ຂ່າວຫຼ້າສຸດ

ເບີ່ງບ້ານເຂົາເອົາບົດຮຽນ 18/07/2018

191 18 ກ.ກ. 2018 ຫົວຂໍ້ຂ່າວອື່ນໆ

   ມື້ນີ້​ມີ​ເລື່ອງ​ໜ້າ​ສົນໃຈ​ມາ​ເລົ່າ​ສູ່​ຟັງ ຄື: ຂ່າວ​ບັ້ນ​ເລີກ​ຮື້​ຂະ​ບວນ​ການ​ພະນັນ​ອອນ​ລາຍ​ທີ່​ຫວຽດນາມ ແລະ ເລື່ອງ​ຄະດີ​ຄ້າ​ມະນຸດ​ຢູ່​ມາ​ເລ​ເຊຍ.

   ທີ່ ຫວຽດນາມ: ມີ​ຂ່າວ​ອອກ​ມາ​ຫວ່າງ​ບໍ່​ດົນ​ມາ​ນີ້ ກ່ຽວ​ກັບ​ທາງ​ການ​ຫວຽດນາມ​ໄດ້​ດຳເນີນ​ບັ້ນ​ເລີກ​ຮື້​ເຄືອ​ຄ່າຍ​ການ​ພະນັນ​ທາງ​ອອນລາຍ​ ທີ່​ດຳເນີນ​ມາ​ແຕ່​ປີ 2015 (The Nation 10/07/2018) ໂດຍ​ມີ​ເງິນ​ລົງ​ໃສ່​ການ​ພະນັນ​ສູງ​ເຖິງ 87 ລ້ານ​ໂດ​ລາ​ສະຫະລັດ ຂ່າວ​ບອກ​ວ່າ ເຄືອ​ຄ່າຍ​ການ​ພະນັນ​ນີ້​ ດຳເນີນ​ຜ່ານ​ເຊີ​ເວີ​ທີ່​ຕັ້ງ​ຢູ່​ປະເທດ​ຟິ​ລິບ​ປິນ ແລະ ມີ​ລະບົບ​ສື່ສານ​ເປັນ​ຫຼາຍ​ພາສາ ສ່ວນ​ປະເພດ​ການ​ພະນັນ​ນັ້ນ​ມີ​ຫຼາຍ​ຮູບ​ຫຼາຍ​ສີ.

   ບັ້ນ​ເລີກ​ຮື້​ຂະ​ບວນ​ຫຼິ້ນ​ການ​ພະນັນ​ທາງ​ອອນ​ລາຍ​ຢູ່​ຫວຽດນາມ​ຄັ້ງ​ນີ້ ມີ​ຂຶ້ນ​ໃນ​ຂະນະ​ທີ່​ທາງ​ການ​ຂອງ​ຫຼາຍ​ປະເທດ​ ໃນ​ອາຊີ​ຕາເວັນ​ອອກສຽງ​ໃຕ້ ​ຈັບ​ຕາ​ເຝົ້າ​ລະວັງ​ພວກສວຍໂອກາດ​ຈັດ​ຕັ້ງ​ການ​ລົງ​ພະນັນ ​ຜົນ​ການ​ແຂ່ງຂັນ​ກີລາ​ບານເຕະ​ໂລກ ​ທີ່​ດຳເນີນ​ມາ​ແຕ່​ກາງ​ເດືອນ​ມິຖຸນາ ແລະ ສິ້ນ​ສຸດ​ລົງ​ໃນ​ກາງ​ເດືອນ​ກໍລະກົດ​ນີ້ ຂ່າວ​ບອກວ່າ: ທາງ​ການ​ຫວຽດນາມ​ສາມາດ​ຈັບ​ຜູ້​ກະທຳ​ຜິດ​ມາ​ດຳເນີນ​ຄະດີ​ໄດ້​ ຈຳນວນ 6 ຄົນ ຢຶດ​ລົດ​ໃຫຍ່​ໄດ້ 3 ຄັນ ແລະ ເງິນສົດ​ຫຼາຍ​ແສນ​ໂດ​ລາ​ສະຫະລັດ ຢູ່​ຫວຽດນາມ​ການ​ຫຼິ້ນ​ການ​ພະນັນນັ້ນ ເປັນ​ການ​ກະທຳ​ທີ່​ຜິດ​ກົດໝາຍ ຍົກເວັ້ນ​ການຫຼິ້ນຫວຍ​ທີ່​ດຳເນີນ​ໂດຍ​ທາງ​ການ ກໍ່​ຄືສູນ​ການ​ພະນັນ​ກາ​ຊີ​ໂນ ທີ່​ອະນຸຍາດ​ສະເພາະ​ໃຫ້​ຄົນ​ຕ່າງປະເທດ.

   ໃນ​ປີ 2017 ທາງ​ການ​ຫວຽດນາມ​ ໄດ້ຮ່າງ​ແຜນ​ທົດ​ລອງ​ອະນຸຍາດ​ໃຫ້​ພົນລະເມືອງ​ຫວຽດນາມ​ ທີ່​ມີ​ອາຍຸ​ແຕ່ 21 ປີ​ຂຶ້ນ​ໄປ ແລະ ມີ​ລາຍ​ໄດ້​ຢ່າງ​ໜ້ອຍ​ເດືອນ​ລະ 430 ໂດ​ລາ​ສະຫະລັດ ເຂົ້າ​ຫຼິ້ນ​ການ​ພະນັນ​ຢູ່​ສູນ​ກາ​ຊີ​ໂນ​ໄດ້ຂ່າວ​ບອກ​ວ່າ ແຜນ​ດັ່ງກ່າວ​ມາ​ຮອດ​ປັດຈຸບັນ ​ຍັງ​ບໍ່​ທັນ​ໄດ້​ຮັບ​ການ​ປະຕິບັດ​ເທື່ອຢູ່​ຫວຽດນາມ​ໃຜ​ຫຼິ້ນ ຫຼື ຈັດ​ຕັ້ງ​ການ​ພະນັນ​ເຖື່ອນ​ຈະ​ໄດ້​ຮັບ​ໂທດ​ຕິດ​ຄຸກ​ສູງ​ສຸດ 10 ປີ.

