ການ​ພົບ​ປະ​ສຸດ​ຍອດ ຣັດ​ເຊຍ - ສ ອາ​ເມ​ຣິ​ກາ ເວົ້າ​ເຖິງ​ຫຼາຍ​ບັນຫາ​ທີ່​ສຳຄັນ

153 18 ກ.ກ. 2018 ຂ່າວຕ່າງປະເທດ
ການ​ພົບ​ປະ​ສຸດ​ຍອດ ຣັດ​ເຊຍ - ສ ອາ​ເມ​ຣິ​ກາ ເວົ້າ​ເຖິງ​ຫຼາຍ​ບັນຫາ​ທີ່​ສຳຄັນ

      ຕາມ​ຂ່າວ​ຕ່າງປະເທດ ຫຼັງ​ການ​ການ​ພົບ​ປະ​ຄັ້ງ​ປະຫວັດສາດ ແກ່ຍາວ​ເປັນ​ເວລາ 4 ຊົ່ວໂມງ ລະຫວ່າງ​ປະທານາທິບໍດີ​ຣັດ​ເຊຍ ວາ​ລາ​ດີ​ເມຍ ປູ​ຕິນ ກັບ​ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ຊຶ່ງ​ຈັດ​ຂຶ້ນ​ທີ່​ນະຄອນຫຼວງ​ແຮນ​ຊິງ​ກີ (ປະເທດ​ແຟງ​ລັງ) ເມື່ອ​ວັນ​ທີ 16 ກໍລະກົດ​ນັ້ນ ຜູ້ນຳ​ທັງ ສອງ​ກໍ​ໄດ້​ເຂົ້າ​ຮ່ວມ​ກອງ​ປະຊຸມ​ຖະແຫຼງ​ຂ່າວ ໂດຍ​ທີ່​ປະທານາທິບໍດີ ປູ​ຕິນ ໃຫ້ການ​ຕີ​ລາຄາ​ວ່າ ການ​ພົບ​ປະ​ມີ​ຂຶ້ນ​ທ່າມກາງ​ບັນຍາກາດ​ທີ່​ເປີດ​ອົກ​ເປີດ​ໃຈ ແລະ​ສຸມ​ໃສ່​ວຽກ​ງານ ແລະ​ຖື​ວ່າການ​ພົບ​ປະ​ນີ້ ປະສົບ​ຄວາມ​ສຳເລັດ​ຜົນ ແລະ​ມີ​ປະໂຫຍດ. ຜູ້ນຳ​ຣັດ​ເຊຍ ເວົ້າ​ວ່າ ການ​ພົວພັນ​ທີ່​ເຄັ່ງ​ຕຶງ​ລະຫວ່າງ ຣັດ​ເຊຍ ກັບ ສ ອາ​ເມ​ຣິ​ກາ ໃນ​ປັດຈຸບັນ​ແມ່ນ​ຍ້ອນ​ເຫດຜົນ​ພາວະ​ວິໄສ ແລະ​ວ່າ​ປະເທດ ມະຫາ​ອຳນາດ​ທັງ​ສອງ ຕ່າງ​ກໍ​ພວມ​ປະ​ເຊີນ​ກັບ​ຄວາມ​ທ້າ​ທາຍ​ຕ່າງໆ​ທີ່​ຄື​ກັນ ເຊັ່ນ ກົນ​ໄກ​ດ້ານ​ຄວາມ ສະ​​​ຫງົບ​ສາກົນ ການ​ສັນ​ລະ​ສູດ​ຕົວ​ຕົນ​ລັດທິ​ກໍ່​ການ​ຮ້າຍ ດັ່ງນີ້​ເປັນຕົ້ນ.

