ຂ່າວຫຼ້າສຸດ

ຢູ-23 ທີມຊາດລາວ ກຽມພົບ ເອັດສຊີຈີ ເມືອງທອງ 31 ສິງຫາ ນີ້

256 19 ກ.ກ. 2018 ວົງຈອນກີລາ
ຢູ-23 ທີມຊາດລາວ ກຽມພົບ ເອັດສຊີຈີ ເມືອງທອງ 31 ສິງຫາ ນີ້

   ເອັດ​ສ​ຊີ​ຈີ ກຸ່ມ​ບໍ­ລິ­ສັດ​ຊັ້ນ​ນຳ​ຜູ້​ຜະ­ລິດ ແລະ ຈຳ­ໜ່າຍ​ວັດ​ສະ​ດຸ​ກໍ່­ສ້າງ ຄຸ­ນະ­ພາບ​ດີ ພາຍ​ໃຕ້​ເຄື່ອງ­ໝາຍ​ສິນ­ຄ້າ ເອັດ​ສ​ຊີ​ຈີ ເສືອ ຊີ​ແພັກ ແລະ ຄັອດ​ໂຕ້ ຈັດ​ຖະ­ແຫຼງ​ຂ່າວ​ການ​ແຂ່ງ­ຂັນ​ເຕະ­ບານ​ນັດ​ພິ­ເສດ  SCG MUANG THONG UNITED ASEAN TOUR ຄັ້ງ​ທີ 2 ໃນ​ວັນ​ທີ 16 ກໍ­ລະ­ກົດ 2018 ຜ່ານ​ມາ ທີ່​ໂຮງ­ແຮມ​ລາວ​ພລາ​ຊາ ລະ­ຫວ່າງ ຢູ-23 ທີມ​ຊາດ​ລາວ ພົບ​ກັບ ສະ­ໂມ­ສອນ​ເອັດ​ສ​ຊີ​ຈີ  ເມືອງ​ທອງ ຢູ​ໄນ​ເຕັດ ໃນ​ວັນ​ທີ 31 ສິງ­ຫາ 2018 ທີ່​ສະ­ໜາມ​ກີ­ລາ​ແຫ່ງ​ຊາດ​ຫຼັກ 16 ເວ­ລາ 18:30 ໂມງ.

   ທ່ານ ບັນ­ຊາ ໄຊ​ພຣົມ ກຳ­ມະ­ການ​ຜູ້​ຈັດ­ການ​ບໍ­ລິ­ສັດ ເອັດ​ສ​ຊີ​ຈີ ເທຣດ​ດິ້ງ ລາວ​ຈຳ­ກັດ ໃນ​ທຸ­ລະ​ກິດຊີ­ມັງ ແລະ ວັດ​ສະ​ດຸ​ກໍ່­ສ້າງ ເອັດ​ສ​ຊີ​ຈີ ກ່າວ​ວ່າ: ເອັດ​ສ​ຊີ​ຈີ ມີ​ຄວາມ​ມຸ່ງ​ມັ່ນ​ເປັນ​ສ່ວນ​ໜຶ່ງ​ຂອງ​ການ​ພັດ­ທະ­ນາ ສປປ ລາວ ໃນ​ຫຼາຍ​ດ້ານ ລວມ​ທັງ​ເຍົາ­ວະ​ຊົນ ຈຶ່ງ​ໄດ້​ຈັດ­ການ​ແຂ່ງ­ຂັນ​ເຕະ­ບານ ນັດ​ພິ­ເສດ​ດັ່ງ­ກ່າວ ເຊິ່ງ​ຈະ​ເປັນ​ປະ­ໂຫຍດ​ຕໍ່​ການ​ພັດ­ທະ­ນາ​ສັກ­ກະ​ຍາ​ພາບ​ດ້ານ​ກີ­ລາ​ເຕະ­ບານ​ຂອງ​ທັງ​ສອງ​ຝ່າຍ ໂດຍ​ຄັ້ງ​ນີ້ ນັບ​ເປັນ​ຄັ້ງ​ທີ 2 ທີ່​ເອັດ​ສ​ຊີ​ຈີ ນຳ​ທີມ ເອັດ​ສ​ຊີ​ຈີ  ເມືອງ​ທອງ ມາ​ຍັງ ສປປ ລາວ ໂດຍ​ຄັ້ງ​ທີ່​ຜ່ານ​ມາ​ໄດ້​ຮັບ​ກະ­ແສ​ຕອບ​ຮັບ​ຢ່າງ​ເຫຼືອ​ລົ້ນ ມີ​ຜູ້​ຊົມ​ເຂົ້າ​ກວ່າ 9.000 ຄົນ ແລະ ມີ​ການ​ຖ່າຍ​ທອດ​ສົດ​ໄປ​ທົ່ວ ສປປ ລາວ ປີ​ນີ້ ຈຶ່ງ​ໄດ້​ຍ້າຍ​ສະ­ຖານ­ທີ່​ຈັດ​ໄປ​ຍັງ​ສະ­ໜາມ​ກີ­ລາ​ແຫ່ງ​ຊາດ​ຫຼັກ 16 ທີ່​ສາ­ມາດ​ບັນ­ຈຸ​ຜູ້​ຊົມ​ໄດ້​ຫຼາຍ​ຂຶ້ນ ເປັນ​ການ​ເພີ່ມ​ໂອ­ກາດ​ໃຫ້​ຊາວ​ລາວ ໄດ້​ເຂົ້າ​ຊົມ ແລະ ເຊຍ​ທີມ​ຊາດ​ລາວ ເຊິ່ງ​ເປັນ​ຂວັນ​ໃຈ ແລະ ຄວາມ​ພາກ ພູມ­ໃຈ​ຂອງ​ຊາດ.

