ຂ່າວຫຼ້າສຸດ

ເປຕັງ ນວ ກຽມພ້ອມໃນ ຊຽງຂວາງ ເກມ

137 23 ກ.ກ. 2018 ວົງຈອນກີລາ

   ຕາມ​ການ​ໃຫ້​ສຳ­ພາດ​ຂອງ ທ່ານ ຄຳ​ເກີດ ຟອງ​ສາ­ນຸ​ວົງ ປະ­ທານ​ສະ­ຫະ­ພັນ​ເປ​ຕັງ​ນະ­ຄອນຫຼວງ​ວຽງ​ຈັນ (ນວ) ໃຫ້​ສຳ­ພາດ​ເມື່ອ​ບໍ່​ດົນ​ມາ​ນີ້​ວ່າ: ໃນ​ການ​ເຂົ້າ​ຮ່ວມ​ການ​ແຂ່ງ­ຂັນ​ເປ​ຕັງ ທົ່ວ​ປະ­ເທດ ຄັ້ງ​ທີ 10 ຊີງ​ຂັນ​ພະ­ນະ​ທ່າ​ນາ­ຍົກ​ລັດ​ທະ​ມົນ­ຕີ​ແຫ່ງ ສປປ ລາວ ສະ­ຫະ­ພັນ​ເປ​ຕັງ ນວ ໄດ້​ສົ່ງ​ນັກ­ກີ­ລາ​ຊາຍ​ເຂົ້າ​ຮ່ວມ​ແຂ່ງ­ຂັນ​ທັງ​ໝົດ 6 ຄົນ ໃນ 4 ລາຍ­ການ ຄື: ທີມ​ດ່ຽວ ທີມ​ຄູ່ ທີມ​ຊຸດ ຊຸດ​ຕິ້ງ ແລະ ຮຸ່ນ​ອາ­ວຸ­ໂສ​ທີມ​ຄູ່ 1 ທີມ ເຂົ້າ​ຮ່ວມ ຜົນ​ການ​ແຂ່ງ­ຂັນ​ອອກ​ມາ​ນັກ­ກີ­ລາ ນວ ສາ­ມາດ​ສ້າງ​ຜົນ­ງານ​ຍາດ​ໄດ້ 1 ຫຼຽນ​ຄຳ ຈາກ​ປະ­ເພດ​ທີມ​ວີ​ໄອ​ພີ ອາ­ວຸ­ໂສ ແລະ 1 ຫຼຽນ​ທອງ​ຊຸດ​ຕິ້ງ​ຊາຍ.

   ສ່ວນ​ບັນ­ຫາ​ນັກ­ກີ­ລາ​ເປ​ຕັງ​ຍິງ​ນັ້ນ ປັດ­ຈຸ­ບັນ​ກໍ່​ສາ­ມາດ​ຄັດ​ເລືອກ​ໄດ້​ແລ້ວ ໂດຍ​ໄດ້​ນັກ­ກີ­ລາ​ທີ່​ເປັນ​ນັກ­ຮຽນ ຈຳ­ນວນ 6 ຄົນ ແລະ ຊຸດ​ນີ້ ກໍ່​ຈະ​ເປັນ​ຊຸດ​ທີ່​ກຽມ​ເຂົ້າ​ຮ່ວມ​ງານ​ກີ­ລາ​ນັກ­ຮຽນ​ທົ່ວ​ປະ­ເທດ ຄັ້ງ​ທີ 7 ທີ່​ແຂວງ​ສາ­ລະ​ວັນ ເປັນ​ເຈົ້າ­ພາບ ໃນ​ປີ 2020.

   ເຖິງ​ຢ່າງ­ໃດ​ກໍ່​ຕາມ ສິ່ງ​ສຳ­ຄັນ​ທີ່​ສຸດ ການ​ນຳ​ຂັ້ນ​ເທິງ ກໍ່​ຄື​ທ່ານ​ເຈົ້າ​ຄອງ ນວ ໄດ້​ມີ​ແນວ­ທາງ​ວິ­ທີ​ການ​ແກ້​ໄຂ​ເປັນ​ທີ່​ຮຽບ​ຮ້ອຍ ໂດຍ​ອອກ​ຂໍ້​ຕົກ­ລົງ​ແຕ່ງ­ຕັ້ງ​ບັນ­ດາ​ເຈົ້າ­ເມືອງ ພະ­ແນກ­ການ ແລະ ຫ້ອງ­ການ​ທັງ​ພາກ​ລັດ ແລະ ເອ­ກະ​ຊົນ​ທີ່​ມີ​ທ່າ­ແຮງ​ອ້ອມ​ຂ້າງ ນວ ເພື່ອ​ມາ​ຮັບ­ຜິດ­ຊອບ​ໃນ​ການ​ປຸກ­ລະ­ດົມ​ຂົນ­ຂວາຍ​ຊ່ວຍ​ກັນ​ນຳ​ພາກ​ນັກ­ກີ­ລາ​ລູກ​ຫຼານ​ຊາວ ນວ ກຽມ​ເຂົ້າ​ຮ່ວມ​ງານ​ດັ່ງ­ກ່າວ ສະ­ເພາະ​ເປ​ຕັງ​ພວກ​ເຮົາ​ກໍ່​ແມ່ນ​ທ່ານ​ເຈົ້າ­ເມືອງ​ເມືອງ​ສີ​ສັກ​ຕະ​ນາກ ເປັນ​ຜູ້​ຊີ້​ນຳ ເຊື່ອ​ວ່າ ໃນ​ການ​ເຂົ້າ​ຮ່ວມ ຊຽງ​ຂວາງ ເກມ 2018 ນັກ­ກີ­ລາ​ຈະ​ໄດ້​ຮັບ​ນະ­ໂຍ­ບາຍ ແລະ ມີ​ຄວາມ​ສະ­ດວກ​ໃນ​ການ​ເກັບ​ຕົວ­ຢ່າງ​ແນ່­ນອນ.

   ສຳ­ລັບ​ນັກ​ກິ­ລາ​ໃນ​ຈຳ­ນວນ 12 ຄົນ ຍິງ 6 ຄົນ ຂອງ ນວ ຈະ​ໄດ້​ຮ່ວມ​ໃນ​ຊຽງ​ຂວາງ ເກມ 2018 11 ລາຍ­ການ ຕາມ​ເຈົ້າ­ພາບ​ກຳ­ນົດ​ໄວ້ ຄື: ປະ­ເພດ​ດ່ຽວ​ຊາຍ-ຍິງ ທີມ​ຄູ່​ຊາຍ-ຍິງ ທີມ​ຊຸດ​ຊາຍ-ຍິງ ຊຸດ​ຕິ້ງ​ຊາຍ-ຍິງ ທີມ​ຄູ່​ປະ­ສົມ ທີມ​ຊຸດ ຊາຍ 2 ຍິງ 1 ແລະ ທີມ​ຊຸດ ຊາຍ 1 ຍິງ 2.

ຂ່າວທີ່ກ່ຽວຂ້ອງ