ຊາວສວນຢາງພາລາ ນຳຜົນຜະລິດມາຂາຍຢ່າງເປັນຂະບວນຟົດຟື້ນ

307 18 ກ.ກ. 2018 ຂ່າວໜ້າ​ໜຶ່ງ
ຊາວສວນຢາງພາລາ ນຳຜົນຜະລິດມາຂາຍຢ່າງເປັນຂະບວນຟົດຟື້ນ

   ຊາວ​ສວນ​ຢາງ­ພາ­ລາ​ເຂດ​ບ້ານ​ຫ້ວຍ​ເດື່ອ ເມືອງ​ໂພນ​ໂຮງ ແຂວງ​ວຽງ​ຈັນ ແລະ ບໍ­ລິ­ເວນ​ໃກ້​ຄຽງ ນຳ​ຜົນ​ຜະ­ລິດ​ຂອງ​ຕົນ​ມາ​ຂາຍ​ໃຫ້​ພໍ່­ຄ້າ-ແມ່​ຄ້າ​ຢ່າງ​ເປັນ​ຂະ​ບວນ​ຟົດ­ຟື້ນ ເນື່ອງ​ຈາກ​ລາ­ຄາ​ຢາງ​ເລີ່ມ​ປັບ​ຕົວ​ດີ​ຂຶ້ນ​ເປັນ​ລຳ­ດັບ ພາຍ­ຫຼັງ​ທີ່​ໄດ້​ມີ​ການ​ດິ່ງ​ລົງ​ຕ່ຳ​ສຸດ​ໃນ​ຊຸມ​ປີ­ຜ່ານ­ມາ.

   ທ່ານ ວິ­ໄລ​ວັນ ພົມ​ເຂ ປະ­ທານ​ສະ­ມາ­ຄົມ​ຢາງ­ພາ­ລາ​ລາວ ໃຫ້​ສຳ­ພາດ​ໂອ­ກາດ​ລົງ​ຕິດ­ຕາມ​ການ​ຊື້-ຂາຍ​ຢາງ­ພາ­ລາ​ຢູ່​ເຂດ​ບ້ານ​ຫ້ວຍ​ເດື່ອ ວັນ​ທີ 14 ກໍ­ລະ­ກົດ 2018 ວ່າ: ເຂດ​ຈຸດ​ສຸມ​ພັດ­ທະ­ນາ​ບ້ານ​ນາ​ເລົາ ເມືອງ​ໂພນ​ໂຮງ ໂດຍ​ສະ­ເພາະ ບ້ານ​ຫ້ວຍ​ເດື່ອ ແລະ ບໍ­ລິ­ເວນ​ເຂດ​ຊາຍ​ແດນ​ລະ­ຫວ່າງ​ເມືອງ​ໂພນ​ໂຮງ ແລະ ເມືອງ​ສັງ​ທອງ ນະ­ຄອນ­ຫຼວງ​ວຽງ​ຈັນ ເປັນ​ຕະ­ຫຼາດ­ນັດ​ຊື້-ຂາຍ​ຢາງ­ພາ­ລາ​ໃຫຍ່ ຂອງ​ປະ­ຊາ­ຊົນ​ບໍ­ລິ­ເວນ​ດັ່ງ­ກ່າວ ເຊິ່ງ​ຜ່ານ​ການ​ລົງ​ຕິດ­ຕາມ​ຕົວ​ຈິງ​ຄັ້ງ​ນີ້ ເຫັນ​ວ່າ​ມີ​ບັນ­ຍາ­ກາດ​ຟົດ­ຟື້ນ ປະ­ຊາ­ຊົນ​ມີ­ໜ້າ​ຕາ​ຍິ້ມ­ແຍ້ມ​ແຈ່ມ​ໃສ ເນື່ອງ​ຈາກ​ໄດ້​ຂາຍ​ຜົນ​ຜະ­ລິດ ບໍ​ລິ​ມາດ​ການ​ຊື້-ຂາຍ​ຢາງ​ມີ​ຫຼວງ­ຫຼາຍ ແລະ ມີ​ການ​ຕໍ່​ລອງ​ລາ­ຄາ​ເພື່ອ​ໃຫ້​ຊາວ​ສວນ​ໄດ້​ຮັບ​ຜົນ​ປະ­ໂຫຍດ​ທີ່​ສຸດ ແຕ່​ສິ່ງ​ທີ່​ຕ້ອງ​ເອົາ­ໃຈ­ໃສ່​ຮີບ​ດ່ວນ ອຳ­ນາດ​ການ​ປົກ­ຄອງ​ເມືອງ​ຄວນ​ແຕ່ງ​ພະ­ນັກ­ງານ​ວິ­ຊາ​ການ​ມາ​ປະ­ຈຳ ຈັດ​ສັນ​ບ່ອນ​ຊື້-ຂາຍ​ຄືນ­ໃໝ່​ໃຫ້​ເປັນ​ລະ­ບຽບ ຍ້ອນ​ມີ​ການ​ຕິດ​ພັນ​ກັບ​ສິ່ງ­ແວ­ດລ້ອມ ພ້ອມ​ນີ້ ກໍ່​ຕ້ອງ​ມີ​ການ​ຄວບ​ຄຸມ​ຜູ້​ທີ່​ມາ​ຮັບ​ຊື້​ຢາງ​ໃຫ້​ຢູ່​ໃນ​ລະ­ບຽບ ມີ​ການ​ປະ­ມູນ​ເພ­ດານ​ລາ­ຄາ​ຊື້-ຂາຍ​ຢ່າງ​ຄັກ­ແນ່​ໃນ​ແຕ່​ລະ​ຄັ້ງ ເພື່ອ​ຮັບ ປະ­ກັນ​ຜົນ​ປະ­ໂຫຍດ​ທັງ​ສອງ​ຝ່າຍ ຫຼີກ​ລ່ຽງ​ການ​ຂັດ​ແຍ່ງ-ຊ່ວງ​ເສັງ​ລູກ​ຄ້າ ແລະ ຄວນ​ມີ​ການ​ບໍ­ລິ­ການ​ດ້ານ​ອາ ຫານ-ເຄື່ອງ​ດື່ມ​ຕື່ມ​ອີກ ຖ້າ​ເຮັດ​ໄດ້​ແນວ​ນັ້ນ​ກໍ່​ຈະ​ສາ­ມາດ​ອຳ­ນວຍ​ຄວາມ​ສະ­ດວກ​ໃຫ້​ຜູ້​ຊື້-ຂາຍ ແລະ ຈະ​ເຮັດ​ໃຫ້ ການ​ຊື້-ຂາຍ​ຢາງ­ພາ­ລາ​ຢູ່​ເຂດ​ນີ້​ຍິ່ງ​ຈະ​ມີ​ບັນ­ຍາ­ກາດ​ຟົດ­ຟື້ນ​ຍິ່ງ​ຂຶ້ນ.

