ຂ່າວຫຼ້າສຸດ

ນວ ບໍ່ອະນຸຍາດໃຫ້ 9 ບໍລິສັດ ເຂົ້າຮ່ວມປະມູນໂຄງການລົງທຶນຂອງລັດ

359 18 ກ.ກ. 2018 ຂ່າວໜ້າ​ໜຶ່ງ

   ຕາມ​ການ​ລາຍ​ງານ​ຂອງ​ທ່ານ ລາດ​ຊະ­ນີ​ວົງ ອະ​ມະ​ຣາ​ທິ​ທາ­ດາ ປະ­ທານ​ກວດ­ກາ​ພັກ ປະ­ທານ​ອົງ­ການ​ກວດ­ກາ​ນະ­ຄອນ­ຫຼວງ​ວຽງ​ຈັນ ລາຍ​ງານ​ຕໍ່​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 5 ຂອງ​ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ ຊຸດ​ທີ I ວ່າ ສົກ​ປີ 2012-2013 ຢູ່​ນະ­ຄອນ­ຫຼວງ​ວຽງ​ຈັນ ມີ 9 ໂຄງ­ການ​ລົງ­ທຶນ​ຂອງ​ລັດ​ທີ່​ຈ່າຍ​ເງິນ​ຊ້ຳ​ຊ້ອນ​ໃນ​ງົບ­ປະ­ມານ​ມູນ​ຄ່າ 4,9 ຕື້​ກີບ​ເປັນ​ການ​ຈ່າຍ​ເງິນ​ຊ້ຳ​ຊ້ອນ​ຍ້ອນ​ວ່າ​ບໍ­ລິ­ສັດ​ດັ່ງ­ກ່າວ​ໄດ້​ໄປ​ຂາຍ​ໜີ້​ແບບ​ມີ​ສ່ວນ​ຫຼຸດ 30%-70% ນຳ​ກະ­ຊວງ​ການ​ເງິນ ແລະ ໄດ້​ຮັບ​ຈ່າຍ​ຕາມ​ລະ­ບຽບ​ແລ້ວ ແຕ່​ຍັງ​ມາ​ເອົາ​ເງິນ​ຕາມ​ແຜນ​ປົກ­ກະ­ຕິ​ຢູ່​ນະ­ຄອນ­ຫຼວງ​ວຽງ​ຈັນ​ຕື່ມ​ອີກ ໝາຍ​ຄວາມ​ວ່າ​ເປັນ​ການ​ເອົາ​ເງິນ​ຂອງ​ລັດ​ຊ້ຳ​ຊ້ອນ ດັ່ງ­ນັ້ນ ຄະ­ນະ​ສະ­ເພາະ​ກິດ​ຈິ່ງ​ໄດ້ ດຳ­ເນີນ​ການ​ກວດ­ກາ​ລາຍ​ລະ­ອຽດ​ໂດຍ​ເຊີນ​ເອົາ 9 ບໍ­ລິ­ສັດ​ດັ່ງ­ກ່າວ​ມາ​ສອບ​ຖາມ ກວດ­ກາ​ບັນ­ດາ​ເອ­ກະ­ສານ​ກ່ຽວ­ຂ້ອງ​ທີ່​ຢັ້ງ­ຢືນ​ການ​ອະ­ນຸ­ມັດ​ເບີກ​ຈ່າຍ ແລະ ທັງ 9 ບໍ­ລິ­ສັດ​ໄດ້​ຍອມ­ຮັບ​ວ່າ​ໄດ້​ເອົາ​ເງິນ​ຊ້ຳ​ຊ້ອນ​ແທ້ ພ້ອມ​ນີ້ ກໍ່​ມີ​ບໍ­ລິ­ສັດ​ຈຳ­ນວນ​ໜຶ່ງ​ມີ​ຄວາມ​ຕື່ນ​ຕົວ​ເອົາ​ເງິນ​ມາ​ສົ່ງ​ຄືນ​ຢ່າງ​ຄົບ​ຖ້ວນ ແລະ ຍັງ​ມີ 2 ບໍ­ລິ­ສັດ​ບໍ່​ຍອມ​ມາ​ສົ່ງ​ຄືນ​ໂດຍ​ເອົາ​ເຫດ­ຜົນ​ໂຄງ­ການ​ອື່ນ​ມາ​ອ້າງ​ເຊິ່ງ​ເປັນ​ການ​ຂັດ​ຕໍ່​ກົດ­ໝາຍ​ວ່າ​ດ້ວຍ​ການ​ລົງ­ທຶນ​ຂອງ​ລັດ ສະ­ນັ້ນ ຄະ­ນະ​ສະ­ເພາະ​ກິດ​ຈິ່ງ​ໄດ້​ໃຊ້​ມາດ​ຕະ­ການ​ຢ່າງ​ເຂັ້ມ​ງວດ 2 ບໍ­ລິ­ສັດ​ດັ່ງ­ກ່າວ​ຈິ່ງ​ຍອມ​ສົ່ງ​ເງິນ​ຄືນ​ໃຫ້​ລັດ​ຢ່າງ​ຄົບ​ຖ້ວນ.

