ຂ່າວຫຼ້າສຸດ

63 ປີ ມີໄຊ ຈົ່ງຮ່ວມໃຈບໍລິຈາກເລືອດ

201 18 ກ.ກ. 2018 ຂ່າວໜ້າ​ໜຶ່ງ
63 ປີ ມີໄຊ ຈົ່ງຮ່ວມໃຈບໍລິຈາກເລືອດ

   ເພື່ອ​ເປັນ​ການ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ສະ­ຫະ­ພັນ​ແມ່­ຍິງ​ລາວ ຄົບ­ຮອບ 63 ປີ (20/7/1955-20/ 7/2018) ທີ່​ຈະ​ມາ​ເຖິງ​ນີ້​ໃຫ້​ມີ​ຄວາມ​ໝາຍ​ເລິກ­ເຊິ່ງ ແລະ ເປັນ​ຂະ​ບວນ​ຟົດ­ຟື້ນ ວັນ​ທີ 17 ກໍ­ລະ­ກົດ  2018 ທີ່​ສູນ​ການ​ຄ້າ​ວຽງ​ຈັນ​ເຊັນ​ເຕີ ສູນ​ເລືອດ​ແຫ່ງ​ຊາດ ອົງ­ການ​ກາ­ແດງ​ລາວ ຮ່ວມ​ກັບ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ຈັດ​ກິດ­ຈະ­ກຳ​ບໍ­ລິ­ຈາກ​ເລືອດ​ແບບ​ເປີດ​ກວ້າງ ໂດຍ​ການ​ເຂົ້າ​ຮ່ວມ​ຂອງ ທ່ານ​ນາງ ອິນ​ລາ​ວັນ ແກ້ວ​ບຸນ​ພັນ ປະ­ທານ​ຄະ­ນະ​ບໍ­ລິ­ຫານ​ງານ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ແລະ ທ່ານ ຄຳ​ຮຸ່ງ ເຮືອງ​ວົງ​ສີ ປະ­ທານ​ອົງ­ການ​ກາ­ແດງ​ລາວ ມີ​ຄະ­ນະ​ນຳ​ຈາກ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ຕາງ­ໜ້າ​ຈາກ​ພາກ­ສ່ວນ​ການ­ຈັດ­ຕັ້ງ​ຕ່າງໆ​ອ້ອມ​ຂ້າງ​ສູນ​ກາງ ແລະ ນະ­ຄອນ­ຫຼວງ​ວຽງ​ຈັນ ເຂົ້າ​ຮ່ວມ​ຫຼາຍ​ກວ່າ 500 ຄົນ.

   ໃນ​ພິ­ທີ​ນອກ­ຈາກ​ການ​ປະ­ຕິ­ບັດ​ກິດ­ຈະ­ກຳ​ບໍ­ລິ­ຈາກ​ເລືອດ​ເພື່ອ​ຊ່ວຍ­ເຫຼືອ​ເພື່ອນ​ມະ­ນຸດ​ດ້ວຍ​ກັນ​ແລ້ວ ປະ­ທານ ສູນ​ກາງ​ສະ­ຫະ­ພັນ​ແມ່­ຍິງ​ລາວ ໄດ້​ຍົກ​ໃຫ້​ເຫັນ​ເຖິງ​ຄວາມ​ໝາຍ​ຄວາມ​ສຳ­ຄັນ​ຂອງ​ວັນ​ສ້າງ­ຕັ້ງ​ສະ­ຫະ­ພັນ​ແມ່­ຍິງ​ລາວ ແລະ ບົດ­ບາດ​ຂອງ​ແມ່­ຍິງ ທີ່​ມີ​ມູນ­ເຊື້ອ​ອັນ​ດີ​ງານ​ມາ​ແຕ່​ດົນ​ນານ ບໍ່​ວ່າ​ຈະ​ແມ່ນ​ໄລ­ຍະ​ຕໍ່­ສູ້​ປົດ​ປ່ອຍ​ຊາດ ຕ້ານ​ຈັກ­ກະ ພັດ​ຜູ້​ຮຸກ​ຮານ ກໍ່​ຄື ໃນ​ໄລ­ຍະ​ສ້າງ­ສາ​ພັດ­ທະ­ນາ​ປະ­ເທດ​ຊາດ ແມ່­ຍິງ​ລາວ​ບັນ­ດາ­ເຜົ່າ​ໃນ​ທົ່ວ​ປະ­ເທດ ຍາມ​ໃດ​ກໍ່​ຄຽງ​ບ່າ​ຄຽງ​ໄຫຼ່​ຮ່ວມ​ກັບ​ອ້າຍ​ນ້ອງ​ຊາຍ ໃນ​ການ​ປະ­ຕິ­ບັດ​ວຽກ​ງານ ທີ່​ຕົນ​ເອງ​ຮັບ­ຜິດ­ຊອບ​ດ້ວຍ​ນ້ຳ­ໃຈ​ຮັກ​ຊາດ​ອັນ​ສູງ​ສົ່ງ ເຊິ່ງ​ເຫັນ​ໄດ້­ຜົນ​ງານ​ອັນ​ໂດດ​ເດັ່ນ ແລະ ໃຫຍ່​ຫຼວງ ເຮັດ​ໃຫ້​ເອື້ອຍ​ນ້ອງ​ແມ່­ຍິງ​ລາວ​ຫຼາຍ​ທ່ານ​ກາຍ­ເປັນ​ວິ­ລະ​ຊົນ​ແຫ່ງ​ຊາດ​ໃນ​ປັດ­ຈຸ­ບັນ.