    ທາງ​ດ້ານ​ປະທານາທິບໍດີ ທຣຳ ກໍ​ມີ​ການ​ຕີ​ລາຄາ​ຄື​ກັນ​ກ່ຽວ​ກັບ​ການ​ພົບ​ປະ​ນັ້ນ ໂດຍ​ເອີ້ນ ວ່າ​ນີ້​ເປັນ “ຈຸດ​ເວລາ​ແຫ່ງ​ບາດ​ລ້ຽວ” ໃນ​ການ​ພົວພັນ​ລະຫວ່າງ ສ ອາ​ເມ​ຣິ​ກາ ກັບ​ຣັດ​ເຊຍ. ຜູ້ນຳ ສ ອາ​ເມ​ຣິ​ກາ ໃຫ້​ຮູ້​ວ່າ ການ​ສົນທະນາ​ກັບ​ທ່ານ ປູ​ຕິນ ມີ​ຂຶ້ນ​ຢ່າງ “ເປີດ​ອົກ​ເປີດ​ໃຈ ແລະ​ມີ​ໝາກຜົນ” ພ້ອມ​ທັງ​ເນັ້ນ​ໜັກ​ເຖິງ​ຄວາມ​ສຳຄັນ​ຂອງ​ການ​ເຈລະຈາ ສຳລັບ ສ ອາ​ເມ​ຣິ​ກາ ກັບ​ຣັດ​ເຊຍ ກໍ​ຄື​ໃນ​ທົ່ວ​ໂລກ ແລະ​ໃຫ້​ທັດສະນະ​ວ່າ ສອງ​ປະເທດ​ຕ້ອງ​ໄດ້​ຊອກ​ຫາ​ໂອກາດ​ການ​ຮ່ວມ​ມື ຖ້າ​ຫາ​ກວ່າ​ຢາກ​ມີ​ການ​ແກ້​ໄຂ​ສະພາບ​ການ​ຢູ່​ໃນ​ໂລກ

    ກ່ອນ​ໜ້າ​ນີ້ ປະທານາທິບໍດີ ປູ​ຕິນ ແລະ​ປະທານາທິບໍດີ ທຣຳ ໄດ້​ພົບ​ປະກັນ​ມາ​ແລ້ວ 2 ເທື່ອ ຕາມ​ລຳດັບ​ໃນ​ເດືອນ​ກໍລະກົດ ປີ 2017  ທີ່​ນະຄອນ ຮຳ​ບວກ (ປະເທດ​ເຢຍ​ລະ​ມັນ) ຊຶ່ງ​ຈັດ​ຂຶ້ນ​ຢູ່​ນອກ​ກອງ​ປະຊຸມ​ກຸ່ມ​ພື້ນຖານ​ເສດຖະກິດ​ພັດທະນາ ແລະ​ເກີດ​ໃໝ່​ອັນ​ກັບ​ແຖວ​ໜ້າ​ຂອງ​ໂລກ (G20) ແລະ​ໃນ​ເດືອນ​ພະຈິກ​ປີ​ດຽວ​ກັນ ລະຫວ່າງ​ທີ່​ເຂົ້າ​ຮ່ວມ​ກອງ​ປະຊຸມ​ສຸດ​ຍອດ​ຂອງ​ເວທີ​ປາ​ໄສ​ການ​ຮ່ວມ​ມື ທາງ​ດ້ານ​ເສດຖະກິດ ອາຊີ - ປາ​ຊີ​ຟິກ  (APEC) ທີ່​ນະຄອນ​ດ່າ​ນັງ (ຫວຽດນາມ) ແຕ່​ວ່າການ​ພົບ ປະ​ສຸດ​ຍອດ​ຢູ່​ທີ່​ນະຄອນຫຼວງ ແຮນ​ຊິງ​ກີ ໃນ​ເທື່ອ​ນີ້ ນັບ​ວ່າ​ເປັນ​ການ​ພົບ​ປະ​ທີ່​ຮອບດ້ານ ເປັນ​ເທື່ອ​ທຳ​ອິດ ລະຫວ່າງ​ຜູ້ນຳ​ທັງ​ສອງ.

 

ຂ່າວທີ່ກ່ຽວຂ້ອງ