ຂ່າວຫຼ້າສຸດ

ຈະໄດ້ຕັດຕົ້ນຝາງແດງ 9 ຕົ້ນທີ່ໂກນ ແລະ ບິດບ້ຽວຢູ່ຖະໜົນສຸພານຸວົງ

226 23 ກ.ກ. 2018 ຂ່າວໜ້າ​ໜຶ່ງ
ຈະໄດ້ຕັດຕົ້ນຝາງແດງ 9 ຕົ້ນທີ່ໂກນ ແລະ ບິດບ້ຽວຢູ່ຖະໜົນສຸພານຸວົງ

    ເພື່ອ​ຈັດ​ຕັ້ງ​ປະ­ຕິ­ບັດ ແລະ ຜັນ​ຂະ­ຫຍາຍ​ນະ­ໂຍ­ບາຍ 6 ສ ຂອງ​ນະ­ຄອນ­ຫຼວງ​ວຽງ​ຈັນ (ນວ) ໂດຍ​ສະ­ເພາະ​ແມ່ນ ສ ສີ­ຂຽວ ໃຫ້​ປາ­ກົດ​ຜົນ​ເປັນ​ຈິງ ທັງ​ເປັນ​ການ​ຜັນ​ຂະ­ຫຍາຍ​ມະ­ຕິ​ຕົກ­ລົງ​ຂອງ​ອົງ­ການ​ປົກ­ຄອງ ນວ ລົງ​ວັນ​ທີ 25 ກັນ­ຍາ 2015 ກ່ຽວ​ກັບ​ແຜນ​ວຽກ ແລະ ມາດ​ຕະ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ວຽງ​ຈັນ​ສະ­ອາດ ໄລ­ຍະ​ສະ­ເພາະ​ໜ້າ​ຮອດ​ປີ 2020 ນອກ​ນີ້ ກໍ່​ເພື່ອ​ຄວາມ​ປອດ​ໄພ​ທີ່​ຈະ​ເກີດ​ຂຶ້ນ​ຕາມ​ຖະ­ໜົນ​ຫົນ­ທາງ​ຈາກ​ອຸ­ບັດ​ຕິ​ເຫດ​ຕົ້ນ­ໄມ້​ຫັກ​ທັບ ດັ່ງ­ນັ້ນ ນວ ໄດ້​ມອບ​ໃຫ້​ຫ້ອງ­ການ​ຄຸ້ມ​ຄອງ ແລະ ບໍ­ລິ­ການ​ຕົວ​ເມືອງ​ວຽງ​ຈັນ (ຄບຕ) ຕັດ​ຕອນ​ຮອນ​ງ່າ­ໄມ້ ແລະ ຕັດ​ຕົ້ນ­ໄມ້​ທີ່​ເຫັນ​ວ່າ​ບໍ່​ມີ​ຄວາມ​ຮັບ­ປະ­ກັນ​ຢູ່​ຕາມ​ຖະ­ໜົນ​ສາຍ​ຕ່າງໆ​ໃນ ນວ.

