ຂ່າວຫຼ້າສຸດ

ສະພາປະຊາຊົນ ນວ ພິຈາລະນາ ແລະ ຮັບຮອງຫຼາຍບັນຫາສຳຄັນ

246 19 ກ.ກ. 2018 ຫົວຂໍ້ຂ່າວອື່ນໆ
ສະພາປະຊາຊົນ ນວ ພິຈາລະນາ ແລະ ຮັບຮອງຫຼາຍບັນຫາສຳຄັນ

    ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 5 ຂອງ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ ຊຸດ​ທີ I ໄດ້​ປິດ​ລົງ​ດ້ວຍ​ຜົນ­ສຳ­ເລັດ​ໃນ​ວັນ​ທີ 18 ກໍ­ລະ­ກົດ 2018 ທີ່​ສຳ­ນັກ­ງານ​ອົງ­ການ​ປົກ­ຄອງ ນວ ໂດຍ​ເປັນ​ປະ­ທານ​ຂອງ​ທ່ານ ອາ­ນຸ­ພາບ ຕຸ​ນາ​ລົມ ປະ­ທານ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ ໃຫ້​ກຽດ​ເຂົ້າ​ຮ່ວມ​ຂອງ ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ  ສະ­ມາ­ຊິກ​ສະ­ພາ​ແຫ່ງ​ຊາດ  ສະ­ມາ­ຊິກ​ສະ­ພາ​ປະ­ຊາ­ຊົນ ນວ  ແລະ ພາກ­ສ່ວນ​ກ່ຽວ­ຂ້ອງ.

    ທ່ານ ອາ­ນຸ­ພາບ ຕຸ​ນາ​ລົມ ກ່າວ​ວ່າ: ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 5 ຂອງ​ສະ­ພາ​ປະ­ຊາ­ຊົນ ນວ ຊຸດ​ທີ I ໄດ້​ດຳ­ເນີນ​ມາ​ແຕ່​ວັນ​ທີ 16-18 ກໍ­ລະ­ກົດ 2018 ບັນ­ດາ​ທ່ານ​ຜູ້​ແທນ​ກອງ​ປະ­ຊຸມ​ໄດ້​ສຸມ​ທຸກ​ສະ­ຕິ​ປັນ­ຍາ​ໃນ​ການ​ຄົ້ນ­ຄວ້າ ປະ­ກອບ​ຄວາມ​ຄິດ​ເຫັນ​ຢ່າງ​ມີ​ເຫດ­ຜົນ ມີ​ເນື້ອ​ໃນ​ທີ່​ເລິກ­ເຊິ່ງ ພ້ອມ​ທັງ​ມີ​ຄວາມ​ເປັນ​ເອ­ກະ​ພາບ​ສູງ​ໃນ​ການ​ຄົ້ນ­ຄວ້າ ພິ­ຈາ­ລະ­ນາ ແລະ ຮັບ­ຮອງ​ເອົາ​ບັນ­ຫາ​ສຳ­ຄັນ​ຕ່າງໆ​ຂອງ​ນະ­ຄອນ­ຫຼວງ​ວຽງ​ຈັນ​ເຊັ່ນ: ກອງ​ປະ­ຊຸມ​ໄດ້​ພິ­ຈາ­ລະ­ນາ ແລະ ຮັບ­ຮອງ​ເອົາ​ບົດ​ລາຍ​ງານ​ຂອງ​ທ່ານ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ​ທະ ນາ​ເສດ­ຖະ­ກິດ-ສັງ­ຄົມ ແລະ ແຜນ​ງົບ­ປະ­ມານ 6 ເດືອນ​ຕົ້ນ​ປີ ແລະ ທິດ​ທາງ​ແຜນ​ວຽກ​ຈຸດ​ສຸມ 6 ເດືອນ​ທ້າຍ​ປີ 2018 ພິ­ຈາ­ລະ­ນາ ແລະ ຮັບ­ຮອງ​ເອົາ ບົດ​ສະ­ຫຼຸບ​ການ­ເຄື່ອນ­ໄຫວ​ວຽກ​ງານ 6 ເດືອນ​ຕົ້ນ​ປີ ແລະ ແຜນ​ວຽກ​ຈຸດ​ສຸມ 6 ເດືອນ​ທ້າຍ​ປີ 2018 ຂອງ​ຄະ­ນະ​ປະ­ຈຳ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ  ພິ­ຈາ­ລະ­ນາ ແລະ ຮັບ­ຮອງ ເອົາ​ນິ­ຕິ​ກຳ ຈຳ­ນວນ 2 ສະ­ບັບ ຄື: ຮ່າງ​ຂໍ້​ຕົກ­ລົງ​ຂອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ວ່າ​ດ້ວຍ​ການ​ກຳ­ນົດ​ຫົວ­ໜ່ວຍ​ລາ­ຄາ​ທົດ​ແທນ​ຄ່າ​ເສຍ​ຫາຍ​ໃຫ້​ຜູ້​ຖືກ​ຜົນ​ກະ­ທົບ​ຈາກ​ໂຄງ­ການ​ກໍ່­ສ້າງ​ທາງ​ດ່ວນ​ວຽງ​ຈັນ ຮ່າງ​ຂໍ້​ຕົກ­ລົງ​ຂອງ​ເຈົ້າ​ຄອງ ນະ­ຄອນ­ຫຼວງ​ວຽງ​ຈັນ ວ່າ​ດ້ວຍ​ການ​ຫຼຸດ­ຜ່ອນ​ອຸ­ບັດ​ຕິ​ເຫດ ແລະ ຮັກ­ສາ​ຄວາມ​ປອດ​ໄພ​ຕາມ​ຖະ­ໜົນ ທົ່ວ​ນະ­ຄອນ­ຫຼວງ​ວຽງ​ຈັນ ຮັບ​ຟັງ​ການ​ລາຍ​ງານ ຂອງ​ອົງ­ການ​ໄອ​ຍະ​ການ ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ 6 ເດືອນ​ຕົ້ນ​ປີ ແລະ ທິດ​ທາງ​ແຜນ­ການ 6 ເດືອນ​ທ້າຍ​ປີ 2018 ໂດຍ​ລົງ​ເລິກ​ຫົວ­ຂໍ້ “ການ​ຕິດ­ຕາມ​ກວດ­ກາ​ການ​ເຄົາ­ລົບ ແລະ ການ​ປະ­ຕິ­ບັດ​ກົດ­ໝາຍ​ໃຫ້​ຖືກ­ຕ້ອງ ແລະ ເປັນ​ເອ­ກະ​ພາບ​ຂອງ​ບັນ­ດາ​ກະ­ຊວງ ອົງ­ການ ແນວ​ລາວ​ສ້າງ​ຊາດ ອົງ​ການ­ຈັດ­ຕັ້ງ​ມະ­ຫາ­ຊົນ ອົງ​ການ­ຈັດ­ຕັ້ງ​ສັງ­ຄົມ ອົງ­ການ​ປົກ­ຄອງ​ທ້ອງ­ຖິ່ນ ວິ​ສາ​ຫະ​ກິດ ພົນ­ລະ­ເມືອງ” ຕາມ​ທີ່​ໄດ້​ກຳ­ນົດ​ໄວ້​ໃນ​ມາດ­ຕາ 10 ຂໍ້ 1 ຂອງ​ກົດ­ໝາຍ​ວ່າ​ດ້ວຍ​ອົງ­ການ​ໄອ​ຍະ​ການ​ປະ­ຊາ­ຊົນ ຮັບ​ຟັງ​ການ​ລາຍ​ງານ​ຂອງ​ສານ​ປະ­ຊາ­ຊົນ ນວ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ 6 ເດືອນ​ຕົ້ນ​ປີ ແລະ ທິດ​ທາງ​ແຜນ­ການ 6 ເດືອນ​ທ້າຍ​ປີ 2018 ລົງ​ເລິກ​ຫົວ­ຂໍ້: ການ​ເກັບ​ກຳ​ຂໍ້​ມູນ​ຫຼັກ​ຖານ ແລະ ການ​ຊັ່ງ­ຊາ​ຕີ​ລາ­ຄາ​ຫຼັກ​ຖານ ໃນ​ການ​ດຳ­ເນີນ​ຄະ­ດີ​ແພ່ງ ຕາມ​ມາດ­ຕາ 106 ແລະ ມາດ­ຕາ 118 ຂອງ​ກົດ­ໝາຍ​ວ່າ​ດ້ວຍ​ການ​ດຳ­ເນີນ​ຄະ­ດີ​ແພ່ງ ສະ­ບັບ​ປັບ­ປຸງ ປີ 2012 ຮັບ​ຟັງ​ການ​ລາຍ​ງານ​ຂອງ​ກອງ​ບັນ­ຊາ​ການ ປກສ ນະ­ຄອນ­ຫຼວງ​ວຽງ​ຈັນ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ 6 ເດືອນ​ຕົ້ນ​ປີ ແລະ ທິດ​ທາງ​ແຜນ­ການ 6 ເດືອນ​ທ້າຍ​ປີ 2018 ໂດຍ​ລົງ​ເລິກ​ຫົວ­ຂໍ້: ການ​ດຳ­ເນີນ​ການ​ສືບ­ສວນ-ສອບ​ສວນ ຂອງ​ເຈົ້າ​ໜ້າ­ທີ່​ຕຳ­ຫຼວດ ແລະ ການ​ຄຸ້ມ​ຄອງ ປ້ອງ​ກັນ​ນັກ­ໂທດ ຜູ້​ຖືກ​ຫາ ແລະ ຜູ້​ຝາກ​ຂັງ ຢູ່​ໃນ​ຄ້າຍ​ຄຸມ​ຂັງ​ດັດ​ສ້າງ ຮັບ​ຟັງ​ການ​ລາຍ​ງານ ຂອງ​ພະ​ແນກ​ຍຸ­ຕິ​ທຳ ນະ ຄອນ​ຫຼວງ​ວຽງ​ຈັນ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ຄຳ​ຕັດ­ສິນ​ຂອງ​ສານ ໃນ​ໄລ­ຍະ 6 ເດືອນ​ຕົ້ນ​ປີ ແລະ ທິດ​ທາງ​ແຜນ­ການ 6 ເດືອນ​ທ້າຍ​ປີ 2018 ໂດຍ​ລົງ​ເລິກ​ຫົວ­ຂໍ້: ການ­ຈັດ­ຕັ້ງ​ປະ­ຕິ­ບັດ​ຄຳ​ຕັດ­ສິນ​ຂອງ​ສານ ຕາມ​ມາດ­ຕາ 311 ຂໍ້ 8 ຂອງ​ກົດ­ໝາຍ​ວ່າ​ດ້ວຍ​ການ​ດຳ­ເນີນ​ຄະ­ດີ​ແພ່ງ ສະ­ບັບ​ປີ 2012 ພ້ອມ​ນັ້ນ ກອງ​ປະ­ຊຸມ​ຄັ້ງ​ນີ້​ຍັງ​ໄດ້​ຮັບ​ຟັງ​ການ​ອະ­ທິ­ບາຍ​ຊີ້​ແຈງ ຂອງ​ອົງ­ການ​ປົກ­ຄອງ ແລະ ພະ­ແນກ­ການ​ກ່ຽວ­ຂ້ອງ ກ່ຽວ​ກັບ​ບາງ​ບັນ­ຫາ​ພົ້ນ​ເດັ່ນ ທາງ​ດ້ານ​ເສດ­ຖະ­ກິດ-ສັງ­ຄົມ.

ຂ່າວທີ່ກ່ຽວຂ້ອງ