ສົ່ງເສີມການພັດທະນາຄຸນະພາບຂອງກຳລັງແຮງງານ

167 19 ກ.ກ. 2018 ຫົວຂໍ້ຂ່າວອື່ນໆ
ສົ່ງເສີມການພັດທະນາຄຸນະພາບຂອງກຳລັງແຮງງານ

   ສຳ­ລັບ ປີ 2018 ການ​ແຂ່ງ­ຂັນ​ສີ­ມື​ແຮງ​ງານ​ອາ​ຊຽນ ຄັ້ງ​ທີ 12 ໂດຍ​ການ​ເປັນ​ເຈົ້າ­ພາບ​ຂອງ​ປະ­ເທດ​ໄທ ເຊິ່ງ​ຈະ​ຈັດ​ຂຶ້ນ​ລະ­ຫວ່າງ​ວັນ​ທີ 26 ສິງ­ຫາ ຫາ 05 ກັນ­ຍາ 2018 ເຊິ່ງ​ເປັນ​ການ​ເຂົ້າ​ຮ່ວມ​ຄັ້ງ​ທີ 10 ຂອງ ສປປ ລາວ ແລະ ໄດ້​ກຳ­ນົດ​ເອົາ 7 ສາ­ຂາ​ຊ່າງ​ເຂົ້າ​ຮ່ວມ​ແຂ່ງ­ຂັນ​ຄື: ຊ່າງ​ກໍ່ ຊ່າງ​ປຸງ​ແຕ່ງ­ອາ­ຫານ ຊ່າງ​ຕິດ​ຕັ້ງ​ໄຟ­ຟ້າ​ໃນ​ອາ­ຄານ ຊ່າງ​ຈອດ​ໂລ­ຫະ ຊ່າງ​ຕັດ­ຫຍິບ​ເຄື່ອງ­ນຸ່ງ ຊ່າງ​ອອກ​ແບບ​ກຣາ​ຟິກ ແລະ ຊ່າງ​ໄມ້​ເຄື່ອງ​ເຮືອນ ລວມ​ມີ​ນັກ​ແຂ່ງ­ຂັນ​ຈຳ­ນວນ 13 ຄົນ ແລະ ຄູ​ເຝິກ 13 ຄົນ.

   ວັນ​ທີ 18 ກໍ­ລະ­ກົດ 2018 ຢູ່​ທີ່​ໂຮງ­ແຮມ​ລ້ານ​ຊ້າງ ນວ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ຈັດ​ພິ­ທີ​ຖະ­ແຫຼງ​ຂ່າວ​ລະ­ດົມ​ທຶນ​ເພື່ອ​ເຝິກ­ຊ້ອມ ແລະ ເດີນ­ທາງ​ເຂົ້າ​ຮ່ວມ​ແຂ່ງ­ຂັນ​ສີ­ມື​ແຮງ​ງານ​ອາ​ຊຽນ ຄັ້ງ​ທີ 12 ຢູ່​ທີ່​ປະ­ເທດ​ໄທ ຂອງ​ທິມ​ຊາດ​ລາວ ໂດຍ​ເປັນ​ປະ­ທານ​ຂອງ​ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ​ກະ­ຊວງ ຮສສ ມີ​ພາກ­ສ່ວນ​ທີ່​ກ່ຽວ­ຂ້ອງ ແລະ ແຂກ​ທີ່​ຖືກ​ເຊີນ​ເຂົ້າ​ຮ່ວມ.

