່ານ ທອງ​ວັນ ບຸນ​ບົວ­ທອງ ຢູ່​ຫ້ອງ­ການ​ສະ­ມາ­ຄົມ​ນັກ​ຂ່າວ​ແຫ່ງ ສປປ ລາວ ຫຼັງ​ໃໝ່ ຫຼື ຫ້ອງ­ການ​ໂທລະ­ພາບ​ແຫ່ງ​ຊາດ​ລາວ ບໍ່​ໃຫ້​ກາຍ​ວັນ​ທີ 5 ສິງ­ຫາ 2018 ພາຍ­ຫຼັງ​ທີ່​ຄະ­ນະ​ກຳ­ມະ­ການ​ລວບ​ລວມ​ຕັດ­ສິນ​ແລ້ວ​ແມ່ນ​ຈະ​ມອບ​ລາ­ງວັນ​ໃນ​ວັນ​ທີ 13 ສິງ­ຫາ 2018 ໂດຍ​ການ​ມອບ​ຂອງ​ການ​ນຳ​ຂັ້ນ​ສູງ.

ຂ່າວທີ່ກ່ຽວຂ້ອງ