ເບີ່ງບ້ານເຂົາເອົາບົດຮຽນ 17/07/2018

95 17 ກ.ກ. 2018 ຫົວຂໍ້ຂ່າວອື່ນໆ

   ຜ່ານ​ຄໍ​ລຳ​ປະ­ຈຳ​ວັນ​ນີ້ ທ່ານ​ຈະ​ຮູ້​ກ່ຽວ​ກັບ​ຄະ­ດີ​ຄາ­ຕະ­ກຳ​ນັກ​ຮ້ອງ​ດັງ​ຢູ່ ຈີ​ເລ ໃນ​ປີ 1973 ແຕ່​ມາ​ຕັດ­ສິນ​ໃນ​ປັດຈຸ​ບັນ ເລື່ອງ​ການ​ອະ­ນຸ­ຍາດ​ພັກ​ອາ­ໄສ​ແບບ​ຖາ­ວອນ​ຢູ່​ມຽນ​ມາ ແລະ ເລື່ອງ​ການ​ປັບ­ປຸງ​ລະ­ບອບ​ການ​ດຳ­ເນີນ​ທຸ­ລະ​ກິດ​ໃຫ້​ງ່າຍ­ດາຍ​ຂຶ້ນ​ທີ່​ຫວຽດ­ນາມ.

   ທີ່ ຈີ​ເລ: ໜັງ­ສື­ພິມ ເດິ​ເນ​ເຊິນ (The Nation 05/07/2018) ໄດ້​ໃຫ້​ຮູ້​ວ່າ: ໃນ​ທີ່​ສຸດ​ຄວາມ​ຍຸ­ຕິ​ທຳ​ກໍ່​ໄດ້​ເລີ່ມ​ສ່ອງ​ແສງ​ອອກ​ມາ ເມື່ອ​ສານ​ຂອງ​ປະ­ເທດ​ຈີ​ເລ​ໄດ້​ຕັດ­ສິນ​ຈຳ​ຄຸກ​ອະ­ດີດ​ນາຍ​ທະ­ຫານ ຈຳ­ນວນ 8 ຄົນ ເປັນ​ເວ­ລາ 15 ປີ ກັບ 1 ວັນ ໃນ​ຄະ­ດີ​ສັງ­ຫານ​ນັກ​ຮ້ອງ​ຂວັນ​ໃຈ​ຂອງ​ປະ­ເທດ ຊື່ ວິກ​ຕໍ​ຮາ​ຣາ ໃນ​ເວ­ລາ​ນາຍ​ພົນ ປີ​ໂນ​ເຊ ເຮັດ​ລັດ­ຖະ­ປະ­ຫານ​ໂຄ່ນ​ລົ້ມ​ປະ­ທາ­ນາ­ທິ­ບໍ­ດີ ຊານ​ວາ​ດໍ ອາ​ເຢັນ​ເດ ໃນ​ວັນ​ທີ 11 ກັນ­ຍາ ປີ 1973.

   ການ​ລັດ­ຖະ­ປະ­ຫານ​ນອງ​ເລືອດ​ທີ່​ໄດ້​ຮັບ​ການ​ສະ­ໜັບ­ສະ­ໜູນ ​ຈາກ​ອົງ­ການ​ສືບ​ລັດ​ຖະ​ການ​ລັບ ຊີ​ໄອ​ເອ (CIA) ຄັ້ງ​ນັ້ນ​ໄດ້​ສັງ­ຫານ​ຊາວ​ຈີ​ເລ​ເປັນ​ຈຳ­ນວນ​ຫຼາຍ​ສິບ​ພັນ​ຄົນ ວິກ​ຕໍ​ຮາ​ຣາ ຕອນ​ນັ້ນ​ເປັນ​ນັກ​ຮ້ອງ​ເພື່ອ​ຊີ­ວິດ​ລະ­ດັບ​ດາວ​ຄ້າງ​ຟ້າ​ໃນ​ພາກ​ພື້ນ​ອາ​ເມ​ຣິ​ກາ​ໃຕ້ ແລະ ເປັນ​ຂວັນ​ໃຈ​ຂອງ​ຊາວ​ຈີ​ເລ ນັກ​ຮ້ອງ​ຄົນ​ນີ້​ເປັນ​ໜຶ່ງ​ໃນ​ຈຳ­ນວນ​ຊາວ​ຈີ​ເລ 5.000 ຄົນ ທີ່​ຖືກ​ປ້ອງ​ໄປ​ກັກ​ຂັງ​ໄວ້​ຢູ່​ສະ­ໜາມ​ກີ­ລາ​ແຫ່ງ​ຊາດ ທີ່​ນະ­ຄອນ­ຫຼວງ ຊານ​ຕີ​ອາ​ໂກ ແລະ ຕໍ່​ມາ​ຖືກ​ທໍ­ລະ­ມານ ແລະ ສັງ­ຫານ​ຢ່າງ​ປ່າ​ເຖື່ອນ.