     ທ່ານ ອຳ​ພາ​ວັນ ມະ­ນີ​ວັນ ຫົວ­ໜ້າ​ຂະ­ແໜງ​ຄຸ້ມ​ຄອງ​ສວນ​ສາ­ທາ­ລະ­ນະ ແລະ ປະ­ດັບ​ປະ­ດາ​ຕົວ​ເມືອງ ຄບຕ ໃຫ້​ສຳ­ພາດ​ວັນ​ທີ 19 ກໍ­ລະ­ກົດ 2018 ວ່າ: ຂະ­ແໜງ​ພວກ​ເຮົາ​ເປັນ​ຂະ­ແໜງ​ໜຶ່ງ​ທີ່​ມີ­ໜ້າ​ທີ່​ຮັບ­ຜິດ­ຊອບ​ໃນ​ການ​ຄຸ້ມ​ຄອງ​ບູ­ລະ­ນະ​ຮັກ­ສາ​ສວນ​ສາ­ທາ­ລະ­ນະ​ໃນ​ຕົວ​ເມືອງ ຕົ້ນ­ໄມ້​ສາ­ທາ­ລະ­ນະ​ຕາມ​ແຄມ​ທາງ​ສາຍ​ຫຼັກ ແລະ ສາຍ​ສຳ­ຮອງ ໄຟ​ປະ­ດັບ​ສວນ​ສາ­ທາ­ລະ­ນະ ແລະ ປ້າຍ​ໄຟ LED ໃນ ນວ ໂດຍ​ສະ­ເພາະ ວຽກ​ຄຸ້ມ​ຄອງ​ຕົ້ນ­ໄມ້​ສາ­ທາ­ລະ­ນະ​ໃນ​ຕົວ​ເມືອງ​ຕາມ​ເສັ້ນ­ທາງ​ສາຍ​ຫຼັກ​ໃຫ້​ມີ​ຄວາມ​ປອດ​ໄພ ມີ​ສີ­ຂຽວ​ເພີ່ມ​ຂຶ້ນ ມີ​ຄວາມ​ສວຍ​ງາມ ແລະ ມີ​ຄວາມ​ຮົ່ມ​ເຢັນ ປັດ​ຈຸ ບັນ​ມີ​ຕົ້ນ­ໄມ້​ຕາມ​ສາຍ​ທາງ​ສາຍ​ຫຼັກ ແລະ ສາຍ​ສຳ­ຮອງ​ທັງ​ໝົດ 25 ເສັ້ນ ມີ​ຈຳ­ນວນ​ຕົ້ນ­ໄມ້​ທັງ​ໝົດ 8.048 ຕົ້ນ ໃນ​ນັ້ນ ຕົ້ນ­ໄມ້​ຮົ່ມ​ເຢັນ 887 ຕົ້ນ ຕົ້ນ­ໄມ້​ໃຫ້​ດອກ 7.161 ຕົ້ນ ໃນ​ແຕ່​ລະ​ປີ​ຂະ­ແໜງ​ພວກ​ເຮົາ​ໄດ້​ຂຶ້ນ​ແຜນ​ເພື່ອ​ຂໍ​ງົບ­ປະ­ມານ​ຈາກ ນວ ເພື່ອ​ມາ​ຈັດ​ຕັ້ງ​ປະ­ຕິ­ບັດ​ວຽກ​ງານ​ຕັດ​ຮອນ​ງ່າ­ໄມ້​ຕາມ​ເສັ້ນ­ທາງ​ດັ່ງ­ກ່າວ ເຊິ່ງ​ພວກ​ເຮົາ​ມີ​ຄວາມ​ຈຳ­ເປັນ​ຢາກ​ຕັດ​ແຕ່ງ​ຕົ້ນ­ໄມ້​ແຕ່​ລະ​ເສັ້ນ­ທາງ​ໃຫ້​ເປັນ​ລະ­ບຽບ​ສວຍ​ງາມ​ທຸກ​ຕົ້ນ​ແຕ່​ອີງ­ໃສ່​ງົບ­ປະ­ມານ​ມີ​ຈຳ­ກັດ ການ​ຂຶ້ນ​ແຜນ​ໄດ້​ຂຶ້ນ​ແຜນ​ສະ­ເພາະ​ຕົ້ນ­ໄມ້​ທີ່​ມີ​ຄວາມ​ສ່ຽງ​ຕໍ່​ຜູ້​ສັນ­ຈອນ​ຕາມ​ເສັ້ນ­ທາງ​ເປັນ­ຕົ້ນ​ໄມ້​ໂດກ ໄມ້​ຕາຍ­ຢືນ ແລະ ງ່າ.

