ຂ່າວຫຼ້າສຸດ

ເບີ່ງບ້ານເຂົາເອົາບົດຮຽນ 19/07/2018

147 19 ກ.ກ. 2018 ຫົວຂໍ້ຂ່າວອື່ນໆ

   ຄໍ​ລຳ​ປະ­ຈຳ​ວັນ​ນີ້ ໄດ້​ສັງ​ລວມ​ເອົາ​ຂ່າວ​ກ່ຽວ​ກັບ​ການ​ປົກ​ປ້ອງ​ຊັບ​ສິນ​ທາງ​ປັນ­ຍາ ກົດ­ໝາຍ​ສັ່ງ​ຫ້າມ​ສູບ­ຢາ​ຕາມ​ສະ­ຖານ­ທີ່​ຕ່າງໆ ແລະ ຄຳ​ສັ່ງ​ຫ້າມ​ໃຊ້​ຖົງ​ຢາງ ເຫດ­ການ​ເຫຼົ່າ​ນີ້​ເກີດ​ຂຶ້ນ​ຢູ່ ສປ ຈີນ ຍີ່­ປຸ່ນ ແລະ ອົດ​ສະ​ຕຣາ​ລີ ຕາມ​ລຳ­ດັບ.

   ທີ່ ສປ ຈີນ: ອີງ​ຕາມ​ແຫຼ່ງ​ຂ່າວ​ຈາກ​ໜັງ­ສື­ພິມ ຈາຍ​ນາ​ເດລີ (China Daily ຂອງ ສປ ຈີນ) ໜັງສື​ພິມ​ວຽງ​ຈັນ​ທາມ ສະ­ບັບ​ວັນ​ທີ 19 ເດືອນ​ນີ້ ໄດ້​ໃຫ້​ຮູ້​ວ່າ: ໃນ​ປັດ­ຈຸ­ບັນ ສປ ຈີນ ໃຫ້​ຄວາມ​ສຳ­ຄັນ​ເປັນ​ພິ­ເສດ​ຕໍ່​ການ​ປົກ​ປ້ອງ​ຊັບ​ສິນ​ທາງ​ປັນ­ຍາ ເຊິ່ງ​ອົງ­ການ​ສານ​ສູງ​ສຸດ​ຂອງ ສປ ຈີນ ໄດ້​ມີ​ແຜນ​ສ້າງ​ຫ້ອງ­ການ​ສານ​ສະ­ເພາະ​ເພີ່ມ​ຂຶ້ນ ເພື່ອ​ພິ​ຈາລະ​ນາ­ຄະ​ດີ​ທີ່​ພົວ­ພັນ​ກັບ​ບັນ­ຫາ​ຊັບ​ສິນ​ທາງ​ປັນຍາ ຫ້ອງ­ການ​ສານ​ທີ່​ວ່າ​ນີ້​ ຈະ​ເຮັດ​ໜ້າ­ທີ່​ແກ້​ໄຂ​ຄະ­ດີ​ຂັດ​ແຍ່ງ​ເລື່ອງ​ຊັບ​ສິນ​ທາງ​ປັນ­ຍາ ເພີ່ມ​ທະ­ວີ​ມາດ​ຕະ­ການ​ປົກ​ປ້ອງ​ເຄື່ອງ­ໝາຍ​ການ​ທີ່​ມີ​ຊື່​ສຽງ​ໂດ່ງ​ດັງ.

