ຂ່າວຫຼ້າສຸດ

ຄວາຍຊົນຄວາຍ ແພ້ຫຍ້າແຝກ

601 18 ກ.ກ. 2018 ນານາສາລະ

ຫາກ​ທ່ານ​ຕິດຕາມ​ຂ່າວ​ໂລກ​ຈະ​ເຫັນ​ວ່າ ສົງຄາມ​ການ​ຄ້າ​ໂລກ​ໄດ້​ທະວີ​ການ​ຮຸນ​ແຮງ​ຂຶ້ນ ຕັ້ງແຕ່​ເດືອນມິຖຸນາ​ເປັນຕົ້ນ​ມາ ແລະ ມາ​ຮອດ​ເດືອນ​ກໍລະກົດ​ນີ້​ຈຶ່ງ​ລະເບີດ​ຂຶ້ນ ແລະ ຈະ​ຖືກ​ແກ່ຍາວ​ໄປ​ຍ້ອນ​ການ​ສູ້​ຢັນ​ກັນ​ຂອງ​ສອງ​ພື້ນຖານ​ເສດຖະກິດ ອັນ​ດັບ 1 ແລະ ອັນ​ດັບ 2 ຂອງ​ໂລກນັ້ນ​ຄື: ສະຫະລັດ​ອາ​ເມ​ຣິ​ກາ ແລະ ສປ ຈີນ.

ສົງຄາມ​ການ​ຄ້າ​ໂລກ ຫຼື Trade War ນີ້​ເກີດ​ຂຶ້ນ​ບໍ່​ແມ່ນ​ຄັ້ງ​ທຳ​ອິດ​ທີ່​ອາ​ເມ​ຣິ​ກາ​ກໍ່​ຂຶ້ນ ໂດຍ​ທີ່​ອາ​ເມ​ຣິ​ກາ ກໍ່​ໄດ້​ຮັບ​ບົດຮຽນ​ຈາກ Smoot Hawley Tariff Act ໃນ​ປີ 1932 ເຊິ່ງ​ເວລາ​ນັ້ນ ລັດຖະບານ​ອາ​ເມ​ຣິ​ກາ ໂດຍ​ການ​ເຫັນ​ດີ​ຂອງ​ສະພາ​ຄອນ​ເກດ​ລົງ​ຄະແນນ​ເຫັນ​ດີ​ຕັ້ງ​ກຳແພງ​ພາສີ​ກັບ​ປະເທດ​ຕ່າງໆ ຄື: ກາ​ນາ​ດາ ອັງກິດ ເຢຍ​ລະ​ມັນ ຍີ່ປຸ່ນ ຝຣັ່ງ ອາກ​ຊັງ​ຕິນ ອີ​ຕາ​ລີ ເນ​ເທີ​ແລນ ແລະ ອົດ​ສະ​ຕຣາ​ລີ ໂດຍ​ເຮັດ​ໃຫ້ການ​ສົ່ງ​ອອກ​ສິນຄ້າ​ຂອງ​ອາ​ເມ​ຣິ​ກາ​ຫຼຸດ​ລົງ​ຢ່າງ​ບໍ່​ເປັນ​ທ່າ​ໃນ​ປີ​ຕໍ່​ມາ ຈາກ​ນັ້ນ ຄື​ໃນ​ປີ 1934 ປະທາ​ນາ​ທິ​ບໍດີ​ແຝຣງ​ກິນ ຣຸດ​ເວນ ໄດ້​ເຊັນ​ກົດໝາຍ Reciprocal Trade Agreements Act (RTAA) ອອກ​ມາ​ເພື່ອ​ໃຫ້​ປະທານາທິບໍດີ ມີ​ອຳນາດ​ເຈລະຈາ​ຕໍ່​ລອງ​ຫຼຸດ​ພາສີ​ນຳ​ເຂົ້າ​ສິນຄ້າ​ກັບ​ປະເທດ​ຕ່າງໆ​ທົ່ວ​ໂລກ ຈາກ​ນັ້ນວ່າ​ປະເທດ​ອາ​ເມ​ຣິ​ກາ ກໍ່​ຢຶດ​ຖື​ນະໂຍບາຍ​ການ​ຄ້າ​ເສລີ​ອອກ​ມາ​ຈົນ​ມາ​ເຖິງ​ປະທານາທິບໍດີ ທຣຳ ຈຶ່ງ​ມີ​ການ​ນຳ​ໃຊ້​ພາສີ​ກຳແພງ​ນຳ​ເຂົ້າ​ສິນຄ້າ​ກັບ​ປະເທດ​ຕ່າງໆ​ອີກ ຈົນ​ກາຍເປັນ​ຂ່າວ Trade War ຢູ່​ໃນ​ເວລາ​ນີ້.

