ຂ່າວຫຼ້າສຸດ

Boeing ໄດ້​ຮັບ​ໃບ​ສັ່ງ​ຊື້​ເຮືອບິນ ມູນ​ຄ່າ 4,7 ຕື້​ໂດ​ລາ

133 18 ກ.ກ. 2018 ຂ່າວຕ່າງປະເທດ
Boeing ໄດ້​ຮັບ​ໃບ​ສັ່ງ​ຊື້​ເຮືອບິນ ມູນ​ຄ່າ 4,7 ຕື້​ໂດ​ລາ

   ບໍລິສັດ​ຜູ້​ຜະລິດ​ເຮືອບິນ ໂບ​ອິງ (Boeing Co) ຂອງ ສ ອາ​ເມ​ຣິ​ກາ ແຈ້ງ​ໃຫ້​ຮູ້ເມື່ອ​ວັນ​ທີ 16 ກໍລະກົດ​ນີ້​ວ່າ ໄດ້​ຮັບ​ໃບ​ສັ່ງ​ຊື້​ເຮືອບິນ Boeing 777 ຈຳນວນ 14 ລຳ ລວມ​ມູນ​ຄ່າ 4,7 ຕື້​ໂດ​ລາ​ສະຫະລັດ ຈາກ​ກຸ່ມ​ບໍລິສັດ DHL ຜູ້​ສະໜອງ​ການ​ບໍລິການ​ສາງ​ຂົນສົ່ງ ນັບ​ວ່າ​ເປັນ​ການ​ເປີດ ສາກ​ການ​ແກ້ງ​ແຍ່ງ​ກັບ​ບໍລິສັດ ແອ​​ຣບັສ (Airbus) ທີ່​ເປັນ​ຄູ່​ແຂ່ງ​ຢູ່​ໃນ ເອີ​ຣົບ ຊຶ່ງ​ການເຄື່ອນໄຫວ ດັ່ງກ່າວ ມີ​ຂຶ້ນ​ໃນ​ວັນ​ເປີດ​ງານ​ຕະຫຼາດນັດ​ການບິນ Farnborough Airshow  ທີ່​ປະເທດ​ອັງກິດ. ນອກຈາກ​ນັ້ນແລ້ວ DHL ກໍ​ຍັງ​ມີ​ສິດ​ຊື້​ເຮືອບິນ​ຂົນສົ່ງ Boeing 777 ອື່ນໆ​ອີກ.

Boeing ແລະ Airbus ມີ​ກຳນົດ​ວ່າ​ຈະ​ນຳ​ເອົາ​ແຈ້ງ​ການ​ຈຳນວນ​ໜຶ່ງ​ອອກ​ມາ ໃນ​ມື້​ເປີດ​ງານ ຕະຫຼາດນັດ Farnborough Airshow ທີ່​ຈະ​ດຳເນີນ​ໄປ​ແຕ່​ວັນ​ທີ 16-22 ກໍລະກົດ​ນີ້ ທ່າມກາງ​ທີ່ ສອງ​ວິ​ສາ​ຫະ​ກິດ​ດັ່ງກ່າວ ພວມ​ຊອກ​ຫາ​ວິທີ​ຍົກ​ສູງ​ໃບ​ສັ່ງ​ຈອງ​ສິນຄ້າ ທີ່​ພວມ​ສືບຕໍ່​ເພີ່ມ​ຂຶ້ນ​ຢູ່​ນັ້ນ.

    ຈາກ​ໃບ​ສັ່ງ​ຊື້​ເຮືອບິນ Boeing ໃໝ່​ຫຼ້າ​ສຸດ​ດັ່ງກ່າວ ຈະ​ເປັນ​ການ​ຍົກ​ຂະໜາດ​ກອງ​ບິນ​ທົ່ວ​ໂລກ ດ້ວຍ​ເຮືອບິນ   Boeing 777 ຂອງ DHL ຂຶ້ນ​ທົບ​ສອງ​ເທົ່າ​ຕົວ. ເວລາ​ສົ່ງ​ມອບ​ເຮືອບິນ 4 ລຳ​ໃນ​ງວດ​ທຳ​ອິດ ຕາມ​ໃບ​ສັ່ງ​ຈອງ​ສິນຄ້າ​ນັ້ນ ຄາດ​ວ່າ​ຈະ​ສຳເລັດ​ໃນ​ປີ 2019.

ກ່ອນ​ໜ້າ​ນັ້ນ ເມື່ອ​ເດືອນ​ມິຖຸນາ ປີ 2018 Boeing ແລະ​ໜ່ວຍ​ງານ FedEx Express ຂອງ​ກຸ່ມ​ບໍລິສັດ​ສະໜອງ​ການ​ບໍລິການ​ມອບ​ຮັບ FedEx Corp ກໍ​ໄດ້​ບັນລຸ​ຂໍ້​ຕົກລົງ​ກ່ຽວ​ກັບ​ການ ຈັດ​ຊື້​ເຮືອບິນ​ຂົນສົ່ງ​ຂະໜາດ​ປານ​ກາງ ແລະ ​ຂະໜາດ​ໃຫຍ່ ຈຳນວນ 24 ລຳ.

    ສະມາຄົມ​ຂົນສົ່ງ​ທາງ​ອາກາດ​ສາກົນ (IATA) ໃຫ້​ຮູ້​ວ່າ ຄວາມ​ຕ້ອງການ ໃນ​ການ​ຂົນສົ່ງ​ສິນຄ້າ​ທາງ​ອາກາດ​ຂອງ​ໂລກ ຄາດ​ວ່າ​ຈະ​ເພີ່ມ​ຂຶ້ນ 4% ໃນ​ປີ 2018. ເມື່ອ​ປີ 2017 ກໍ​ໄດ້​ບັນທຶກ​ຜົນງານ​ທີ່​ດີ​ທີ່​ສຸດ ສຳລັບ​ການເຄື່ອນໄຫວ​ຂົນສົ່ງ​ທາງ​ອາກາດ ນັບ​ແຕ່​ປີ 2010 ເປັນຕົ້ນ​ມາ ດ້ວຍ​ລະດັບ​ຄວາມ​ເຕີບ​ໂຕ​ທີ່ 9%.

 

ຂ່າວທີ່ກ່ຽວຂ້ອງ