IMF ແຈ້ງ​ເຕືອນ​ເວ​ເນ​ຊູ​ເອ​ລາ ກ່ຽວ​ກັບ​ຄວາມ​ຊຸດໂຊມ​ທາງ​ດ້ານ​ເສດຖະກິດ

189 19 ກ.ກ. 2018 ຂ່າວຕ່າງປະເທດ
IMF ແຈ້ງ​ເຕືອນ​ເວ​ເນ​ຊູ​ເອ​ລາ ກ່ຽວ​ກັບ​ຄວາມ​ຊຸດໂຊມ​ທາງ​ດ້ານ​ເສດຖະກິດ

    ກອງ​ທຶນ​ເງິນຕາ​ສາກົນ (IMF) ຢັ້ງຢືນ​ອອກ​ມາ​ເມື່ອ​ວັນ​ທີ 17 ກໍລະກົດ​ນີ້​ວ່າ ພື້ນຖານ​ເສດຖະກິດ​ເວ​ເນ​ຊູ​ເອ​ລາ ພວມ​ຢູ່​ໃນ​ສະພາບ “ຊຸດໂຊມ” ໂດຍ​ມີ​ອັດຕາ​ເງິນ​ເຟີ້​ສູງ​ຢ່າງ​ບໍ່​ເຄີຍ​ມີ​ມາ​ກ່ອນ ນັບ​ແຕ່​ກາງ​ສະຕະວັດ​ທີ 20 ເປັນຕົ້ນ​ມາ.

    ທ່າມກາງ​ທີ່​ລາຄາ​ນ້ຳມັນ​ໃນ​ຕະຫຼາດ​ໂລກ​ເພີ່ມ​ຂຶ້ນ ຊຶ່ງ​ເປັນ​ການ​ສ້າງ​ທ່ວງ​ທ່າ​ໄດ້​ປຽບ​ໃຫ້​ແກ່​ເກືອບ​ທຸກໆ​ປະເທດ​ຜູ້​ສົ່ງ​ອອກ​ນ້ຳມັນ​ນັ້ນ ແຕ່​ວ່າ IMF ກໍ​ຍັງ​ຄົງ​ມີ​ມູມ​ມອງ​ອອກ​ມາ​ທີ່​ຂາດ​ຄວາມ​ໝັ້ນ​ໃຈ ກ່ຽວ​ກັບ​ຄວາມ​ຫວັງ​ຂອງ​ເສດຖະກິດ​ເວ​ເຊ​ຊູ​ເອ​ລາ ດ້ວຍ​ການ​ຄາດ​ຄະເນ​ວ່າ​ຈະ​ຊຸດໂຊມ​ລົງ 15% ແລະ​ເງິນ​ເຟີ້​ໃນ​ປີ​ນີ້​ຢູ່​ທີ່​ລະດັບ 14.000%.

    ຕົວ​ເລກ​ຂອງ​ອົງການ​ບັນດາ​ປະເທດ​ຜູ້​ສົ່ງ​ອອກ​ນ້ຳມັນ (OPEC) ຊີ້​ໃຫ້​ເຫັນ​ວ່າ ປະລິມານ​ການ​ຜະລິດ​ນ້ຳມັນ​ຂອງ​ເວ​ເນ​ຊູ​ເອ​ລາ ໃນ​ເວລາ​ນີ້​ໄດ້​ຫຼຸດ​ລົງ​ສູ່​ລະດັບ​ຕ່ຳ​ສຸດ ໃນ​ຮອບ 30 ປີ​ທີ່​ຜ່ານ​ມາ ໂດຍ​ລົງ​ໄປ​ຢູ່​ທີ່ 1,5 ລ້ານ​ບາ​ເຣນ/ວັນ ໃນ​ເດືອນ​ມິຖຸນາ​ທີ່​ຜ່ານ​ມາ. 96% ຂອງ​ແຫຼ່ງ​ລາຍ​ຮັບ​ຂອງ​ເວ​ເນ​ຊູ​ເອ​ລາ ແມ່ນ​ມາ​ຈາກ​ການ​ຈຳ​ໜາຍ​ນ້ຳມັນ ແຕ່​ວ່າການ​ທີ່​ເວ​ເນ​ຊູ​ເອ​ລາ​ຂາດແຄນ​ເງິນຕາ​ຕ່າງປະເທດ ເພື່ອ​ແກ້​ໄຂ​ຄວາມ​ເສຍ​ຫາຍ​ທາງ​ດ້ານ​ເສດຖະກິດ ໄດ້​ເຮັດ​ໃຫ້​ປະເທດ​ນີ້ ຕົກ​ຢູ່​ໃນ​ສະພາບ​ຂາດແຄນ​ສະບຽງ​ອາຫານ ແລະ​ຜະລິດ​ຕະ​ພັນ​ການ​ຢາ​ຢ່າງ​ຮ້າຍ​ແຮງ.

ຂ່າວທີ່ກ່ຽວຂ້ອງ