   ຂ່າວ​ບອກ​ວ່າ: ສົບ​ຂອງ ວິກ​ຕໍ​ຮາ​ຣາ ຖືກ​ພົບ​ເຫັນ​ໃນ​ເວ­ລາ​ສອງ-ສາມ​ວັນ​ຕໍ່​ມາ ໂດຍ​ມີ​ຮ່ອງ­ຮອຍ​ຖືກ​ທໍ­ລະ­ມານ ແລະ ມີ​ຮອຍ​ກະ­ສຸນ ຈຳ­ນວນ 44 ລູກ ຢູ່​ຕາມ​ຮ່າງ­ກາຍ​ອະ­ດີດ​ນາຍ​ທະ­ຫານ​ທີ່​ໄດ້​ໃຊ້​ໜີ້​ເລືອດ​ດ້ວຍ​ການ​ໄປ​ນອນ​ຢູ່​ກົ້ນ​ຄຸກ​ຄັ້ງ​ນີ້ ເມື່ອ​ກ່ອນ (ໃນ​ປີ 1973) ມີ​ຍົດ​ແຕ່​ຮ້ອຍ​ໂທ ຫາ ພັນ​ເອກ.

   ທີ່ ມຽນ​ມາ: ມຽນ​ມາ​ມີ​ນະ­ໂຍ­ບາຍ​ດີໆ​ເພື່ອ​ດຶງ​ດູດ​ແຮງ​ງານ​ສີ­ມື ຊ່ຽວ­ຊານ ກໍ່​ຄື ນັກ​ລົງ­ທຶນ​ຕ່າງ­ປະ­ເທດ ເພື່ອ​ເຂົ້າ​ໄປ​ຮ່ວມ​ແຮງ​ຂັບ​ເຄື່ອນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ໂດຍ​ໄດ້​ເລີ່ມ​ຮັບ​ຄຳ​ຮ້ອງ​ຂອງ​ຊາວ​ຕ່າງ­ປະ­ເທດ ​ທີ່​ຕ້ອງ­ການ​ເຂົ້າ​ໄປ​ຢູ່​ເຄື່ອນ​ໄຫວ​ແບບ​ຖາ­ວອນ​ໃນ​ມຽນ​ມາ ນັບ​ແຕ່​ອາ­ທິດ​ທ້າຍ​ເດືອນ​ຕຸ­ລາ ປີ 2014 ເປັນ­ຕົ້ນ​ມາ.

