ຂ່າວຫຼ້າສຸດ

ນາຍົກ ເນັ້ນການຜັນຂະຫຍາຍ ມາດຕະຖານພົ້ນທຸກ ແລະ ມາດຕະຖານພັດທະນາ

506 18 ກ.ກ. 2018 ຂ່າວໜ້າ​ໜຶ່ງ
ນາຍົກ ເນັ້ນການຜັນຂະຫຍາຍ ມາດຕະຖານພົ້ນທຸກ ແລະ ມາດຕະຖານພັດທະນາ

    ວັນ​ທີ 17 ກໍ­ລະ­ກົດ 2018 ທີ່​ຫໍ​ປະ­ຊຸມ​ແຫ່ງ​ຊາດ ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ໄດ້​ເຂົ້າ​ຮ່ວມ ແລະ ໃຫ້​ກຽດ​ໂອ້​ລົມ​ຕໍ່​ກອງ​ປະ­ຊຸມ​ເຜີຍ­ແຜ່ ແນະ­ນຳ​ການ​ຜັນ​ຂະ­ຫຍາຍ​ຈັດ​ຕັ້ງ​ປະ­ຕິ­ບັດ​ດຳ­ລັດ 348/ລບ ວ່າ​ດ້ວຍ​ມາດ­ຕະ­ຖານ​ພົ້ນ​ທຸກ ແລະ ມາດ­ຕະ­ຖານ​ພັດ­ທະ­ນາ ມີ​ບັນ­ດາ​ລັດ­ຖະ­ມົນ­ຕີ ອົງ­ການ ເຈົ້າ­ແຂວງ ຮອງ​ເຈົ້າ­ແຂວງ ຈາກ​ສູນ​ກາງ ແລະ ທ້ອງ­ຖິ່ນ​ເຂົ້າ​ຮ່ວມ.

    ໂອ­ກາດ​ນີ້ ທ່ານ​ນາ­ຍົກ­ລັດ­ຖະ­ມົນ­ຕີ​ໄດ້​ຮັບ​ຟັງ​ການ​ລາຍ​ງານ​ຈາກ​ທ່ານ ລຽນ ທິ​ແກ້ວ ລັດ­ຖະ­ມົນ­ຕີ ກະ­ຊວງ​ກະ­ສິ­ກຳ ແລະ ປ່າ­ໄມ້ ໂດຍ​ຊີ້​ໃຫ້​ເຫັນ​ວ່າ​ໃນ 2 ປີ​ກວ່າ​ຜ່ານ​ມາ​ໄດ້​ມີ​ຜົນ­ສຳ­ເລັດ​ໃນ​ການ​ຜັນ​ຂະ­ຫຍາຍ​ວຽກ​ງານ​ສາມ​ສ້າງ​ອອກ​ຢ່າງ​ກວ້າງ­ຂວາງ​ໃນ​ທົ່ວ​ປະ­ເທດ ເຮັດ​ໃຫ້​ລະ­ບົບ​ການ­ເມືອງ​ຢູ່​ທ້ອງ­ຖິ່ນ​ໄດ້​ຮັບ​ການ​ປັບ­ປຸງ​ໃຫ້​ເຂັ້ມ­ແຂງ​ໜັກ​ແໜ້ນ​ຂຶ້ນ​ເທື່ອ​ລະ​ກ້າວ ເປັນ​ພື້ນ­ຖານ​ໃຫ້​ແກ່​ການ​ສູ້​ຊົນ​ບັນ­ລຸ​ຄາດ­ໝາຍ​ດ້ານ​ການ​ພັດ­ທະ­ນາ​ຊົນ­ນະ­ບົດ ແລະ ລຶ­ບລ້າງ​ຄວາມ­ທຸກ​ຍາກ ສະ­ແດງ​ອອກ​ໃຫ້​ເຫັນ​ຄອບ­ຄົວ​ທຸກ​ຍາກ​ໄດ້​ຫຼຸດ​ລົງ​ຕື່ມ​ອີກ ຈຳ­ນວນ 12.011 ຄອບ­ຄົວ ທຽບ­ໃສ່​ທ້າຍ​ປີ 2015 ຫຼຸດ​ລົງ 1,25% ປັດ­ຈຸ­ບັນ​ຍັງ​ມີ​ຄອບ­ຄົວ​ທຸກ​ຍາກ​ຈຳ­ນວນ 64.593 ຄອບ­ຄົວ ເທົ່າ​ກັບ 5,34% ບ້ານ​ທຸກ​ຍາກ​ໄດ້​ຫຼຸດ​ລົງ​ຕື່ມ​ອີກ 200 ບ້ານ ທຽບ­ໃສ່​ທ້າຍ​ປີ 2015 ຫຼຸດ​ລົງ 2,37% ເຮັດ​ໃຫ້​ບ້ານ​ທຸກ​ຍາກ​ປັດ­ຈຸ­ບັນ ມີ 1.536 ບ້ານ ເທົ່າ​ກັບ 18,13% ແລະ ໃນ​ໄລ­ຍະ​ເຄິ່ງ​ສະ­ໄໝ​ມາ​ນີ້ ໄດ້​ມີ​ບ້ານ​ພັດ­ທະ­ນາ​ເພີ່ມ​ຂຶ້ນ​ອີກ ຈຳ­ນວນ 561 ບ້ານ ທຽບ­ໃສ່​ປີ 2015 ເພີ່ມ​ຂຶ້ນ 6,62% ເຮັດ​ໃຫ້​ທົ່ວ​ປະ­ເທດ​ມີ​ບ້ານ​ພັດ­ທະ­ນາ 4.138 ບ້ານ ເທົ່າ​ກັບ 48,85% ແລະ ມີ​ບ້ານ​ໃຫຍ່​ກາຍ­ເປັນ​ຕົວ​ເມືອງ​ນ້ອຍ​ໃນ​ຊົນ­ນະ­ບົດ​ເພີ່ມ​ຂຶ້ນ 45 ບ້ານ​ມາ​ເປັນ 56 ບ້ານ.

