ຂ່າວຫຼ້າສຸດ

ນ້ຳຕົກຕາດ​ຜາ​ສ້ວມ ໜຶ່ງ​ໃນ​ແຫຼ່ງ​ທ່ອງ​ທ່ຽວ​ທີ່​ລື​ຊື່​ຂອງ​ແຂວງ​ຈຳປາ​ສັກ

318 17 ກ.ກ. 2018 ຫົວຂໍ້ຂ່າວອື່ນໆ
ນ້ຳຕົກຕາດ​ຜາ​ສ້ວມ ໜຶ່ງ​ໃນ​ແຫຼ່ງ​ທ່ອງ​ທ່ຽວ​ທີ່​ລື​ຊື່​ຂອງ​ແຂວງ​ຈຳປາ​ສັກ

    ອຸດທະຍານ​ບາ​ຈຽງ​ຈຳປາ​ສັກ ແຫຼ່ງ​ທ່ອງ​ທຽວ​ນ້ຳຕົກ​ຜາ​ສ້ວມ ແມ່ນ​ໜຶ່ງ​ໃນ​ແຫຼ່ງ​ທ່ອງ​ທີ່​ມີ​ຊື່ ສຽງ​ຂອງ​ແຂວງ​ຈຳປາ​ສັກ ຖ້າ ໃຜ​ມີ​ໂອກາດ​ໄດ້​ໄປ​ຢ້ຽມຢາມ​ສະຖານ​ທີ່​ແຫ່ງ​ນີ້​ແລ້ວ​ກໍ່​ຈະ​ໄດ້​ສຳຜັດ​ກັບ​ຄວາມ​ງົດ​ງາມ​ຂອງ​ນ້ຳຕົກຕາດ​ຜາ​ສ້ວມ ຕາດ​ໝາກ​ແງວ ຊົມ​ວິວ​ທິວ​ທັດ ເຮືອນ​ພັກ​ແຄມ​ຫ້ວຍ ແລະ ຣີ​ສອດ​ແຄມ​ນ້ຳຕົກ ຊົມ​ບ້ານ​ວັດທະນະທຳ​ບັນດາເຜົ່າ ແລະ ທ່ຽວ​ຊົມ​ຖ້ຳ​ພະຍາ​ນາກ.

     ອຸດທະຍານ​ບາ​ຈຽງ ນ້ຳຕົກ​ຜາ​ສ້ວມ​ແຫ່ງ​ນີ້ ​ຕັ້ັງ​ຢູ່​ເມືອງ​ບາ​ຈຽງ​ຈະເລີນ​ສຸກ ຫ່າງ​ຈາກ​ເທສະ​ບານ​ແຂວງ​ຈຳປາ​ສັກ ໄປ​ທາງ​ທິດຕາເວັນອອກ​ປະມານ 30 ກິໂລແມັດ   ອີງ​ຕາມ​ທ່ານ ທຳ​ຜາ​ສຸກ ຈີ​ປຣູ ແຈະ​ກຣຽງ ເຜົ່າ​ກຣຽງ ຜູ້​ປະຊາສຳພັນ​ນຳ​ທ່ຽວ​ປະຈຳ​ແຫຼ່ງ​ທ່ອງ​ທຽວ​ແຫ່ງ​ນີ້​ໃຫ້​ຮູ້​ວ່າ: ກ່ອນ​ໜ້າ​ນີ້​ຫຼາຍ​ສິບ​ປີ​ຕອນ​ທີ່​ຂ້າພະເຈົ້າ​ບໍ່​ທັນ ໄດ້​ມາ​ຢູ່​ບໍລິເວນ​ແຫ່ງ​ນີ້​ເປັນ​ພື້ນ​ທີ່​ປ່າ​ຊຸດໂຊມ ພາຍຫຼັງ​ທີ່​ທ່ານ ວິມົນ​ກິດ​ບຳລຸງ​ນັກ​ລົງທຶນ​ຊາວ​ໄທ​ໄດ້​ຮັບ​ການ​ສຳ​ປະທານ​ພັດ​ທະ ນາ​ເປັນ​ແຫຼ່ງ​ທ່ອງ​ທຽວ​ທຳ​ມະ​ຊາດ​ຕິດ​ພັນ​ກັບ​ວັດທະນະທຳ​ເຊີງ ອະນຸ​ຮັກ​ພື້ນ​ທີ່​ປ່າໄມ້​ໃນ​ບໍລິເວນ​ແຫ່ງ​ນີ້​ປະມານ 2 ກີ​ໂລ​ຕາ​ແມັດ ຈຶ່ງ​ໄດ້​ຮັບ​ການ​ຟື້ນ​ຟູ​ໃຫ້​ຂຽວງາມ ອຸດົມສົມບູນ ມີ​ນົກ​ໜູ​ປູ​ປາ​ນາ​ນ້ຳ ມີ​ການ​ພັດທະນາ​ໃຫ້​ມີ​ຮ້ານ​ອາ ຫານ ກິດຈະກຳ​ຍ່າງ​ປ່າ ມີ​ບ້ານ​ຊົນເຜົ່າ​ທີ່​ສະແດງ​ເຖິງ​ວັດທະນະທຳ ຮີດຄອງ​ປະເພນີ​ອັນ​ດີງາມ​ຂອງ​ບັນດາເຜົ່າ​ລາວ​ເຮົາ ເພື່ອ​ຕ້ອນຮັບ​ແຂກ​ມາ​ທ່ຽວ​ຊົມ.

