ຂ່າວຫຼ້າສຸດ

ກອງທັບ ຄອງຂັນເຕະບານ ຊີງຂັນເລຂາ ຊປປລ ປະຈຳປີ 2018

186 19 ກ.ກ. 2018 ວົງຈອນກີລາ
ກອງທັບ ຄອງຂັນເຕະບານ ຊີງຂັນເລຂາ ຊປປລ ປະຈຳປີ 2018

   ປີດ​ສາກ​ແຂ່ງ­ຂັນ​ຂຶ້ນ​ຢ່າງ​ເປັນ​ທາງ​ການ​ແລ້ວ ສຳ­ລັບ​ການ​ແຂ່ງ­ຂັນ​ເຕະ­ບານ 7 ຄົນ ຊີງ​ຂັນ​ສະ­ຫາຍ​ເລ­ຂາ​ຄະ­ນະ​ບໍ­ລິ­ຫານ​ງານ​ສູນ​ກາງ ຊາວ​ໜຸ່ມ​ປະ­ຊາ­ຊົນ​ປະ­ຕິ­ວັດ​ລາວ (ຊປປລ) ປະ­ຈຳ​ປີ 2018 ໃນ​ວັນ​ທີ 17 ກໍ­ລະ­ກົດ 2018 (ຫຼັງ​ຈາກ​ແຂ່ງ­ຂັນ​ມາ​ແຕ່​ວັນ​ທີ 30 ພຶດ­ສະ­ພາ 2018) ທີ່​ສະ ໜາມ​ກີ­ລາ​ເຕະ­ບານ​ຫຍ້າ​ທຽມ​ໄອ​ເຕັກ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ ມີ​ທ່ານ ອາ​ລຸນ​ໄຊ ສູນ​ນະ­ລາດ ເລ­ຂາ​ຄະ­ນະ​ບໍ­ລິ­ຫານ​ງານ​ສູນ​ກາງ ຊປປລ ພ້ອມ​ດ້ວຍ​ຄະ­ນະ ແຂກ​ທີ່​ຖືກ​ເຊີນ ຄະ­ນະ​ນຳ ຄູ​ເຝິກ ແລະ ນັກ­ກີ­ລາ​ແຕ່​ລະ​ພາກ­ສ່ວນ​ເຂົ້າ​ຮ່ວມ.

   ການ​ແຂ່ງ­ຂັນ​ກິ­ລາ​ຄັ້ງ​ນີ້ ເພື່ອ​ສ້າງ​ຂະ​ບວນ​ການ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ພັກ ແລະ ວັນ​ສ້າງ­ຕັ້ງ ຄຊປປລ ຄົບ­ຮອບ 63 ປີ ວັນ​ສ້າງ­ຕັ້ງ​ກອງ­ທັບ ຄົບ­ຮອບ 70 ປີ (ປີ 2019) ແລະ ວັນ​ສຳ­ຄັນ​ອື່ນໆ​ທາງ​ປະ­ຫວັດ­ສາດ​ຂອງ​ຊາດ ຄຽງ​ຄູ່​ກັນ​ນັ້ນ ຍັງ​ເປັນ​ການ​ເຕົ້າ­ໂຮມ​ຄວາມ​ສາ­ມັກ­ຄີ​ລະ­ຫວ່າງ​ຊາວ​ໜຸ່ມ​ບັນ­ດາ​ອົງ­ການ ກະ­ຊວງ ນະ­ຄອນ­ຫຼວງ​ວຽງ​ຈັນ ແລະ ເພື່ອ​ພັດ­ທະ­ນາ​ກີ­ລາ​ເຕະ­ບານ​ໃຫ້​ມີ​ປະ­ສິດ­ທິ­ພາບ ແລະ ກ້າວ­ໜ້າ​ຂຶ້ນ​ໄປ​ເລື້ອຍໆ ສ້າງ​ເງື່ອນ­ໄຂ​ໃຫ້​ຄະ­ນະ​ຊາວ​ໜຸ່ມ ສະ­ມາ­ຊິກ​ຊາວ​ໜຸ່ມ​ໄດ້​ມີ​ໂອ­ກາດ​ສະ­ແດງ​ຄວາມ​ສາ­ມາດ​ຂອງ​ຕົນ​ທາງ​ດ້ານ​ກີ­ລາ​ເຕະ­ບານ ແລະ ທັງ​ເປັນ​ການ​ອອກ­ກຳ­ລັງ​ກາຍ ເພື່ອ​ຮັກ­ສາ​ສຸ­ຂະ­ພາບ ເພື່ອ​ສ້າງ​ຄວາມ​ຮູ​ຄວາມ​ສາ­ມາດ​ໃຫ້​ພະ­ນັກ­ງານ​ຂະ​ບວນ​ການ​ໄດ້​ພັດ­ທະ­ນາ​ຕົນ​ເອງ ທາງ​ດ້ານ​ວິ­ຊາ​ການ ແລະ ໄດ້​ຜ່ານ​ຂະ​ບວນ​ການ​ຕົວ​ຈິງ​ໃຫ້​ຫຼາຍ​ຂຶ້ນ​ກວ່າ​ເກົ່າ.

