ຂ່າວຫຼ້າສຸດ

ມາ​ເລ​ເຊຍ​ຍົກເລີກ​ການ​ປິດ​ລ້ອມ​ບັນຊີ​ການ​ເງິນ​ຂອງ​ອະດີດ​ນາຍົກລັດຖະມົນຕີ ນາ​ຈິບ ຣາ​ຊັກ

141 19 ກ.ກ. 2018 ຂ່າວຕ່າງປະເທດ
ມາ​ເລ​ເຊຍ​ຍົກເລີກ​ການ​ປິດ​ລ້ອມ​ບັນຊີ​ການ​ເງິນ​ຂອງ​ອະດີດ​ນາຍົກລັດຖະມົນຕີ ນາ​ຈິບ ຣາ​ຊັກ

     ໜັງສືພິມ New Straits Times ອ້າງ​ຕາມ​ຄຳ​ເວົ້າ​ຂອງ​ທ່ານ ອາ​ຊາມ ບາ​ກີ ຮອງ​ປະທານ​ຄະນະ​ກຳມະການ​ຕ້ານ​ການ​ສໍ້​ລາດ​ບັງ​ຫຼວງ​ຂອງ​ມາ​ເລ​ເຊຍ (MACC) ໃຫ້​ຮູ້ເມື່ອ​ວັນ​ທີ 17 ກໍລະກົດ​ນີ້​ວ່າ ບັນຊີ​ການ​ເງິນ​ສ່ວນ​ຕົວ​ຂອງ​ຂອງ​ທ່ານ ນາ​ຈິບ ຣາ​ຊັກ ອະດີດ​ນາບ​ຍົກ​ລັດຖະມົນຕີ​ມາ​ເລ​ເຊຍ ບໍ່​ໄດ້​ຖືກ​ປິດ​ລ້ອມ​ອີກ​ຕໍ່​ໄປ​ແລ້ວ.

    ທ່ານ ອາ​ຊາມ ບາ​ກີ ເວົ້າ​ວ່າ ການ​ຍົກເລີກ​ການ​ປິດ​ລ້ອມ​ບັນຊີ​ການ​ເງິນ​ຂອງ​ທ່ານ ນາ​ຈິບ ໄດ້​ຮັບ​ການ​ປະຕິບັດ ຫຼັງ​ຈາກ​ທີ່ MACC ເຫັນ​ວ່າ ບໍ່​ມີ​ການ​ກ່ຽວ​ພັນ​ລະຫວ່າງ​ບັນຊີ​ການ​ເງິນ​ຂອງ​ທ່ານ ນາ​ຈິບ ກັບ​ການ​ສືບສວນ​ສອບ​ສວນ​ຂອງ MACC ກ່ຽວ​ກັບ​ກອງ​ທຶນ​ການ​ລົງທຶນ  1 ມາ​ເລ​ເຊຍ (1MDB).  MACC ກໍ​ພົບ​ເຫັນ​ວ່າ ບັນຊີ​ການ​ເງິນ​ຂອງ​ທ່ານ ນາ​ຈິບ (ທີ່​ໄດ້​ຮັບ​ການ​ຍົກເລີກ​ການ​ປິດ​ລ້ອມ​ເມື່ອ​ວັນ​ທີ 16 ກໍລະກົດ) ນັ້ນ​ບໍ່​ມີ​ການ​ຕິດ​ພັນ​ກັບ SRC International ຊຶ່ງ​ເປັນ​ບໍລິສັດ​ລູກ​ຂອງ 1MDB. ໃນ​ຂະນະ​ດຽວ​ກັນ ທ່ານ ອາ​ຊາມ ບາ​ກີ ຍັງ​ໃຫ້​ຮູ້​ວ່າ ບັນຊີ​ການ​ເງິນ​ໃນ​ທະນາຄານ ທີ່​ຄອບ​ຄອງ​ໂດຍ​ບັນດາ​ລູກ​ຫຼານ​ຂອງ​ທ່ານ ນາ​ຈິບ  ກໍ​ບໍ່​ຖືກ​ປິດ​ລ້ອມ​ອີກ​ແລ້​​ວ.

    ກ່ອນ​ໜ້າ​ນັ້ນ ເມື່ອ​ວັນ​ທີ 2 ກໍລະກົດ​ທີ່​ຜ່ານ​ມາ MACC ແຈ້ງ​ໃຫ້​ຮູ້​ວ່າ ລວມ​ແລ້ວ​ມີ​ບັນຊີ​ການ​ເງິນ​ໃນ​ທະນາຄານ 408 ລາຍການ ດ້ວຍ​ຍອດ​ຈຳນວນ​ເງິນ 1,1 ຕື້​ຣິງ​ກິດ (ເທົ່າ​ກັບ 272 ລ້ານ​ໂດ​ລາ​ສະຫະລັດ) ໄດ້​ຖືກ​ປິດ​ລ້ອມ ເພື່ອ​ຮັບ​ໃຊ້​ໃຫ້​ແກ່​ການ​ສືບສວນ​ສອບ​ສວນ ກ່ຽວ​ກັບ​ການ​ກ່າວ​ຫາ​ມີ​ການ​ໃຊ້​ເງິນ​ໄປ​ໃນ​ທາງ​ທີ່​ຜິດ​ຢູ່​ໃນ  1MDB. ການເຄື່ອນໄຫວ​ນີ້ ມີ​ການ​ພົວພັນ​ເຖິງ 81 ບຸກຄົນ ແລະ 55 ບໍລິສັດ ໂດຍ​ໄດ້​ປະຕິບັດ​ແຕ່​ວັນ​ທີ 26-29 ມິຖຸນາ​ທີ່​ຜ່ານ​ມາ.

 

ຂ່າວທີ່ກ່ຽວຂ້ອງ