     ສຳ­ລັບ​ການ​ສະ­ເໜີ​ຂໍ​ຕັດ​ຕົ້ນ​ຝາງ​ແດງ​ແຄມ​ຖະ­ໜົນ​ສຸ​ພາ­ນຸ​ວົງ ເຂດ​ເດີ່ນ​ບິນ​ສາ­ກົນ​ວັດ​ໄຕ ເມືອງ​ສີ​ໂຄດ​ຕະ­ບອງ ໂດຍ​ອີງ­ໃສ່​ການ​ລົງ​ສຳ​ຫຼວດ​ຕົວ​ຈິງ​ຂອງ​ວິ­ຊາ​ການ ຄບຕ ເຫັນ​ວ່າ ຕົ້ນ​ຝາງ​ແດງ​ມີ​ທັງ​ໝົດ 15 ຕົ້ນ ມີ​ຄວາມ​ສູງ​ປະ­ມານ 5-6 ແມັດ ໜ້າ​ຕັດ​ຂອງ​ຕົ້ນ­ໄມ້ ປະ­ມານ 30-50 ຊັງ​ຕີ​ແມັດ ສ່ວນ​ຫຼາຍ​ແມ່ນ​ມີ​ລຳ­ຕົ້ນ​ໂກນ​ກາງ ບິດ​ບ້ຽວ ປູກ​ບໍ່​ເປັນ​ລະ­ບຽບ​ຍາມ​ລົມ​ພັດ​ແຮງ​ມັກ​ຫັກ​ເປັນ​ອັນ­ຕະ­ລາຍ​ຕໍ່​ພາ­ຫະ­ນະ ແລະ ຜູ້​ສັນ­ຈອນ​ໃນ​ເສັ້ນ­ທາງ​ດັ່ງ­ກ່າວ ໃນ​ນັ້ນ​ຈະ​ໄດ້​ຕັດ​ຕົ້ນ​ຝາງ​ແດງ​ອອກ​ໝົດ​ຕົ້ນ​ຖິ້ມ ຈຳ­ນວນ 9 ຕົ້ນ​ທີ່​ໂກນ​ກາງ ແລະ ບິດ​ບ້ຽວ ສ່ວນ​ທີ່​ຍັງ​ເຫຼືອ 6 ຕົ້ນ​ຈະ​ໄດ້​ຕັດ​ຮອນ​ເປັນ​ຟຸ່ມ​ໃຫ້​ສວຍ​ງາມ ຕໍ່​ບັນ­ຫາ​ນີ້​ທາງ ຄບຕ ແມ່ນ​ໄດ້​ຮັບ​ການ​ອະ­ນຸ­ຍາດ​ຈາກ​ການ​ນຳ ນວ ດັ່ງ­ນັ້ນ ຈຶ່ງ​ແຈ້ງ​ມາ​ຍັງ​ພາກ­ສ່ວນ​ຕ່າງໆ ສັງ­ຄົມ ແລະ ປະ­ຊາ­ຊົນ​ບັນ­ດາ­ເຜົ່າ​ຈົ່ງ​ຮັບ​ຊາບ ສຳ­ລັບ​ການ­ຈັດ­ຕັ້ງ​ປະ­ຕິ­ບັດ​ຈະ​ໄດ້​ຈັດ​ຂຶ້ນ​ໃນ​ໄວໆ​ນີ້ ໃນ​ມື້​ວັນ​ເສົາ ແລະ ວັນ​ອາ­ທິດ ເປັນ​ວັນ​ພັກ​ທີ່​ບໍ່​ສ້າງ​ຄວາມ​ຫຍຸ້ງ­ຍາກ​ໃຫ້​ແກ່​ຜູ້​ໄປ​ການ ດັ່ງ­ນັ້ນ ເວ­ລາ​ຈັດ​ຕັ້ງ​ປະ­ຕິ­ບັດ​ການ​ໄປ​ມາ​ບໍ່​ສະ­ດວກ​ກໍ່​ຕ້ອງ​ຂໍ​ອະ­ໄພ.

ຂ່າວທີ່ກ່ຽວຂ້ອງ