ລ້ານຊ້າງ ຖ່າຍທອດປະສົບການບານເຕະ ໃຫ້ເຍົາວະຊົນລາວ

239 18 ກ.ກ. 2018 ວົງຈອນກີລາ
ລ້ານຊ້າງ ຖ່າຍທອດປະສົບການບານເຕະ ໃຫ້ເຍົາວະຊົນລາວ

   ສະ­ໂມ­ສອນ​ເຕະ­ບານ​ລ້ານ​ຊ້າງ​ອາ​ຄາ​ເດ​ມີ້ (ລ້ານ​ຊ້າງ​ຢູ​ໄນ​ເຕັດ) ຈັດ​ກິດ­ຈະ­ກຳ​ສອນ​ທັກ​ສະ​ແບບ​ພື້ນ­ຖານ ແລະ ປະ­ສົບ​ການ​ໃນ​ການ​ຫຼິ້ນ​ກີ­ລາ​ເຕະ­ບານ​ຕົວ​ຈິງ​ຈາກ​ແຂ່ງ­ຂັນ​ກີ­ລາ​ເຕະ­ບານ­ໂລກ 2018 ຖ່າຍ​ທອດ​ໃຫ້​ນ້ອງ​ນ້ອຍ​ເຍົາ­ວະ​ຊົນ​ລາວ​ໃນ​ນະ­ຄອນ­ຫຼວງ​ວຽງ​ຈັນ ເກືອບ 500 ຄົນ​ນຳ­ໄປ​ພັດ­ທະ­ນາ​ໃຫ້​ມີ​ຄວາມ​ຮູ້​ຄວາມ​ສາ­ມາດ​ກ້າວ​ຂຶ້ນ​ໄປ​ເປັນ​ນັກ​ເຕະ​ລະ­ດັບ​ອາ­ຊີບ​ໃນ​ອະ­ນາ­ຄົດ.

   ທ່ານ ເຮັບ​ປີ້ ສີ​ສົມ​ພອນ ຜູ້​ຈັດ­ການ​ຝ່າຍ​ໂຄ­ສະ­ນາ ແລະ ການ​ຕະ­ຫຼາດ​ບໍ­ລິ­ສັດ ລ້ານ​ຊ້າງ​ມິ​ເດຍ ຈຳ­ກັດ  ກ່າວ​ວ່າ: ກິດ­ຈະ­ກຳ​ຄັ້ງ​ນີ້​ຈັດ​ຂຶ້ນ​ເພື່ອ​ເພື່ອ​ສ້າງ​ແຮງ​ບັນ­ດານ​ໃຈ​ໃຫ້​ກັບ​ເຍົາ­ວະ​ຊົນ​ລາວ​ທີ່​ມັກ​ຮັກ​ໃນ​ກີ­ລາ​ເຕະ­ບານ​ສ້າງ ໂອ­ກາດ​ໃນ​ການ​ພົບ​ປະ​ກັບ​ນັກ­ກີ­ລາ​ເຍົາ­ວະ​ຊົນ​ລາວ ແລະ ນັກ­ກີ­ລາ​ທີ່​ເຄີຍ​ເຂົ້າ​ຮ່ວມ​ການ​ແຂ່ງ­ຂັນ​ບານ­ເຕະ​ໂລກ​ຖ່າຍ​ທອດ​ຄວາມ​ຮູ້​ຄວາມ​ສາ­ມາດ​ໃຫ້​ນ້ອງ​ນ້ອຍ​ເຍົາ­ວະ​ຊົນ​ນຳ­ໄປ​ພັດ­ທະ­ນາ ເພື່ອ​ກ້າວ​ຂຶ້ນ​ໄປ​ເປັນ​ນັກ​ເຕະ​ລະ­ດັບ​ອາ­ຊີບ​ໃນ​ອະ­ນາ­ຄົດ ສ້າງ​ຄວາມ​ເຂົ້າ­ໃຈ​ທີ່​ຖືກ­ຕ້ອງ​ກ່ຽວ​ກັບ​ກີ­ລາ​ເຕະ­ບານ ແລະ ການ​ເປັນ​ນັກ­ກີ­ລາ​ເຕະ­ບານ ເຮັດ​ໃຫ້​ຜູ້​ທີ່​ໄດ້​ເຂົ້າ​ຮ່ວມ​ງານ​ໄດ້​ເຫັນ​ແນວ­ທາງ​ທີ່​ກວ້າງ​ໄກ​ຂອງ​ກີ­ລາ​ເຕະ­ບານ ໂດຍ​ສະ­ເພາະ​ສີ­ສັນ​ການ​ແຂ່ງ­ຂັນ​ເຕະ­ບານ­ໂລກ 2018 ທີ່​ປະ­ເທດ​ຣັດ​ເຊຍ​ເປັນ​ເຈົ້າ­ພາບ.

   ສຳ­ລັບ​ກິດ­ຈະ­ກຳ​ຄັ້ງ​ນີ້​ຈັດ​ຂຶ້ນ​ວັນ​ທີ 15 ກໍ­ລະ­ກົດ 2018 ທີ່​ສະ­ໜາມ​ກີ­ລາ​ເຕະ­ບານ​ລ້ານ​ຊ້າງ​ຢູ​ໄນ​ເຕັດ ບ້ານ​ໜອງ​ໄຮ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ ໂດຍ​ແບ່ງ​ອອກ​ເປັນ 4 ຮຸ່ນ​ຄື: ຮຸ່ນ​ອາ­ຍຸ 6-9 ປີ ຮຸ່ນ​ອາ­ຍຸ 10-12 ປີ ຮຸ່ນ​ອາ­ຍຸ 13-15 ແລະ ຮຸ່ນ​ອາ­ຍຸ 16-18 ປີ ໃນ​ນັ້ນ​ນັກ­ກີ­ລາ​ໃນ​ຈຳ­ນວນ​ເກືອບ 500 ຄົນ ແຕ່​ລະ​ຮຸ່ນ​ໄດ້​ຈັດ​ແບ່ງ​ອອກ​ເປັນ​ກຸ່ມ​ໃຜ­ລາວ​ແລ້ວ​ມາ​ແຂ່ງ­ຂັນ​ທັກ​ສະ­ກັນ ຄື:ການ​ລາກ​ບານ​ຜ່ານ​ສິ່ງ​ກີກ​ຂວາງ ຊິກ​ແຊັກ​ຍິງ​ຟຣີ​ຄິກ ການ​ເດາະ​ບານ ການ​ສົ່ງ​ບານ ແລະ ການ​ຍິງ​ຈຸດ​ໂທດ ແຕ່​ລະ​ຈັງ­ຫວະ​ຂຶ້ນ​ກັບ​ນັກ­ກີ­ລາ​ໃນ​ແຕ່​ລະ​ຈຸ​ເຮັດ​ໄດ້​ຄ່ອງ​ແຄ້ວ​ວ່ອງ­ໄວ ແລະ ແມ້ນ​ຢ້ຳ​ຈະ​ໄດ້​ຄະ­ແນນ​ດີ ພ້ອມ​ທັງ​ຮັບ​ຫຼຽນ​ຄຳ ຫຼຽນ​ເງິນ ແລະ ຫຼຽນ​ທອງ​ໄປ​ຄອງ.

ຂ່າວທີ່ກ່ຽວຂ້ອງ