ສຕລ ຄັດເລືອກນັກກີລາ ຢູ-16 ຮ່ວມຊີງຂັນອາຊຽນ 2018

83 23 ກ.ກ. 2018 ວົງຈອນກີລາ

   ອີງ​ຕາມ​ການ​ລາຍ​ງານ​ຂອງ​ເວັບ​ໄຊ ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ (ສຕລ) ແຈ້ງ​ໃຫ້​ຊາບ​ວ່າ: ທ່ານ ກັນ­ລະ­ຍາ ສີ​ສົມ​ຫວັງ ຫົວ­ໜ້າ​ຄູ​ເຝິກ​ໃຫຍ່​ທີມ​ຊາດ​ລາວ ຮຸ່ນ​ອາ­ຍຸ​ບໍ່​ເກີນ 16 ປີ ແມ່ນ​ສາ­ມາດ​ຄັດ​ເລືອກ​ນັກ­ກີ­ລາ​ໄດ້​ຈຳ­ນວນ 29 ຄົນ​ແລ້ວ ແລະ ຈະ​ຄັດ​ເລືອກ​ເອົາ 23 ຄົນ​ສຸດ​ທ້າຍ ກ່ອນ​ອອກ​ເດີນ­ທາງ​ໄປ​ເຂົ້າ​ຮ່ວມ​ການ​ແຂ່ງ­ຂັນ​ເຕະ­ບານ​ຊາຍ ຊີງ​ຂັນ​ອາ​ຊຽນ ຮຸ່ນ​ອາ­ຍຸ​ບໍ່​ເກີນ 16 ປີ ຫຼື “AFF U16 CHAMPIONSHIP 2018” ທີ່​ເມືອງ​ຊູ​ຣາ​ບາ​ຢາ ປະ­ເທດ​ອິນ​ໂດ​ເນ​ເຊຍ ໃນ​ລະ­ຫວ່າງ​ວັນ​ທີ 29 ກໍ­ລະ­ກົດ ຫາ 11 ສິງ­ຫາ​ນີ້.

   ສຳ­ລັບ​ການ​ແຂ່ງ­ຂັນ​ເຕະ­ບານ​ຊາຍ ຊີງ​ຂັນ​ອາ​ຊຽນ ຮຸ່ນ​ອາ­ຍຸ​ບໍ່​ເກີນ 16 ປີ ມີ​ທີມ​ເຂົ້າ​ຮ່ວມ​ທັງ​ໝົດ 11 ປະ­ເທດ ແບ່ງ​ອອກ​ເປັນ 2 ກຸ່ມ ຄື: ກຸ່ມ ເອ ມີ ຫວຽດ­ນາມ ມຽນ​ມາ ກຳ­ປູ­ເຈຍ ອິນ​ໂດ​ເນ​ເຊຍ ຕີ​ມໍ ເລ​ສ​ເຕ ແລະ ຟີ​ລິບ​ປິນ ກຸ່ມ ບີ ມີ ໄທ ມາ​ເລ​ເຊຍ ລາວ ບຣູ​ໄນ ແລະ ສິງ­ກະ­ໂປ.

   ສ່ວນ​ຕາ­ຕະ­ລາງ​ການ​ແຂ່ງ­ຂັນ​ຂອງ​ທີມ​ຊາດ​ລາວ ໃນ​ວັນ​ທີ 30 ກໍ­ລະ­ກົດ 2018 ເວ­ລາ 15:30 ໂມງ ພົບ ມາ​ເລ​ເຊຍ ວັນ​ທີ 1 ສິງ­ຫາ 2018 ເວ­ລາ 19:00 ໂມງ ພົບ ສິງ­ກະ­ໂປ ວັນ​ທີ 5 ສິງ­ຫາ 2018 ເວ­ລາ 19:00 ໂມງ  ພົບ ໄທ ແລະ ວັນ​ທີ 7 ສິງ­ຫາ 2018 ເວ­ລາ 19:00 ໂມງ ພົບ ບຣູ​ໄນ ເຊິ່ງ​ທຸກ​ນັດ​ທີ່​ທີມ​ຊາດ​ລາວ ລົງ​ແຂ່ງ­ຂັນ ແມ່ນ​ຈະ​ແຂ່ງ­ຂັນ​ຢູ່​ທີ່​ສະ­ໜາມ JOKO SAMUDRO STA DIUM ກຳ­ນົດ​ການ​ເດີນ­ທາງ ແມ່ນ​ໃນ​ວັນ​ທີ 26 ກໍ­ລະ­ກົດ​ນີ້.

ຂ່າວທີ່ກ່ຽວຂ້ອງ