ຂ່າວຫຼ້າສຸດ

ເດັກນ້ອຍ 120 ລ້ານ​ກ່ວ​​າ​ຄົນ ໄດ້​ຮັບ​ການ​ສັກ​ຢາ​ປ້ອງ​ກັນ​ພະຍາດ​ຕິດຕໍ່

212 19 ກ.ກ. 2018 ຂ່າວຕ່າງປະເທດ
ເດັກນ້ອຍ 120 ລ້ານ​ກ່ວ​​າ​ຄົນ ໄດ້​ຮັບ​ການ​ສັກ​ຢາ​ປ້ອງ​ກັນ​ພະຍາດ​ຕິດຕໍ່

    ຕົວ​ເລກ​ສະຖິຕິ​ຂອງ​ສະຫະ​ປະຊາ​ຊາດ (​ສປຊ) ທີ່​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 16 ກໍລະກົດ​ນີ້ ໃຫ້​ຮູ້​ວ່າ ໃນ​ປີ 2017 ຈຳນວນ​ເດັກນ້ອຍ​ເກີດ​ໃໝ່​ໃນ​ໂລກ ໄດ້​ຮັບ​ການ​ສັກ​ຢາ​ປ້ອງ​ກັນ​ບັນດາ​ພະຍາດ​ຕິດຕໍ່ ໄດ້​ບັນລຸ​ລະດັບ​ສູງ​ເປັນ​ສະຖິຕິ ໂດຍ​ມີ​ທີ່​ປະມານ 123 ລ້ານ​ຄົນ ເທົ່າ​ກັບ​ວ່າ​ເດັກນ້ອຍ 10 ຄົນ​ໃດ ແມ່ນ​ມີ 9 ຄົນ ໄດ້​ຮັບ​ການ​ສັກ​ຢາ​ກັນ​ພະຍາດ.

    ກອງ​ທຶນ​ສຳລັບ​ເດັກນ້ອຍ​ຂອງ ​ສປຊ (UNICEF) ແລະ​ອົງການ​ອະນາໄມ​ໂລກ (WHO) ໃຫ້​ຮູ້​ວ່າ ນັບ​ແຕ່​ປີ 2015 ເປັນຕົ້ນ​ມາ ອັດຕາ​ສ່ວນ​ເດັກນ້ອຍ​ທີ່​ໄດ້​ຮັບ​ການ​ສັກ​ຢາ​ກັນ​ພະຍາດຄໍຕີບ ບາດ​ທະ​ຍັກ  ແລະ​ໄອ​ໄກ່  (DTP3) ບັນລຸ 85% (ເທົ່າ​ກັບ​ເດັກນ້ອຍ​ຈຳນວນ 116,2 ລ້ານ​ຄົນ). ເຖິງ​ວ່າ​ອັດຕາ​ສ່ວນ​ການ​ສັກ​ຢາ​ປ້ອງ​ກັນ​ພະຍາດ​ທົ່ວ​ໂລກ​ກັບ DTP3 ຍັງ​ຮັກສາ​ຢູ​ທີ່​ລະດັບ 85% ກໍ​ຕາມ ແຕ່​ວ່າ​ສິ່ງ​ທີ່​ໜ້າ​ໃສ່ໃຈ​ກໍ​ຄື​ວ່າ ການ​ເພີ່ມ​ເຕີມ​ເດັກນ້ອຍ​ເກີດ​ໃໝ່ 4,6 ລ້ານ​ຄົນ ທີ່​ໄດ້​ຮັບ​ການ​ສັກ​ຢາ​ປ້ອງ​ກັນ​ພະຍາດ​ໃນ​ທົ່ວ​ໂລກ​ໃນ​ປີ​ກາຍ ທຽບໃສ່​ປີ 2010 ນັ້ນ​ຕົ້ນຕໍ​ແມ່ນ​ຍ້ອນ​ປະຊາກອນ​ທົ່ວ​ໂລກ​ເພີ່ມ​ຂຶ້ນ.

    ສະຖິຕິ​ຊີ້​ໃຫ້​ເຫັນ​ວ່າ ໃນ​ຈຳນວນ​ເດັກນ້ອຍ​ເກີດ​ໃໝ່​ເກືອບ 20 ລ້ານ​ຄົນ ບໍ່​ໄດ້​ຮັບ​ການ​ສັກ​ຢາ​ປ້ອງ​ກັນ​ພະຍາດ DTP3 ຢ່າງ​ຄົບ​ຖ້ວນ ແລະ ​ມີ​ເດັກນ້ອຍ​ເກືອບ 8 ລ້ານ​ຄົນ (ເທົ່າ​ກັບ 40%) ດຳລົງ​ຊີວິດ​ຢູ່​ໃນ​ສະພາບ​ແວດ​ລ້ອມ​ທີ່​ບໍ່​ມີ​ຄວາມ​ໝັ້ນຄົງ ຫຼື​ຕ້ອງການ​ໄດ້​ຮັບ​ຄວາມ​ຊ່ວຍເຫຼືອ​ມະນຸດສະທຳ. ເດັກນ້ອຍ​ປະມານ 5,6 ລ້ານ​ຄົນ​ໃນ​ຈຳນວນ​ດັ່ງກ່າວ ດຳລົງ​ຊີວິດ​ຢູ່​ໃນ 3 ປະເທດ​ທີ່​ເກີດ​ການ​ພິພາດ​ຢູ່​ເປັນ​ປະຈຳ ໄດ້ແກ່ ອາ​ຟະ​ກາ​ນິດ​ສະຖານ ນີ​ເຊຣີ ແລະ ປາ​ກິດ​ສະຖານ. ໃນ​ປີ 2017 ມີ 10 ປະເທດ ທີ່​ມີ​ອັດຕາ​ສ່ວນ​ການ​ສັກ​ຢາ​ປ້ອງ​ກັນ​ພະຍາດ DTP3 ທີ່​ລະດັບ​ຕ່ຳ​ກວ່າ 50% ປະກອບ​ດ້ວຍ ອັງ​ໂກ​ລາ ສາທາລະນະ​ລັດ​ອາ​ຟະ​ຣິກ​ກາ​ກາງ ກີ​ເນ​ບິດ​ໂຊ ຈາດ ກີ​ເນ ໂຊ​ມາລີ ນີ​ເຊຣີ ຊູ​ດານ​ໃຕ້ ຊີ​ຣີ ແລະ ອູ​ແກຣນ.

 

ຂ່າວທີ່ກ່ຽວຂ້ອງ