ແອັດ​ສະ​ປາຍ ກາຍເປັນ​ປາຍທາງ​ອັນ​ດັບ​ຕົ້ນ​ຂອງ​ຜູ້​ອົບ​ພະ​ຍົບ

105 19 ກ.ກ. 2018 ຂ່າວຕ່າງປະເທດ
ແອັດ​ສະ​ປາຍ ກາຍເປັນ​ປາຍທາງ​ອັນ​ດັບ​ຕົ້ນ​ຂອງ​ຜູ້​ອົບ​ພະ​ຍົບ

   ຈຳນວນ​ຜູ້​ອົບ​ພະ​ຍົບ ທີ່​ເດີນທາງ​ໄປ​ທີ່​ແຄມ​ຝັ່ງ​ທະເລ​ຂອງ​ແອັດ​ສະ​ປາຍ ພວມ​ເພີ່ມ​ຂຶ້ນ ແລະ​ ໃນ​ເວລາ​ນີ້ ປະເທດ​ດັ່ງກ່າວ​ໄດ້​ລ້ຳ​ໜ້າ​ອີ​ຕາ​ລີ ກາຍເປັນ​ປາຍທາງ​ອັນ​ດັບ​ແຖວ​ໜ້າ​ຂອງ​ຜູ້​ອົບ​ພະ​ຍົບ ທີ່​ເດີນທາງ​ຜ່ານ​ທະເລ​ເມ​ດີ​ເຕ​ຣາ​ເນ.

    ໃນ​ບົດ​ລາຍ​ງານ ທີ່​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 17 ກໍລະກົດ​ນີ້​ນັ້ນ ອົງການ​ຜູ້​ຍ້າຍ​ຖິ່ນ​ຖານ​ສາກົນ (IOM) ໃຫ້​ຮູ້​ວ່າ ນັບ​ແຕ່​ຕົ້ນ​ປີ​ນີ້​ເປັນຕົ້ນ​ມາ ມີ​ຜູ້​ອົບ​ພະ​ຍົບ 18.000 ກວ່າ​ຄົນ ເດີນທາງ​ໄປ​ເຖິງ​ແອັດ​ສະ​ປາຍ ນັບ​ວ່າ​ເປັນ​ຕົວ​ເລກ​ທີ່​ເພີ່ມ​ຂຶ້ນ 3 ເທົ່າ​ຕົວ ເມື່ອ​ທຽບໃສ່​ເວລາ​ດຽວ​ກັນ​ຂອງ​ປີ 2017 ໃນ​ນັ້ນ ສະເພາະ​ແຕ່​ໃນ​ເດືອນ​ມິຖຸນາ​ທີ່​ຜ່ານ​ມາ ກໍ​ມີ​ຜູ້​ອົບ​ພະ​ຍົບ​ເຂົ້າ​ໄປ​ແອັດ​ສະ​ປາຍ​ເກືອບ 10.000 ຄົນ. ໃນ​ຂະນະ​ດຽວ​ກັນ ຈຳນວນ​ຜູ້​ອົບ​ພະ​ຍົບ ເດີນທາງ​ເຂົ້າ​ໄປ​ໃນ​ປະເທດ​ອີ​ຕາ​ລີ ມີ 17.800 ຄົນ ນັບ​ວ່າ​ຫຼຸດ​ລົງ​ຫຼາຍ​ເມື່ອ​ທຽບໃສ່ 93.200 ຄົນ ໃນ​ເຄິ່ງ​ຕົ້ນ​ປີ​ກາຍ.

  ສຳລັບ​ຢູ່​ໃນ​ທົ່ວ​ເອີ​ຣົບ ໃນ 6 ເດືອນ​ຕົ້ນ​ປີ 2018 ຈຳນວນ​ຜູ້​ອົບ​ພະ​ຍົບ​ທີ່​ເດີນທາງ​ຜ່ານ​ທະເລ​ເມ​ດີ​ເຕ​ຣາ​ເນ ເຂົ້າ​ໄປ​ໃນ​ເອີ​ຣົບ ມີ​ເກືອບ 51.000 ຄົນ ຫຼຸດ​ລົງ​ເກືອບ 50% ເມື່ອ​ທຽບໃສ່​ໄລຍະ​ເວລາ​ດຽວ​ກັນ​ຂອງ​ປີ 2017.

 

ຂ່າວທີ່ກ່ຽວຂ້ອງ