ຂ່າວຫຼ້າສຸດ

ລາວ ສຳເລັດທົບທວນບົດລາຍງານສິດທິມະນຸດ ທີ່ເຊີແນວ

281 18 ກ.ກ. 2018 ຂ່າວໜ້າ​ໜຶ່ງ
ລາວ ສຳເລັດທົບທວນບົດລາຍງານສິດທິມະນຸດ ທີ່ເຊີແນວ

   ວັນ​ທີ 11-12 ກໍ­ລະ­ກົດ 2018  ຄະ­ນະ​ຜູ້​ແທນ​ລາວ​ນຳ​ໂດຍ​ທ່ານ ບຸນ​ເກີດ ສັງ​ສົມ​ສັກ ລັດ­ຖະ­ມົນ­ຕີ​ປະ­ຈຳ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ຊີ້​ນຳ​ລະ­ດັບ​ຊາດ​ໃນ​ການ​ປະ­ສານ​ງານ​ດ້ານ​ສິດ­ທິ​ມະ­ນຸດ ໄດ້​ເຂົ້າ​ຮ່ວມ​ກອງ​ປະ­ຊຸມ​ຄັ້ງ​ທີ 123 ຂອງ​ຄະ­ນະ​ກຳ­ມະ­ການ​ສິດ­ທິ​ມະ­ນຸດ ສປຊ (UN Human Rights Committee) ທີ່​ນະ­ຄອນ​ເຊີ​ແນວ ປະ­ເທດ​ສະ​ວິດ​ເພື່ອ​ທົບ​ທວນ​ບົດ​ລາຍ​ງານ​ການ­ຈັດ­ຕັ້ງ​ປະ­ຕິ­ບັດ​ສົນ­ທິ­ສັນ­ຍາ​ວ່າ​ດ້ວຍ​ສິດ­ທິ​ທາງ​ການ­ເມືອງ ແລະ ສິດ­ທິ​ຂອງ​ພົນ­ລະ­ເມືອງ​ເປັນ​ຄັ້ງ​ທຳ​ອິດ​ນັບ​ແຕ່ ສປປ ລາວ ເປັນ​ພາ­ຄີ​ໃນ​ປີ 2009 ເປັນ​ປະ­ທານ​ຂອງ​ທ່ານ ຢູ​ວອນ ຊາ​ນີ ປະ­ທານ​ຄະ­ນະ​ກຳ­ມະ­ການ​ສິດ­ທິ​ມະ­ນຸດ ມີ​ບັນ­ດາ​ຊ່ຽວ­ຊານ​ທີ່​ເປັນ​ສະ­ມາ­ຊິກ​ຂອງ​ຄະ­ນະ​ກຳ­ມະ­ການ​ສິດ­ທິ​ມະ­ນຸດ ຄະ­ນະ​ຜູ້​ແທນ​ລາວ ແລະ ຜູ້​ສົນ­ໃຈ​ຈຳ­ນວນ​ໜຶ່ງ​ເຂົ້າ​ຮ່ວມ.

