ຂ່າວຫຼ້າສຸດ

ຈີນ - EU ເຫັນ​ດີ​ຊຸກຍູ້​ການ​ເຂົ້າ​ສູ່​ຕະຫຼາດ

100 18 ກ.ກ. 2018 ຂ່າວຕ່າງປະເທດ
ຈີນ - EU  ເຫັນ​ດີ​ຊຸກຍູ້​ການ​ເຂົ້າ​ສູ່​ຕະຫຼາດ

   ໃນ​ຖະແຫຼງການ​ທີ່​ນຳ​ອອກ​ມາ​ຈາກ​ກອງ​ປະຊຸມ​ສຸດ​ຍອດ​ປະຈຳ​ປີ ຈີນ - ສະຫະພາບ​ເອີ​ຣົບ  (EU) ຊຶ່ງ​ຈັດ​ຂຶ້ນ​ທີ່​ນະຄອນຫຼວງ​ປັກ​ກິງ (ຈີນ) ເມື່ອ​ວັນ​ທີ 16 ກໍລະກົດ​ນັ້ນ ສອງ​ຝ່າຍ​ໄດ້​ເຫັນ​ດີ ເປັນ​ເອກະສັນ​ກັນ ໃນ​ການ​ສືບຕໍ່​ແລກປ່ຽນ​ຄວາມ​ເຫັນ​ການ​ສະເໜີ ກ່ຽວ​ກັບ​ການ​ເຂົ້າ​ສູ່​ຕະຫຼາດ ຊຶ່ງ​ກັນ ​ແລະ ​ກັນ ເພື່ອ​ຊຸກຍູ້​ຂໍ້​ຕົກລົງ​ການ​ລົງທຶນ​ແບບ​ສອງ​ຝ່າຍ ຊຶ່ງ​ສອງ​ຝ່າຍ​ພວມ​ດຳເນີນ​ການ ເຈລະຈາ ພ້ອມ​ກັນ​ນັ້ນ​ກໍ​ຮຽກຮ້ອງ​ກ່ຽວ​ກັບ​ການ​ນຳ​ເອົາ​ຂໍ້​ຕົກລົງ​ນີ້ ໃຫ້​ກາຍເປັນ​ບຸລິມະສິດ​ອັນ​ດັບ​ຕົ້ນ ໃນ​ການ​ພົວພັນ​ລະຫວ່າງ​ສອງ​ຝ່າຍ.

    ສອງ​ຝ່າຍ​ກໍ​ໄດ້​ໃຫ້​ສັນຍາ​ຈະ​ສ້າງຕັ້ງ​ຈຸ​ເຮັດ​ວຽກ​ຮ່ວມ ກ່ຽວ​ກັບ​ການ​ປະຕິ​ຮູບ ອົງການ​ການ ຄ້າ​ໂລກ (WTO); ເຫັນ​ດີ​ນຳ​ກັນ​ວ່າ ສະພາບ​ເຫຼືອ​ເຟືອ​ຂອງ​ກຳລັງ​ການ​ຜະລິດ​ເຫຼັກ​ກ້າ ເປັນ​ສິ່ງ ທ້າ​ທາຍ​ຂອງ​ທົ່ວ​ໂລກ ແລະ ​ເນັ້ນ​ໜັກ​ເຖິງ​ຄວາມ​ສຳຄັນ ຂອງ​ການ​ຜັນ​ຂະຫຍາຍ​ມາດ​ຕະການ ອະນຸລັກ​ສິ່ງແວດລ້ອມ ແລະ ​ຊຸກຍູ້​ພະລັງງານ​ສະອາດ​ຢູ່​ໃນ​ເວລາ​ນີ້.

    ກອງ​ປະຊຸມ​ສຸດ​ຍອດ​ຈີນ - EU ເທື່ອ​ນີ້​ມີ​ຂຶ້ນ​ທ່າມກາງ​ທີ່ ສ ອາ​ເມ​ຣິ​ກາ ແລະ​ຈີນ ພວມ​ເຂົ້າ​ເລິກ​ສູ່​ການ​ພິພາດ​ດ້ານ​ການ​ຄ້າ ຫຼັງ​ຈາກ​ທີ່ ສ ອາ​ເມ​ຣິ​ກາ​ປະຕິບັດ​ພາສີ​ທີ່​ລະດັບ 25% ກັບ​ສິນຄ້າ​ທີ່​ນຳ​ເຂົ້າ​ຈາກ​ຈີນ ເປັນ​ມູນ​ຄ່າ 34 ຕື້ ໂດ​ລາ​ສະຫະລັດ. ໃນ​ຂະນະ​ດຽວ​ກັນ ຈີນ​ກໍ​ໄດ້​ປະກາດ​ຕອບ​ໂຕ້​ໄປ​ເທື່ອ​ລະ​ກ້າວ. ໃນ​ການເຄື່ອນໄຫວ​ຫຼ້າ​ສຸດ ທີ່​ມີ​ອອກ​ມາ​ເມື່ອ​ວັນ​ທີ 16 ກໍລະກົດ​ນີ້ ກະຊວງ​ການ​ຄ້າ​ຈີນ ໃຫ້​ຮູ້​ວ່າ ໄດ້​ຍື່ນ​ຄຳ​ຮ້ອງ​ຟ້ອງ​ຂຶ້ນ​ໄປ​ຍັງ WTO ຊຶ່ງ​ພົວພັນ​ເຖິງ ແຜນການ​ຂອງ ສ ອາ​ເມ​ຣິ​ກາ ໃນ​ການ​ປະຕິບັດ​ພາສີ 10% ກັບ​ສິນຄ້າ​ທີ່​ນຳ​ເຂົ້າ​ຈາກ​ຈີນ ເປັນ​ມູນ​ຄ່າ 200 ຕື້​ໂດ​ລາ​ສະຫະລັດ.

 

ຂ່າວທີ່ກ່ຽວຂ້ອງ