ຂ່າວຫຼ້າສຸດ

ສ ອາ​ເມ​ຣິ​ກາ ຍົກເລີກ​ຄຳ​ສັ່ງ​ຫ້າມ​ກັບ​ກຸ່ມ​ບໍລິສັດ ZTE

210 17 ກ.ກ. 2018 ຂ່າວຕ່າງປະເທດ
ສ ອາ​ເມ​ຣິ​ກາ ຍົກເລີກ​ຄຳ​ສັ່ງ​ຫ້າມ​ກັບ​ກຸ່ມ​ບໍລິສັດ ZTE

    ເມື່ອ​ວັນ​ທີ 13 ກໍລະກົດ​ທີ່​ຜ່ານ​ມາ ສ ອາ​ເມ​ຣິ​ກາ ໄດ້​ຍົກເລີກ​ຢ່າງ​ເປັນ​ທາງ​ການ ສຳລັບ​ຄຳ ສັ່ງ​ຫ້າມ​ຂາຍ​ຊອບ​ແວ ແລະ​ເຄື່ອງ​ອາ​ໄຫຼ່​ໃຫ້​ແກ່​ກຸ່ມ​ບໍລິສັດ​ໂທລະ​ຄົມມະນາຄົມ ZTE ຂອງ​ຈີນ ຊຶ່ງ​ເປັນ​ໜຶ່ງ​ໃນ​ຜູ້​ຜະລິດ​ອຸປະກອນ​ໂທລະ​ຄົມມະນາຄົມ​ລາຍ​ໃຫຍ່​ສຸດ​ຂອງ​ໂລກ​ນັ້ນ.

    ກະຊວງ​ການ​ຄ້າ​ຂອງ ສ ອາ​ເມ​ຣິ​ກາ ໃຫ້​ຮູ້​ວ່າ ກະຊວງ​ນີ້​ຈະ​ຍັງ​ຄົງ​ຕິດຕາມ​ກວດກາ ຕໍ່​ກຸ່ມ​ບໍລິສັດ ZTE ເພື່ອ​ສະກັດ​ກັ້ນ​ການ​ລະເມີດ ໃນ​ອະນາຄົດ ທີ່​ມີ​ຕໍ່​ຄຳ​ສັ່ງ​ປິດ​ລ້ອມ​ຂອງ ສ ອາ​ເມ​ຣິ​ກາ​ຕໍ່​ອີ​ຣານ ແລະ ​ສປປ ເກົາຫຼີ.

    ໃນ​ແຈ້ງ​ການ​ທີ່​ມີ​ອອກ​ມາ​ເມື່ອ​ວັນ​ທີ 11 ກໍລະກົດ​ນັ້ນ ກະຊວງ​ການ​ຄ້າ ສ ອາ​ເມ​ຣິ​ກາ ໃຫ້​ຮູ້​ວ່າ ZTE ໄດ້​ເຊັນ​ຂໍ້​ຕົກລົງ​ສະບັບ​ໜຶ່ງ​ກັບ ສ ອາ​ເມ​ຣິ​ກາ ຊຶ່ງ​ຕາມ​ນັ້ນແລ້ວ​ແມ່ນ ZTE ຍອມຮັບ​ຕໍ່​ການ ຈ່າຍ​ບ້ວງ “ເງິນ​ມັດ​ຈຳ” 400 ລ້ານ​ໂດ​ລາ​ສະຫະລັດ ໃນ​ກໍລະນີ​ທີ່​ກັບ​ມາ​ລະເມີດ​ມາດ​ຕະການ ປິດ​ລ້ອມ​ຂອງ ສ ອາ​ເມ​ຣິ​ກາ ໃນ​ອະນາຄົດ. ຕາມ​ຂໍ້​ຕົກລົງ​ນີ້​ແລ້ວ ຫຼັງ​ຈາກ​ທີ່ ZTE ຈ່າຍ​ບ້ວງ​ເງິນ​ດັ່ງກ່າວ ສ ອາ​ເມ​ຣິ​ກາ​ກໍ​ຈະ​ຍົກເລີກ​ການ​ປິດ​ລ້ອມ​ທັນທີ ເປັນ​ການ​ເປີດ​ທາງ​ໃຫ້ ZTE  ເຊື່ອມ​ຕໍ່​ການເຄື່ອນໄຫວ​ບາງ​ລາຍການ​ທີ່​ສຳຄັນ.

    ການ​ຕົກລົງ​ກ່ຽວ​ກັບ​ເງິນ​ຄ່າ​ມັດ​ຈຳ​ດັ່ງກ່າວ ເປັນ​ສ່ວນ​ໜຶ່ງ​ໃນ​ຂໍ້​ຕົກລົງ​ຈັດ​ແຈງ ເປັນ​ມູນ​ຄ່າ 1,4 ຕື້​ໂດ​ລາ​ສະຫະລັດ ຊຶ່ງ ສ ອາ​ເມ​ຣິ​ກາ ແລະ​ ຈີນ ບັນລຸ​ໄດ້​ເມື່ອ​ວັນ​ທີ 7 ມິຖຸນາ​ທີ່​ຜ່ານ​ມາ. ZTE ຕ້ອງ​ໄດ້​ງົດ​ການເຄື່ອນໄຫວ​ທຸລະ​ກິດ​ໃນ​ທົ່ວ​ໂລກ ຫຼັງ​ຈາກ​ທີ່​ເມື່ອ​ກາງ​ເດືອນ​ເດືອນ​ເມສາ​ທີ່​ຜ່ານ​ມາ ກະຊວງ​ການ​ຄ້າ ສ ອາ​ເມ​ຣິ​ກາ ໄດ້​ຫ້າມ​ບັນດາ​ບໍລິສັດ​ຂອງ ສ ອາ​ເມ​ຣິ​ກາ ຂາຍ​ຊອບ​ແວ ແລະ ອາ​ໄຫຼ່​ໃຫ້​ແກ່ ZTE  ເປັນ​ເວລາ​ເຈັດ​ປີ ຍ້ອນ​ວ່າ​ກັບ​ໄປ​ລະເມີດ​ຫຼາຍ​ເທື່ອ ຕໍ່​ມາດ​ຕະການ​ປິດ ລ້ອມ​ຂອງ ສ ອາ​ເມ​ຣິ​ກາ ທີ່​ມີ​ຕໍ່​ອີ​ຣານ ແລະ ​ສປປ ເກົາຫຼີ.

 

ຂ່າວທີ່ກ່ຽວຂ້ອງ