ວິທະຍຸ​ກະຈາຍສຽງ​ຫວຽດນາມ (VOVWORLD) ສະບັບ​ອອນ​ລາຍ ລົງ​ວັນ​ທີ 10 ກໍລະກົດ 2018 ໄດ້​ມີ​ບົດ​ທີ່​ພາດ​ຫົວຂໍ້​ວ່າ: “ລະດັບ​ຄວາມ​ເສຍ​ຫາຍ​ຂອງ​ສົງຄາມ​ການ​ຄ້າ​ໂລກ​ອາ​ເມ​ຣິ​ກາ-ຈີນ...” ເຊິ່ງ​ມີ​ບາງ​ຈຸດ​ສຳ​ຄັນວ່າ: “...ວັນ​ທີ 6 ກໍລະກົດ ສົງຄາມ​ການ​ຄ້າ​ຄັ້ງ​ໃຫຍ່​ທີ່​ສຸດ​ໃນ​ປະຫວັດສາດ​ເສດຖະກິດ​ຖືກ​ລະເບີດ​ຂຶ້ນ ເມື່ອ ວໍ​ຊິງ​ຕັນ ຈັດ​ວາງ​ອັດຕາ​ພາສີ 25% ສຳລັບ​ສິນຄ້າ​ນຳ​ເຂົ້າ​ທີ່​ມີ​ມູນ​ຄ່າ 34 ຕື້ USD ຈາກ​ປັກ​ກິ່ງ ຢ່າງ​ເປັນ​ທາງ​ການ ໃນ​ທັນທີ​ປະເທດ​ນີ້​ກໍ່​ມີ​ບັນດາ​ມາດ​ຕະການ​ໂຕ້​ຕອບ​ເລັ່ງ​ໃສ່​ອາ​ເມ​ຣິ​ກາ ສິ່ງ​ທີ່​ຜູ້ນຳ​ສົນໃຈ​ແມ່ນບັນດາ​ປະເພດ​ສິນຄ້າ​ຖືກ​ຈັດ​ວາງ​ອັດຕາ​ພາສີ​ລ້ວນ​ແຕ່​ແມ່ນ​ບັນດາ​ຂົງເຂດ “ຫຼັກ​ແຫຼ່ງ” ຂອງ 2 ພື້ນຖານ​ເສດຖະກິດ​ແຖວ​ໜ້າ​ຂອງ​ໂລກ.

ນອກຈາກ​ອັດຕາ​ພາສີ​ທີ່​ຫາກໍ່​ຈັດ​ວາງ​ນັ້ນ ໃນ​ຮອບ​ເວລາ 2 ອາທິດ​ຈະ​ມາ​ເຖິງ ອາ​ເມ​ຣິ​ກາ ຈະ​ສືບຕໍ່​ຈັດ​ວາງ​ອັດຕາ​ພາສີ​ເພີ່ມ​ເຕີມ​ສຳລັບ​ບັນດາ​ປະເພດ​ສິນຄ້າ​ຂອງ​ຈີນ ທີ່​ມີ​ມູນ​ຄ່າ 16 ຕື້ USD ຊ້ຳບໍ່ໜຳ ທ່ານ​ປະທານາທິບໍດີ ອາ​ເມ​ຣິ​ກາ Donald Trump ຍັງ​ກ່າວ​ເຕືອນ​ວ່າ ວໍ​ຊິງ​ຕັນ ພ້ອມ​ແລ້ວ​ທີ່​ຈະ​ຈັດ​ວາງ​ອັດຕາ​ພາສີ 10% ສຳລັບ​ສັນ​ຄ້າ​ຂອງ​ຈີນ ທີ່​ມີ​ມູນ​ຄ່າ 200-300 ຕື້ USD ຍົກ​ຈຳນວນ​ສິນຄ້າ​ຂອງ​ຈີນ​ທີ່​ຖືກ​ອາ​ເມ​ຣິ​ກາ​ຈັດ​ວາງ​ອັດຕາ​ພາສີ​ນຳ​ເຂົ້າ​ເຖິງ 550 ຕື້ USD ກະຊວງ​ການ​ຄ້າ​ຈີນ ໄດ້​ຕຳ​ໜິ​ຕິຕຽນ​ການ​ກະທຳ​ຂອງ​ອາ​ເມ​ຣິ​ກາ ແມ່ນ​ຮູບ​ແບບ “ບັງ​ບຽດ​ດ້ານ​ການ​ຄ້າ” ພ້ອມ​ທັງ​ແຈ້ງວ່າ ໄດ້​ສົ່ງ​ໃບ​ຮ້ອງ​ຟ້ອງ​ຕໍ່​ອົງການ​ການ​ຄ້າ​ໂລກ (WTO) ຊ້ຳບໍ່ໜຳ ປັກ​ກິ່ງ ຍັງ​ເອີ້ນ​ການ​ກະທຳ​ດັ່ງກ່າວ​ຂອງ ວໍ​ຊິງ​ຕັນ ແມ່ນ​ບໍ່​ໃສ​ແຈ້ງ ເຮັດໃຫ້​ບັນດາ​ຜົນ​ປະໂຫຍດ​ຂອງ​ບັນດາ​ປະເທດ​ອື່ນ ກໍ່​ຄືຂອງ​ປະເທດ​ນີ້​ເອງ​ຖືກ​ຫຼຸດ​ລົງ.

