ຂ່າວຫຼ້າສຸດ

ນັກຮຽນກຽດຕິສັກ ຍາດໄດ້ຫຼຽນຄຳສ້າງຜົນງານໃຫ້ປະເທດ

208 19 ກ.ກ. 2018 ຫົວຂໍ້ຂ່າວອື່ນໆ
ນັກຮຽນກຽດຕິສັກ ຍາດໄດ້ຫຼຽນຄຳສ້າງຜົນງານໃຫ້ປະເທດ

   ນັກ­ຮຽນ​ໂຮງ­ຮຽນ​ກຽດ​ຕິ​ສັກ​ນາໆຊາດ ເປັນ​ຕົວ​ແທນ​ຈາກ​ປະ­ເທດ​ລາວ ສາ­ມາດ​ຍາດ​ໄດ້​ຫຼຽນ​ຄຳ​ໃນ​ກຸ່ມ​ແຂ່ງ­ຂັນ​ສາ­ຂາ​ວິ­ຊາ​ຊີ­ວະ​ສາດ​ຫົວ­ຂໍ້“ປູກ​ໄໝ​ລ້ຽງ​ມ້ອນ”ໃນ​ງານ​ວາງ­ສະ­ແດງ​ນະ​ວັດ­ຕະ​ກຳ​ສິ່ງ​ປະ­ດິດ​ຂອງ​ນັກ­ວິ­ທະ­ຍາ­ສາດ​ຜູ້​ໜຸ່ມ​ນ້ອຍ​ທີ່​ນະ­ຄອນ­ຫຼວງ​ກົວ​ລາ​ລຳ​ເປີ ປະ­ເທດ​ມາ​ເລ​ເຊຍ ເປັນ​ເຈົ້າ­ພາບ​ຈັດ​ຂຶ້ນ​ວັນ​ທີ 9-13 ກໍ­ລະ­ກົດ 2018.

   ການ​ເຂົ້າ​ຮ່ວມ​ແຂ່ງ­ຂັນ​ຄັ້ງ​ນີ້ ນັກ­ຮຽນ​ຈາກ​ໂຮງ­ຮຽນ​ກຽດ​ຕິ​ສັກ​ນາໆຊາດ ເປັນ​ຕົວ​ແທນ​ປະ­ເທດ​ລາວ​ເຂົ້າ​ຮ່ວມ​ງານ​ວາງ­ສະ­ແດງ​ນະ​ວັດ­ຕະ​ກຳ​ສິ່ງ​ປະ­ດິດ​ຂອງ​ນັກ­ວິ­ທະ­ຍາ­ສາດ​ຜູ້​ໜຸ່ມ​ນ້ອຍ ເຊິ່ງ​ການ​ແຂ່ງ­ຂັນ​ມີ​ຫຼາຍ​ປະ­ເທດ​ເຂົ້າ​ຮ່ວມ​ຄື: ອິນ​ໂດ​ເນ​ເຊຍ ອິນ​ເດຍ ໄທ ຟີ​ລິບ​ປິນ ສະ­ຫະ­ລັດ​ອາ​ເມ​ຣິ​ກາ ກວມ ສີ​ລັງ­ກາ ຣັດ​ເຊຍ ແລະ ຈີນ ໃນ​ນັ້ນ ໂຮງ­ຮຽນ​ກຽດ​ຕິ​ສັກ​ນາໆຊາດ ໄດ້​ຄັດ​ເລືອກ​ນັກ­ຮຽນ​ເຂົ້າ​ຮ່ວມ​ແຂ່ງ­ຂັນ 13 ຄົນ ຍິງ 10 ຄົນ ແລະ ຄູ​ນຳ­ພາ 1 ຄົນ.