    ເພື່ອ​ພັດ­ທະ­ນາ​ກະ­ສິ­ກຳ-ຊົນ­ນະ­ບົດ ແກ້​ໄຂ​ຄວາມ­ທຸກ​ຍາກ ແລະ ເປັນ​ພື້ນ­ຖານ​ໃຫ້​ແກ່​ການ­ຈັດ­ຕັ້ງ​ຜັນ​ຂະ­ຫຍາຍ​ດຳ­ລັດ​ເລກ​ທີ 348/ລບ ກໍ່​ຄື ບົດ​ແນະ­ນຳ​ເລກ​ທີ 830/ກປ ເຂົ້າ​ໃນ​ບັນ­ດາ​ວຽກ​ງານ​ຂອງ​ຂະ­ແໜງ­ການ ອົງ­ການ​ຂັ້ນ​ສູນ​ກາງ ແລະ ທ້ອງ­ຖິ່ນ​ໃຫ້​ເປັນ​ລະ­ບົບ​ຄົບ​ຊຸດ ຮອບ­ດ້ານ ເປັນ​ເອ­ກະ​ພາບ​ກັນ ທ່ານ ທອງ​ລຸນ ສີ​ສຸ​ລິດ ໄດ້​ສະ­ເໜີ​ບາງ​ທັດ­ສະ­ນະ​ກ່ຽວ​ກັບ​ກະ­ສິ­ກຳ​ຊົນ­ນະ­ບົດ ແລະ ບາງ​ຄວາມ​ເຫັນ​ກ່ຽວ​ກັບ​ຊົນ­ນະ­ບົດ​ໃໝ່​ຄື: ກະ­ສິ­ກຳ​ຊົນ­ນະ­ບົດ​ມີ​ທີ່​ຕັ້ງ​ຍຸດ​ທະ​ສາດ​ສຳ­ຄັນ​ໃນ​ພາ­ລະ­ກິດ​ຫັນ​ເປັນ​ອຸດ​ສະ­ຫະ​ກຳ ແລະ ທັນ​ສະ­ໄໝ ເປັນ​ພື້ນ­ຖານ​ເປັນ​ກຳ­ລັງ​ແຮງ​ສຳ­ຄັນ​ສຳ­ລັບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຍືນ​ຍົງ ເຊິ່ງ​ບັນ­ຫາ​ກະ­ສິ­ກຳ ແລະ ຊົນ­ນະ­ບົດ​ຕ້ອງ​ໄດ້​ຮັບ​ການ​ແກ້​ໄຂ​ຢ່າງ​ຄົບ​ຊຸດ​ຕິດ​ພັນ​ກັບ​ການ​ຫັນ​ເປັນ​ອຸດ­ສາ­ຫະ­ກຳ ແລະ ທັນ​ສະ­ໄໝ ມີ​ສາຍ​ພົວ­ພັນ​ກັນ​ຢ່າງ​ສະ­ໜິດ​ແໜ້ນ​ແບບ​ກາຍ​ອິນ​ຊີ ເປັນ​ໂຄງ​ສ້າງ​ອັນ​ໜຶ່ງ​ທີ່​ສຳ­ຄັນ​ທີ່​ສຸດ​ຢູ່​ໃນ​ຍຸດ​ທະ​ສາດ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ຍົກ​ສູງ​ຊີ­ວິດ​ການ​ເປັນ​ຢູ່​ທາງ​ດ້ານ​ວັດ­ຖຸ ແລະ ຈິດ­ໃຈ​ຂອງ​ຊາວ​ຊົນ­ນະ­ບົດ​ຕ້ອງ​ບົນ​ພື້ນ­ຖານ​ກົນ​ໄກ​ເສດ­ຖະ­ກິດ​ຕະ­ຫຼາດ ຕາມ​ທິດ​ສັງ­ຄົມ​ນິ­ຍົມ ສອດ­ຄ່ອງ​ກັບ​ເງື່ອນ­ໄຂ​ຂອງ​ແຕ່​ລະ​ແຄວ້ນ ແຕ່​ລະ​ຂົງ­ເຂດ ເພື່ອ​ນຳ​ໃຊ້​ແຫຼ່ງ​ທຶນ​ຕ່າງໆ​ຂອງ​ສັງ­ຄົມ ແລະ ຊົນ­ນະ­ບົດ​ໃໝ່ ໄດ້​ສະ­ເໜີ​ໃຫ້​ມີ​ແຜນ­ຜັງ ມີ​ການ­ຈັດ­ຕັ້ງ​ປະ­ຕິ­ບັດ​ຕາມ​ແຜນ­ຜັງ​ທີ່​ດີ ບ້ານ​ຊ່ອງ​ສະ­ອາດ ຂຽວ­ງາມ ເປັນ​ລະ­ບົບ​ໜ້າ​ຢູ່​ຂອງ​ຊຸມ​ຊົນ ມີ​ໂຄງ​ລ່າງ​ພື້ນ­ຖານ​ເສດ­ຖະ­ກິດ-ສັງ­ຄົມ​ທີ່​ດີ ແລະ ທັນ​ສະ­ໄໝ ມີ​ເສດ­ຖະ­ກິດ​ຂະ­ຫຍາຍ­ຕົວ​ແບບ​ຍືນ​ຍົງ ມີ​ການ​ຜະ­ລິດ​ເປັນ​ສິນ­ຄ້າ ມີ​ການ​ບໍ­ລິ­ການ ແລະ ການ­ຈັດ­ຕັ້ງ​ການ​ຜະ­ລິດ​ທີ່​ສອດ­ຄ່ອງ ເໝາະ​ສົມ ພ້ອມ​ນັ້ນ ມີ​ວັດ­ທະ­ນະ­ທຳ​ອັນ​ດີ­ງາມ​ທີ່​ເປັນ​ເອ­ກະ­ລັກ​ຂອງ​ທ້ອງ­ຖິ່ນ ແລະ ຂອງ​ຊາດ ໄດ້​ຮັບ​ການ​ອະ­ນຸ​ຮັກ​ຮັກ­ສາ ເສີມ​ຂະ­ຫຍາຍ​ທຸກ​ຄົນ​ໃນ​ເກນ​ອາ­ຍຸ​ມີ​ວຽກ​ເຮັດ​ງານ​ທຳ ແລະ ມີ​ລາຍ​ຮັບ​ທີ່​ໝັ້ນ­ຄົງ ພ້ອມ​ນັ້ນ ລະ­ບົບ​ການ­ເມືອງ​ມີ​ການ​ເຄື່ອນ ໄຫວ​ຕາມ​ພາ­ລະ​ບົດ­ບາດ​ໜ້າ­ທີ່​ຂອງ​ຕົນ ໃນ​ນັ້ນ ຮາກ​ຖານ​ພັກ​ເປັນ​ຮາກ​ຖານ​ທີ່​ປອດ​ໃສ​ມີ​ຄວາມ​ເຂັ້ມ­ແຂງ ປະ­ຊາ­ຊົນ​ມີ​ສະ­ຕິ​ຕື່ນ​ຕົວ​ເປັນ​ເຈົ້າ​ປະ­ຕິ­ບັດ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ທົ່ວ​ປວງ​ຊົນ ແລະ ອື່ນໆ.