    ກອງ​ປະ­ຊຸມ ທ່ານ ບຸນ​ເກີດ ສັງ​ສົມ​ສັກ ຫົວ­ໜ້າ​ຄະ­ນະ​ຜູ້​ແທນ ໄດ້​ຍົກ​ໃຫ້​ເຫັນ​ການ​ເອົາ­ໃຈ­ໃສ່​ຢ່າງ​ຕໍ່​ເນື່ອງ​ຂອງ​ລາວ​ໃນ​ການ­ຈັດ­ຕັ້ງ​ປະ­ຕິ­ບັດ​ສົນ­ທິ­ສັນ­ຍາ​ວ່າ​ດ້ວຍ​ສິດ­ທິ​ທາງ​ການ­ເມືອງ ແລະ ສິດ­ທິ​ຂອງ​ພົນ­ລະ­ເມືອງ (ICCPR) ການ​ຄ້ຳ­ປະ­ກັນ​ສິດ­ທິ​ມະ­ນຸດ ແລະ ສິດ­ທິ​ຂອງ​ພົນ­ລະ­ເມືອງ​ລາວ​ໃນ​ລັດ​ຖະ​ທຳ​ມະ­ນູນ ການ​ຜັນ​ຂະ­ຫຍາຍ​ພັນ­ທະ ແລະ ຄຳ​ໝັ້ນ​ສັນ­ຍາ​ຂອງ​ລາວ​ພາຍ​ໃຕ້​ສົນ­ທິ­ສັນ­ຍາ​ດ້ານ​ສິດ­ທິ​ມະ­ນຸດ​ທີ່​ລາວ​ເປັນ​ພາ­ຄີ​ເຂົ້າ​ໃນ​ກົດ­ໝາຍ ແລະ ນິ­ຕິ​ກຳ​ໃຕ້​ກົດ­ໝາຍ ເຊິ່ງ​ຕະ­ຫຼອດ​ໄລ­ຍະ 43 ປີ­ຜ່ານ­ມາ ລາວ​ເຮົາ​ໄດ້​ມີ​ຜົນ­ສຳ­ເລັດ​ອັນ​ໃຫຍ່​ຫຼວງ​ໃນ​ການ​ປະ­ຕິ­ບັດ​ສອງ​ໜ້າ­ທີ່​ຍຸດ​ທະ​ສາດ​ຄື:ປົກ​ປັກ​ຮັກ­ສາ ແລະ ພັດ­ທະ­ນາ​ປະ­ເທດ​ຊາດ ສປປ ລາວ ມີ​ສະ­ຖຽນ​ລະ​ພາບ​ທາງ​ດ້ານ​ການ­ເມືອງ​ອັນ​ໜັກ​ແໜ້ນ ເສດ­ຖະ­ກິດ​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ປະ­ຊາ­ຊົນ​ລາວ​ດຳ­ລົງ​ຊີ­ວິດ​ໃນ​ສັນ­ຕິ­ພາບ ຄວາມ​ເປັນ​ເອ­ກະ­ລາດ​ແຫ່ງ​ຊາດ ໄດ້​ຮັບ​ການ​ປັບ­ປຸງ​ຊີ­ວິດ​ການ​ເປັນ​ຢູ່​ທາງ​ດ້ານ​ວັດ­ຖຸ ແລະ ຈິດ­ໃຈ​ດີ​ຂຶ້ນ​ຢ່າງ​ຕໍ່​ເນື່ອງ ຫົວ­ໜ້າ​ຄະ­ນະ​ຜູ້​ແທນ​ລາວ​ຍັງ​ໄດ້​ຍົກ​ໃຫ້​ເຫັນ​ປະ­ຫວັດ­ສາດ​ອັນ​ຍາວ​ນານ​ທີ່​ລະ​ອິດ​ລະ​ອ້ຽວ​ຂອງ​ຊາດ​ລາວ ເຊິ່ງ​ໄດ້​ຜ່ານ​ຜ່າ​ຄວາມ​ຫຍຸ້ງ­ຍາກ​ນາໆ​ປະ­ການ​ເຄີຍ​ຕົກ​ຢູ່​ພາຍ​ໃຕ້​ການ​ຄອບ​ຄອງ ແລະ ຫົວ​ເມືອງ​ຂຶ້ນ​ຂອງ​ຕ່າງ​ຊາດ ປະ­ຊາ­ຊົນ​ລາວ​ເວ­ລາ​ນັ້ນ​ຂາດ​ສິດ­ທິ​ມະ­ນຸດ ແລະ ເສລີ­ພາບ​ຂັ້ນ​ພື້ນ­ຖານ ການ​ສ້າງ­ຕັ້ງ ສປປ ລາວ ໃນ​ປີ 1975 ໄດ້​ໄຂ​ສັງ­ກາດ​ໃໝ່​ໃຫ້​ປະ­ຊາ­ຊົນ​ລາວ​ບັນ­ດາ­ເຜົ່າ ໄດ້​ເປັນ​ເຈົ້າ​ຂອງ​ປະ­ເທດ​ຊາດ ເລືອກ​ເອົາ­ລະ​ບອບ​ການ­ເມືອງ​ທີ່​ສອດ­ຄ່ອງ​ກັບ​ຄວາມ​ເປັນ​ຈິງ​ທາງ​ດ້ານ​ປະ­ຫວັດ­ສາດ ວັດ­ທະ­ນະ­ທຳ-ສັງ­ຄົມ​ຂອງ​ຊາດ ຕອບ​ສະ­ໜອງ​ເຈດ​ຈຳ­ນົງ ແລະ ຄວາມ​ມຸ່ງ​ມາດ​ປາ­ຖະ­ໜາ​ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ​ບົນ​ພື້ນ­ຖານ​ສິດ​ໃນ​ການ​ຕັດ­ສິນ​ຊາ­ຕາ­ກຳ​ຂອງ​ຕົນ​ໂດຍ​ຕົນ​ເອງ ລັດ­ຖະ­ບານ​ລາວ​ດຳ­ເນີນ​ນະ­ໂຍ­ບາຍ​ປັບ­ປຸງ​ບູ­ລະ­ນະ​ລະ­ບອບ​ປະ­ຊາ ທິ​ປະ​ໄຕ​ປະ­ຊາ­ຊົນ ສ້າງ​ລັດ​ແຫ່ງ​ກົດ­ໝາຍ ສ້າງ​ຄວາມ​ເຂັ້ມ­ແຂງ​ໃຫ້​ແກ່​ອົງ­ການ​ຕຸ­ລາ­ການ ແລະ ການ​ເຂົ້າ​ເຖິງ​ຂະ​ບວນ​ຍຸ­ຕິ​ທຳ ມາ​ຮອດ​ປັດ­ຈຸ­ບັນ ສປປ ລາວ ໄດ້​ຮັບ­ຮອງ​ເອົາ​ກົດ­ໝາຍ​ຫຼາຍ​ກວ່າ 120 ສະ­ບັບ ແລະ ໃຫ້​ສັດ­ຕະ­ຍາ­ບັນ​ສົນ­ທິ­ສັນ­ຍາ​ດ້ານ​ສິດ­ທິ​ມະ­ນຸດ 7 ສະ­ບັບ ແລະ ອະ­ນຸ​ສັນ­ຍາ​ເພີ່ມ​ເຕີມ 2 ສະ­ບັບ ໃນ​ຈຳ­ນວນ​ສົນ­ທິ­ສັນ­ຍາ​ຫຼັກ​ດ້ານ​ສິດ­ທິ​ມະ­ນຸດ​ທັງ​ໝົດ 9 ສະ­ບັບ​ຂອງ​ອົງ­ການ ສປຊ.