   ສ່ວນ​ການ​ເຂົ້າ​ຮ່ວມ​ແຂ່ງ­ຂັນ​ໄດ້​ແບ່ງ​ອອກ​ເປັນ 4 ກຸ່ມ​ຄື: ກຸ່ມ​ທີ 1 ແຂ່ງ­ຂັນ​ໃນ​ສາ­ຂາ​ວິ­ຊາ​ຊີ­ວະ​ສາດ ໃນ​ຫົວ­ຂໍ້“ປູກ​ໄໝ​ລ້ຽງ​ມ້ອນ” ກຸ່ມ​ທີ 2 ແຂ່ງ­ຂັນ​ໃນ​ສາ­ຂາ​ວິ­ຊາ​ວິ­ທະ­ຍາ­ສາດ​ເຕັກ​ໂນ​ໂລ​ຢີ ແລະ ຄະ­ນິດ­ສາດ ໃນ​ຫົວ­ຂໍ້ “ເຮືອນ​ອັດ​ສະ​ລິ​ຍະ” ກຸ່ມ​ທີ 3 ແຂ່ງ­ຂັນ​ໃນ​ສາ­ຂາ​ວິ­ຊາ​ວັດ­ຖຸ ສາ­ຂາ​ວິ­ຊາ​ຟີ​ຊິກ​ສາດ ແລະ ວິ­ສະ­ວະ­ກຳ​ສາດ ໃນ​ຫົວ­ຂໍ້“ແຂນ​ຫຸ່ນ​ຍົນ” ແລະ ກຸ່ມ​ທີ 4 ແຂ່ງ­ຂັນ​ສາ­ຂາ​ວິ­ຊາ​ວິ­ທະ­ຍາ­ສາດ​ສິ່ງ­ແວ­ດລ້ອມ ໃນ​ຫົວ­ຂໍ້ “ຫຼັງ­ຄາ​ສີ­ຂຽວ​ທີ່​ໃຫ້​ພະ­ລັງ­ງານ​ແບບ​ຍືນ​ຍົງ”.

   ສຳ­ລັບ​ຜົນ​ຂອງ​ການ​ແຂ່ງ­ຂັນ​ປາ­ກົດ​ວ່າ: ກຸ່ມ​ທີ 1 ແຂ່ງ­ຂັນ​ສາ­ຂາ​ວິ­ຊາ​ຊີ­ວະ​ສາດ ໃນ​ຫົວ­ຂໍ້“ປູກ​ໄໝ​ລ້ຽງ​ມ້ອນ” ສາ­ມາດ​ຍາດ​ໄດ້​ຫຼຽນ​ຄຳ ມາ​ຄອງ​ໄດ້​ສຳ­ເລັດ ແລະ ລາ­ງວັນ​ພິ­ເສດ​ສາ­ຂາ​ວິ­ຊາ​ຊີ­ວະ​ສາດ ເຊິ່ງ​ໃນ​ກຸ່ມ​ປະ­ກອບ​ມີ​ນາງ ທິບ​ສາຍ­ໃຈ ນາ​ທະ​ວົງ ນາງ ວະ​ນັດ­ດາ ປັນ­ຍາ​ສັດ­ທະ​ນາ​ສິນ ນາງ ກຸນ­ລະ­ສັດ­ຕີ ມະ­ນີ​ວົງ ແລະ ທ້າວ ກິດ​ຊະ­ໄນ ພົມ​ມະ​ວົງ­ສາ ກຸ່ມ​ທີ 2 ກຸ່ມ​ທີ 3 ແລະ ກຸ່ມ​ທີ 4 ໄດ້​ຮັບ​ຫຼຽນ​ທອງ ໃນ​ນັ້ນ  ກຸ່ມ​ທີ 3 ໄດ້​ຮັບ​ລາ­ງວັນ​ພິ­ເສດ ສາ­ຂາ​ການ​ນຳ​ໃຊ້​ພະ­ລັງ­ງານ​ໝູ­ນວຽນ​ຕື່ມ​ອີກ ເຊິ່ງ​ນັກ­ຮຽນ​ກຽດ​ຕິ​ສັກ​ນາໆຊາດ​ທີ່​ໄດ້​ຮັບ​ລາ­ງວັນ​ຄັ້ງ​ນີ້ ໄດ້​ນຳ​ເອົາ​ຊື່​ສຽງ​ມາ­ສູ່​ສະ​ຖາ​ບັນ​ຄອບ­ຄົວ ໂຮງ­ຮຽນ ແລະ ປະ­ເທດ​ຊາດ ທັງ​ເປັນ​ບົດ­ຮຽນ​ທີ່​ດີ​ໃຫ້​ແກ່​ນັກ­ຮຽນ​ຜູ້​ອື່ນໆ.

ຂ່າວທີ່ກ່ຽວຂ້ອງ