ເລື່ອງ​ທ່ານ​ປະທານາທິບໍດີ ອາ​ເມ​ຣິ​ກາ Donald Trump ຕົກລົງ​ຈັດ​ວາງ​ອັດຕາ​ພາສີ​ລົບ​ສິນຄ້າ​ທີ່​ນຳ​ເຂົ້າ​ຈາກ​ຈີນ ບໍ່​ແມ່ນ​ການ​ກະທຳ​ໂດຍ​ບັງເອີນ ນັບ​ແຕ່​ການ​ຂົນຂວາຍ​ຫາ​ສຽງ​ເລືອກ​ຕັ້ງຍາມ​ໃດ​ທ່ານ Donald Trump ກໍ່​ຢືນຢັນ​ທັດສະນະ​ກ່ຽວ​ກັບ​ເລື່ອງ​ຈັດ​ວາງ​ອັດຕາ​ພາສີ ແມ່ນ​ມີ​ຄວາມ​ຈຳເປັນ ເພື່ອ​ປົກປ້ອງ​ຊັບ​ສິນ​ທາງ​ປັນຍາ ແລະ ເຕັກ​ໂນ​ໂລ​ຊີ​ຂອງ​ອາ​ເມ​ຣິ​ກາ ຫຼຸດຜ່ອນ​ການ​ຂາດ​ດຸນ​ການ​ຄ້າ​ອາ​ເມ​ຣິ​ກາ​ກັບ​ຈີນ.

ເຖິງ​ຢ່າງໃດ​ກໍ່​ຕາມ ໃນ​ຕົວ​ຈິງ ສາເຫດ​ຂອງ​ມັນ​ບໍ່​ແມ່ນ​ຢູ່​ບ່ອນ​ນັ້ນ ຕາມ​ບັນດາ​ນັກ​ໄຈ້​ແຍກ​ແລ້ວ ການ​ກະທຳ​ໂຕ້​ຕອບ​ດ້ານ​ການ​ຄ້າ​ຂອງ 2 ຝ່າຍ ໄດ້​ສ່ອງ​ແສງ​ເຖິງ​ການ​ແກ້ງ​ແຍ້ງ​ທີ່​ນັບ​ມື້​ນັບ​ຮ້າຍ​ແຮງ​ທາງ​ດ້ານ​ເສດຖະກິດ ການ​ທະຫານ ລະຫວ່າງ​ອາ​ເມ​ຣິ​ກາ ແລະ ຈີນ ເຊິ່ງ 2 ປະເທດ ມີ​ຄວາມ​ແຕກ​ຕ່າງ​ກັນ​ກ່ຽວ​ກັບ​ຫຼັກ​ໝັ້ນ ແລະ ຄວາມ​ມັກ​ໃຫຍ່​ໄຝ່​ສູງ​ຫຼາຍ​ຢ່າງ ໄດ້​ສົ່ງ​ຜົນ​ສະທ້ອນ​ເຖິງ​ທົ່ວ​ໂລກ ຄວາມ​ເຄັ່ງ​ຕຶງ​ຍຸດ​ທະ​ສາດ​ດັ່ງກ່າວ ອາດ​ສາມາດ​ພຽງ​ແຕ່​ເພີ່ມ​ຂຶ້ນ​ເທົ່າ​ນັ້ນ ຫາກ​ບໍ່​ຫຼຸດຜ່ອນ​ບໍ່​ວ່າການ​ສູ້​ຢັນ​ດ້ານ​ພາສີ​ໃນ​ປັດຈຸບັນ ​ຈະ​ມີ​ຜົນ​ອອກ​ມາ​ຄື​ແນວໃດ...”.