     ທ່ານ ທຳ​ຜາ​ສຸກ ອະທິບາຍ​ກ່ຽວ​ກັບ​ຄວາມ​ໝາຍ​ຂອງ​ນ້ຳຕົກ​ຜາ​ສ້ວມ​ສູ່​ຟັງ​ວ່າ: ‘‘ສ້ວມ” ໃນ​ພາສາ​ລາວ ແມ່ນ​ໝາຍ​ເຖິງ​ຫ້ອງ​ນອນ ຮີດຄອງ​ປະເພນີ​ລາວ​ແຕ່ ດຶກ​ດຳ​ບັນ​ໃນ​ເວລາ​ບ່າວ-ສາວ ແຕ່ງດອງ​ເປັນ​ຄູ່​ຜົວ-ເມຍ​ກັນ​ຈະ​ມີ​ຜູ້​ເຖົ້າ​ຜູ້​ແກ່​ເປັນ​ຜູ້​ຈູງ​ແຂນ​ເຂົ້າ​ສ້ວມ ການ​ທີ່​ນ້ຳຕົກ​ແຫ່ງ​ນີ້​ມີ​ຊື່ ວ່າ: ນ້ຳຕົກ​ຜາ​ສ້ວມ​ນັ້ນ ກໍ່​ຍ້ອນ​ວ່າ ບໍລິເວນ​ທີ່​ນ້ຳ​ຕົກລົງ​ສູງ​ປະມານ​ເກືອບ 10 ແມັດ​ນັ້ນ ລຽນ​ລ້ອມ​ໄປ​ດ້ວຍ​ຝາ​ຜະໜັງ​ຫີນ​ຕັ້ງ​ຊື່​ຄື​ກັນ​ກັບ​ໄມ້​ແປ້ນ​ແອ້ມ​ຝາ​ເຮືອນ ເປັນ​ວົງ​ກົມ​ລັກສະນະ​ຄື​ກົ້ນ​ຫວີງ   ສາຍ​ນ້ຳ​ນີ້​ແມ່ນ​ຫ້ວຍ​ຈຳປີ​ມີ ຄວາມ​ຍາວ​ທັງ​ໝົດ 42 ກີ​ໂລ​ແມັດ ກຳເນີດ​ຈາກ​ພູ​ສູງ​ທີ່​ມີ​ຊື່ວ່າ: ພູ​ເທວະ​ດາ ເຊິ່ງ​ສູງ​ຈາກ​ລະດັບ​ນ້ຳ​ທະເລ 500 ແມັດ ແລະ ໄຫຼ​ຈາກ ທິດໃຕ້​ໄປ​ຫາ​ທິດເໜືອ ເຫດຜົນ​ກໍ່ ຍ້ອນ​ວ່າ​ບໍ່​ນ້ຳ​ເກີດ​ຈາກ​ທິດ​ສູງ ແລະ ໄຫຼ​ໄປ​ຫາ​ທິດ​ຕ່ຳ ຜ່ານ​ດິນ​ບາ​ຈຽງ​ຈະເລີນ​ສຸກ ປາກ​ຊ່ອງ ແລ້ວ​ລົງ​ໃສ່​ບ້ານ​ຈຳປີ (ຕາດ​ຈຳປີ) ກ່ອນ​ຈະ​ຕົກລົງ​ໃສ່​ນ້ຳ​ເຊ ທີ່ ເຂດ​ເມືອງ​ຊະນະ​ສົມບູນ.

