ແດດ​ຮ້ອນ​ເອົ້າ​ໃນ​ຍີ່ປຸ່ນ ເຮັດ​ໃຫ້​ມີ​ຜູ້​ເສຍ​ຊີວິດ​ຫຼາຍ​ຄົນ

191 18 ກ.ກ. 2018 ຂ່າວຕ່າງປະເທດ
ແດດ​ຮ້ອນ​ເອົ້າ​ໃນ​ຍີ່ປຸ່ນ ເຮັດ​ໃຫ້​ມີ​ຜູ້​ເສຍ​ຊີວິດ​ຫຼາຍ​ຄົນ

     ຂ່າວສານ ກຽວ​ໂດ ລາຍ​ງານ​ວ່າ ແດດ​ຮ້ອນ​ປານ​ໄຟ​ລົນ ສືບຕໍ່​ມີ​ຂຶ້ນ​ຢູ່​ໃນ​ຍີ່ປຸ່ນ ໃນ​ວັນ​ທີ 16 ກໍລະກົດ​ນີ້ ເປັນ​ເຫດ​ໃຫ້​ມີ​ຜູ້​ເສຍ​ຊີວິດ 7 ຄົນ ແລະ ​ອີກ​ຫຼາຍ​ພັນ​ຄົນ ຕ້ອງ​ໄດ້​ໄປ​ເຂົ້າ​ໂຮງໝໍ ຍ້ອນ​ເມົາ​ແດດ ໃນ​ເມື່ອ​ອຸ່ນ​ຫະ​ພູມ​ຢູ່​ໃນ​ບາງ​ເຂດ ສູງ​ຢູ່​ທີ່​ລະດັບ​ສ້າງ​ສະຖິຕິ ໃນ​ຮອບ​ຫຼາຍ​ປີ​ທີ່​ຜ່ານ​ມາ.

   ອົງການ​ອຸຕຸນິຍົມ​ຍີ່ປຸ່ນ (JMA) ໃຫ້​ຮູ້​ວ່າ ອຸ່ນ​ຫະ​ພູມ​ຢູ່​ທີ່​ລະດັບ​ສູງ​ສຸດ​ທີ່ 39 ອົງສາ C ທີ່​ເມືອງ ອີ​ບີ​ກາ​ວາ ແລະ​ທາ​ຈີ​ມີ (ພາກ​ຕາເວັນຕົກ​ຂອງ​ຍີ່ປຸ່ນ) ໃນ​ຂະນະ​ທີ່​ອຸ່ນ​ຫະ​ພູມ​ເກີນ 38 ອົງສາ C ຢູ່​ໃນ​ເຂດ​ພາກ​ຕາເວັນ​ອອກ ແລະ​ພາກ​ກາງ​ຍີ່ປຸ່ນ. ສະເພາະ​ບາງ​ເຂດ​ໃນ​ນະຄອນຫຼວງ ໂຕ​ກຽວ  ກໍ​ແທກ​ອຸ່ນ​ຫະ​ພູມ​ໄດ້​ເກີນ 36 ອົງສາ C. ອົງການ​ປ້ອງ​ກັນ​ອັກຄີ​ໄພ​ຂອງ​ນະຄອນ​ໂຕ​ກຽວ ໃຫ້​ຮູ້​ວ່າ ໄລ່​ມາ​ຮອດ​ເວລາ 21 ໂມງ ຂອງ​ວັນ​ທີ 16 ກໍລະກົດ​ນີ້ ອາກາດ​ຮ້ອນ ເຮັດ​ໃຫ້​ມີ​ຜູ້​ຕ້ອງ​ໄດ້​ເຂົ້າ​ໂຮງໝໍ ຕື່ມ​ອີກ 174 ຄົນ.

    JMA ໃຫ້​ຮູ້​ວ່າ ຢູ່​ໃນ 927 ຈຸດ​ທີ່​ຕິດຕາມ​ອຸ່ນ​ຫະ​ພູມ​ນັ້ນ ມີ 186 ຈຸດ ແທກ​ອຸ່ນ​ຫະພູມ​​ທີ່​ໄດ້​ເກີນ 35 ອົງສາ C ຫຼື​ສູງ​ກວ່າ​ນັ້ນ ໃນ​ນັ້ນ​ມີ​ຫຼາຍ​ເຂດ​ຢູ່​ໃນ ຮີ​ໂຣ​ຊີ​ມາ ແລະ​ໂອ​ກາ​ຢາ​ມາ ບ່ອນ​ຊຶ່ງ​ຫາ​ກໍ​ປະສົບ​ຝົນຕົກ​ໜັກ ແລະ​ນ້ຳ​ຖ້ວມ​ຮ້າຍ​ແຮງ ມາ​ຕັ້ງແຕ່​ວັນ​ທີ 5 ກໍລະກົດ ທີ່​ຜ່ານ​ມາ.

    JMA ໃຫ້​ຮູ້​ຕື່ມ​ວ່າ ແອດ​ຮ້ອນ​ເອົ້າ​ຍັງ​ຈະ​ສືບຕໍ່​ແກ່ຍາວ​ໃນ​ອາທິດ​ນີ້ ໃນ​ຂອບ​ເຂດ​ທົ່ວ​ປະເທດ ຍີ່ປຸ່ນ ໂດຍ​ຍົກເວັ້ນ​ແຕ່ ຮອກ​ໄກ​ໂດ ແລະ​ໂອ​ກີ​ນາວາ.

ຂ່າວທີ່ກ່ຽວຂ້ອງ