ອີງ​ຕາມ​ແຫຼ່ງ​ຂ່າວ​ຕ່າງປະເທດ​ໃຫ້​ຮູ້​ວ່າ: ສົງຄາມ​ການ​ຄ້າ​ລະຫວ່າງ​ສອງ​ປະເທດ​ມະຫາ​ອຳນາດເສດຖະ​ກິດ​ນີ້ ຈະ​ກໍ່​ຜົນ​ເສຍ​ຫາຍ​ຕໍ່​ລະບົບ​ເສດຖະກິດ​ໂລກ​ໃນ​ໄລຍະ​ສັ້ນ ຢ່າງ​ຫຼີກ​ລ່ຽງ​ບໍ່​ໄດ້ ການ​ໂຕ້​ຕອບ​ນີ້​ມີ​ທ່າ​ອ່ຽງ​ຮຸນ​ແຮງ​ຂຶ້ນ​ໄປ ຈົນ​ເຖິງ​ການ​ເລືອກ​ຕັ້ງປະທານາທິບໍດີ​ສະຫະລັດ ໃນ​ເດືອນ​ພະຈິກ ເນື່ອງ​ຈາ​ກວ່າ ບັນຫາ​ການ​ຄ້າ​ທີ່​ບໍ່​ເປັນ​ທຳ​ນີ້ ທ່ານ ທຣຳ ຖື​ເປັນ​ນະໂຍບາຍ​ທີ່​ຈິງ​ຈັງ ທີ່​ເຄີຍ​ໃຫ້​ຄຳ​ສັນຍາ​ກັບ​ຖານ​ສຽງ​ມາ​ແລ້ວ ສະນັ້ນ ຈຶ່ງ​ຕ້ອງ​ໃຊ້​ມາດ​ຕະການ​ເພື່ອ​ສ້າງ​ຄວາມ​ເຊື່ອ​ຖື​ໃຫ້​ກັບ​ນະໂຍບາຍ​ຂອງ​ຕົນ ກັບ​ຄູ່​ເຈລະຈາ ເຊິ່ງ​ມັນ​ຈະ​ສ້າງ​ຜົນ​ກະທົບ​ຕໍ່​ກຸ່ມ​ປະເທດ​ເສດຖະກິດ​ໃໝ່ ທີ່​ເພິ່ງ​ພາ​ການ​ສົ່ງ​ອອກ ປະກອບ​ກັບ​ພາວະ​ການເງິນ​ໄຫຼ​ອອກ​ຈາກ​ຕະຫຼາດ​ຮຸ້ນ​ຢ່າງ​ວ່ອງໄວ ຍ້ອນ​ຂາດ​ຄວາມ​ເຊື່ອ​ໝັ້ນ ນັກ​ວິເຄາະ​ການ​ເງິນ​ໂລກ​ບອກ​ວ່າ: ຕ້ອງ​ຕິດຕາມ​ມາດ​ຕະການ​ອີກ​ສອງ​ຂໍ້ ທີ່​ອາ​ເມ​ຣິ​ກາ​ອາດ​ນຳ​ໃຊ້​ເພີ່ມ​ເຕີມໄດ້ແກ່ຂຶ້ນ​ພາສີ​ນຳ​ເຂົ້າ​ສິນຄ້າ ອີກ​ປະມານ 4 ແສນ​ລ້ານ​ໂດ​ລາ ພວກ​ຈີນ​ບໍ່​ຢຸດ​ເຊົາ​ການ​ໂຕ້​ຕອບ ແລະ ມາດ​ຕະການ​ຂຶ້ນ​ພາສີ​ນຳ​ເຂົ້າ​ສິນຄ້າ​ກຸ່ມ​ຍານ​ຍົນ ມູນ​ຄ່າ 2,75 ແສນ​ລ້ານ​ໂດ​ລາ ກັບ​ທຸກ​ປະເທດ​ທີ່​ສົ່ງ​ອອກ​ລົດຍົນ​ໄປ​ຕະຫຼາດ​ອາ​ເມ​ຣິ​ກາ ມີ​ການ​ຄາດ​ວ່າ ທະນາຄານ​ກາງ​ອາ​ເມ​ຣິ​ກາ Fed ອາດ​ຕ້ອງ​ປັບ​ດອກ​ເບ້ຍ​ເງິນ​ກູ້ ເພື່ອ​ບໍ່​ໃຫ້​ອັດຕາ​ເງິນ​ເຟີ້​ສູງ​ຂຶ້ນ ແລະ ຕ້ອງ​ຄຸ້ມ​ຄອງ​ບາງ​ສິນຄ້າ​ເພື່ອ​ບໍ່​ໃຫ້​ມີ​ຜົນ​ກະທົບ​ຕໍ່​ຜູ້​ບໍລິໂພກ ເບື້ອງ ສປ ຈີນ ແນ່ນອນ​ກໍ່​ຕ້ອງ​ມີ​ການ​ຕອບ​ໂຕ້ ແຕ່​ໃນ​ຄວາມ​ເປັນ​ຈິງ ສປ ຈີນ ນຳ​ເຂົ້າ​ສິນຄ້າ​ຈາກ​ອາ​ເມ​ຣິ​ກາ​ໜ້ອຍ​ກວ່າ​ສົ່ງ​ອອກ ສະນັ້ນ ການ​ຕອບ​ໂຕ້​ຈະ​ບໍ່​ຮຸນ​ແຮງ​ໄດ້​ເທົ່າ​ອາ​ເມ​ຣິ​ກາ ແຕ່​ຫາກ​ນຳ​ໃຊ້​ການ​ຕອບ​ໂຕ້​ດ້ວຍ​ການ​ເທ​ຂາຍ​ພັນທະບັດ​ຂອງ​ລັດຖະບານ​ອາ​ເມ​ຣິ​ກາ​ອອກ ແລະ ໃຊ້​ມາດ​ຕະການ​ປ່ອຍ​ຄ່າ​ເງິນ​ຢວນ​ໃຫ້​ອ່ອນ​ຄ່າ​ລົງ ແລະ ໃຊ້​ມາດ​ຕະການ​ກັບ​ທຸລະ​ກິດ​ອາ​ເມ​ຣິ​ກາ​ທີ່​ລົງທຶນ​ຢູ່​ຈີນ ເປັນຕົ້ນ ຍິ່ງ​ຈະ​ເພີ່ມ​ທະວີ​ຜົນ​ກະທົບ​ຕໍ່​ເສດຖະກິດ​ຂອງ​ອາ​ເມ​ຣິ​ກາ ແລະ ໂລກ​ຢ່າງ​ຮຸນ​ແຮງ​ຂຶ້ນ ຈາກ​ເຫດການ​ນີ້ ພໍ​ສັງ​ລວມ​ໄດ້​ວ່າ: ຜົນ​ເສຍ​ຫາຍ​ບໍ່​ແມ່ນ​ແຕ່​ອາ​ເມ​ຣິ​ກາ ແລະ ຈີນ ທໍ່​ນັ້ນ ມັນ​ຍ່ອມ​ກະທົບ​ເຖິງ​ເສດຖະກິດ​ໂລກ ຍ້ອນ​ວ່າ​ສອງ​ປະເທດ​ນີ້​ແມ່ນ​ພື້ນຖານ​ເສດຖະກິດ​ທີ່​ໃຫຍ່​ອັນ​ດັບ​ໜຶ່ງ ແລະ ອັນ​ດັບ​ສອງ ຢູ່​ລະດັບ​ມະຫາ​ພາກ ມາດ​ຕະການ​ຕອບ​ໂຕ້​ຂອງ​ສອງ​ປະເທດ​ນີ້ ໄດ້​ເຮັດ​ໃຫ້ GDP ຂອງ​ອາ​ເມ​ຣິ​ກາ ແລະ ຈີນ ໃນ​ປີ 2018 ຫຼຸດ​ລົງ 0,1%-0,2% ສ່ວນ​ລະດັບ​ຈຸ​ລະ​ພາກ​ ບໍລິສັດ​ສົ່ງ​ອອກ​ຫຼາຍ​ແຫ່ງ​ທີ່​ສົ່ງ​ສິນຄ້າ​ໄປ​ອາ​ເມ​ຣິ​ກາ​ຂອງ​ຈີນ​ຖືກ​ຜົນສະທ້ອນ ໃນ​ຂະນະ​ດຽວ​ກັນ ບໍລິສັດ​ອາ​ເມ​ຣິ​ກາ ທີ່​ມາ​ລົງທຶນ​ຢູ່​ຈີນ​ກໍ່​ຖືກເສຍ​ຫາຍ.

ຢາກ​ສະຫຼຸບ​ຕາມ​ຄຳ​ພັງ​ເພີຍ​ຂອງ​ລາວ​ທີ່​ວ່າ: ຄວາຍ​ຊົນ​ຄວາຍ ແພ້​ຫຍ້າ​ແຝກ.

ຂ່າວທີ່ກ່ຽວຂ້ອງ