   ນອກ­ຈາກ​ນີ້ ເອັດ​ສ​ຊີ​ຈີ ຍັງ​ຈັດ Football Clinic ໃຫ້​ກັບ​ນ້ອງໆ ເຍົາ­ວະ​ຊົນ​ຈາກ ສປປ ລາວ ໄດ້​ເຂົ້າ​ຮ່ວມ​ເຝິກ­ຊ້ອມ​ກັບ​ນັກ​ເຕະ­ບານ​ລະ­ດັບ​ຊຸບ​ເປີ້​ສະ​ຕາ ແລະ ຜູ້​ເຝິກ​ສອນ​ມື​ອາ­ຊີບ​ຈາກ​ສະ­ໂມ­ສອນ ເອັດ​ສ​ຊີ​ຈີ  ເມືອງ​ທອງ ຢູ​ໄນ​ເຕັດ ທີ່ ເອັດ​ສ​ຊີ​ຈີ  ເປັນ​ຜູ້​ສະ­ໜັບ­ສະ­ໜູນ​ຫຼັກ ລວມ​ເຖິງ​ຜູ້​ເຝິກ​ສອນ​ຈາກ​ທີມ​ຊາດ​ລາວ ອີກ​ດ້ວຍ.

   ທ່ານ ຄຳ​ແພງ ວົງ​ຂັນ­ຕີ ຮອງ​ປະ­ທານ​ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ ກ່າວ​ວ່າ: ພວກ​ເຮົາ​ຂໍ​ຂອບ­ໃຈ ເອັດ​ສ​ຊີ​ຈີ  ທີ່​ຈັດ​ລາຍ­ການ​ດັ່ງ­ກ່າວ​ໃນ​ປະ­ເທດ​ລາວ​ອີກ​ຄັ້ງ ການ​ແຂ່ງ­ຂັນ​ເຕະ­ບານ​ຄັ້ງ​ນີ້ ນັບ​ເປັນ​ປະ­ສົບ​ການ​ທີ່​ສຳ­ຄັນ​ອີກ​ຄັ້ງ​ໜຶ່ງ​ຂອງ​ເຮົາ ເປັນ​ໂອ­ກາດ​ທີ່​ດີ​ຂອງ​ທີມ​ຊາດ​ລາວ ໃນ​ການ​ເກັບ​ກ່ຽວ​ປະ­ສົບ​ການ ແລະ ເປັນ​ໂອ­ກາດ​ທີ່​ກອງ​ເຊຍ​ບານ​ຈະ​ໄດ້​ເຊຍ​ທີມ​ຊາດ​ລາວ​ຢ່າງ​ໃກ້­ຊິດ ຢ່າງ​ທີ່​ຮູ້​ດີ​ວ່າ ຕົວ​ແທນ​ສະ­ໂມ­ສອນ​ຂອງ​ລາວ​ຫຼາຍ​ຄົນ ໄດ້​ໂກ​ຕ້າ​ໄປ​ແຂ່ງ­ຂັນ​ເຕະ­ບານ​ສະ­ໂມ­ສອນ​ລະ­ດັບ​ທະ­ວີບ­ອາ­ຊີ​ຫຼາຍ​ລາຍ­ການ ນັກ​ເຕະ​ທີມ​ຊາດ​ຂອງ​ເຮົາ​ເອງ​ມີ​ຄວາມ​ເຂັ້ມ­ແຂງ ມີ​ວິ­ໄນ​ການ​ເຝິກ­ຝົນ ມີ​ການ​ພັດ­ທະ­ນາ​ທັກ​ສະ​ທີ່​ດີ​ຂຶ້ນ​ທຸກໆ​ປີ ແລະ ເປັນ​ທີ່​ຮູ້­ຈັກ​ຂອງ​ປະ­ເທດ​ອື່ນໆ.

   ເພື່ອ​ຄືນ​ກຳ­ໄລ​ໃຫ້​ກັບ​ລູກ​ຄ້າ ແລະ ຜູ້​ທີ່​ມັກ​ກີ­ລາ​ບານ­ເຕະ ເອັດ​ສ​ຊີ​ຈີ ແຈກ​ປີ້​ເຂົ້າ​ຊົມ​ຟຣີ ພ້ອມ​ກຽມ​ລົດ​ຮັບ​ສົ່ງ​ຢູ່​ຈຸດ​ປະ­ຕູ​ໄຊ ແລະ ສະ­ໜາມ​ເຈົ້າ​ອາ​ນຸ​ວົງ ໄປ​ທີ່​ສະ­ໜາມ​ກີ­ລາ​ແຫ່ງ​ຊາດ ຫຼັກ 16 ພຽງ​ເຂົ້າ​ຮ່ວມ​ກັບ​ກິດ­ຈະ­ກຳ​ທີ່ Facebook ເພ​ຈ SCG (www.facebook.com/SCGBrandLaos) ລຸ້ນ​ຮັບ​ປີ້​ເຂົ້າ​ຊົມ​ການ​ແຂ່ງ­ຂັນ​ດັ່ງ­ກ່າວ ໄດ້​ຕັ້ງ­ແຕ່​ມື້­ນີ້​ເປັນ­ຕົ້ນ​ໄປ.

ຂ່າວທີ່ກ່ຽວຂ້ອງ