   ໃນ​ຕົ້ນ​ອາ­ທິດ​ທີ​ສອງ​ຂອງ​ເດືອນ​ກໍ­ລະ­ກົດ​ນີ້ ສານ​ສູງ​ໄດ້​ຈັດ​ຕັ້ງ​ກອງ​ປະ­ຊຸມ​ເພື່ອ​ຮັບ​ຟັງ​ກ່ຽວ​ກັບ​ຄະ­ດີ​ຊັບ​ສິນ​ທາງ​ປັນ­ຍາ​ ຢູ່​ແຂວງ​ຊານ​ຕຸງ ທ່ານ ຕາວ ໄກ​ຢວນ (Tao Kaiyuan) ຮອງ​ປະທານ​ສານ​ປະ­ຊາ­ຊົນ​ສູງ​ສຸດ​ຈີນ ໄດ້​ມີ​ຄຳ​ເຫັນ​ກ່ຽວ​ກັບ​ບັນ­ຫາ​ນີ້​ວ່າ: ບັນ­ດາ​ຫ້ອງ­ການ​ສານ​ຊັບ​ສິນ​ທາງ​ປັນ­ຍາ ​ຈະ​ສ້າງ​ຂຶ້ນ​ໃນ​ເຂດ​ແຄວ້ນ​ທີ່​ມີ​ຄວາມ​ຈຳ­ເປັນ​ ໃນ​ການ​ປົກ​ປ້ອງ​ນະ​ວັດ­ຕະ​ກຳ​ປະ­ດິດ​ສ້າງ​ຂຶ້ນ​ໃໝ່ ​ທີ່​ພວມ​ປະ​ເຊີນ​ກັບ​ບັນ­ຫາ​ທາງ​ກົດ­ໝາຍ ນັບ​ແຕ່​ປີ 2017 ເປັນ­ຕົ້ນ​ມາ ອົງ­ການ​ຍຸ­ຕິ​ທຳ​ຈີນ​ໄດ້​ຕົກ­ລົງ​ສ້າງ­ຕັ້ງ​ສານ​ຊັບ​ສິນ​ທາງ​ປັນ­ຍາ​ໃນ 16 ຕົວ​ເມືອງ​ໃຫຍ່ໆ ໃນ​ນັ້ນ ລວມ​ມີ​ນະ­ຄອນ​ນານ​ຈິງ ຮາງ​ຊູ ວູ​ຫານ ແລະ ຊຸ​ຈູ.

   ທີ່ ຍີ່­ປຸ່ນ: ມີ​ຂ່າວ​ທີ່​ອອກ​ມາ​ຫວ່າງ​ບໍ່​ດົນ​ມາ​ນີ້ວ່າ: ນະ­ຄອນ­ຫຼວງ​ໂຕ​ກຽວ​ໄດ້​ຮັບ­ຮອງ​ເອົາ​ກົດໝາຍ​ ທີ່​ກຳ­ນົດ​ມາດ​ຕະ­ການ​ເຫຼັກ​ໃສ່​ຜູ້​ລະ­ເມີດ​ຂໍ້​ຫ້າມ​ສູບ­ຢາ ດ້ວຍ​ການ​ປັບ​ໃໝ​ເປັນ​ເງິນ​ປະ­ມານ 3.700.000 ກີບ (ປະ­ມານ 455 ໂດ​ລາ​ສະ­ຫະລັດ).

   ໃນ​ປີ 2020 ຍີ່­ປຸ່ນ​ຈະ​ໄດ້​ເປັນ​ເຈົ້າ­ພາບ​ມະ​ຫະກຳ​ກີ­ລາ​ໂອ​ລິມ​ປິກ ດັ່ງ­ນັ້ນ ຈຶ່ງ​ຕ້ອງ​ໄດ້​ກຳ­ນົດ​ເຂດ​ປອດ​ຄວັນ​ຢາ­ສູບ​ຕາມ​ແຫ່ງ​ຕ່າງໆ​ຂອງ​ນະ­ຄອນ­ຫຼວງ ເຊັ່ນ: ຫ້າມ​ສູບ­ຢາ​ຢ່າງ​ເດັດ­ຂາດ​ຕາມ​ໂຮງ­ຮຽນ ນັບ​ແຕ່​ໂຮງ­ຮຽນ​ລ້ຽງ​ເດັກ​ຮອດ​ຊັ້ນ​ມັດ­ທະ­ຍົມ ສ່ວນ​ຢູ່​ຕາມ​ໂຮງ­ພະ­ຍາ­ບານ ແລະ ມະ­ຫາ­ວິ­ທະ­ຍາ­ໄລ​ນັ້ນ ​ສາ­ມາດ​ສູບ​ໄດ້​ສະ­ເພາະ​ໃນ​ສະ­ຖານ­ທີ່ ທີ່​ກຳ­ນົດ​ໄວ້​ຢູ່​ກາງ­ແຈ້ງ ຢູ່​ຮ້ານ​ອາ­ຫານ ບັນ­ດາ​ສິງ​ອົມ​ຄວັນ​ສາ­ມາດ​ສູບ­ຢາ​ໄດ້​ໃນ​ຮົ່ມ​ບ່ອນ​ທີ່​ມີ​ຄົນ​ກິນ​ດື່ມ ໃນ​ຊຸມ​ປີ­ຜ່ານ­ມາ ທາງ​ການ​ຍີ່­ປຸ່ນ​ໄດ້​ສະ­ໜັບ­ສະ­ໜູນ​ທາງ​ການ​ເງິນ​ ໃຫ້​ຮ້ານ​ອາ­ຫານ​ຈຳ­ນວນ​ໜຶ່ງ​ໃນ​ການ​ສ້າງ​ຫ້ອງ​ສະ­ເພາະ​ເປັນ​ບ່ອນ​ສູບ­ຢາ.