   ການ​ແຂ່ງ­ຂັນ​ຄັ້ງ​ນີ້ ແມ່ນ​ມີ​ທີມ​ເຂົ້າ​ຮ່ວມ​ທັງ​ໝົດ 31 ພາກ­ສ່ວນ​ທີ່​ເປັນ​ຕົວ​ແທນ​ຊາວ​ໜຸ່ມ​ຈາກ​ບັນ­ດາ​ກະ­ຊວງ ແລະ ອົງ​ການ­ຈັດ­ຕັ້ງ​ຕ່າງໆ ພາຍ​ໃນ​ສູນ​ກາງ ເຊິ່ງ​ໄດ້​ແບ່ງ​ການ​ແຂ່ງ­ຂັນ​ອອກ​ເປັນ​ທັງ​ໝົດ 8 ສາຍ ຜ່ານ​ການ​ແຂ່ງ­ຂັນ​ຜົນ​ປາ­ກົດ​ວ່າ: ອັນ​ດັບ 1 ຊາວ​ໜຸ່ມ​ກະ­ຊວງ​ປ້ອງ​ກັນ​ປະ­ເທດ (ກອງ­ທັບ) ໄດ້​ຮັບ​ຂັນ 1 ໜ່ວຍ ພ້ອມ​ເງິນ­ສົດ 5 ລ້ານ​ກີບ ອັນ​ດັບ 2 ຊາວ​ໜຸ່ມ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ໄດ້​ຮັບ​ຂັນ 1 ໜ່ວຍ ພ້ອມ​ເງິນ­ສົດ 3 ລ້ານ​ກີບ ອັນ​ດັບ 3 ຊາວ​ໜຸ່ມ​ກະ­ຊວງ​ສາ­ທາ­ລະ­ນະ​ສຸກ ໄດ້​ຮັບ​ຂັນ 1 ໜ່ວຍ ພ້ອມ​ເງິນ­ສົດ 2 ລ້ານ​ກີບ ແລະ ອັນ​ດັບ 4 ຊາວ​ໜຸ່ມ​ກະ­ຊວງ​ການ​ເງິນ​ໄດ້​ຮັບ​ເງິນ​ລາ­ງວັນ 1 ລ້ານ​ກີບ ຂະ­ນະ​ທີ່​ລາ­ງວັນ​ທີມ​ມາ­ລະ­ຍາດ​ດີ­ເດັ່ນ ແມ່ນ​ທີມ​ຊາວ​ໜຸ່ມ​ນະ­ຄອນ­ຫຼວງ​ວຽງ​ຈັນ ໄດ້​ຮັບ​ຂັນ 1 ໜ່ວຍ ພ້ອມ​ເງິນ­ສົດ 5 ແສນ​ກີບ ແລະ ລາ­ງວັນ​ຜູ້​ທີ່​ຍິງ​ປະ­ຕູ​ໄດ້​ຫຼາຍ​ທີ່​ສຸດ ທ້າວ ຄຳ​ພາ​ວັນ ອິນ​ທະ​ວົງ ຊາວ​ໜຸ່ມ​ນະ­ຄອນ­ຫຼວງ​ວຽງ​ຈັນ ໄດ້​ຮັບ​ຂັນ 1 ໜ່ວຍ ພ້ອມ​ເງິນ­ສົດ 2 ແສນ​ກີບ.

ຂ່າວທີ່ກ່ຽວຂ້ອງ