ຂ່າວຫຼ້າສຸດ

ຣັດ​ເຊຍ ມອບ​ສິດ​ເປັນ​ເຈົ້າພາບ World Cup 2022 ໃຫ້​ແກ່​ກາ​ຕາ

237 17 ກ.ກ. 2018 ຂ່າວຕ່າງປະເທດ
ຣັດ​ເຊຍ ມອບ​ສິດ​ເປັນ​ເຈົ້າພາບ World Cup 2022 ໃຫ້​ແກ່​ກາ​ຕາ

     ພິທີ​ມອບ​ສິດ​ເປັນ​ເຈົ້າພາບ​ຈັດ​ງານ​ມະຫາ​ກຳ​ກິລາ​ບານເຕະ​ໂລກ​ໃນ​ປີ 2022 (World Cup 2022) ໃຫ້​ແກ່​ກາ​ຕາ ໄດ້​ຈັດ​ຂຶ້ນ​ທີ່​ນະຄອນ​ຫຼວງ​​ມົສ​ກູ (ຣັດ​ເຊຍ) ເມື່ອ​ວັນ​ທີ 15 ກໍລະກົດ​ທີ່​ຜ່ານ​ມາ ໂດຍ​ປະທານາທິບໍດີ​ຣັດ​ເຊຍ ວາ​ລາ​ດີ​ເມຍ ປູ​ຕິນ ໄດ້​ມອບ​ໝາກບານ​ທາງ​ການ​ຂອງ World Cup ໃຫ້​ແກ່​ທ່ານ ຊານ​ນີ ອິນ​ຟັງ​ຕີ​ໂນ ປະທານ​ສະຫະພັນ​ບານເຕະ​ໂລກ (FIFA) ແລະ ຫຼັງ​ຈາກ​ນັ້ນ ກໍ​ມອບ​ຕໍ່ໃຫ້​ກະສັດ ທາ​ມິມ ບິນ ຮາ​ມັດ ອາ​​ລ-ທາ​ທີ ແຫ່ງ​ກາ​ຕາ.

    ປະທານາທິບໍດີ​ປູ​ຕິນ ໄດ້​ກ່າວ​ຢູ່​ໃນ​ພິທີ​ດັ່ງກ່າວ ໂດຍ​ໄດ້​ສະແດງ​ຄວາມ​ພາກພູມ​ໃຈ ເມື່ອ​ຣັດ​ເຊຍ ປະສົບ​ຄວາມ​ສຳເລັດ​ໃນ​ການ​ເປັນ​ເຈົ້າພາບ​ຈັດ​ງານ​ແຂ່ງຂັນ  World Cup 2018 ພ້ອມ​ທັງ​ຢືນຢັນ​ວ່າ ພ້ອມ​ທີ່​ຈະ​ແບ່ງປັນ​ບົດຮຽນ​ການ​ຈັດ​ງານ​ດັ່ງກ່າວ ໃຫ້​ແກ່​ກາ​ຕາ.

    ກ່ອນ​ໜ້າ​ນັ້ນ ທ່ານ ອິນ​ຟັງ​ຕີ​ໂນ ໄດ້​ພັນ​ລະ​ນາ World Cup 2018 ວ່າ​ເປັນ​ງານ World Cup ທີ່ "ຍອດ​ຢ່ຽມ​ທີ່​ສຸດ" ດ້ວຍ​ຜົນງານ​ຂອງ​ປະເທດ​ເຈົ້າພາບ​ຣັດ​ເຊຍ ປະກອບ​ກັບ ເຕັກ​ໂນ​ໂລ​ຊີ VAR ແລະ​ສິ່ງ​ປະ​ທັບ​ໃຈ​ອື່ນໆ.

    ສ່ວນ​ນັດ​ແຂ່ງຂັນ​ຊີງ​ຊະນະ​ເລີດ ໃນ World Cup 2018 ນັ້ນ​ມີ​ຂຶ້ນ​ເມື່ອ​ຄ່ຳ​ຄືນ​ຂອງ​ວັນ​ທີ 15 ກໍລະກົດ​ນີ້ ລະຫວ່າງ​ທິມ​ຊາດ​ຝຣັ່ງ ກັບ​ທິມ​ຊາດ ໂກຣ​ອາຊີ ຊຶ່ງ​ໃນ​ທີ່​ສຸດ​ກໍ​ແມ່ນ​ທິມ​ຊາດ​ຝຣັ່ງ ໄດ້​ຄອງ​ຊະນະ​ເລີດ ໂດຍ​ຊະນະ​ດ້ວຍ 4 ປະຕູ ຕໍ່ 2; ແລະ ເມື່ອ​ວັນ​ທີ 14 ກໍລະກົດ ການ​ແຂ່ງຂັນ​ຊີງ​ອັນ​ດັບ​ທີ 3 ໄດ້​ມີ​ຂຶ້ນ​ລະຫວ່າງ​ທິມ​ຊາດ ອັງກິດ ກັບ​ທິມ​ຊາດ ແບນ​ຊິກ ໂດຍ​ທີ່​ແບນ​ຊິກ ຊະນະ​ໄປ 2 ປະຕູ ຕໍ່ 0.

ຂ່າວທີ່ກ່ຽວຂ້ອງ