   ການ​ແຂ່ງ­ຂັນ​ສີ­ມື​ແຮງ​ງານ ເພື່ອ​ສົ່ງ­ເສີມ​ການ​ພັດ­ທະ­ນາ​ຄຸ­ນະ­ພາບ​ຂອງ​ກຳ­ລັງ​ແຮງ​ງານ ແລະ ການ​ຮ່ວມ​ມື​ກັນ​ໃນ​ວຽກ​ງານ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ປັດ­ຈຸ­ບັນ​ການ​ກະ­ກຽມ​ຄວາມ​ພ້ອມ​ຂອງ​ນັກ​ແຂ່ງ­ຂັນ​ທີມ​ຊາດ​ລາວ ບາງ​ສາ­ຂາ​ຊ່າງ​ພວມ​ດຳ­ເນີນ​ການ​ເຝິກ­ຊ້ອມ​ໃຫ້​ແກ່​ນັກ­ກີ­ລາ​ຂອງ​ຕົນ ໂດຍ​ອິງ​ໃສ່​ຂໍ້​ສະ­ດວກ​ພື້ນ­ຖານ ແລະ ງົບ­ປະ­ມານ​ສ່ວນ​ໜຶ່ງ​ຂອງ​ເຂົາ­ເຈົ້າ​ເອງ ເຊິ່ງ​ງົບ­ປະ­ມານ​ທີ່​ຕ້ອງ­ການ​ເພື່ອ​ເຂົ້າ​ຮ່ວມ​ການ​ແຂ່ງ­ຂັນ​ສີ­ມື​ແຮງ​ງານ​ອາ​ຊຽນ ຄັ້ງ​ທີ 12 ແລະ ການ​ຍ້ອງ­ຍໍ​ຜົນ­ງານ​ຈຳ­ນວນ 590.887.000 ກີບ ແຕ່​ງົບ­ປະ­ມານ​ຈາກ​ການ​ລົງ­ທຶນ​ຂອງ​ລັດ​ໃນ​ວຽກ​ງານ​ແຂ່ງ­ຂັນ​ສີ­ມື​ແຮງ​ງານ​ມີ​ພຽງ​ຈຳ­ນວນ 260 ລ້ານ​ກີບ ເຊິ່ງ​ໄດ້​ກຳ­ນົດ​ການ​ນຳ​ໃຊ້​ໃນ 2 ກິດ­ຈະ­ກຳ ຄື: 1.ສົ່ງ​ຄະ­ນະ​ຄູ​ເຝິກ ແລະ ນັກ​ແຂ່ງ­ຂັນ​ທີມ​ຊາດ​ລາວ ຈຳ­ນວນ 6 ສາ­ຂາ​ວິ­ຊາ​ຊ່າງ​ໄປ​ເຝິກ­ຊ້ອມ​ທີ່​ປະ­ເທດ​ຫວຽດ­ນາມ ຈຳ­ນວນ 137.600.000 ກີບ ແລະ 2.ການ​ເຝິກ­ຊ້ອມ​ເຂັ້ມ​ພາຍ​ໃນ​ປະ­ເທດ​ພາຍ­ຫຼັງ​ຄະ­ນະ​ດັ່ງ­ກ່າວ​ກັບ​ຈາກ ສສ ຫວຽດ­ນາມ ຈຳ­ນວນ 122.400.000 ກີບ ໂດຍ​ອີງ​ຕາມ​ຄະ­ນະ​ກຳ­ມະ­ການ​ຊີ້​ນຳ​ລວມ ແລະ ອະ­ນຸ​ກຳ­ມະ­ການ​ລະ­ດົມ​ທຶນ ໄດ້​ປຶກ­ສາ​ຫາ­ລື ພ້ອມ​ທັງ​ກຳ­ນົດ​ກິດ­ຈະ­ກຳ​ເພື່ອ​ຫາ​ທຶນ​ສົມ­ທົບ​ງົບ­ປະ­ມານ​ຂອງ​ລັດ ຈະ​ມີ​ການ​ລະ­ດົມ​ທຶນ​ດ້ວຍ 3 ຮູບ​ແບບ​ຄື: 1. ການ​ສະ­ເໜີ​ຫ້ອງ​ວ່າ­ການ​ລັດ­ຖະ­ບານ​ພິ­ຈາ­ລະ­ນາ ແລະ ອະ­ນຸ­ມັດ​ການ​ອອກ​ສະ­ຫຼາກ​ແບບ​ມີ​ລາ­ງວັນ 2. ການ​ພິມ​ເສື້ອ​ທີ່​ລະ­ນຶກ​ເພື່ອ​ຈຳ­ໜ່າຍ ແລະ 3. ການ​ລະ­ດົມ​ທຶນ​ຈາກ​ພາກ­ສ່ວນ​ຕ່າງໆ.

ຂ່າວທີ່ກ່ຽວຂ້ອງ