ຂ່າວຫຼ້າສຸດ

ພ້ອມກັນສືບທອດສິລະປະວັດທະນະທຳເປົ່າແຄນ

202 23 ກ.ກ. 2018 ຂ່າວໜ້າ​ໜຶ່ງ
ພ້ອມກັນສືບທອດສິລະປະວັດທະນະທຳເປົ່າແຄນ

   ປັດ­ຈຸ­ບັນ​ສຽງ​ແຄນ​ລາວ​ໄດ້​ຖືກ​ຮັບ­ຮອງ​ເປັນ​ມໍ­ລະ­ດົກ​ນາມ​ມະ​ທຳ​ຂອງ​ມວນ​ມະ­ນຸດ​ໃນ​ທົ່ວ​ໂລກ ເຊິ່ງ​ເຮັດ​ໃຫ້​ປະ­ຊາ­ຊົນ​ລາວ​ບັນ­ດາ­ເຜົ່າ​ມີ​ຄວາມ​ເອກ­ອ້າງ​ທະ​ນົງ​ໃຈ ແລະ ພ້ອມ​ກັນ​ສືບ​ທອດ​ປົກ​ປັກ​ຮັກ­ສາ​ສຽງ​ແຄນ​ໃຫ້​ມີ​ຄວາມ​ຍືນ​ຍົງ​ຢູ່​ຄູ່​ກັບ​ຄົນ​ລາວ​ຕະ­ຫຼອດ​ໄປ.

