ສາມັນ​ຊົນ​ໃນ​ອາ​ຟະ​ກາ​ນິດ​ສະຖານ ເສຍ​ຊີວິດ​ເພີ່ມ​ຂຶ້ນ​ສູ່​ລະດັບ​ສ້າງ​ສະຖິຕິ

125 17 ກ.ກ. 2018 ຂ່າວຕ່າງປະເທດ
ສາມັນ​ຊົນ​ໃນ​ອາ​ຟະ​ກາ​ນິດ​ສະຖານ ເສຍ​ຊີວິດ​ເພີ່ມ​ຂຶ້ນ​ສູ່​ລະດັບ​ສ້າງ​ສະຖິຕິ

    ຄະນະ​ຊ່ວຍເຫຼືອ​ຂອງ​ສະຫະ​ປະຊາ​ຊາດ ຢູ່​ໃນ​ອາ​ຟະ​ກາ​ນິດ​ສະຖານ (UNAMA) ໄດ້​ປະກາດ ບົດ​ລາຍ​ງານ​ອອກ​ມາ​ເມື່ອ​ວັນ​ທີ 15 ກໍລະກົດ​ນີ້ ຊີ້​ອອກ​ວ່າ ສາມັນ​ຊົນ​ສືບຕໍ່​ເປັນ​ຜູ້ ໄດ້​ຮັບ​ເຄາະ​ຮ້າຍ ຕົ້ນຕໍ ຢູ່​ໃນ​ເຫດການ​ຮຸນ​ແຮງ​ທີ່​ເກີດ​ຂຶ້ນ​ຢູ່​ໃນ ອາ​ຟະ​ກາ​ນິດ​ສະຖານ.

    UNAMA ກຳນົດ​ຕົວ​ເລກ​ສາມັນ​ຊົນ​ເສຍ​ຊີວິດ ສູງ​ເປັນ​ການ​ສ້າງ​ສະຖິຕິ​ທີ່ 1.692 ຄົນ ຢູ່​ໃນ​ການ​ພິພາດ ແລະ​ການ​ໂຈມ​ຕີ​ກໍ່​ການ​ຮ້າຍ​ທີ່​ເກີດ​ຂຶ້ນ​ຢູ່​ໃນ​ອາ​ຟະ​ກາ​ນິດ​ສະຖານ ພາຍ​ໃນ​ເຄິ່ງ​ຕົ້ນ​ປີ 2018 ໃນ​ຂະນະ​ທີ່​ຈຳນວນ​ສາມັນ​ຊົນ​ທີ່​ໄດ້​​ຮັບ​ບາດເຈັບ​ຢູ່​ທີ່ 3.430 ຄົນ.

    ບົດ​ລາຍ​ງານ​ຂອງ UNAMA ລະບຸ​ວ່າ ການ​ນຳ​ໃຊ້​ອຸປະກອນ​ລະເບີດ​ທີ່​ຜະລິດ​ເອົາ​ເອງ (IEDs) ຢູ່​ໃນ​ການ​ວາງ​ລະເບີດ​ສະລະ​ຊີບ​ຫຼາຍ​ລາຍ ຫຼື​ຢູ່​ໃນ​ຮູບ​ການ​ໂຈມ​ຕີ​ອື່ນໆ ນັບ​ວ່າ ເປັນ​ສາເຫດ​ອັນ​ດັບ​ຕົ້ນ ທີ່​ເຮັດ​ໃຫ້​ສວາ​ມັນ​ຊົນ​ເສຍ​ຊີວິດ​ຈຳນວນ​ຫຼາຍ (ກວມ​ເອົາ​ເຖິງ 50%). ນອກຈາກ​ນັ້ນແລ້ວ ການ​ໂຈມ​ຕີ​ຢູ່​ເທິງ​ໜ້າດິນ ການ​ໂຈມ​ຕີ​ທີ່​ມີ​ການ​ວາງ​ເປົ້າ ການ​ປະຕິບັດ​ການ​ໂຈມ​ຕີ ທາງ​ອາກາດ ແລະ​ອື່ນໆ ກໍ​ເປັນ​ສາເຫດ​ເຮັດ​ໃຫ້​ເກີດ​ການ​ເສຍ​ຊີວິດ ແລະ​ບາດ​ເຈັບເປັນ​ຈຳນວນ​ຫຼາຍ ໃຫ້​ແກ່​ສາມັນ​ຊົນ.

    UNAMA ໄດ້​ຕິຕຽນ​ກຸ່ມ ຕາ​ລີ​ບັນ ແລະ​ກຸ່ມ​ປະກອບ​ອາວຸດ​ອື່ນໆ ວ່າ​ເປັນ​ຝ່າຍ ທີ່​ເຮັດ​ໃຫ້​ເກີດ​ມີ​ຜູ້​ເສຍ​ຊີວິດ ແລະ​ບາດເຈັບ 67% ໃຫ້​ແກ່​ສາມັນ​ຊົນ ໃນ​ຂະນະ​ທີ່​ກອງ​ກຳລັງ​ຮັກສາ ຄວາມ​ສະຫງົບ​ຂອງ​ອາ​ຟະ​ກາ​ນິດ​ສະຖານ ຕ້ອງ​ຮັບຜິດຊອບ​ຕໍ່ 20% ຂອງ​ຈຳນວນ​ກໍລະນີ​ບາດເຈັບ ລົ້ມ​ຕາຍ​ຂອງ​ສາມົນ​ຊົນ ໃນ​ສ່ວນ​ທີ່​ຍັງ​ເຫຼືອ.

    ສະຖິຕິ​ຂອງ​ສະຫະ​ປະຊາ​ຊາດ ໃຫ້​ຮູ້​ວ່າ ນັບ​ແຕ່​ເດືອນ​ມັງກອນ ປີ 2009 ເປັນຕົ້ນ​ມາ ມີ​ສາມັນ​ຊົນ​ເສຍ​ຊີວິດ 26.500 ກວ່າ​ຄົນ ແລະ ບາດເຈັບ​ເກືອບ 49.000 ຄົນ ຍ້ອນ​ການ​ປະ​ທະ​ກັນ ດ້ວຍ​ອາວຸດ​ຢູ່​ໃນ​ອາ​ຟະ​ກາ​ນິດ​ສະຖານ.

 

ຂ່າວທີ່ກ່ຽວຂ້ອງ