   ຜ່ານ​ການ​ສືບ­ສວນ​ສອບ​ສວນ 9 ບໍ­ລິ­ສັດ​ແມ່ນ​ຄວາມ​ຈົງ­ໃຈ​ເອົາ​ເງິນ​ຊ້ຳ​ຊ້ອນ ເຊິ່ງ​ເປັນ​ການ​ສໍ້​ໂກງ​ຊັບ​ສິນ​ຂອງ​ລັດ ແລະ ເຮັດ​ໃຫ້​ລັດ​ເສຍ​ຫາຍ ຕາມ​ກົດ­ໝາຍ​ແລ້ວ​ແມ່ນ​ມີ​ຄວາມ​ຜິດ​ທາງ​ອາ­ຍາ ແຕ່​ເນື່ອງ​ຈາກ​ວ່າ­ການ​ເກັບ​ກູ້​ເງິນ​ຊ້ຳ​ຊ້ອນ​ຄືນ​ໃຫ້​ລັດ​ຄົບ​ຖ້ວນ​ຈິ່ງ​ໄດ້​ຜ່ອນ­ຜັນ​ມາ​ເປັນ­ຄວາມ​ຜິດ​ແກ້​ໄຂ​ທາງ​ບໍ­ລິ­ຫານ​ຄື ໃຫ້​ມີ​ການ​ປັບ​ໃໝ ບໍ່​ໃຫ້​ເຂົ້າ​ຮ່ວມ​ປະ­ມູນ​ໂຄງ­ການ​ລົງ­ທຶນ​ຂອງ​ລັດ​ໃນ​ສົກ​ປີ 2018  ບັນ­ດາ​ບໍ­ລິ­ສັດ​ທີ່​ມີ​ການ​ກະ­ທຳ​ຜິດ​ກ່ຽວ​ກັບ​ໂຄງ­ການ​ບໍ່​ມີ​ຕົວ​ຕົນ ໂຄງ­ການ​ຈ່າຍ​ເງິນ​ຊ້ຳ​ຊ້ອນ ຈ່າຍ​ເງິນ​ເກີນ​ຢູ່​ກະ­ຊວງ​ການ​ເງິນ ແຂວງ​ອຸ­ດົມ​ໄຊ ແລະ ແຂວງ​ອື່ນໆ ປັດ­ຈຸ­ບັນ ບັນ­ດາ​ບໍ­ລິ­ສັດ​ໄດ້​ມາ​ເສຍ​ຄ່າ​ປັບ​ໃໝ​ແລ້ວ ແລະ ໄດ້​ອອກ​ແຈ້ງ​ການ​ໃຫ້​ທຸກ​ພະ­ແນກ­ການ​ຢູ່ ນວ ບໍ່​ອະ­ນຸ­ຍາດ​ໃຫ້​ຈຳ­ນວນ 9 ບໍ­ລິ­ສັດ​ເຂົ້າ​ຮ່ວມ​ປະ­ມູນ​ໂຄງ­ການ​ລົງ­ທຶນ​ຂອງ​ລັດ ໃນ​ສົກ​ປີ 2018.

ຂ່າວທີ່ກ່ຽວຂ້ອງ