ກອງ​ປະ­ຊຸມ​ທົບ​ທວນ​ບົດ​ລາຍ​ງານ​ຂອງ​ລາວ​ຄັ້ງ​ນີ້ ໄດ້​ດຳ­ເນີນ​ໄປ​ດ້ວຍ​ຄວາມ​ເປີດ​ອົກ​ເປີດ​ໃຈ ແລະ ກົງ​ໄປ​ກົງ​ມາ ຄະ­ນະ​ຜູ້​ແທນ​ລາວ​ໄດ້​ຕອບ​ຄຳ​ຖາມ ສະ­ໜອງ​ຂໍ້​ມູນ ແລະ ໃຫ້​ຄວາມ​ກະ­ຈ່າງ​ແຈ້ງ​ຕໍ່​ຄຳ​ຖາມ​ເຈາະ​ຈີ້ມ​ຂອງ​ຄະ­ນະ​ກຳ­ມະ­ການ ເຊິ່ງ​ກ່ຽວ­ຂ້ອງ​ກັບ​ບົດ​ບັນ­ຍັດ​ຂອງ​ສົນ­ທິ­ສັນ­ຍາ​ວ່າ​ດ້ວຍ​ສິດ­ທິ​ທາງ​ການ­ເມືອງ ແລະ ສິດ­ທິ​ຂອງ​ພົນ­ລະ­ເມືອງ ບົດ​ລາຍ​ງານ​ສະ­ບັບ​ທຳ​ອິດ​ຂອງ​ລາວ ແລະ ຄຳ​ຕອບ​ຕໍ່​ຄຳ​ຖາມ​ເຈາະ​ຈີ້ມ​ເປັນ​ລາຍ​ລັກ​ອັກ­ສອນ​ທີ່​ໄດ້​ສົ່ງ​ໃຫ້​ຄະ­ນະ​ກຳ­ມະ­ການ​ກ່ອນ​ໜ້າ​ນີ້ ໃນ​ນັ້ນ ລວມ​ມີ​ການ​ຜັນ​ຂະ­ຫຍາຍ​ບົດ​ບັນ­ຍັດ​ຂອງ​ສົນ­ທິ­ສັນ­ຍາ​ເຂົ້າ​ໃນ​ກົດ­ໝາຍ​ພາຍ​ໃນ​ການ​ພົວ­ພັນ ລະ­ຫວ່າງ ສົນ­ທິ­ສັນ­ຍາ ແລະ ກົດ­ໝາຍ​ພາຍ​ໃນ​ຂອງ​ລາວ ແລະ ບັນ­ຫາ​ອື່ນໆ​ທີ່​ກ່ຽວ­ຂ້ອງ​ກັບ​ສົນ­ທິ­ສັນ­ຍາ​ດັ່ງ­ກ່າວ. 