    ຢູ່​ສະຖານທີ່​ແຫ່ງ​ນີ້ ຈຸດ​ທຳ​ອິດ ທີ່​ພວກ​ເຮົາ​ໄປ​ທ່ຽວ​ຊົມ​ກໍ່​ແມ່ນ ນ້ຳຕົກ​ຜາ​ສ້ວມ ເຊິ່ງ​ເມື່ອ​ໄດ້​ສຳ ຜັດ​ຕົວ​ຈິງ​ກໍ່​ເຫັນ​ວ່າ​ສວຍ​ງາມ​ດັ່ງ​ຄຳ​ຊ່າ​ລື​ອີ​ຫຼີ ບົນ​ສາຍ​ນ້ຳ​ຈາກ​ພັກ​ເບື້ອງ​ເທິງ ນ້ຳ​ແຍກ​ກັນ​ເປັນ​ສາຍ​ທະຍານ​ຕົກລົງ​ສູ່​ດ້ານ​ລ່າງ​ຕາມ​ຝາ​ຜະໜັງ​ຫີນ​ແຕກ​ກະຈາຍ ຂາວ​ຄື​ປຸຍ​ຝ້າຍ ອ້ອມ​ຮອບ​ລຽນ​ລ້າຍ​ໄປ​ດ້ວຍ​ແມກ​ໄມ້​ໃບ​ຂຽວ​ຖິ້ມ​ຮົ່ມ​ເງົາ​ປູ​ຕາມ​ໜ້ານ້ຳ ເຮັດ​ໃຫ້​ທົ່ວ ບໍລິເວນ​ມີ​ຄວາມ​ສົດຊື່ນ ເມື່ອ​ໄດ້​ສຳຜັດ​ຮູ້ສຶກ​ເຢືອກ​ເຢັນ​ໃນ​ສາຍຕາ ແລະ ຊຸ່ມ​ຊື່ນ​ໃນ​ຫົວໃຈ.

     ຈາກ​ບໍລິເວນ​ນ້ຳຕົກ​ຜາ​ສ້ວມ ພວກ​ເຮົາ​ຍ່າງເລາະ​ມາ​ທາງ​ຮ້ານ​ອາຫານ ຮ້ານ​ຂາຍເຄື່ອງ​ທີ່​ລະນຶກ ຜ່ານ​ຂົວ​ເຫຼັກ​ແລ້ວ​ຍ່າງ​ຊົມ​ປ່າໄມ້ ຣີ​ສອດ​ທີ່​ປຸກ​ຕາມ​ແບບ​ຕ່າງໆ ຊົມ ນ້ຳຕົກ​ໝາກ​ແງວ ແລ້ວ​ເຂົ້າ​ສູ່​ບ້ານ​ວັດທະນະທຳ​ບັນດາເຜົ່າ ຢູ່ ທີ່​ນີ້​ໄດ້​ເຕົ້າໂຮມ​ເອົາ​ເຮືອນ​ບູຮານ​ຂອງ 8 ຊົນເຜົ່າ​ຈາກ 4 ແຂວງ​ພາກ​ໃຕ້ ແລະ ໄດ້​ຈັດ​ຕັ້ງ​ຫໍ​ຜະລິດ ຕະ​ພັນ​ຊົນເຜົ່າ​ໄວ້​ຄອຍ​ຕ້ອນຮັບ ນັກ​ທ່ອງ​ທຽວ ທ່ານ ບຸນ​ມີ ດວງ​ລິວ ເຜົ່າ​ອາລັກ ເລົ່າ​ສູ່​ຟັງ​ວ່າ: ແຕ່​ກ່ອນ​ເຮົາ​ຢູ່​ເມືອງ​ຊານ​ໄຊ ແຂວງ​ອັດ​ຕະ​ປື ແລະ ໄດ້​ເຂົ້າ​ມາ​ຢູ່​ທີ່​ນີ້ 10 ກວ່າ​ປີ​ແລ້ວ ພວກ ເຮົາ​ຢູ່​ທີ່​ນີ້​ແມ່ນ​ອາໄສ​ຂາຍເຄື່ອງ​ພື້ນເມືອງ​ຂອງ​ຊົນເຜົ່າ​ໃຫ້​ນັກ​ທ່ອງ​ທຽວ ເປັນຕົ້ນ ແມ່ນ​ສິ້ນ ເສື້ອ ຜ້າແພ ເຄື່ອງ​ຈັກສານ ແລະ ອື່ນໆ​ສະເລ່ຍ​ແລ້ວ​ມື້ໜຶ່ງ ສ້າງ​ລາຍ​ຮັບ​ໄດ້​ປະມານ 400.000-600.000 ກີບ ນັກ​ທ່ອງ​ທຽວ​ສ່ວນ​ຫຼາຍ​ແມ່ນ​ຊາວ​ໄທ ແລະ ວັນ​ເສົາ ວັນ​ອາທິດ ຈະ​ມີ​ແຂກ​ມາ​ທ່ອງ​ທຽວ​ຫຼາຍ.