   ນະ­ໂຍ­ບາຍ​ໃຫ້​ຊາວ​ຕ່າງ­ປະ­ເທດ​ເຂົ້າ​ໄປ​ພັກ​ອາ­ໄສ​ຢູ່​ປະ­ເທດ​ນັ້ນ​ມີ​ກຳ­ນົດ 5 ປີ ແລະ ສາ­ມາດ​ຕໍ່​ໄດ້​ເປັນ​ແຕ່​ລະ​ໄລ­ຍະ 5 ປີ ໃນ​ການ​ຜັນ​ຂະຫຍາຍ​ນະ­ໂຍ­ບາຍ​ໃຫ້​ຊາວ​ຕ່າງ­ປະ­ເທດ​ພັກ​ອາໄສ​ແບບ​ຖາ­ວອນ​ຢູ່​ພາຍ​ໃນ​ປະ­ເທດ​ໄດ້​ນີ້ ທາງ​ການ​ມຽນ​ມາ​ໄດ້​ແຍກ​ຊາວ​ຕ່າງ­ປະ­ເທດ​ອອກ​ເປັນ​ສີ່​ປະ­ເພດ ຄື: ແຮງ​ງານ​ທີ່​ຊຳ­ນານ​ງານ ລວມ​ທັງ​ຊ່ຽວ­ຊານ ນັກ​ລົງ­ທຶນ ພົນ­ລະ­ເມືອງ​ມຽນ​ມາ​ທີ່​ຖື​ສັນ­ຊາດ​ອື່ນ ແລະ ຊາວ​ມຽນ​ມາ​ທີ່​ເກີດ​ຈາກ​ພໍ່ ຫຼື ແມ່​ທີ່​ແຕ່ງ­ດອງ​ກັບ​ຄົນ​ຕ່າງ­ປະ­ເທດ ມຽນ​ມາ​ບໍ່​ອະ­ນຸ­ຍາດ​ໃຫ້​ພົນ­ລະ­ເມືອງ​ຂອງ​ຕົນ​ຖືສອງ​ສັນ­ຊາດ ດັ່ງ­ນັ້ນ ຄົນ​ມຽນ​ມາ​ທີ່​ຖື​ສັນ­ຊາດ​ອື່ນໆ​ນັ້ນ ​ຈະ​ຖືກ​ຖື​ຄື​ກັບ​ຄົນ​ຕ່າງ­ປະ­ເທດ ໄດ້​ຮັບ​ນະ­ໂຍ­ບາຍ​ຕ່າງໆ​ຄື​ກັບ​ຄົນ​ຕ່າງ­ປະ­ເທດ ຖ້າ​ຢາກ​ໄດ້​ສິດ​ຄົບ​ຖ້ວນ​ຄື​ພົນ­ລະ­ເມືອງ​ມຽນ​ມາ​ ກໍ່​ຕ້ອງ​ປະ​ສັນ­ຊາດ​ອື່ນ​ກ່ອນ.

   ທີ່ ຫວຽດ­ນາມ: ມີ​ຂ່າວ​ອ່າວ​ເກົ່າ​ເກີດ​ຂຶ້ນ​ແຕ່​ທ້າຍ​ປີ 2016 ທີ່​ບອກ​ວ່າ ຫວຽດ­ນາມ​ໄດ້​ປັບ­ປຸງ​ລະ­ບົບ​ດຳ­ເນີນ​ທຸ­ລະ​ກິດ​ໃຫ້​ສະ­ດວກ​ສະ­ບາຍ​ງ່າຍ­ດາຍ​ຂຶ້ນ​ຢ່າງ​ຕໍ່​ເນື່ອງ ເຊັ່ນ: ໃນ​ປີ 2016 ຫວຽດ­ນາມ​ໄດ້​ຄອງ​ລະ­ດັບ 82 ຂອງ​ປະ­ເທດ​ທີ່ເອື້ອ​ອຳ­ນວຍ​ເງື່ອນ­ໄຂ​ສະ­ດວກ​ສະ­ບາຍ​ໃນ​ການດຳ­ເນີນ​ທຸ­ລະ​ກິດ ຈາກ​ທີ່​ເປັນ​ລະ­ດັບ​ທີ 91 ໃນ​ປີ 2015 ສະ­ຖິ­ຕິ​ນີ້​ໄດ້​ມາ​ຈາກ​ການ​ຈັດ​ລະ­ດັບ​ຂອງທະ­ນາ­ຄານ​ໂລກ ໃນ 190 ປະ­ເທດ​ທົ່ວ​ໂລກ ການຕີ​ລາ­ຄາ​ເພື່ອ​ຈັດ​ລະ­ດັບ​ນັ້ນ​ໄດ້​ເນັ້ນ​ຄວາມ​ສະດວກ​ສະ­ບາຍ​ໃນ 10 ຂະ­ແໜງ­ການ​ທຸ­ລະ​ກິດ​ໃນ​ປີ​ນັ້ນ ຫວຽດ­ນາມ​ໄດ້​ຮັບ​ຜົນ­ສຳ­ເລັດ​ໃນ​ຂົງ­ເຂດ​ການ​ປົກ​ປ້ອງ​ນັກ​ລົງ­ທຶນ​ຈາກ​ຊົນ​ກຸ່ມ​ນ້ອຍ ການ​ເສຍ​ພາ­ສີ ການ​ຄ້າ​ຕາມ​ຊາຍ​ແດນ ການ​ຊົມ­ໃຊ້​ໄຟ­ຟ້າ ແລະ ການ​ແກ້​ໄຂ​ບັນ­ຫາ​ທີ່​ຄົງ​ຄ້າງ​ດ້ວຍ​ລະ­ບຽບ​ກົດ­ໝາຍ.

ຂ່າວທີ່ກ່ຽວຂ້ອງ