ຕໍ່​ຄຳ​ຖາມ​ທີ່​ຄະ­ນະ​ກຳ­ມະ­ການ​ຍົກ​ຂຶ້ນ​ນັ້ນ​ຄະ­ນະ​ຜູ້​ແທນ​ໄດ້​ເປັນ​ເຈົ້າ​ການ​ຊີ້​ແຈງ​ອະ­ທິ­ບາຍ​ຢ່າງ​ຈະ­ແຈ້ງ ລະ­ອຽດ ຊັດ​ເຈນ  ໂດຍ​ຍົກ​ໃຫ້​ເຫັນ​ບົດ​ບັນ­ຍັດ​ລັດ​ຖະ​ທຳ​ມະ­ນູນ ບັນ­ດາ​ກົດ­ໝາຍ ແລະ ນິ­ຕິ​ກຳ​ທີ່​ກ່ຽວ­ຂ້ອງ​ຂອງ​ລາວ ນະ​ໂຍ ບາຍ ມາດ​ຕະ­ການ ແລະ ຄວາມ​ພະ­ຍາ­ຍາມ​ຂອງ​ລັດ­ຖະ­ບານ​ລາວ​ໃນ​ການ​ປົກ​ປ້ອງ ແລະ ສົ່ງ­ເສີມ​ສິດ­ທິ​ທາງ​ດ້ານ​ການ­ເມືອງ ແລະ ສິດ­ທິ​ຂອງ​ພົນ­ລະ­ເມືອງ​ຢູ່​ລາວ ອັນ​ໄດ້​ເຮັດ​ໃຫ້​ຄະ­ນະ​ກຳ­ມະ­ການ​ສິດ­ທິ​ມະ­ນຸດ ສປຊ ແລະ ຜູ້​ມີ​ຄວາມ​ສົນ­ໃຈ​ອື່ນໆ​ມີ​ຄວາມ​ຮັບ​ຮູ້ ແລະ ເຂົ້າ­ໃຈ ກ່ຽວ​ກັບ​ສະ­ພາບ​ຄວາມ​ເປັນ​ຈິງ​ໃນ​ການ­ຈັດ­ຕັ້ງ​ປະ­ຕິ­ບັດ​ສິດ­ທິ​ມະ­ນຸດ​ຢູ່​ລາວ ແນວ­ທາງ​ນະ­ໂຍ­ບາຍ​ຂອງ​ພັກ-ລັດ​ລາວ ຄວາມ​ຖືກ­ຕ້ອງ​ເປັນ​ທຳ​ຂອງ​ລະ­ບອບ​ການ­ເມືອງ-ການ​ປົກ­ຄອງ​ຂອງ​ລາວ ບົນ ພື້ນ­ຖານ​ລັດ​ຖະ​ທຳ​ມະ­ນູນ ກົດ​ບັດ ສປຊ ແລະ ກົດ­ໝາຍ​ສາ­ກົນ ກອງ​ປະ­ຊຸມ​ທົບ​ທວນ​ດັ່ງ­ກ່າວ​ຍັງ​ເປັນ​ໂກ​ອາດ​ອັນ​ດີ​ໃຫ້​ແກ່​ຄະ­ນະ​ຜູ້​ແທນ​ລາວ​ໄດ້​ແລກ­ປ່ຽນ​ບົດ­ຮຽນ ແລະ ປະ­ສົບ​ປະ­ການ​ກັບ​ຜູ້​ຊ່ຽວ­ຊານ​ທີ່​ເປັນ​ສະ­ມາ­ຊິກ​ຂອງ​ຄະ­ນະ​ກຳ​ມະ ການ​ອີກ ເພື່ອ​ຈຸດ­ປະ­ສົງ​ການ­ຈັດ­ຕັ້ງ​ປະ­ຕິ­ບັດ​ພັນ­ທະ​ສາ­ກົນ​ຂອງ​ລາວ​ໄດ້​ຮັບ​ຜົນ​ດີ​ຂຶ້ນ​ເລື້ອຍໆ.

ຂ່າວທີ່ກ່ຽວຂ້ອງ