   ສຳ­ລັບ​ກິດ­ຈະ­ກຳ​ດັ່ງ­ກ່າວ​ນີ້ ເປັນ​ກິດ­ຈະ­ກຳ​ໜຶ່ງ​ທີ່​ສຳ­ຄັນ ເພື່ອ​ປຸກ­ລະ­ດົມ​ເຊີນ­ຊວນ​ເອື້ອຍ​ນ້ອງ​ແມ່­ຍິງ ກໍ່​ຄື​ການ­ຈັດ­ຕັ້ງ​ຕ່າງໆ​ເຂົ້າ​ຮ່ວມ​ບໍ­ລິ­ຈາກ​ເລືອດ​ໃນ​ທົ່ວ​ສັງ­ຄົມ ພາຍ​ໃຕ້​ຄຳ​ຂວັນ “ 63 ປີ​ມີ​ໄຊ ຈົ່ງ​ຮ່ວມ​ໃຈ​ບໍ­ລິ­ຈາກ​ເລືອດ” ໂດຍ​ການ​ເປັນ​ເຈົ້າ​ການ​ຂອງ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ແລະ ຄາດ​ວ່າ​ກິດ­ຈະ­ກຳ​ຄັ້ງ​ນີ້ ຈະ​ມີ​ຜູ້​ເຂົ້າ​ຮ່ວມ​ບໍ­ລິ­ຈາກ​ເລືອດ 200-300 ເທື່ອ​ຄົນ​ເປັນ​ຢ່າງ​ໜ້ອຍ.

   ໂອ­ກາດ​ນີ້ ທ່ານ ຄຳ​ຮຸ່ງ ເຮືອງ​ວົງ​ສີ ກໍ່​ໄດ້​ກ່າວ​ສະ­ແດງ​ຄວາມ​ຂອບ­ໃຈ​ມາ​ຍັງ​ການ​ນຳ​ຂອງ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ທີ່​ຍາມ​ໃດ​ກໍ່​ໄດ້​ໃຫ້​ສຳ­ຄັນ ແລະ ເອົາ­ໃຈ­ໃສ່​ໃນ​ການ​ສະ­ໜັບ­ສະ­ໜູນ​ວຽກ​ງານ​ມະ­ນຸດ­ສະ­ທຳ​ຂອງ​ອົງ­ການ​ກາ­ແດງ​ລາວ ໂດຍ​ສະ­ເພາະ ແມ່ນ​ການ​ປຸກ­ລະ­ດົມ​ເຊີນ­ຊວນ​ການ​ບໍ­ລິ­ຈາກ​ເລືອດ​ຢ່າງ​ເປັນ​ປະ­ຈຳ ເຊິ່ງ​ການ​ບໍ­ລິ­ຈາກ​ເລືອດ ມີ​ຄວາມ​ຈຳ­ເປັນ​ຕໍ່​ມວນ​ມະ­ນຸດ ແລະ  ໃນ​ແຕ່​ລະ​ມື້​ຜູ້​ເຈັບ­ເປັນ​ທີ່​ນອນ​ຮັກ­ສາ​ພະ­ຍາ­ບານ​ຕົວ​ຢູ່​ຕາມ​ໂຮງ­ໝໍ​ຕ່າງໆ​ຍັງ​ມີ​ຄວາມ​ຕ້ອງ­ການ​ເລືອດ​ສູງ​ພໍ​ສົມ­ຄວນ  ສູນ​ເລືອດ​ແຫ່ງ​ຊາດ ແລະ ບັນ­ດາ​ສູນ​ເລືອດ​ແຂວງ​ທົ່ວ​ປະ­ເທດ ຕ້ອງ​ໄດ້​ຈັດ​ຫາ ແລະ ສະ­ໜອງ​ເລືອດ​ໃຫ້​ແກ່​ຄົນ​ເຈັບ​ມື້​ລະ 100-200 ຖົງ​ຢ່າງ​ເປັນ​ປະ­ຈຳ ເຊິ່ງ​ມີ​ທັງ​ສຸກ​ເສີນ ກະ­ທັນ ຫັນ ແລະ ຕ້ອງ­ການ​ປິ່ນ­ປົວ​ດ້ວຍ​ເລືອດ​ໃນ​ໄລ­ຍະ​ຍາວ ໂດຍ​ສະ­ເພາະ ແມ່ນ​ໄລ­ຍະ​ປັດ­ຈຸ­ບັນ​ເຊິ່ງ​ເປັນ​ລະ­ດູ­ຝົນ ເພື່ອ​ນຳ​ໃຊ້​ເຂົ້າ​ໃນ​ການ​ປິ່ນ­ປົວ​ພະ­ຍາດ​ໄຂ້­ເລືອດ­ອອກ ແລະ ອື່ນໆ.

ຂ່າວທີ່ກ່ຽວຂ້ອງ