    ສ່ວນ​ມາດ​ຕະ​ການ­ຈັດ­ຕັ້ງ​ຜັນ​ຂະ­ຫຍາຍ​ແມ່ນ​ມອບ​ໃຫ້​ຂະ­ແໜງ­ການ ອົງ­ການ​ຂັ້ນ​ສູນ​ກາງ​ປັບ­ປຸງ​ມາດ​ຕະ­ການ​ຂອງ​ຂະ  ແໜງ​ການ ອົງ­ການ​ຂອງ​ຕົນ​ໃຫ້​ສອດ­ຄ່ອງ​ກັບ​ດຳ­ລັດ​ສະ­ບັບ​ນີ້ ໃຫ້​ບັນ­ດາ​ທ້ອງ­ຖິ່ນ​ອີງ­ໃສ່​ເນື້ອ​ໃນ​ມາດ​ຕະ­ການ​ທີ່​ກຳ­ນົດ​ໄວ້​ໃນ​ດຳ­ລັດ 348/ລບ ກໍ່​ຄື ບົດ​ແນະ­ນຳ​ເລກ​ທີ 830/ກປ ເພື່ອ​ຫັນ​ເປັນ​ລະ­ອຽດ ສອດ­ຄ່ອງ ເໜາະ​ສົມ​ກັບ​ທ້ອງ­ຖິ່ນ​ຂອງ​ຕົນ​ໂດຍ​ຕິດ​ພັນ​ກັບ​ການ​ກຽມ​ດຳ­ເນີນ​ກອງ​ປະ­ຊຸມ​ໃຫຍ່ 3 ຂັ້ນ​ຂອງ​ພັກ ແລະ ຕາມ​ທິດ​ສາມ​ສ້າງ ໃນ​ນັ້ນ ໃຫ້​ກວດ­ກາ​ເບິ່ງ​ຄາດ ໝາຍ​ການ​ສ້າງ​ແຂວງ​ເປັນ​ຫົວ­ໜ່ວຍ​ຍຸດ​ທະ​ສາດ ສ້າງ​ເມືອງ​ໃຫ້​ເປັນ​ຫົວ­ໜ່ວຍ​ເຂັ້ມ­ແຂງ​ຮອບ­ດ້ານ​ສ້າງ​ບ້ານ​ໃຫ້​ເປັນ​ຫົວ­ໜ່ວຍ​ພັດ­ທະ­ນາ​ທີ່​ໄດ້​ກຳ­ນົດ​ໄວ້​ໃນ​ຄຳ​ສັ່ງ​ເລກ​ທີ 34/ນຍ ສະ­ເພາະ​ກະ­ຊວງ​ກະ­ສິ­ກຳ ແລະ ປ່າ­ໄມ້ ຕ້ອງ​ໄດ້​ຊຸກ­ຍູ້ ແລະ ຊ່ວຍ​ທ້ອງ­ຖິ່ນ​ໃນ​ການ​ສ້າງ​ພະ­ນັກ­ງານ ເຝິກ­ອົບ­ຮົມ (ສ້າງ​ຄູ​ເຝິກ) ຈັດ​ຕັ້ງ​ຕິດ­ຕາມ​ກວດ­ກາ ຕີ​ລາ­ຄາ ແລະ ປະ​ເມີນ​ຜົນ ອອກ​ຄູ່​ມື​ແນະ­ນຳ ອອກ​ຄຳ​ແນະ­ນຳ​ໃຫ້​ທ້ອງ­ຖິ່ນ​ສ້າງ​ແຜນ​ພັດ­ທະ­ນາ​ກວມ​ລວມ ນອກ​ນີ້ ທ່ານ​ຍັງ​ໄດ້​ມີ​ຄຳ​ເຫັນ​ທີ່​ມີ​ລັກ­ສະ­ນະ​ວິ­ໄຈ​ຕື່ມ​ອີກ.

ຂ່າວທີ່ກ່ຽວຂ້ອງ