   ທ່ານ ຄຳ​ສວນ ວົງ​ທອງ­ຄຳ ສິ­ລະ​ປິນ​ຫຼຽນ​ຄຳ​ອິນ­ດູ­ຈີນ ທັງ​ເປັນ​ອາ­ຈານ​ສອນ​ດົນ­ຕີ​ພື້ນ​ເມືອງ ໂຮງ­ຮຽນ​ສິ­ລະ​ປະ​ແຫ່ງ​ຊາດ ແລະ ສະ­ໂມ­ສອນ​ສືບ​ທອດ​ສິ­ລະ​ປະ​ວັດ­ທະ­ນະ­ທຳ​ລາວ​ດ່ານ​ຊ້າງ ໃຫ້​ສຳ­ພາດ​ວ່າ: ແຄນ​ເປັນ​ສິ­ລະ​ປະ​ວັດ­ທະ­ນະ­ທຳ​ທີ່­ຢູ່​ຄູ່​ກັບ​ການ​ດຳ­ລົງ​ຊີ­ວິດ​ຂອງ​ປະ­ຊາ­ຊົນ​ລາວ ແຕ່​ເໜືອ​ຮອດ​ໃຕ້​ມາ​ແຕ່​ບູ­ຮານ​ນະ​ການ ເຊິ່ງ​ຕົນ​ເປັນ​ບຸກ­ຄົນ​ໜຶ່ງ​ທີ່​ມີ​ຄວາມ​ມັກ​ຮັກ​ໃນ​ດົນ­ຕີ​ພື້ນ​ບ້ານ​ຂອງ​ລາວ ໂດຍ​ສະ­ເພາະ ແມ່ນ​ສຽງ​ແຄນ​ທີ່​ມີ​ສຽງ​ອອນ­ຊອນ ປະ­ກອບ​ໃສ່​ດົນ­ຕີ​ຕ່າງໆ​ໃຫ້​ມີ​ຄວາມ​ເບີກ­ບານ​ມ່ວນ­ຊື່ນ​ລື່ນ­ເລີງ ດັ່ງ­ນັ້ນ ຕົນ​ໄດ້​ເຂົ້າ​ຮຽນ​ສິ­ລະ​ປະ​ດົນ­ຕີ​ພື້ນ​ບ້ານ​ຢູ່​ໂຮງ­ຮຽນ​ສິ­ລະ​ປະ​ແຫ່ງ​ຊາດ ພາຍ­ຫຼັງ​ທີ່​ຮຽນ​ຈົບ​ແລ້ວ​ແມ່ນ​ໄດ້​ເປັນ​ອາ­ຈານ​ສອນ​ຢູ່​ໂຮງ­ຮຽນ​ດັ່ງ­ກ່າວ ນອກ​ນີ້ ໂດຍ​ໄດ້​ຖືກ​ແຕ່ງ­ຕັ້ງ​ຈາກ​ທ່ານ ບົວ​ເງິນ ຊາ​ພູ​ວົງ ສິ­ລະ​ປິນ​ແຫ່ງ​ຊາດ ຮອງ​ລັດ­ຖະ­ມົນ­ຕີ​ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ໄດ້​ຊີ້​ນຳ​ໃຫ້​ເປັນ​ອາ­ຈານ​ສິດ­ສອນ​ສິ­ລະ​ປະ​ດົນ­ຕີ​ພື້ນ​ບ້ານ​ໃນ​ວັນ​ເສົາ-ວັນ​ທິດ ຢູ່​ສະ­ໂມ­ສອນ​ສືບ​ທອດ​ສິ­ລະ​ປະ​ວັດ­ທະ­ນະ­ທຳ​ດ່ານ​ຊ້າງ ໃນ​ນີ້​ຈະ​ມີ​ພາກ​ບັງ­ຄັບ​ຄື ນັກ­ຮຽນ​ທີ່​ມາ​ຮຽນ​ຢູ່​ສະ­ໂມ­ສອນ​ດັ່ງ­ກ່າວ ແມ່ນ​ຕ້ອງ​ໄດ້​ຮຽນ​ເປົ່າ​ແຄນ ຈາກ​ນັ້ນ ໄດ້​ຮຽນ​ຮູ້​ກ່ຽວ​ກັບ​ການ​ຟ້ອນ ລຳ ແລະ ອື່ນໆ ເພື່ອ​ເປັນ​ການ​ປຸກ­ລະ­ດົມ​ແນວ​ຄິດ​ຈິດ­ໃຈ​ຂອງ​ເດັກ­ນ້ອຍ​ໃຫ້​ໃຊ້​ເວ­ລາ​ຫວ່າງ​ໃຫ້​ເປັນ​ປະ­ໂຫຍດ​ຕໍ່​ກັບ​ດົນ­ຕີ​ພື້ນ​ບ້ານ​ຂອງ​ລາວ ພ້ອມ​ນັ້ນ ທັງ​ເປັນ​ການ​ປູກ​ຈິດ​ສຳ­ນຶກ​ໃຫ້​ເດັກ­ນ້ອຍ​ມີ​ຄວາມ​ມັກ​ຮັກ​ໃນ​ສຽງ​ແຄນ​ລາວ ພ້ອມ​ກັນ​ອະ­ນຸ​ຮັກ​ວັດ­ທະ­ນະ­ທຳ​ອັນ​ດີ­ງາມ​ຂອງ​ລາວ ໃຫ້​ມີ​ຄວາມ​ຍືນ​ຍົງ​ຕະ­ຫຼອດ​ໄປ ປັດ­ຈຸ­ບັນ​ສຽງ​ແຄນ​ລາວ​ໄດ້​ຖືກ​ຮັບ­ຮອງ​ເປັນ​ມໍ­ລະ­ດົກ​ດ້ານ​ນາມ​ມະ​ທຳ​ຂອງ​ມວນ​ມະ­ນຸດ ຈາກ​ອົງ­ການ​ອຸຍ​ແນ​ສ​ໂກ ໄດ້​ເປັນ​ສິ່ງ​ໜຶ່ງ​ທີ່​ເຮັດ​ໃຫ້​ຄົນ​ລາວ​ມີ​ຄວາມ​ເອກ­ອ້າງ​ທະ​ນົງ​ໃຈ​ໃນ​ຄວາມ​ເປັນ​ລາວ ເຮັດ​ໃຫ້​ຫຼາຍໆ​ປະ­ເທດ​ໄດ້​ຮູ້­ຈັກ​ກັບ​ປະ­ເທດ​ລາວ​ຫຼາຍ​ຂຶ້ນ.

   ຂໍ​ຮຽກ­ຮ້ອງ​ມາ​ຍັງ​ເຍົາ­ວະ​ຊົນ​ທຸກ​ທົ່ວ​ໜ້າ​ແຕ່​ເໜືອ​ຮອດ​ໃຕ້​ໃຫ້​ມາ​ຮຽນ​ຮູ້​ການ​ເປົ່າ​ແຄນ ໂດຍ​ບໍ່​ເສຍ​ຄ່າ ຢູ່​ສະ­ໂມ­ສອນ​ສືບ​ທອດ​ສິ­ລະ​ປະ​ວັດ­ທະ­ນະ­ທຳ​ດ່ານ​ຊ້າງ ເຊິ່ງ​ມີ​ຜົນ​ດີ​ຕໍ່​ການ​ບໍ­ລິ­ຫານ​ປອດ ເຮັດ​ໃຫ້​ປອດ​ແຂງ­ແຮງ ທັງ​ເປັນ​ການ​ອະ­ນຸ​ຮັກ​ວັດ­ທະ­ນະ­ທຳ​ອັນ​ດີ­ງາມ​ຂອງ​ຊາດ​ໃຫ້​ມີ​ຄວາມ​ຍືນ​ຍົງ ແລະ ໃຫ້​ຕ່າງ­ປະ­ເທດ​ຮັບ​ຮູ້​ວ່າ​ມີ​ສຽງ​ແຄນ​ບ່ອນ​ໃດ​ຍ່ອມ​ມີ​ຄົນ​ລາວ​ໃນ​ສະ­ຖານ­ທີ່​ນັ້ນ ແລະ ອື່ນໆ.

   ສຳ­ລັບ​ສະ­ໂມ­ສອນ​ສືບ​ທອດ​ສິ­ລະ​ປະ​ວັດ­ທະ­ນະ­ທຳ​ດ່ານ​ຊ້າງ ໄດ້​ສ້າງ­ຕັ້ງ​ມາ​ໄດ້ 9 ປີ ໂດຍ​ການ​ສະ­ໜັບ­ສະ­ໜູນ​ຂອງ​ທ່ານ ບົວ​ສອນ ບຸບ­ຜາ​ວັນ ອະ­ດີດ​ນາ­ຍົກ­ລັດ­ຖະ­ມົນ­ຕີ ແນ­ໃສ່​ໃຫ້​ເດັກ­ນ້ອຍ​ທີ່​ເກີດ​ໃໝ່​ຂຶ້ນ​ມາ​ໄດ້​ຮຽນ​ຮູ້​ສິ­ລະ​ປະ​ວັດ­ທະ­ນະ­ທຳ​ອັນ​ດີ­ງາມ​ຂອງ​ຊາດ ໃຫ້​ມີ​ຄວາມ​ຍືນ​ຍົງ​ຕະ­ຫຼອດ​ໄປ ແລະ ທ່ານ ຄຳ​ສວນ ວົງ​ທອງ­ຄຳ ໄດ້​ມາ​ເປັນ​ອາ­ຈານ​ສິດ­ສອນ​ຢູ່​ສະ­ໂມ­ສອນ​ດັ່ງ­ກ່າວ ແຕ່​ປີ 2009 ເປັນ­ຕົ້ນ​ມາ ປັດ­ຈຸ­ບັນ​ມີ​ນັກ­ຮຽນ​ທັງ​ໝົດ 87 ຄົນ ຍິງ 37 ຄົນ.

ຂ່າວທີ່ກ່ຽວຂ້ອງ