   ທ່ານ​ນາງ ຊໍ້ ຫວ່າງ ຊາວ​ສວນ​ຢາງ​ບ້ານ​ໜອງ​ຂອນ ກ່າວ​ວ່າ: ຂ້າ­ພະ­ເຈົ້າ​ປູກ​ຢາງ​ໄດ້ 10 ກວ່າ​ປີ​ມາ​ແລ້ວ ປັດ­ຈຸ­ບັນ​ສາ­ມາດ​ຂະ­ຫຍາຍ​ເນື້ອ­ທີ່​ໄດ້ 5 ເຮັກ­ຕາ ໄດ້​ເລີ່ມ​ຂີດ​ຢາງ​ມາ​ໄດ້ 5 ປີ​ແລ້ວ ຜ່ານ​ການ​ປູກ​ຢາງ­ພາ­ລາ​ແມ່ນ​ເຮັດ​ໃຫ້​ຊີ­ວິດ​ເປັນ​ການ​ຢູ່​ດີ​ຂຶ້ນ ສະ­ເລ່ຍ​ລາຍ​ຮັບ 3 ລ້ານ​ກີບ​ຕໍ່​ເດືອນ (ຕົ້ນ​ຢາງ​ທີ່​ສາ­ມາດ​ຂີດ​ໄດ້​ມີ​ໜ້ອຍ ເນື່ອງ​ຈາກ​ບໍ່​ຮອດ​ອາ­ຍຸ​ການ​ຂີດ) ແຕ່​ກ່ອນ​ຂ້າ­ພະ­ເຈົ້າ​ຕ້ອງ​ຂົນ​ຢາງ​ໄປ​ຂາຍ​ຢູ່​ແຂວງ​ບໍ​ລິ​ຄຳ​ໄຊ ເຊິ່ງ​ມີ​ໄລ­ຍະ​ທາງ ໄກ ແລະ ສິ້ນ​ເປືອງ​ເລື່ອງ​ການ​ຂົນ­ສົ່ງ ລາ­ຄາ​ຢາງ​ກໍ່​ບໍ່​ສູງ ເຮັດ​ໃຫ້​ຊາວ​ສວນ​ມີ​ກຳ­ໄລ​ໜ້ອຍ ແຕ່​ພາຍ­ຫຼັງ​ເພິ່ນ​ມາ​ຮັບ​ຊື້​ຢູ່​ບ່ອນ​ນີ້​ໄດ້​ເຮັດ​ໃຫ້​ຊາວ​ສວນ​ຢາງ​ພວກ​ເຮົາ​ມີ​ຄວາມ​ສະ­ດວກ​ຫຼາຍ​ຂຶ້ນ ສິ່ງ​ທີ່​ຢາກ​ໃຫ້​ພາກ​ລັດ​ຊ່ວຍ­ເຫຼືອ​ແມ່ນ​ຢາກ​ໃຫ້​ລະ­ດົມ​ຜູ້​ທີ່​ມາ​ຮັບ​ຊື້​ຢາງ​ຂຶ້ນ​ລາ­ຄາ​ຕື່ມ​ອີກ ເພາະ­ວ່າ​ຕ້ອງ​ໃຊ້​ເວ­ລາ 7-8 ປີ ຈຶ່ງ​ໄດ້​ຂີດ​ຢາງ ເຊິ່ງ​ຕ້ອງ​ໄດ້​ໃຊ້​ທຶນ­ຮອນ​ຫຼາຍ​ໃນ​ການ​ບົວ­ລະ­ບັດ​ຮັກ­ສາ ດ້ານ​ລາ­ຄາ​ໃນ​ເມື່ອ​ກ່ອນ​ແມ່ນ 15.000 ກີບ​ຕໍ່​ກິ​ໂລ ແລະ ໄດ້​ຫຼຸດ​ລົງ​ເຖິງ 2.500 ກີບ​ຕໍ່​ກິ​ໂລ ຈຶ່ງ​ມາ​ເລີ່ມ​ປັບ​ຂຶ້ນ​ເທື່ອ​ລະ​ໜ້ອຍ​ໃນ​ຊຸມ​ປີ­ຜ່ານ­ມາ ສະ­ເພາະ​ປີ 2017 ໄລ­ຍະ​ລາ­ຄາ​ດີ​ແມ່ນ 8.000-9.000 ກີບ​ຕໍ່​ກິ​ໂລ ແຕ່​ປັດ­ຈຸ­ບັນ​ລາ­ຄາ 5.000-5.800 ກີບ​ຕໍ່​ກິ​ໂລ ຖ້າ​ເປັນ​ໄລ­ຍະ​ລາ­ຄາ​ດີ​ກໍ່​ອາດ​ຈະ​ເພີ່ມ​ຂຶ້ນ​ເລັກ​ໜ້ອຍ ສະ­ນັ້ນ ຈຶ່ງ​ຢາກ​ໃຫ້​ຂັ້ນ​ເທິງ​ຊ່ວຍ​ຕື່ມ​ອີກ​ໃນ​ດ້ານ​ການ​ກຳ­ນົດ​ລາ­ຄາ​ຊື້-ຂາຍ​ໃຫ້​ສະ​ໝ່ຳ​ສະ­ເໝີ ຢ່າງ​ໜ້ອຍ​ໃຫ້​ຢູ່​ລະ­ດັບ 10.000 ກີບ​ຕໍ່​ກິ​ໂລ ໜ້າ​ຈະ​ເໝາະ​ສົມ ເພື່ອ​ຊ່ວຍ​ໃຫ້​ຊາວ​ສວນ​ມີ​ລາຍ​ຮັບ​ເພີ່ມ​ຂຶ້ນ.