   ທີ່ ມາ​ເລ​ເຊຍ: ມີ​ຂ່າວ​ຄະດີ​ຄ້າຍໆ​ກັບ​ທີ່​ໄດ້​ເວົ້າ​ມາ​ຂ້າງ​ເທິງ​ນີ້ ແຕ່​ເປັນ​ເລື່ອງ​ການ​ຄ້າ​ມະນຸດ​ທີ່​ເກີດ​ຂຶ້ນ​ຢູ່​ປະເທດ​ມາ​ເລ​ເຊຍ ທ້າວ ຣາ​ດີ​ມານ ບິນ​ອາລີ​ດິນ ອາຍຸ 38 ປີ ຜູ້​ກໍ່​ເຫດ​ຖືກ​ຕັດສິນ​ໂທດ​ຢ່າງ​ໜັກ ຄື: ຕິດ​ຄຸກ 4 ປີ ຖືກ​ຂ້ຽນ 2 ບາດ ແລະ ຕ້ອງ​ເສຍ​ຄ່າ​ປັບ​ໃໝ​ໃນ​ມູນ​ຄ່າ 6.632 ໂດ​ລາ​ສະຫະລັດ ຖ້າ​ຫາກ​ບໍ່​ຈ່າຍ​ຕາມ​ກຳນົດ​ກໍ່​ຈະ​ເພີ່ມ​ໂທດ​ຕິດ​ຄຸກ​ຕື່ມ​ອີກ 9 ເດືອນ.

   ເລື່ອງ​ມີ​ຢູ່​ວ່າ ຍິງ​ຟິ​ລິບ​ປິນ 3 ຄົນ ທີ່​ເຮັດ​ວຽກ​ເປັນ​ສາວ​ບໍລິການ​ຢູ່​ຮ້ານ​ເທັກ ທີ່​ເມືອງ​ລາ​ບວນ (Labuan) ມາ​ເລ​ເຊຍ​ຂໍ​ຮ້ອງ​ໃຫ້​ທ້າວ ຣາ​ດີ​ມານ ຊ່ວຍ​ພວກ​ຕົນ​ໂຕນ​ອອກ​ຈາກ​ເທັກ​ແຫ່ງ​ນີ້ ທ້າວ ຣາ​ດີ​ມານ ຕົກລົງ ແຕ່​ຍິງ​ຟິ​ລິບ​ປິນ ຕ້ອງ​ຈ່າຍ​ຄ່າ​ເມື່ອຍ​ເປັນ​ເງິນ ຈຳນວນ 1.300 ຣິງ​ກິດ (ປະມານ​ກວ່າ 300 ໂດ​ລາ​ສະຫະລັດ) ໂດຍ​ໃຫ້​ຈ່າຍ​ກ່ອນ 500 ຣິງ​ກິດ ແລະ ຈ່າຍ​ສ່ວນ​ເຫຼືອ​ອີກ 800 ຣິງ​ກິດ ເວລາ​ລົງ​ເຮືອ​ມຸ່ງ​ໜ້າ​ສູ່​ເກາະ​ບອກ​ນຽວ ປະເທດ​ບຼູ​ໄນ ພໍ​ເຮືອ​ຈອດ​ຢູ່​ເກາະ​ບອກ​ນຽວ​ ກໍ່​ມີ​ຊາຍ​ຄົນ​ບຼູ​ໄນ​ສອງ​ຄົນ​ມາ​ຄຸມ​ເອົາ​ແມ່ຍິງ​ຟິ​ລິບ​ປິນ​ທັງ​ສາມ​ຄົນ ເປັນ​ອັນວ່າ​ແທນ​ທີ່​ຈະ​ຊ່ວຍ​ຍິງ​ຟິ​ລິບ​ປິນ​ໂຕນ​ອອກ​ຈາກ​ຂຸມ​ນາຮົກ​ສູ່​ເສລີພາບ ແຕ່​ທ້າວ ຣາ​ດີ​ມານ ຜັດ​ຫົວ​ໃສ​ໃຈ​ຄົດ​ເອົາ​ຍິງ​ທັງ​ສາມ​ໄປ​ຂາຍ​ຕໍ່ ເຮັດ​ໃຫ້​ພວກ​ນາງ​ກາຍເປັນ​ຄົນ​ເຂົ້າ​ປະເທດ​ແບບ​ຜິດ​ກົດໝາຍ ສຸດ​ທ້າຍ ​ຜູ້​ກໍ່​ເຫດ​ຖືກ​ທາງ​ການ​ບຼູ​ໄນ​ຈັບ​ໄດ້​ໃນ​ວັນ​ທີ 25 ພຶດສະພາ​ປີ​ນີ້ ເວລາ​ເຂົາ​ເຂົ້າ​ໄປ​ບຼູ​ໄນ.

ຂ່າວທີ່ກ່ຽວຂ້ອງ