ຂ່າວຫຼ້າສຸດ

ນາວາສັກສິດ ຊະນະເລີດ ຊ່ວງເຮືອທີ່ສວນນ້ຳບຶງສາລາຄຳ

302 18 ກ.ກ. 2018 ວົງຈອນກີລາ
ນາວາສັກສິດ ຊະນະເລີດ ຊ່ວງເຮືອທີ່ສວນນ້ຳບຶງສາລາຄຳ

   ການ​ແຂ່ງ­ຂັນ​ງານ​ຊ່ວງ​ເຮືອ​ຍາວ 55 ສີ­ພາຍ ຄັ້ງ​ທີ 1 ປະ­ຈຳ​ປີ 2018 ຈັດ​ຂຶ້ນ​ວັນ​ທີ 15 ກໍ​ລະ ກົດ 2018 ທີ່ສວນ​ນ້ຳ​ບຶງ​ສາ­ລາ​ຄຳ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ (ນວ) ມີ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ປະ­ທານ​ສະ­ມາ­ຄົມ​ກີ­ລາ-ກາ​ຍະ​ກຳ ນວ ບັນ­ດານ​ເຈົ້າ­ເມືອງ ຫົວ­ໜ້າ​ພະ​ແນກ ຄະ­ນະ​ຮັບ­ຜິດ­ຊອບ​ເຮືອ​ຊ່ວງ ຄູ​ເຝິກ ນັກ­ກີ­ລາ ແລະ ແຂກ​ຖືກ​ເຊີນ​ເຂົ້າ​ຮ່ວມ.

   ທ່ານ ພູ​ວົງ ກໍ​ຣະ​ສັກ ປະ­ທານ​ບໍ­ລິ­ສັດ ມິດ­ຕະ­ພາບ​ພັດ­ທະ­ນາ​ການ​ກະ­ເສດ ທັງ​ເປັນ​ປະ­ທານ​ຈັດ​ງານ​ແຂ່ງ­ຂັນ​ຊ່ວງ​ເຮືອ​ດັ່ງ­ກ່າວ ກ່າວ​ວ່າ: ການ​ແຂ່ງ­ຂັນ​ຄັ້ງ​ນີ້​ເພື່ອ​ເປັນ​ການ​ສ້າງ​ຂະ​ບວນ​ການ​ຄຳ­ນັບ​ຮັບ​ຕ້ອນ​ວັນ​ສຳ­ຄັນ​ຕ່າງໆ​ຂອງ​ຊາດ​ຂອງ​ພັກ ໂດຍ​ສະ­ເພາະເພື່ອ​ສະ­ເຫຼີມ­ສະ­ຫຼອງ​ວັນ​ຄ້າຍ​ວັນ​ເກີດ​ປະ­ທານ​ສຸ​ພາ­ນຸ​ວົງ ຄົບ­ຮອບ 109 ປີ ແລະ ວັນ​ອະ­ນຸ​ຮັກ​ສັດ​ນ້ຳ-ສັດ­ປ່າ​ແຫ່ງ​ຊາດ (13 ກໍ­ລະ­ກົດ) ທັງ​ເປັນ​ການ​ສ້າງ​ຂະ​ບວນ​ການ​ສົ່ງ­ເສີມ​ການ­ທ່ອງ­ທ່ຽວ​ລາວ​ປີ 2018 ໃຫ້​ເປັນ​ຂະ​ບວນ​ຟົດ­ຟື້ນ​ມ່ວນ­ຊື່ນ ນອກ­ຈາກ​ນີ້​ພວກ​ເຮົາ​ຍັງ​ໄດ້​ປ່ອຍ​ປາ​ຈຳ­ນວນ 100.109 ໂຕ ລົງ​ສູ່​ແຫຼ່ງ​ນ້ຳ​ທຳ​ມະ​ຊາດ​ອີກ​ດ້ວຍ.

   ສຳ­ລັບການ​ແຂ່ງ­ຂັນ​ຊ່ວງ​ເຮືອ​ຍາວ 55 ສີ­ພາຍ​ຄັ້ງ​ນີ້ ມີ​ເຮືອ​ເຂົ້າ​ຮ່ວມ​ທັງ​ໝົດ 10 ລຳ ມາ​ຈາກ​ຕ່າງ​ແຂວງ 3 ລຳ​ຄື:ແຂວງ​ບໍ​ລິ​ຄຳ​ໄຊ ສະ­ຫວັນ​ນະ​ເຂດ ສາ­ລະ​ວັນ ແລະ ເຮືອ​ຊ່ວງ​ອ້ອມ​ຂ້າງ ນວ ຜ່ານ​ການ​ແຂ່ງ­ຂັນ​ຜົນ​ປາ­ກົດ​ວ່າ:ຊະ­ນະ​ເລີດ ໄດ້­ແກ່​ເຮືອ​ນາ­ວາ​ສັກ­ສິດ (1) ບ້ານ​ໄຊ​ສະ­ຖານ ເມືອງ​ສີ​ສັດ­ຕະ​ນາກ ຮອງ​ຊະ­ນະ​ເລີດ ເຮືອ​ນາ­ວາ​ສັກ­ສິດ (2) ອັນ​ດັບ​ທີ 3 ເຮືອ​ເທບ​ພອນ​ໄຊ ບ້ານ​ທ່າ​ໂພ ເມືອງ​ໄຊ​ພູ​ທອງ ແຂວງ​ສະ­ຫວັນ​ນະ​ເຂດ ແລະ ອັນ​ດັບ 4 ເຮືອ​ເຈົ້າ​ແມ່​ແກ້ວ​ມັງ­ກອນ ກອງ​ບັນ­ຊາ​ການ​ທະ­ຫານ​ແຂວງ​ສາ­ລະ​ວັນ ເຊິ່ງ​ລາ­ງວັນ​ແຕ່​ລະ​ປະ­ເພດ (1-4) ໄດ້​ຮັບ​ຂັນ+ເງິນ­ສົດ 10 ລ້ານ​ກີບ 8 ລ້ານ​ກີບ 6 ລ້ານ​ກີບ ແລະ 4 ລ້ານ​ກີບ ຕາມ​ລຳ­ດັບ ພິ­ເສດ​ເຮືອ​ທີ່​ຊະ­ນະ​ເລີດ​ຄັ້ງ​ນີ້​ຍັງ​ໄດ້​ຮັບ​ຂັນ​ໝູ­ນວຽນ 1 ໜ່ວຍ.

ຂ່າວທີ່ກ່ຽວຂ້ອງ