   ທ່ານ ເຈ້ຍ​ຢ່າງ ກົງ​ຈີ ພະ­ນັກ­ງານ​ບັນ­ຊີ​ບໍ­ລິ­ສັດ​ສົ່ງ­ເສີມ​ກະ­ສິ­ກຳ​ຈຳ­ກັດ (ຜູ້​ຮັບ​ຊື້​ຢາງ) ກ່າວ​ວ່າ: ບໍ­ລິ­ສັດ​ພວກ​ເຮົາ​ໄດ້​ຮັບ​ຊື້​ຢາງ­ພາ­ລາ​ຢູ່​ເຂດ​ນີ້ 2 ຄັ້ງ​ຕໍ່​ເດືອນ ສະ­ເລ່ຍ 500-600 ໂຕນ ຜ່ານ​ການ​ເກັບ​ຊື້​ໃນ​ໄລ­ຍະ​ຜ່ານ​ມາ​ແມ່ນ​ຍັງ​ມີ​ຄວາມ​ຫຍຸ້ງ­ຍາກ ເນື່ອງ​ຈາກ​ບໍ່​ມີ​ການ​ປະ­ມູນ​ລາ­ຄາ ເຮັດ​ໃຫ້​ມີ​ການ​ຕໍ່​ລອງ​ລາ­ຄາ ລາ­ຄາ​ບໍ່​ເປັນ​ເອ­ກະ​ພາບ​ກັນ ເຮັດ​ໃຫ້​ພວກ​ເຮົາ​ພົບ​ຄວາມ​ຫຍຸ້ງ­ຍາກ​ໃນ​ການ​ຕົກ­ລົງ​ລາ­ຄາ​ຂາຍ​ຢູ່​ຕະ­ຫຼາດ​ປາຍ ແລະ ບາງ​ຄັ້ງ​ກໍ່​ຫຼຸບ​ທຶນ ຍ້ອນ​ມີ​ການ​ເກ​ລາ­ຄາ​ກັນ​ລະ­ຫວ່າງ​ຜູ້​ຮັບ​ຊື້ ຢາງ­ພາ­ລາ​ເປັນ​ສິນ­ຄ້າ​ທີ່​ຕະ­ຫຼາດ​ຍັງ​ມີ​ຄວາມ​ຕ້ອງ­ການ​ຫຼາຍ ໂດຍ​ສະ­ເພາະ ຕະ­ຫຼາດ​ຈີນ ສະ­ນັ້ນ ຈຶ່ງ​ຝາກ​ເຖິງ​ຊາວ​ສວນ​ປູກ​ໃຫ້​ຫຼາຍ​ຂຶ້ນ ສ່ວນ​ພາກ​ລັດ​ກໍ່​ຕ້ອງ​ໄດ້​ເອົາ­ໃຈ­ໃສ່​ຊ່ວຍ​ພວກ​ເຮົາ ໂດຍ​ສະ­ເພາະ ຢາກ​ໃຫ້​ມີ​ການ​ປະ­ມູນ​ລາ­ຄາ​ຢ່າງ​ຄັກ­ແນ່​ເພື່ອ​ຄວາມ​ເປັນ​ເອ­ກະ​ພາບ​ດ້ານ​ລາ­ຄາ​ຊື້-ຂາຍ ເຮັດ​ແນວ­ໃດ​ໃຫ້​ຜູ້​ຊື້ ແລະ ຜູ້​ຂາຍ​ຕ່າງ​ຝ່າຍ​ໄດ້​ຮັບ​ຜົນ​ປະ­ໂຫຍດ.

ຂ່າວທີ່ກ່ຽວຂ້ອງ