    ພາຍ​ໃນ​ບ້ານ​ວັດທະນະທຳ​ບັນ ດາ​ເຜົ່າ​ມີ​ການ​ປຸກ​ສ້າງ​ເຮືອນ​ທີ່​ມີ ຮູບ​ແບບ​ເອກະລັກ​ຂອງ​ແຕ່​ລະ ເຜົ່າ ໃຈ​ກາງຂອງ​ບ້ານ​ມີ​ສາລາ​ທີ່ ເປັນ​ບ່ອນ​ເຕົ້າໂຮມ​ເຮັດ​ພິທີກຳ​ຕ່າງໆ ມີ​ເຮືອນ​ເສົາ​ດຽວ​ທີ່​ເປັນ ບ່ອນ​ພົບ​ປະ​ໂອ້​ລົມ​ກັນ​ຂອງ​ບ່າວ-ສາວ ມີ​ການ​ຕ່ຳຫູກ​ທໍ​ໄໝ ຫຍິບ ປັກ​ຖັກ​ແສ່ວ ແລະ ສະແດງ​ເຄື່ອງ ດົນຕີ​ພື້ນເມືອງ​ຂອງ​ຊົນເຜົ່າ ເຊິ່ງ ໄດ້​ສ້າງ​ຄວາມ​ປະ​ທັບ​ໃຈ​ໃຫ້​ແກ່ ນັກ​ທ່ອງ​ທຽວ​ທີ່​ເຂົ້າ​ມາ​ທຽວ​ຊົມ ຢ່າງ​ບໍ່​ມີ​ວັນ​ລືມ.

    ສະຖານທີ່​ທ່ອງ​ທຽວ​ອຸດ​ທະ ຍານ​ບາ​ຈຽງ ນ້ຳຕົກ​ຜາ​ສ້ວມ ເປັນ ທີ່​ຮູ້ຈັກ​ກັນ​ດີ​ຂອງ​ນັກ​ທ່ອງ​ທຽວ ພາຍ​ໃນ 4 ແຂວງ​ພາກ​ໃຕ້ ແລະ ນັກ​ທ່ອງ​ທຽວ​ຊາວ​ໄທ ແຕ່​ລະ​ວັນ ແຫຼ່ງ​ທ່ອງ​ທຽວ​ແຫ່ງ​ນີ້​ໄດ້​ຕ້ອນ ຮັບ​ນັກ​ທ່ອງ​ທຽວ​ຈາກ​ສາລະ​ທິດ ມາ​ເບິ່ງ​ມາ​ຊົມ​ຢ່າງ​ບໍ່​ຂາດ​ສາຍ. 

   ນາງ ໃສ ພະນັກງານ​ເກັບ​ເງິນ ຄ່າ​ປີ້​ເຂົ້າ​ທຽວ​ຊົມ​ບອກ​ວ່າ: ປົກ ກະຕິ​ນັກ​ທ່ອງ​ທຽວ​ມາ​ຫຼາຍ​ແມ່ນ ວັນ​ເສົາ ແລະ ວັນ​ອາທິດ ແຕ່​ມາ ຫຼາຍ​ກວ່າ​ໝູ່​ແມ່ນ​ວັນ​ບຸນ​ຕ່າງໆ ເປັນຕົ້ນ ວັນ​ບຸນປີໃໝ່​ລາວ ວັນ ແມ່ຍິງ​ສາກົນ... ເຊິ່ງ​ປະລິມານ ລົດ​ແມ່ນ​ມີ​ເຖິງ 300-400 ຄັນ ສຳລັບ​ຄ່າ​ເຂົ້າ​ທຽວ​ຊົມ​ຄົນ​ລາວ 5.000 ກີບ ຄົນ​ຕ່າງປະເທດ 10.000 ກີບ​ຕໍ່​ຄົນ ຄ່າ​ຝາກ​ລົດ ໃຫຍ່ 5.000 ກີບ ແລະ ລົດຈັກ 2.000 ກີບ​ຕໍ່​ຄັນ.

   ຖ້າ​ໃຜ​ໄດ້​ໄປ​ພາກ​ໃຕ້​ກໍ່​ຢ່າ​ລືມ​ໄປ ແວ່​ຊົມ​ອຸດທະຍານ​ບາ​ຈຽງ​ນ້ຳຕົກ ຜາ​ສ້ວມ ຮັບຮອງ​ວ່າ​ທ່ານ​ຈະ​ມີ​ຄວາມ​ປະ​ທັບ​ໃຈ​ໃນ​ທຳ​ມະ​ຊາດ​ທີ່​ສວຍ​ງາມ ແລະ ຊື່ນ​ຊົມ​ຕື່ນ​ຕາ ຕື່ນ​ໃຈ​ກັບ​ວັດທະນະທຳ​ຂອງ​ບັນ ດາ​ເຜົ່າ​ທີ່​ອຸດົມສົມບູນ ແລະ ມີ ຫຼາຍ​ສິ່ງ​ຫຼາຍ​ຢ່າງ.

 

ຂ່າວທີ່ກ່ຽວຂ້ອງ