ຍີ່ປຸ່ນ - EU ລົງ​ນາມ​ຂໍ້​ຕົກລົງ​ການ​ຄ້າ​ເສລີ ຢ່າງ​ເປັນ​ທາງ​ການ

123 19 ກ.ກ. 2018 ຂ່າວຕ່າງປະເທດ
ຍີ່ປຸ່ນ - EU ລົງ​ນາມ​ຂໍ້​ຕົກລົງ​ການ​ຄ້າ​ເສລີ ຢ່າງ​ເປັນ​ທາງ​ການ

     ບັນດາ​ຜູ້ນຳ​ຂອງ​ຍີ່ປຸ່ນ ແລະ ສະຫະພາບ​ເອີ​ຣົບ (EU) ໄດ້​ພົບ​ປະກັນ ແລະ​ລົງ​ນາມ​ຂໍ້​ຕົກລົງ​ການ​ຄ້າ​ເສລີ ເມື່ອ​ວັນ​ທີ 17 ກໍລະກົດ​ນີ້ ເພື່ອ​ແນໃສ່​ເພີ່ມ​ທະວີ​ທາງ​ດ້ານ​ການ​ຄ້າ​ລະຫວ່າງ​ສອງ​ຝ່າຍ ທ່າມກາງ​ທີ່​ເກີດ​ຄວາມ​ເຄັ່ງ​ຕຶງ​ທາງ​ດ້ານ​ການ​ຄ້າ​ເພີ່ມ​ຂຶ້ນ​ທົ່ວ​ໂລກ.

    ພິທີ​ລົງ​ນາມ​ດັ່ງກ່າວ​ມີ​ຂຶ້ນ​ທີ່​ນະຄອນຫຼວງ​ໂຕ​ກຽວ (ຍີ່ປຸ່ນ) ໂດຍ​ມີ​ນາຍົກລັດຖະມົນຕີ​ຍີ່ປຸ່ນ ຊິນ​ໂຊ ອາ​ເບ ຕະຫຼອດ​ຮອດ​ປະທານ​ຄະນະ​ກຳມະການ​ເອີ​ຣົບ (EC) ເຈນ ຄລາວ ຈັງ​ເກີ ແລະ​ປະທານ​ສະພາ​ເອີ​ຣົບ ໂດ​ນາ​​ລ ​ທັສກ໌ ເຂົ້າ​ຮ່ວມ.

    ຍີ່ປຸ່ນ ແລະ EU ເລີ່ມ​ການ​ເຈລະຈາ​ການ​ຄ້າ​ເສລີ ມາ​ຕັ້ງແຕ່​ປີ 2013. ຢູ່​ໃນ​ກອງ​ປະຊຸມ​ສຸດ​ຍອດ​ຍີ່ປຸ່ນ-EU ເມື່ອ​ເດືອນ​ກໍລະກົດ ປີ  2017 ສອງ​ຝ່າຍ​​ໄດ້​ບັນລຸ​ຂໍ້​ຕົກລົງ​ໃນ​ດ້ານ​ຫຼັກການ ແລະ ​ເປັນ​ເອກະສັນ​ກັນ​ກັບ​ຂໍ້​ຕົກລົງ​ສຸດ​ທ້າຍ ໃນ​ເດືອນ​ທັນວາ ປີ 2017.

    ເນື້ອ​ໃນ​ຕ່າງໆ​ຂອງ​ຂໍ້​ຕົກລົງ​ດັ່ງກ່າວ ລະບຸ​ວ່າ ຍີ່ປຸ່ນ​ຈະ​ຍົກເລີກ​ພາສີ​ກັບ 94% ຂອງ​ສິນຄ້າ​ທັງ​ໝົດ​ທີ່​ນຳ​ເຂົ້າ​ຈາກ EU ອັນ​ປະກອບ​ມີ 82% ເປັນ​ຜະລິດ​ຕະ​ພັນ​ກະສິກຳ ແລະ​ການ​ປະມົງ ຊຶ່ງ​ຈະ​ເຮັດ​ໃຫ້ ເນີຍ​ແຂງ ເຫຼົ້າ​ແວງ ແລະ​ຊີ້ນ​ໝູ ຂອງ  EU ມີ​ລາຄາ​ຕ່ຳ​ລົງ​ຢູ່​ໃນ​ຕະຫຼາດ​ຍີ່ປຸ່ນ.

ທາງ​ດ້ານ EU ຈະ​ຍົກເລີກ​ພາສີ​ກັບ 99% ຂອງ​ສິນຄ້າ​ທີ່​ນຳ​ເຂົ້າ​ຈາກ​ຍີ່ປຸ່ນ. ໃນ​ຂະນະ​ດຽວ​ກັນ EU ກໍ​ຈະ​ຍົກເລີກ​ພາສີ​ກັບ​ບັນດາ​ສິນຄ້າ​ທີ່​ສຳຄັນ​ຂອງ​ຍີ່ປຸ່ນ ເຊັ່ນ​ວ່າ​ກັບ​ລົດຍົນ ແມ່ນ​ຫຼັງ​ຈາກ 8 ປີ ແລະ​ກັບ​ໂທລະທັດ ແມ່ນ​ຫຼັງ 6 ປີ ນັບ​ແຕ່​ຂໍ້​ຕົກລົງ​ການ​ຄ້າ​ເສລີ​ມີ​ຜົນ​ບັງຄັບ​ໃຊ້​ເປັນຕົ້ນ​ໄປ.

    ຫຼັງ​ຈາກ​ທີ່​ລົງ​ນາມ​ນຳ​ກັນ​ແລ້ວ ຍີ່ປຸ່ນ ແລະ EU ກໍ​ຈະ​ດຳເນີນ​ການ​ເພື່ອ​ໃຫ້​ອົງການ​ນິຕິບັນຍັດ​ຂອງ​ສອງ​ຝ່າຍ​ໃຫ້​ສັດຕະຍາບັນ ດ້ວຍ​ຈຸດປະສົງ​ກໍ​ເພື່ອ​ໃຫ້​ຂໍ້​ຕົກລົງ​ດັ່ງກ່າວ ມີ​ຜົນ​ບັງຄັບ​ໃຊ້ ນັບ​ແຕ່​ທ້າຍ​ເດືອນ​ມີນາ ປີ 2019 ເປັນຕົ້ນ​ໄປ ຊຶ່ງ​ເປັນ​ເວລາ​ທີ່​ຄາດ​ວ່າ​ອັງກິດ ຈະ​ອອກ​ໄປ​ຈາກ EU ຢ່າງ​ເປັນ​ທາງ​ການ.

    ຂໍ້​ຕົກລົງ​ການ​ຄ້າ​ເສລີ ຍີ່ປຸ່ນ - EU ຈະ​ເຮັດ​ໃຫ້​ເກີດ​ມີ​ໜຶ່ງ​ໃນ​ບັນດາ​ກຸ່ມ​ເສດຖະກິດ​ຂະໜາດ​ໃຫຍ່​ໃນ​ໂລກ ໂດຍ​ກວມ​ເອົາ​ປະມານ 30% ຂອງ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ທົ່ວ​ໂລກ ແລະ​ມີ​ປະຊາກອນ​ປະມານ 600 ລ້ານ​ຄົນ.

 

ຂ່າວທີ່ກ່ຽວຂ້ອງ