ຂ່າວຫຼ້າສຸດ

ບັນດາ​ກຸ່ມ​ປະກອບ​ອາວຸດ​ໃນ​ມຽນ​ມາ ໃຫ້​ສັນຍາ​ເຈລະຈາ​ສັນຕິພາບ​ກັບ​ຝ່າຍ​ລັດຖະບານ

167 17 ກ.ກ. 2018 ຂ່າວຕ່າງປະເທດ
ບັນດາ​ກຸ່ມ​ປະກອບ​ອາວຸດ​ໃນ​ມຽນ​ມາ ໃຫ້​ສັນຍາ​ເຈລະຈາ​ສັນຕິພາບ​ກັບ​ຝ່າຍ​ລັດຖະບານ

    ສື່ສານ​ໃນ​ມຽນ​ມາ ລາຍ​ງານ​ເມື່ອ​ວັນ​ທີ 15 ກໍລະກົດ​ນີ້​ວ່າ ບັນດາ​ກຸ່ມ​ປະກອບ​ອາວຸດ 7 ກຸ່ມ ຂອງ​ກອງ​ກຳລັງ​ພັນທະ​ພາບ​ທາງ​ພາກ​ເໜືອ ໄດ້​ໃຫ້​ສັນຍາ​ທີ່​ຈະ​ຮັກສາ​ການ​ເຈລະຈາ​ສັນຕິພາບ ກັບ​ລັດຖະບານ​ມຽນ​ມາ ໂດຍ​ຢືນຢັນ​ວ່າ​ຈະ​ດຳເນີນ​ການ​ປຶກສາ​ຫາລື ກ່ຽວ​ກັບ​ຖະແຫຼງການ ຂອງ​ເຈົ້າ​ໜ້າທີ່ ຢູ່​ໃນ​ກອງ​ປະຊຸມ​ສັນຕິພາບ ປາງ​ຫຼົງ (Panglong) ສະຕະວັດ​ທີ 21 ຄັ້ງ​ທີ 3 ທີ່​ພວມ​ດຳເນີນ​ຢູ່​ໃນ​ນະຄອນຫຼວງ​ເນ​ປີ​ດໍ ນັ້ນ.

    ກອງ​​ປະ​ຊຸມ​ດັ່ງກ່າວ​ໄຂ​ຂຶ້ນ​ເມື່ອ​ວັນ​ທີ 11 ກໍລະກົດ ແລະ ບັນດາ​ກຸ່ມ​ປະກອບ​ອາວຸດ​ດັ່ງກ່າວ ໄດ້​ເຂົ້າ​ຮ່ວມ​ການ​ປະຊຸມ​ຮອດ​ວັນ​ທີ 14 ກໍລະກົດ. ກອງ​ກຳລັງ​ພັນທະ​ພາບ​ພາກ​ເໜືອ ປະກອບ​ດ້ວຍ​ກຸ່ມ​ປະກອບ​ອາວຸດ 7 ກຸ່ມ ທີ່​ບໍ່​ທັນ​ໄດ້​ລົງ​ນາມ​ໃນ​ຂໍ້​ຕົກລົງ​ຢຸດ​ຍິງ​ທົ່ວ​ປະເທດ (NCA) ເມື່ອ​ປີ 2015 ປະກອບ​ມີ ອົງການ​ເອກະລາດ ກະ​ຈິນ (KIO) ກອງທັບ​ແຫ່ງ​ຊາດ​ພັນທະ​ພາບ ຫວ້າ (UWSA) ພັກ​ກ້າວໜ້າ​ແຫ່ງ​ລັດ (SSPP) ກອງທັບ​ສະຫະພາບ ປະຊາທິປະໄຕ​ແຫ່ງ​ຊາດ (NDAA) ກອງທັບ​ສະຫະພາບ ປະຊາທິປະໄຕ​ແຫ່ງ​ຊາດ​ມຽນ​ມາ (MNDAA) ກອງທັບ​ປົດ​ປ່ອຍ​ແຫ່ງ​ຊາດ ຕາ​ອັງ (TNLA) ແລະ​ ກອງທັບ ອາ​ຣາ​ຄານ (AA).

   ຫຼັງ​ຈາກ​ທີ່ NCA ເລີ່ມ​ຂຶ້ນ​ໃນ​ປີ 2015 ລັດຖະບານ​ມຽນ​ມາ​ຊຸດ​ປັດຈຸບັນ ໄດ້​ຈັດ​ກອງ​ປະຊຸມ​ສັນຕິພາບ​ປາງ​ຫຼົງ ສະຕະວັດ​ທີ 21 ມາ​ແລ້ວ 2 ເທື່ອ ຕາມ​ລຳດັບ​ໃນ​ເດືອນ​ສິງຫາ ປີ 2016 ແລະ​ ເດືອນ​ພຶດສະພາ ປີ 2017. ຢູ່​ໃນ​ກອງ​ປະຊຸມ​ສັນຕິພາບ​ປາງ​ຫຼົງ ສະຕະວັດ​ທີ 21 ຄັ້ງ​ທີ 2 ນັ້ນ ລັດຖະບານ​ມຽນ​ມາ ແລະ ​ບັນດາ​ກຸ​​່ມ​ປະກອບ​ອາວຸດ​ຊົນເຜົ່າ ເຕົ້າໂຮມ​ມາ​ໄດ້​ລວມ 7 ຫຼັກການ ໂດຍ​ໄດ້​ຮັບຮອງ​ໃຫ້​ເປັນ​ສົນທິສັນຍາ​ຂອງ​ສະຫະພາບ ຢູ່​ໃນ​ຂະ​ບວນ​ການ​ສັນຕິພາບ ຂອງ​ປະເທດ​ຊາດ.

    ຢູ່​ໃນ​ກອງ​ປະຊຸມ​ສັນຕິພາບ​ປາງ​ຫຼົງ ສະຕະວັດ​ທີ 21 ຄັ້ງ​ທີ 3 ນີ້ ແມ່ນ​ສຸມ​ໃສ່ ຈຸດ​ຕ່າງໆ​ທີ່​ຍັງ​ເຫຼືອ ຊຶ່ງ​ພົວພັນ​ເຖິງ​ຂົງ​ເທດ​ການເມືອງ ເສດຖະກິດ-ສັງຄົມ ຄວາມ​ສະຫງົບ ທີ່​ດິນ ແລະ ສິ່ງແວດລ້ອມ​ທຳ​ມະ​ຊາດ ໂດຍ​ແມ່ນ​ຄະນະ​ກຳມະການ​ປະສົມ ກ່ຽວ​ກັບ​ການ​ເຈລະຈາ​ສັນຕິພາບ ຂອງ​ສະຫະພາບ (UPDJC) ນຳ​ສະເໜີ​ອອກ​ມາ ເພື່ອ​ເພີ່ມ​ເຕີມ​ໃຫ້​ແກ່​ຂໍ້​ຕົກລົງ NCA./

 

ຂ່າວທີ່ກ່ຽວຂ້ອງ