ປະທານຟີຟ່າ ຊີ້ແຈງວ່າ ບານໂລກຄັ້ງນີ້ດີສຸດຕະຫຼອດການ

122 17 ກ.ກ. 2018 ວົງຈອນກີລາ
ປະທານຟີຟ່າ ຊີ້ແຈງວ່າ ບານໂລກຄັ້ງນີ້ດີສຸດຕະຫຼອດການ

ທ່ານ ຈານນີ ອິນຟານຕິໂນ ປະທານສະຫະພັນເຕະບານນານາຊາດ ຫຼື ຟີຟ່າ ອອກມາຍົກຍ້ອງວ່າ ເຕະບານໂລກ 2018 ເປັນເຕະບານໂລກທີ່ດີທີ່ສຸດຕະຫຼອດການ ພ້ອມຍົກສັກສີໃຫ້ປະຊາຊົນ ແລະ ລັດຖະບານຣັດເຊຍ ທີ່ຊ່ວຍກັນເຮັດໃຫ້ມະຫະກໍາເຕະບານຄັ້ງນີ້ປະສົບຄວາມສໍາເລັດ.

ທ່ານ ຈານນີ ອິນຟານຕິໂນ ກ່າວວ່າ “ປະມານ 2 ປີທີ່ຜ່ານມາ ຂ້າພະເຈົ້າເຄີຍບອກໄວ້ວ່າ ນີ້ອາດຈະເປັນເຕະບານໂລກທີ່ດີທີ່ສຸດຕະຫຼອດການ ວັນນີ້ຂ້າພະເຈົ້າສາມາດເວົ້າໄດ້ອີກຄັ້ງດ້ວຍຄວາມໝັ້ນໃຈຍິ່ງກວ່າເດີມ ເພາະຂ້າພະເຈົ້າ ແລະ ພວກທ່ານ ຕ່າງກໍໄດ້ເຫັນກັນໄປໝົດແລ້ວ ນີ້ເປັນເຕະບານໂລກທີ່ດີທີ່ສຸດຕະຫຼອດການ”.

“ຂ້າພະເຈົ້າຄິດວ່າ ເຕະບານໂລກຄັ້ງນີ້ໄດ້ປ່ຽນຄວາມຄິດຂອງຄົນທັງໂລກທີ່ມີຕໍ່ຣັດເຊຍ ທຸກຄົນຕ່າງພົບວ່ານີ້ເປັນປະເທດທີ່ສວຍງາມ ແລະ ອົບອຸ່ນ ປະຊາຊົນທຸກຄົນຕ່າງສະແດງສູ່ສາຍຕາຊາວໂລກວ່າ ບາງສິ່ງທີ່ມີຄົນເວົ້າເຖິງປະເທດນີ້ ບໍ່ແມ່ນເລື່ອງຈິງ”.

ນອກຈາກນີ້ ທ່ານ ອິນຟານຕິໂນ ຍັງກ່າວຊົມເຊີຍເຕັກໂນໂລຊີວິດີໂອຊ່ວຍຕັດສິນ ຫຼື VAR ທີ່ນໍາມາໃຊ້ໃນເຕະບານໂລກ5ັ້ງນີ້ ວ່າປະສົບຄວາມສໍາເລັດດ້ວຍດີ ໂດຍສະເພາະການເຮັດໃຫ້ປະຕູກັງຂາຈາກຈັງຫວະລໍ້າໜ້າ ກາຍເປັນອະດີດໄປໂດຍສິ້ນເຊີງ.

“VAR ບໍ່ໄດ້ປ່ຽນເຕະບານ ແຕ່ມັນເຮັດໃຫ້ເຕະບານໃສສະອາດ ແລະ ຊ່ວຍໃຫ້ຜູ້ຕັດສິນເຮັດໜ້າທີ່ໄດ້ຢ່າງຖືກຕ້ອງ ປະຕູຈາກການຢືນໃນຕໍາແໜ່ງລໍ້າໜ້າໄດ້ໝົດສິ້ນໄປແລ້ວ ຢ່າງໜ້ອຍກໍໃນເກມເຕະບານທີ່ມີ VAR”.

ຂ່າວທີ່ກ່ຽວຂ້ອງ