   ທີ່ ອົດ​ສະ​ຕຣາ​ລີ: ຢູ່​ລັດ​ຄວີນ​ສະ​ແລນ ອົດ​ສະ​ຕຣາ​ລີ ໄດ້​ມີ​ຄຳ​ສັ່ງ​ຫ້າມ​ໃຊ້​ຖົງ​ຢາງ (ຖົງ​ປະລາ​ສະ​ຕິກ) ປະ­ເພດ​ໃຊ້​ເທື່ອ​ດຽວ​ແລ້ວ​ຖິ້ມ​ໂລດ ເຊິ່ງ​ເປັນ​ປະ­ເພດ​ບາງໆ ເຊິ່ງ​ມີ​ຄວາມ​ໜາ​ໜ້ອຍ​ກວ່າ​ໄມ​ໂຄຼ​ເມັດ (Micromet) ສ່ວນ​ຖົງ​ຢາງ​ປະເພດ​ໜາໆໃຊ້​ໄດ້​ຫຼາຍ​ເທື່ອ​ນັ້ນ​ບໍ່​ນອນ​ຢູ່​ໃນ​ຄຳ​ສັ່ງ​ຫ້າມ​ນີ້.

   ທີ່​ຕ້ອງ​ມີ​ຄຳ​ສັ່ງ​ເດັດ­ຂາດ​ນີ້​ອອກ​ມາ ກໍ່​ເພາະວ່າ​ໃນ​ເຂດ​ທະ­ເລ​ອ້ອມ­ແອ້ມ​ລັດ​ນັ້ນ ​ເຕັມ​ໄປ​ດ້ວຍ​ຂີ້​ເຫຍື້ອ​ປະ­ລາ­ສະ­ຕິກ ຈຳ­ນວນ 75% ຂອງ​ຂີ້ເຫຍື້ອ​ທີ່​ເກັບ​ຂຶ້ນ​ມາ​ໄດ້​ນັ້ນ​ກໍ່​ມີ​ແຕ່​ຈຳ­ພວກ​ຈາກເຂດ​ຕື້ນໆ​ແຄມ​ຝັ່ງ​ເທົ່າ​ນັ້ນ ຂີ້​ເຫຍື້ອ​ທີ່​ຕົກ​ຄ້າງ ນີ້​ໄດ້​ກາຍ­ເປັນ​ອາ­ຫານ​ສຳ­ລັບ 90% ຂອງ​ຈຳນວນ​ນົກ ແລະ 30% ຂອງ​ບັນ­ດາ​ເຕົ່າ​ທີ່​ອາ­ໄສ​ຢູ່​ຕາມ​ບໍ­ລິ­ເວນ​ດັ່ງ­ກ່າວ ບັນ­ຫາ​ຂີ້​ເຫຍື້ອ​ທີ່​ລົ້ນ​ທະ­ເລ​ໄດ້​ກາຍ­ເປັນ​ສິ່ງ​ທ້າ​ທາຍ​ຕໍ່​ແຜນ​ພັດ­ທະ­ນາ ການ­ທ່ອງ­ທ່ຽວ​ຂອງ​ລັດ​ນີ້ ຄຳ​ສັ່ງ​ຫ້າມ​ດັ່ງ­ກ່າວ ເລີ່ມ​ປະ­ຕິ­ບັດ​ແຕ່​ວັນ​ທີ 1 ເດືອນ​ກໍ­ລະ­ກົດ​ປີ​ນີ້​ເປັນຕົ້ນ​ມາ.

ຂ່າວທີ່ກ່ຽວຂ້ອງ